Ruthziho rwa epithsa kereke
5
Kwaa yuvahara ci ko ru di ruthziho mu kaci kenu, ro kuninga ci mane shaanga mahedeni tumba ru kwama. Kwaa yuvahara ci mukwerume aa rara na munu wa tata wenthzi. 2 Mane mwaa cishangara! Kadi mwaa roera ku dira makuano? Mukwerume o kengeyo a tundithsiwe mu kaci kenu.3 Inene shaanga ci ka ni di nenu kerama, nenu ni di mu mupepo. Pakuninga ci eci nenu ni di, ni na pa kare raturo poyu munu naa kwama enu yo kengeyo. 4 Ou mwa ku ciwana pofoci mu dithzina dya Fumu Yesu, name o ku ni di nenu mu mupepo, nokoro wa Fumu wetu Yesu o ku u diko, 5 munu o kengeyo mwa ku mu pe mu moko a Satana ci ecikumbwethza yoimango yerama yenthzi ya ku nongithsiwe, unone mupepo wenthzi wa ku yoyithsiwe mu diyuwa edi a ku keya Fumu Yesu.
6 Mununa wenu umango. Ene ka mu dimukire ci mamene oapu a tundurukithsa dikende dyodihe nji? 7 Mu tundithse mu mwenu mamene o kare ci mwikare dikende dyodipe dyo kukana ku umeriwa eci edi mu di shemwa. Inene Krisitu, aye Dinguana wetu o Paseka na epaiwa ku tendiwa thsiyambero. 8 Mweyo, tu kine thsidika thsetu, kadi ko dikende dyo kare dyo ku umeriwa no thsivi nomango, unone ko dikende dyo kupira mamene dyodikenu noshemwa.
9 Na mi ñorerire mu diñoro dyange ci mwa cipakerera nanu o ruthziho. 10 Uno honi ka na ambire yanu o kukana ku tawa awa a na tendanga ruthziho, nji rununa, nji o makupakupa, nji akwakurombera ekupuro. Apo shime ou nga mu thsia kano kaye mbeci nga mu kane ku cipakerera nanu o kengeyo. 11 Uno honi kuma na mi ñorerire ci mwa cipakerera no munu yomuhe oyu cithsa ci mukwakutawa unone aa tenda ruthziho, nji rununa, nji mukwakurombera ekupuro, nji o kwipithsa amweya mathzina, nji thsitakwa, nji o ku kupakupa anu amweya. Shaanga ku dya mwa dyano.