Pɔlu la yɛtɛ kunma fɔɛ Agiripa ɲala
26
Awa, Agiripa ka a fɔ Pɔlu ye, a ko: «N bata i sago sa, i ni i tɛŋɛ ɲamakaran.» Pɔlu ka a bole tajigan, a fɔlɔta a yɛtɛ kunma fɔla,
2 a ko:
«Mansa Agiripa, n be sɛɛwaren koola, n ni n yɛtɛ labeya bi ile ɲala siɲɛre bɛ la Yahudenu be min bɛ fɔren n kunma.
3 I to be naamuŋɛ nun sɔsɔre bɛ lɔnden a ɲinma la min be mɔle Yahudenu bolo, wolo mu n bata i táran, i ni wakkilɛ i ni i tolomasɔ n kulɛ la.
4 Awa, n be ki min na bɔɔla n denden tɛmuɛ n bɔnsɛ tɛma Darisalamu saa butɔ bɔɔla a fɔlɛ, Yahude bɛ ka wo lɔn.
5 Anu ka n na ko lɔn bɔɔla fɔlɔ, anu si nɔ mala n seede la, ka a tagata taran anu sɔnta: Farisi jama minnu la diina sariyanu bɛlɛ ka tanbi doenu tɛŋɛ la, n mata wo mɔgɛ do le la.
6 Kɔtɛ, Ala ka lahire min jigan wo mɔ benbanu ye, n be sɔren yan n makiiti koe le la, bayi n be n yigi saren wo lahiri lakamali koe le la.
7 Mɔ bɔnsɔ tan nun fila be Ala batue tɔ wagate bɛ sue nun tele, anu be yigi saren anu ni wo lahire lakamalireŋɛ yen. Awa mansa, Yahudenu be n siɲɛren wo yige yati le la.
8 Iyoo, fen de wole Yahudenu te laa a la, ka a fɔla Ala si mɔgɔ fagareŋɛnu lawuli le?
9 Fɔlɔ nun, nde yɛtɛ ko, fɔ n ni kata kila bɛ la, n ni kɛlɛ tɛgɛ Isa Nasarɛti kaa ma.
10 N ka wolo ma Darisalamu: nde yɛtɛ wunde ka mɔgɔ saniyandeŋɛ siyama sa geele tɔ, sarika lakela kuntigenu sagoe tɔ; anu mɛn be anu fagala wagate min tɔ, nde tugun ka anu sago dii.
11 N tota anu ɲagankatala kawandi ma boŋɛnu bɛ tɔ, wagate yo wagate, n mɛn be anu karahanna, anu ni tana kuma fɔ. N na fatiya to tanbita a tɔ, n kitita anu ɲagankata koe la han jamanɛ donu saa butɔ.
12 Awa, lun do n be tagala wolo la Damasi saa tɔ. Sarika lakela kuntigenu ka anu la yamɔre nun pawa don n bolo.
13 Mansa Agiripa, mɔ be kila tɔ, tele be kunna, n ka malaŋɛ yen, a be bɔɔren saŋɛ tɔ, a malaŋɛ fisa tele tɛŋɛ ko. A be malanna nde nun n tagamanɲɔgɛnu lamiliŋɛ tɔ.
14 Mɔ bɛ boeta duge tɔ, n ka kumari kulɛ do mɔɛ, a be a fɔla n ɲɛ Hebure kuma tɔ, a ko: ‹Sɔlu, Sɔlu, i be kitiren n ɲagankata koe la fenna? I be nde len sɔsɔla! Wo butɔ, i be bɛlɛya sɔtɔla i fan de ye iko ningi tuura be a kɛn natugula ki min na a tige la lɔgɔ selundeŋɛ la.›
15 N ka a jaabi: ‹Marige, ɲɔmɔ le mu i la?› A ka a fɔ: ‹Isa le mu nde la, i be kitiren min ɲagankata koe la.
16 Wuli kɔtɛ, i ni sɔ i kɛŋɛnu kunma. N bɔɔta le i ma alako le n ni i ma n na walila nun n seede la, i ni a fɔ i ka n yen ki min na, anun n be naala minnu yitala i la.
17 N be i latangala Yahudenu nun sii gbɛtɛ mɔgɛnu ma, n be i kiila sii gbɛtɛ minnu ma kɔtɛ,
18 alako i ni anu ɲa laka, anu ni bɔɔ dibe tɔ ka to kɛnɛ tɔ, anu ni bɔɔ Sentanɛ la nɔɛ kɔtɔ, anu ni to Ala la mansabaya kɔtɔ. Wo butɔ, ka anu bata dɛnkɛnɛya n ma, anu si junubu kafare sɔtɔ le, anu mɛn si naa kɛɛ sɔtɔ le saniyanbaganu bɛ ɲaama.›
19 Mansa Agiripa, wo butɔ, Marige ka min yita n na bɔɔla saŋɛ tɔ, n ma wo sɔsɔ.
20 N ɲan ka kuma lake Damasi kaanu le fɔlɔ ma, wo kɔma n tagata Darisalamu nun Juda duge bɛ tɔ, n mɛn keta sii gbɛtɛ mɔgɛnu tugun ma, ka a fɔla anu ni tuubɛ ka anu yɛtɛ lasaagi Ala ma, anu wali ɲa mɛn ni a yita ka a fɔla anu bata tuubɛ.
21 Yahudenu ka n bita Ala batu bon banba butɔ wo surute le la, anu ka kila ɲini n faga koe la.
22 Kɔnɔ n to bata Ala la dɛmare sɔtɔ han bi, wolo be a maren n be tola a seedeɲɔgɔya bɔɔla dendeŋɛnu nun kayibanu ye. Nde bele fenfen fɔla, fɔ annabi Musa nun nabiyonmɛ doenu ka koe minnu na koe fɔ,
23 ka a fɔla Ala la mɔgɔ masubɛreŋɛ si naa tɔɔrɔ le, ale fɔlɔ si naa tawuli le fagabaganu tɛma, wo butɔ, a ni malakise malaŋɛ la ko lake Yahudenu nun sii gbɛtɛ mɔgɛnu ma.»
24 Awa, Pɔlu to be a fan kunma fɔla wo la, Fɛsitu ka a kulɛ mayɛlɛ, a ko: «Pɔlu, i be fatiyaren de! I la kitabu karaŋɛ banba bata ma i ye fatiya la.»
25 Kɔnɔ Pɔlu ka a jaabi: «Fɛsitu mansa ɲinma, n bele fatiyaren, n be tɔɲa nun hakkilimaya kuma le fɔla.
26 Mansa Agiripa be kɛ koenu lɔnden de, wolo mu n be kumala a ye limaniya la. N be laaren a la, kɛ koe hali dɔndɔ bele dogonden ale la, bayi anu ma ma dogon tɔ.
27 Mansa Agiripa, i bele laaren nabiyonmɛnu la kumanu la ba? N be a lɔnden, ka a fɔla i be laaren anu la.»
28 Agiripa ka a fɔ Pɔlu ye, a ko: «A banba bele toren, i ni n nalaa i ni n ma Isayanka la!»
29 Pɔlu ko: «I dɔrɔn ma, wole min bɛ be n kulɛ mɔɛla bi, ka a mata kɔtɛ la, ka wo ma a mata wagati do la, Ala mu a mala wo ni to iko nde, fɔ wo ni tanga kɛ jɔlɔnkɔŋɛ la ko tɔɔrɛ ma.»
30 Wo kɔma, Mansa Agiripa, nun dugu mansa Fɛsitu, nun Berinisi, anun minnu be sigiren ɲɔ, anu bɛ wulita anu bɔɔta.
31 Anu la bɔɔreŋɛ, anu be a fɔla ɲɔgɔn ye: «Kɛ kaye bele fenfen maren, a bɛnta a ni faga min na, ka wo ma a ni sa geele tɔ.»
32 Agiripa ka a fɔ Fɛsitu ye, a ko: «Ka kɛ kaye ma a fɔ nun a ni tanbi Rɔmu mansa banba bata, a si nɔ bolokala le nun.»