Raturo thza Nyambi
2
Mweyo, owe o ratura muenthzoe munu, kwithsa edi wa ku i hamura. Inene mu kuratura muenthzoe munu waa ciratura othsinda inene waa ratura muenthzoe mwinu eyi o tenda nowe. 2 Tu na dimuka ci Nyambi kenge a ku ratura komu ku na roera anu awa a tenda enu yo kengeyo. 3 Uno honi ngeci waa ratura muenthzoe pa ku tenda enu yo kengeyo, owe honi ne waa anekera ci kenge wa ku para ku raturo thza Nyambi nji? 4 Nji waa shwahura thsihemo thsa Nyambi thsothsikuru nene, nothzui wenthzi, no kukwatamucima kwenthzi? Ene ko dimukire ci thsihemo thsa Nyambi thsaa ku twara ku kucera?5 Unone mukaci ko mukanayuva woe no mucima woe o kukana ku cera, waa ciungumekera humbithso thzoe. Inene diyuwa dyoanthzi wa Nyambi dyaa keya, ou thza ku hokoriwa raturo thzenthzi thzothziwawa. 6 Kenge a ku ratura munu no munu kokuthza ketenda yenthzi. 7 Kenge a ku pa mwoyo o diyere awa a ootera ku kwama yoiwa ko ku fotafota kutethzima no direma, mane no kukana ku fa. 8 Uno honi awa a di noñondi no kukana ku shupwera oshemwa, unone aa shupwera omango, Nyambi kenge a ku wa anthzipera no ku wa ratura. 9 Kenge kwa kwikara dikando dyodikuru no dikarara kwa munu yomuhe oyu tenda omango, ku tatekera Majuda mbeci honi Anukenge. 10 Unone kenge kwa kwikara kutethzima no direma no thsiyaro kowa a tenda yoiwa, ku tatekera Majuda mbeci honi Anukenge. 11 Inene Nyambi ka a wana mavwevwe.
12 Wahe awa na tende thsivi ko kupira murao kenge a ku fa ko kupira murao. Karo wahe awa na tende thsivi o kwa di mushi thzo murao kenge a ku raturiwa ko murao. 13 Inene kadi cingwa awa a teerera murao o ku u variwa awa a tendiwa owawawa pa meho a Nyambi, unone awa a u hengeka wodiyo a tendiwa owawawa. 14 Inene Anukenge, awo o kupira murao, ngeci awopo a tenda ko micima thzo eyi u na raerera murao, aekara no murao mu mwo, shaanga ci ka di no murao. 15 Aa monithsa ci eraerera yo murao i na ñoriwa mu micima thzo. Mumoneno wo nao waa pa ombangi, karo eanekera yo yaa wa retera ci a cinyenge nji ku wemanena. 16 Eyi kenge ya ku tendahara mu diyuwa edi a ku ratura Nyambi ka Krisitu Yesu etenda yanu yo ku mukunda, eci edi u amba Muthzimbu Ouwa ou ni rongithsa.
Majuda no Murao
17 Unone owe o cithsa ci o Mujuda waa citinga pa murao no ku cishangarera Nyambi. 18 O na dimuka eshima ya Nyambi no ku tawethza yoiwa nene, inene murao na u i ku rongithsa. 19 Waa tawa shemwa ci yowe o muendithsi o tupuputwa no mwethzi owa a di mu mirema. 20 O mukwakuronga wetomba no murongithsi wanuke, inene waa tawa ci murao wa Nyambi waa ku pa odimukero noshemwa yo ku yara.
21 Uno honi owe o na rongithsanga amweya ne, ine honi eyi o kanena ku cirongithsa othsinda? Owe o na honganga ci kadi o mu kwa kwithza, ine honi owe eyi o withzera? 22 Owe na ambanga ci kadi o mukwa ku rembeka, ine honi owe eyi o rembekera? Owe na thzimbi ekupuro, ine honi eyi o withzera enu yo mu matembere ayo? 23 Owe o na cishangara mukaci ko murao, unone waa shwahura Nyambi ko ku cora murao wenthzi. 24 Inene ku na ñoriwa mu Mañoro ci: “Anukenge aa yengwera dithzina dya Nyambi mukaci kenu amwe mwa Majuda.”
25 Ngeci waa hengeka murao, apo honi mukanda woe wa shemwa. Unone ngeci ko hengekire murao ne mukanda woe ne ine nga u ku kwathsa? 26 Mweyo, ngeci Munukenge aa hengeka eraerera yo murao wa Nyambi, ene Nyambi ne nga ka a mu shimbi ci wa ku thza ku mukanda nji? 27 Amwe mwa Majuda, kenge mwa ku raturiwa kwAnukenge, inene mwaa cora murao shaanga ci mu di nao, o ku ñoriwa, karo mwakwa ku thza ku mukanda. Unone awo Anukenge aa hengeka murao wa Nyambi shaanga ci ka thza ku mukanda.
28 Inene Mujuda shemwa po kadi cingwa oyu di Mujuda peuru, nji ci o mukanda o peuru o perama. 29 Dyombo, Mujuda shemwa po munu oyu di Mujuda mu kaci, pakuninga ci mukanda po thsinu thso mu mucima ko Mupepo kadi ko murao o ku ñoriwa. Munu o kengeyo kushangariwa kwenthzi po kadi kwanu unone kwa Nyambi.