Aburahama aa tendiwa o muwawa ko thsitawo
4
Wangu tu ambe ine keyi a wanine konu mukwathsañuru wetu Aburahama? 2 Ngeci Aburahama kuma a tendiwire o muwawa ketenda yenthzi, apo honi kenge nga a i cishangarera. Uno honi tumba a cishangara pa meho a Nyambi. 3 Inene Mañoro aa amba ci: “Aburahama wa tawire ya Nyambi, mweyo, mukaci ko thsitawo thsenthzi Nyambi wa mu varire ci muwawa.”4 Munu oyu na kwama, eyi a na horo ka i variwire ci thsipa, unone yaa variwa ci eyi a na wana pekwama yenthzi. 5 Uno honi o kukana ku kurupera ekwama, unone aa kurupera Nyambi oyu na tendanga owawa anu wevi, thsitawo thsenthzi thsaa variwa ci owawa. 6 Davida naye wa i ambire ou a ambire yo thsiyauthzi thso munu oyu a tara Nyambi ci muwawa ko kupira ekwama, ou a ambire ci:
7 “Akwa thsiyauthzi
awa na teteriwa mirandu thzo,
nowa na thsikiwera evi yo!
8 Wa thsiyauthzi munu
oyu a kana ku varera evi yenthzi Fumu.”
9 Ene ethsi thsiyauthzi ne thsakwa ku thza ku mukanda pohuma nji, nji mofoci kengeyo nakwakukana ku thza ku mukanda? Inene twaa amba ci thsitawo thsa Aburahama thsa mu reterire ci a variwe ci muwawa. 10 Eyi ne ngepi ya tendaharire? Ene kuma a variwire ci muwawa o ku shime ku thza ku mukanda nji, nji munyima thzo ku thza ku mukanda? Nedi kadi munyima thzo ku thza ku mukanda, unone o ku shime.
11 Kuma a tamburire thsimonithso thso mukanda kwikara thsitamba thsowawa ou a tamburire mukaci ko thsitawo thsenthzi o ku shime ku thza ku mukanda. Mweyo, Aburahama yodiyo tata owa na tawa kwa Nyambi wahe, karo Nyambi aa wa tambura ci a wawa shaanga ci ka thza ku mukanda. 12 Karo yodiyo tata owa a thza ku mukanda, kadi cingwa mukaci kokuthza kwo ku mukanda, unone mukaci ko ku yoya mwoyo o thsitawo o ku cipitura eci ou a yoyire tata wetu Aburahama o ku shime ku thza ku mukanda.
13 Nyambi ka a kumbwethzire Aburahama nanahokenthzi ku tambura kaye mukaci ko ku hengeka murao, unone nedi kowawa ou u na keyanga ko thsitawo. 14 Ngeci thsikumbwethzo thsa Nyambi po kenge thsa ku piwa pohuma awa a hengeka murao, apo honi thsitawo ka thsi kwathsire thsimweya, karo no thsikumbwethzo thsa Nyambi nga thsa kenge. 15 Inene murao waa reta oanthzi wa Nyambi, uno honi po kupira murao kwithsa ku cora murao.
16 Mweyo, thsikumbwethzo thsaa keya ko thsitawo ci thsikare thsipa thsa Nyambi. Ethsi thsipa thsaa piwa kwanahoka a Aburahama, kadi awa hengeka pohuma murao, unone nowa di no thsitawo eci thsa Aburahama, aye tata wetu twahe. 17 Eci edi ku na ñoriwa ci: “Ni na ku tende tata o matunga oangi.” Aye po tata wetu pa meho a Nyambi, oyu a tawire yenthzi, aye oyu pa mwoyo kwafu karo yodiyo wombire enu eyi ya pirireko.
18 Aburahama wa tawire no ku kurupera po kupira okurupero, ci ekare tata o matunga oangi, eci dyodi a i kumbwethziwire ci: “Kenge mbo wikara nanahoka owangi.” 19 Kuma ekarire no myaka thzo ku fota ku kwana dikumi dyo makumi, unone thsitawo thsenthzi ka thsa faraterire ou a anekerire yerama yenthzi eyi yekarire eci yo kufa mukaci ko ku kurupara nene, karo no munuwenthzi Sara kuma ekarire mvumi.
20 Aburahama ka a tamangerire mu thsitawo thsenthzi keyi a mu kumbwethzire Nyambi, unone wa tanarire mu thsitawo no ku pa Nyambi kutethzima. 21 Kuma a rakwire shemwa ci Nyambi kenge mba a tenda eyi a mu kumbwethzire. 22 Mweyo, Nyambi wa varire Aburahama ci muwawa mukaci ko thsitawo thsenthzi. 23 Unone ao maywi o ku amba ci: “O na variwa ci muwawa” ka a ñoriwerire aye pohuma yofoci, 24 unone kuma a ñoriwerire natwe kengeyo atwe tu variwa ci twawawa, atwe tu tawa ku kwenthzi oyu wa pindurire Yesu Fumu wetu kwafu. 25 Wa piwire ci epaiwe mukaci ko thsivi thsetu, karo wa pinduriwire kwafu ci tu tendiwe owawawa pa meho a Nyambi.