Filipi 1

Pɔlu la bataakɛ tagala Isayankanu ma minnu be Filipi

Kɔntɔri ma koe

Kɛ bataakɛ be fatanden nde Pɔlu nun Timote le la, minnu mu Isa Ala la mɔgɔ masubɛreŋɛ la jondeŋɛnu la. Mɔ bata wo kɔntɔn, Ala la mɔgɔ masubɛreŋɛ la saniyanbaganu bɛ minnu be Filipi, anun wo la diina ɲatɔsɔlanu nun wo dɛmannanu. 2 Wo mɔ Baaba Ala nun mɔ Marige Isa Ala la mɔgɔ masubɛreŋɛ ni hinnɛ nun jususa dii wo ma.

Pɔlu la Ala mataraŋɛ Filipi dɛnkɛnɛyabaganu ye

3 N tini n mira wole la ko la, n si n Marige Ala tantu le. 4 Tɛmuɛ bɛ, n be Ala mataraŋɛ min tɔ, n be a mataranna wo ye sɛɛwa le tɔ, 5 bayi wo mɔ be ɲɔgɔn na Ala la kibaru ɲinma lake koe la bɔɔla a fɔlɛ han kɔtɛ. 6 N be laaren a la, Ala min be wali ɲinma fɔlɔren wo tɛma, a be tola wolo tɔ han a ni a lakamali, a la mɔgɔ masubɛreŋɛ Isa be tanala lun min na.

7 Wo la ko to be toren n ɲɛ ɲɔgɔnna le, wolo kaɲin mɔ tɛma. Wo bɛ la ko ɲan be n juse tɔ. Ka n be geele tɔ le ba, ka n be Ala la kibaru ɲinma kunmakɛlɛ mala le ba kawande la n ni a mafatan mɔgɛnu ma minnu be n kɛnna, wo bɛ butɔ Ala si hinnɛ wo mɔ bɛ ma. 8 Iyon, Ala mu n seede la, n be wo bɛ kanuren iko Ala la mɔgɔ masubɛreŋɛ Isa to be kinikiniren wo ma.

9 Awa, n be Ala mataranna le wo ye, alako wo la kanunteya ni to yiriwala le, han ko lɔŋɛ anun hakkilimaya ni siya wo bolo a ɲinma la. 10 Wolo si a ma wo ni nɔ koenu fatanfasila ɲɔgɔn ye, minnu sɔdula kolo. Wo butɔ, wo juse ni beeya, malakɔrɔsi yo kana to wo ma Ala la mɔgɔ masubɛreŋɛ tana luŋɛ. 11 Wo lun, wo si a taran, Isa Ala mɔgɔ masubɛreŋɛ ka wo juse lafa ko matelendeŋɛnu la, alako Ala ni biliya sɔtɔ, a ni matɔgɔ.

Ala la kibaru ɲinma lasɔnɔya koe

12 N nɛɛnɛdɔndɔ diinalanu, n be diren wo ni a lɔn, ɲagankata min be n masɔtɔren, wo ɲan bata Ala la kibaru ɲinma lake koe lasɔnɔya, 13 han a bata beeya mansa la sɔɔrenu anun yan mɔgɛnu bɛ ma, n be geele tɔ Ala la mɔgɔ masubɛreŋɛ la ko le la. 14 N nɛɛnɛdɔndɛnu minnu be yan, anu siyama la limaniya be kunmasaren Marige la ko ma n na ɲagankata sabu la. Anu la suusɛ bata kunmasa Ala la kuma fɔ koe la.

15 Tɔɲa le mu, donu be Ala la mɔgɔ masubɛreŋɛ la ko kawande mala miila nun bɛsɛnkɔnnɛya le la. Kɔnɔ donu tugun be kawande mala jusu beeya le la. 16-17 Wonu be a mala kanunteya le la, bayi anu be a lɔnden aa n be sɔren kibaru ɲinma kunmakɛlɛ ma koe le la. Kɔnɔ wo bɛsɛnkɔnnɛntenu kan be Ala la mɔgɔ masubɛreŋɛ la ko kawande mala anu la ɲɔgɔn siinaya le la. Anu juse bele beeyaren. Anu hakkili be a ma aa anu si nɔ le do sala n na geele ɲagankata kunma. 18 Kɔnɔ fenfen ma wo la. Ka anu juse beeta, ka anu juse ma be, a mata kiyoki, anu be Ala la mɔgɔ masubɛreŋɛ la kuma lakela. Kɛ be mala sɛɛwa le la n ɲɛ. N na sɛɛwa ɲan si koloya le, 19 bayi n ka a lɔn koe minnu be n masɔtɔla, anu si ma n ɲɛ kise le la wo la Ala mataraŋɛ sabu la. Ala la mɔgɔ masubɛreŋɛ Isa hakkile tugun si n dɛman de.

20 Awa, n yili be min ma kɔtɛ, n te malu fenfen na. N ni limaniya kɔtɛ iko tɛmu tanbireŋɛnu, alako Ala la mɔgɔ masubɛreŋɛ ni kunnawule sɔtɔ n na simaya, ka wo ma n na faga sabu la. 21 N na dunuya tatɛgɛ butɔ, n si sɔ le Ala la mɔgɔ masubɛreŋɛ kɔma. N na faga kan be mala n ɲɛ geenɛ le la. 22 Kɔnɔ ka n be tola dunuya, n si nɔ wali ɲinma donu tugun mala. Awa kɔtɛ, wo ko filanu la ko tɔ, miniman kaɲin n ɲɛ? N ma a lɔn. 23 Wo kandula fila le be n masabaala ɲɔgɔn tɛma. A sɔgɔ be n na n ni bɔɔ yan, n ni taga Ala la mɔgɔ masubɛreŋɛ dula. Wo kaɲin ka tanbi koe bɛ la. 24 Kɔnɔ ka n be tola dunuya, wolo fisa wole ye. 25 N bata laa a la yati, n mɛn be tatola le wo bɛ ɲaama alako wo ni taga ɲatɔ dɛnkɛnɛya butɔ ka sɛɛwa sɔtɔ wo tɔ. 26 N tini saagi wo dula, wo be mamatɔgɛ min mala Ala la mɔgɔ masubɛreŋɛ Isa ye, wo mɛn si naa kunmasa le n na ko la.

Limaniya koe kibaru ɲinma la ko ma

27 Wo tagamanɲa ni bɛn Ala la mɔgɔ masubɛreŋɛ la kibaru ɲinma ma tun. Wolo si a ma, ka n be wo ɲaama ba, ka n bele wo ɲaama ba, n si nɔ le a lɔnna hakkili dɔndɔ le be wo ye, wo bɛ be katala dɛnkɛnɛya le la, dɛnkɛnɛya min be fatanden Ala la kibaru ɲinma la. 28 Wo butɔ, wo kana kilan wo kɛlɛlanu la. Wo la limaniya mu tɔnkuma le la, anu si halagi le. Wole tugun ni a lɔn wo si kisi le. Wo kise be fatanden Ala le la. 29 Iyon, Ala bata hinnɛ wo la kɛ ko fila bɛ la: wo la dɛnkɛnɛya la a la mɔgɔ masubɛreŋɛ ma, anun wo la tɔɔrɔ koe la a ye yati. 30 Wo ka a yen n be kata min mala, wo mɛn be a mɔɛla han bi n be a tɔ, wole tugun be wo kata yati le mala.