Taga koe Rɔmu saa tɔ
27
Anu to ka a hanige mɔ ni taga kulun banba tɔ Itali jamanɛ tɔ, anu ka Pɔlu nun gelemanɛ donu don sɔɔri kuŋɛ do bolo, a tɔgɔ Suliyusi, Rɔmu mansa banba la sɔɔri kuruŋɛ kuŋɛ do le.
2 Wo tɛmuɛ, kulun banba do min bɔɔta Adiramiti saa tɔ, a be tagala Asi duge sɔngɔ mafanna, mɔ bakkita wolo tɔ, mɔ ka tagamaŋɛ fɔlɔ. Arisitariki, Masedoni kaa min bɔɔta Tesaloniki saa tɔ, wo be mɔ tɛma.
3 Wo tabantaka, mɔ keta Sidɔn saa tɔ. Ɲɔ, Suliyusi ka kanunteya ma Pɔlu ye, a ka a sago sa a ni taga a kafuɲɔgɛnu bata alako anu ni a dankun.
4 Mɔ to bɔɔta ɲɔ, mɔ takkɛta Sipiri sure ba sɔngɔ dɔndɔ tɔ, bayi fɔɲɛ be a ɲamatelenden mɔ ma.
5 Ba min be Silisi nun Panfili dugenu kɛnna, mɔ to tɛgɛta wo tɔ, mɔ keta Mira, Lusi duge saa do le wo la.
6 Sɔɔri kuŋɛ ka kulun banba do taran ɲɔ, min bɔɔta Alɛsandiri saa tɔ, a be tagala Itali jamanɛ tɔ, a ka mɔ bakki wo tɔ.
7 Awa, tele siyama kɔtɔ kuluŋɛ la tagamaŋɛ be lanɛɛbiren, karahan mɔ keta Kinidi saa tabɛŋɛ tɔ. Fɔɲɛ to be mɔ ɲamɔren mɔ la tagamaŋɛ tɔ, mɔ bɔɔta Kirɛti sure sɔngɔ la, sure kuŋɛ tabɛŋɛ tɔ ka min tɔgɔ Salemoni.
8 Karahan mɔ be tanbila Kirɛti sure sɔngɔ la, han mɔ keta dula do tɔ min tɔgɔ Bakki da Ɲinma, wo be Lase saa dala le.
9 Awa, wagati siyama to bata tanbi han súŋɛ́ sale wagatea ɲan bata ban tanbila, wo tɛmuɛ ji kunma tagamaŋɛ bata ma mamakilan koe la, wo butɔ Pɔlu ka anu lasii, a ko:
10 «N biyasi makafuɲɔgɛnu, n ka a lɔn kɛ ji kunma tagamaŋɛ si naa ma le tɔɔrɛ nun kasara banba la, kote nun kuluŋɛ tun ma, anun wo mɔ nɛ tugun.»
11 Hali wolo mu, sɔɔri kuŋɛ laata kulun naborilá nun kulun tige la, ka tanbi Pɔlu tɛn kuma fɔreŋɛnu la.
12 Sama ban koe ɲan bɛlɛ wo bakki dala. Wolo mu, mɔgɔ banba sagoe le mu anu ni bɔɔ ɲɔ, alako tumado ka anu si nɔ kela Fenikisi saa tɔ, anu ni sama ma ɲɔ le. Kirɛti sure bakki da do le wo la, a be ɲamatelenden tele jige mafanna le ma.
13 Awa, fɔɲɔ lanma do to bɔɔta ka bɔɔ bolo ɲinma tɔ, anu ka a mira biyase si naa sɔnɔya le. Wo butɔ, anu ka hanga layɛlɛ, anu be tanbila Kirɛti sure kɛnna la.
14 Kɔnɔ wori a ma mɛ, fɔɲɔ bɛlɛŋɛ banba min tɔgɔ Erakilɔn, wo nata bɔɔ bɔɔla sure mafanna,
15 a ka kuluŋɛ tuntun han kuluŋɛ ɲan ma nɔ sɔtɔ fɔɲɛ ma. Wolo mu mɔ ka a to fɔɲɛ bolo.
16 Mɔ tagata ke suru lanmandeŋɛ do kɔma, a tɔgɔ Kuloda. Kulun lanma min mu malatangafeŋɛ la, min be kitiren kulun banba la, wo dita tagala; karahan mɔ nɔta a masɔtɔla.
17 Anu to ka wo layɛlɛ, anu mɛn ka kulun banba tɛma takiti jule la. Anu to be kilanden anu kana ke Sirite bɛnki kɔtɔnɛŋɛnu ma, anu ka bɛɛla lajigi, fɔɲɛ tota anu donila kɔtɛ.
18 Wo tabantaka, fɔɲɔ banba to be mɔ lamagala koola, anu fɔlɔta kote donu lafilila je tɔ.
19 A tele saba luŋɛ, anu ka kuluŋɛ miraŋɛ donu yati lafili anu yɛtɛ bole la.
20 Tele siyama be tanbila, tele nun loolenu bele yenna, wo bɛ fɔɲɛ sɛnbɛ be koloyaren tun han mɔ bɛ yigitɛgɛta ka a fɔla mɔ te naa kisi bitugun.
21 Awa, bɔɔla bima mɔgɔ bele dɔmɔre mala. Wo butɔ, Pɔlu naata sɔ anu tɛma, a ko: «N tagamanɲɔgɛnu, a bɛnta le nun wo ni n na kuma bita ka a fɔla wo mɔ kana bɔɔ Kirɛti sure tɔ. Wolo mu wo mɔ te kɛ tɔɔrɛ nun kasara sɔtɔ nun.
22 Hali wolo mu, n be wo lasiila kɔtɛ, wo ni limaniya, bayi hali mɔgɔ dɔndɔ nɛɛ te bɔɔ wo tɛma, fɔ kuluŋɛ le tun be kasarala.
23 Wo ni a lɔn, Ala min tɛŋɛ mu n na, n be min batula, wo la Maleka le sɔta n kɛnna, bi su tanbireŋɛ.
24 A ko n ma: ‹Pɔlu, i kana kilan! A fɛrɛ bele fɔ i ni sɔ le Rɔmu mansa banba ɲakɔtɔ. Ala mɛn si i tagamanɲɔgɛ bɛ nɛ tugun nakisi i fɛ!›
25 Wolo mu, n tagamanɲɔgɛnu, wo ni limaniya: n be laaren Ala la ka a fɔla a si ma le, iko a fɔta n ɲɛ ki min na.
26 Kɔnɔ a fɛrɛ bele fɔ kuluŋɛ ni tiɲa sure do tɔ.»
27 Tele tan nun naani kɔtɔ, wo bɛ fɔɲɛ be mɔ layilɛla Adiriya ba banba kunma, awa a tele tan nun naaniɲɔgɛ luŋɛ su tɛma kulun natagamannanu sogita ka a fɔla anu be sutuyala kɛnɛ do la.
28 Anu to ka ji sumanfeŋɛ lajigi, anu ka a taran a la luggɛ be kankeɲa mugan. Anu tagata ɲatɔ donden, anu mɛn ka a tasuman, anu ka kankeɲa tan nun loolu taran.
29 Anu to be kilanden ka anu te garin kurenu la, anu ka hanga naani lajigi kuluŋɛ kɔma la; a sɔgɔ be anu la han, ɲɔ ni kɛnɛ.
30 Wo tɛmuɛ, kulun natagamannanu be katala anu ni bori ka bɔɔ kulun banba tɔ; anu ka malatanga kulun lanma lajigi ba je tɔ, anu be a mala iko anu be diren hanga le lajigila kulun banba ɲatɔ tugun.
31 Kɔnɔ Pɔlu ka a fɔ sɔɔri kuŋɛ nun sɔɔrenu ye: «Ka kɛ mɔgɛnu ma to kulun banba butɔ, wole te nɔ kisila.»
32 Awa, sɔɔrenu ka kulun lanma julenu kuntu anu ka a laboe a ni taga.
33 Yannun ɲɔ ni kɛnɛ, Pɔlu ka anu bɛ madiya anu ni dɔmɛ dɔmɔ, a ko: «A tele tan nun naani le mu bi, wo be kɔnɔŋɛ mala ka to dɔmɔ dɔmɔbaliya tɔ, wo ma fenfen dɔmɔ.
34 Wolo mu, n be wo madiyala wo ni dɔmɔre ma, bayi wolo si wo dɛman wo latanga koe la. N ni a fɔ wo ye: hali wo kunsigi dɔndɔ te naa bɔɔ wo kuŋɛ tɔ.»
35 A to ka wo fɔ, a ka dɛgɛ jigan, a ka Ala tantu anu bɛ ɲala. A ka dɛgɛ kuntu, a ka a fɔlɔ dɔmɔla.
36 Anu bɛ juse makimata wo tɔ, ande yɛtɛ tugun ka dɔmɛ dɔmɔ.
37 Mɔle min bɛ labɛndeŋɛ be kuluŋɛ tɔ, mɔ kɔnte be tabɛnden mɔgɔ kɛmɛ fila mɔgɔ bi wɔrɔwila nun wɔɔrɔ le ma.
38 Dɔmɛ to ka anu bɛ fa, anu ka farin nafili ba je tɔ, alako kuluŋɛ ni fɛɛya.
39 Ɲɔ to kɛnɛta, anu bele wo duge talɔnden. Kɔnɔ anu ka dabon sale do yen anun barafue, wo butɔ anu ka a hanige anu ni kata kuluŋɛ ni ke ɲɔ.
40 Anu ka hanganu fulen ka anu laboe ba je tɔ, anu mɛn ka fɛɛyaa kiti julenu fulen, anu ka ɲatɔ bɛɛla layɛlɛ fɔɲɛ ye, anu be anu kun sɔla barafue mafanna ye.
41 Kɔnɔ anu keta ji kunda fila bɛndula ma, kuluŋɛ sigita bɛnke kunma. A ɲatɔ sigita a ɲinma la, a tota a te lamaga; a kute fɔlɔta makuntula mɔrɔŋɛ sɛnbɛ la.
42 Awa, sɔɔrenu dita le gelemanɛnu fagala, alako mɔgɔ yo kana je masa a ni bori.
43 Kɔnɔ a sɔgɔ be sɔɔri kuŋɛ la a ni Pɔlu lakisi, wolo mu a ka anu ladan anu kana anu sagoe ma. A ka yamɔre sa, minnu kusan je masala wonu fɔlɔ ni boe je ma, alako anu ni kɛnɛ masɔtɔ,
44 jɔnɔn tɔmanu ni bakku kebeŋɛnu ka wo ma kulun kuntenu la. Awa, mɔ bɛ keta kɛnɛ tɔ ɲɔgɔnna le, mɔ kisita.