Orurami wa Nyambi
3
Thsine ethsi thsi reta ci Majuda ekare ku rupara? Ene mukanda ne waa kwathsa thsimweya nji? 2 Ii, waa kwathsa mu makuñwa oahe. Inene, thso kutanga Majuda kuma a piwire maywi a Nyambi. 3 Ngeci amweya kukwo ka ruramine ne, ene kukana ku rurama kwo ne kenge nga ku retera Nyambi ci a rurama? 4 Dyombo! Shaanga ci anu wahe wekare akwakwangera, Nyambi aye po wa ku amba yoshemwa. Eci edi ku na ñoriwa ci:“Waa roera ku monahara owawa mweyi o amba,
ci eamba yoe ya ku ku endere nawa o ku thzekithsiwa.”
5 Unone ngeci omango wetu waa monaharithsa owawa wa Nyambi, apo honi ne tu ambe ngepi? Ene tu ambe ci Nyambi wa dipethso pa ku tu pa humbithso nji? (Naa amba ko muambero wanu.) 6 Dyombo, kadi kengeyo! Inene Nyambi nga kadi muwawa ne, ngepi nga a twethsa ku ratura kaye? 7 Unone ngeci kukana ku rurama kwange, kwaa kwathsa ku monaharithsa oshemwa no kutethzima kwa Nyambi, Nyambi ne ine nga a ni ratwera eci o thsivi? 8 Uno honi anu amweya ko ku fota ku twipithsa mathzina a amba ci kuma na tu amba ci: “Tu tendenu thsivi ci owa u keye!” Anu awa a amba enu yo kengeyo aa roera ku piwa humbithso.
Kwithsa munu o muwawa
9 Uno honi, atwe twa Majuda ne twaa pita anu amweya nji ngepi? Dyombo, kadi kengeyo! Na tu mi monithsa ci Majuda nAnukenge po wahe mofoci, wahe mushi thzokoro o thsivi a di. 10 Eci edi ku na ñoriwa ci:
“Kwithsa munu o muwawa, shaanga yofoci kwithsa.
11 Kwithsa o ku yuvithsithsa,
karo kwithsa oyu fotafota Nyambi.
12 Wahe na tundu kwa Nyambi,
wahe ka kwathsire thsimweya.
Kwithsa oyu tenda yoiwa,
kwithsa shaanga yofoci.”
13 “Midyu thzo thzaa cipitura eci thsidi thso ku yahama,
madimi o a neirera kwangera.”
“Miromo thzo thzaa amba yo kwipaa eci ohungu o diyoka.”
14 “Tunwa to tu na yara makuya no ndurungera.”
15 “Edyato yo ya ku yakamena ku kwipaa.
16 Kokuhe oku a thza, kwipa no makando yaa wa shupwera.
17 Karo ka dimukire dikuñwa dyo thsiyaro.”
18 “Ka yapire Nyambi.”
19 Uno honi tu na dimuka ci eyi i di mu murao yoihe, yaa ambera awa di mushi thzao ci kwa kwikara shaanga munu yofoci oyu wa ku hamura, no ku monithsa kaye kokahe ci ka di no murandu kwa Nyambi. 20 Inene kwithsa munu o kwikara o muwawa pa meho a Nyambi ketenda yo murao. Unone murao po waa tu dimukithsa thsivi thsetu.
Owawa ko Thsitawo
21 Uno honi, Nyambi na a tu monithsa dyo ku tendiwa owawawa pa meho enthzi. Kadi cingwa ko murao, shaanga ikare ci murao nakwakukethza a pire ombangi wedyo dikuñwa. 22 Nyambi aa tu tenda owawawa mukaci ko thsitawo thsetu kwa Yesu Krisitu. Eyi Nyambi aa i tenda kowa na tawa wahe. Kwithsa thsiano mu kaciko,
23 inene anu wahe na tende thsivi, mweyo, wahe na kwanga ku kuma ku kutethzima kwa Nyambi. 24 Unone ko thsipa thso kengekenge thso thsihemo thsenthzi, anu wahe aa twethsa ku piruka owawawa ka Krisitu Yesu oyu wa wa paturire.
25 Inene Yesu Krisitu po Nyambi wa mu hangurire ci na ekare thsiyambero thsevi konyinga wenthzi. Eyi yaa tamburiwa ko thsitawo. Nyambi wa tendire kengeyo ku monithsa owawa wenthzi, inene mu kucithzua mucima konyambi wenthzi wa thsiererire evi yowa a tendire thsivi ku kare. 26 Uno honi Nyambi aa monaharithsa owawa wenthzi ko thsino thsikati kwanu wahe ko ku tenda owawawa anu wevi awa a na tawa kwa Yesu.
27 Pa ine karo tu cishangarera? Kwithsa! Ko ku hengeka murao nji? Dyombo, unone ko thsitawo pohuma. 28 Inene twaa tawa ci shime ko thsitawo pohuma munu mbeci ekare o muwawa pa meho a Nyambi kadi ketenda yo murao. 29 Ene Nyambi ne Nyambi o Majuda pohuma nji? Ene kadi nAnukenge nawo Nyambi wo? Ii, nawo Nyambi wo, 30 pakuninga ci ku di Nyambi yofoci, oyu wa ku tenda anu ko thsitawo thso kwikara owawawa, ikare Majuda nji Anukenge. 31 Ene apo honi ne twaa monithsa ci twaa pwithsa murao ko thsitawo nji? Dyombo, ka tu u pwithsire unone twaa u tanarithsa.