Pɔlu la bataakɛ fɔlɛ tagala Isayankanu ma minnu be Tesaloniki saa tɔ
Kɔntɔri ma koe
1
Bataakɛ le mu ka, a be fatanden nde Pɔlu, Silasi nun Timote le la, tagala wole Tesaloniki saa dɛnkɛnɛyabaga jama ma, minnu bata ma Baaba Ala nun a la mɔgɔ masubɛreŋɛ, Marige Isa tɛŋɛ la.⸂Ala nun a la mɔgɔ masubɛreŋɛ Isa⸃ ni hinnɛ nun jususa dii wo ma.
Ala tantu koe Tesaloniki kaanu la dɛnkɛnɛya la ko la
2 Wagate bɛ tɔ, mɔ be Ala tantula wo bɛ la ko la. Mɔ hakkile be wo ma mɔ la Ala mataraŋɛ tɔ tɛmuɛ bɛ. 3 Tɛmuɛ bɛ tɔ, mɔ hakkile to be wo la ko ma, mɔ be a fɔla wo mɔ Baaba Ala ye, mɔ be a tantula le wo la wale la min be fatanden wo la dɛnkɛnɛya la, anun wo be min maren kanunteya sabu la. Mɔ be a tantula le bayi wo be wo timiladiyaren wo yigi sɔ koe la Ala la mɔgɔ masubɛreŋɛ Marige Isa ma.
4 Wo butɔ, n nɛɛnɛdɔndɛnu, wole Ala kanunteŋɛnu, mɔ ka a lɔn aa Ala bata wo masubɛ. 5 Mɔ to be kibaru ɲinma lakela nun wo ma tɛmuɛ min tɔ, a ma ma da tɔ kuma tun de la. Mɔ be a maren dɛnkɛnɛya sabatireŋɛ yati le la, Ala Hakkili saniyandeŋɛ tugun ka sɛnbɛ dii mɔ la kibaru ɲinma kawandi koe ma. Mɔ be wo ɲaama tɛmuɛ min tɔ nun, wo ka a lɔn yati mɔ be tagamanna nun ki min na wo la ko la. 6 Awa, wo bata ma mɔ nun Marige ladegenná la, bayi wo ka Ala la kuma bita le sɛɛwa la, sɛɛwa min be fatanden Ala Hakkili saniyandeŋɛ la, hali wo to bata ɲagankata siyama sɔtɔ wo butɔ.
7 Wo bɛ butɔ, wole bata ma misale la dɛnkɛnɛyabaga bɛ ye minnu be Masedoni nun Akayi duge tɔ. 8 Marige la kuma bata malansan wole sabu la. A bele malansanden Masedoni nun Akayi dɔrɔn de, dula bɛ ɲan bata a lɔn wo be dɛnkɛnɛyaren Ala ma ki min na. Wo butɔ, hali mɔ ma fenfen fɔ wo la ko tɔ bitugun. 9 Mɔgɛ minnu bɛ be mɔ la ko ɲamakaranna, anu be a fɔla wo ka mɔ labɛn ki min na, wo mɛn bɔɔta kuyenu kɔma ki min na. Anu ko, aa wo ka wo ɲamatelen Ala ma, Ala min be baluren, Ala min na ko mu tɔɲa la, alako wo ni a batu, 10 wo mɛn ni gbataa a la den kayireŋɛ kɔnɔn koe la kabɔɔ saŋɛ tɔ, min mu Isa la. Ala ka a lawuli fagabaganu tɛma, ale Isa le be wo mɔ lakisila Ala la dumɛŋɛ ma, min be nala.