Kucitepatepa mu kereke
3
Andengenu, ka na twethsire ku amba nenu eci edi nga ni amba nanu awa di no Mupepo wa Nyambi. Unone na ambire nenu eci anu awa yoya mu nyama nji eci anu awa ninga ci shimbi ekarera tumbu mwa Krisitu. 2 Kuma na mi korerire ko mahwe, ka na mi pire edya yoikoro, inene nga ka mwa i twethsire. No thsino thsikati tumba mu i twethse, 3 inene ko ku endithsiwa mu endithsiwa kwicikumbwethza yerama. Pakuninga ci shimbi mwekarera no mbamba no mikwangarakanyi mu kaci kenu. Ene eyo ne ka i monithsire ci mwaa endithsiwa kwicikumbwethza yoimango yerama nji? Ene apo ka mu yoyire eci anu o kaye nji? 4 Ngeci yumweya ku kwenu aa amba ci: “Ame po naa shupwera Paulu,” oyu ci “Ame po naa shupwera Apolosi,” ene apo ne ka mu tendire eci anu o kaye nji?5 Apolosi ne thsine? Paulu ne thsine? Twangamba Nyambi pohuma awa mi kwathsire ku tawa Muthzimbu Ouwa. Munu no munu ku kwetu twa kwamine ekwama eyi twa piwire kwa Fumu. 6 Ame na kunine mbuto, Apolosi wa thzi hupaerire, unone Nyambi yo wa thzi kurithsire. 7 Mweyo, mukwakukuna no mukwakuhupaera kadi a kuru mu thsivaka. Thsothsikuru po ci Nyambi aa i kurithsa. 8 Mukwakukuna no mukwakuhupaera mofoci. Munu no munu kenge a ku tambura muyambo kokuthza kekwama eyi naa kwama. 9 Inene twaa kwamena pofoci na Nyambi. Yamwe mwa dikanda dya Nyambi karo mwa thsiumba thsa Nyambi.
10 Ko thsihemo thsa Nyambi ethsi na ni piwa, na ni kwama mushisho eci mukwakuumba o muñurungu, pano honi yumweya aa umbapo. Uno honi munu no munu aa roera ku mamera edi a umba apa pa mushisho. 11 Inene kwithsa oyu nga kwama mushisho wao shime ou tu di nao, aye Yesu Krisitu.
12 Ngeci munu aa umba apa pa mushisho ko gauda, silivera, mawe oakuru mu thsivaka, etondo, muhonyi nji mataka, 13 mu Diyuwa dyo Raturo mudiro kenge wa ku hokora mushovo wekwama yo munu no munu eyi a kwama. Kenge wa ku monithsa ngeci ekwama yo munu iwawa, inene mudiro kenge wa ku ereka ekwama yo munu no munu. 14 Ngeci ekwama yo munu ayopo i kana ku pya ku mudiro, oyo mukwakuumba kenge a ku tambura muyambo. 15 Unone ngeci ayopo i pya ku mudiro, oyo mukwakuumba kenge a ku yawa nene. Aye thsinda kenge a ku yoyithsiwa, unone eci oyu na para pohuma ku mudiro.
16 Ene ka mu dimukire ci yamwe mwa tembere thza Nyambi, karo ci no Mupepo wa Nyambi waa yoya mu mwenu? 17 Ngeci munu ayepo o wipithsa tembere thza Nyambi, Nyambi kenge a kwipithsa oya munu, inene tembere thza Nyambi po thzikenu, karo ethzo tembere po yamwe.
18 Mwa ciangera mwathsinda. Ngeci yumweya ku kwenu aa anekera ci munyanyami konyanyami o kano kaye, ekare thsitomba ci nga ekare o munyanyami shemwa. 19 Inene onyanyami o kano kaye po otomba mu meho a Nyambi. Eci edi ku na ñoriwa ci: “Aa kwecekanga owanyanyami mu dinyanyamena dyo.” 20 Karo ku na ñoriwa ci: “Fumu na dimuka ci eanekera yanyanyami po ya kenge.”