Pɔlu la wale Tesaloniki
2
N nɛɛnɛdɔndɛnu, wole yɛtɛ yati ka a lɔn ka a fɔla mɔ na koe wo dula, wo ma ma ko fufafu la. 2 Wo ka a lɔn mɔ to keta wo bata, wo ka a taran anu bata mɔ fɛɛya nun Filipi saa tɔ, anu bata mɔ tɔɔrɔ.a Kɔnɔ mɔ Marige Ala ka limaniya dii mɔ ma, mɔ ni mɔ hakkile sɔ a ma, alako mɔ ni naa wo kawandi Ala la kibaru ɲinma la, hali anu to be mɔ kɛlɛla nun han. 3 Mɔ la kawande bele fatanden foniya fɔ koe le la, ka wo ma hanige saniyanbale le la, anun janfanteya tugun na. 4 Ala to bata mɔ mafɛlɛ, a bata a la kibaru ɲinma taaku mɔ la mɔ ni a fɔ, wo butɔ, mɔ bele kumala le alako mɔ ni diya mɔgɛnu ye. Ade, mɔ be kumala alako mɔ la ko ni diya Ala le ye, min be wo mɔ jusu butɔ koenu fɛlɛla. 5 Wo ka a lɔn yati, Ala tugun mu a seede la, mɔ bele da diya kuma yo fɔren nun wo ye. Mɔ ma kawande ma le alako mɔ ni fondo sɔtɔ. 6 Mɔ ma mɔgɛnu la mamatɔgɛ le ɲini, a mata wole la ba, a mata mɔgɔ gbɛtɛnu la ba.7 Ala la mɔgɔ masubɛreŋɛ la kiilanu to mu mɔ la, mɔ si nɔ le mɔ la ko kote sigila wo kunma nun, kɔnɔ mɔ ma sɔn. Mɔ bata ma mɔgɔ diɲareŋɛnu la wole la ko la, iko konbira min be mɛnnila a la deŋɛnu ma. 8 Wo la ko mabɛlɛ mɔ ma nun koola han mɔ ka mɔ yɛtɛ yati dii wo ma, sala Ala la kibaru ɲinma kunma, mɔ ka wo kawandi min na, bayi wo ka a taran mɔ be wo kanuren de han. 9 Iyon, n nɛɛnɛdɔndɛnu, wo ni wo mira mɔ la wale ma anun mɔ ka bɛlɛya min sɔtɔ a butɔ. Mɔ be Ala la kibaru ɲinma kawandila nun wo ye tɛmuɛ min tɔ, mɔ wakkilɛta wale la sue nun tele alako mɔ la kote kana ma dodo tɛŋɛ la wo tɛma. 10 Mɔ tagamanta saniyaŋɛ nun teleŋɛ le la wole dɛnkɛnɛyabaganu la ko la, malakɔrɔsi yo bele mɔ ma. Wo bata ma wo koe seede la, wo nun Ala. 11 Wo ka a lɔn yati ka a fɔla mɔ be wo bɛ ye, iko baaba nun a la deŋɛnu be ki min na. Mɔ tota wo lalimaniyala, ka wo mamɔɔmɔ, 12 ka a fɔ wo ye a beeyareŋɛ la, wo tagamanɲa ni bɛn Ala ye, min be wo makeleren wo ni to a la mansaya niiniŋɛ nun a la nɔɔra kɔtɔ.
13 Wolo mu, mɔle tugun, mɔ be Ala lawali sala, bayi mɔ to ka wo kawandi Ala la kuma la, wo bele a bitaren de iko mɔgɛ kumari kulɛ, wo ka a bita le iko Ala la kuma. Iyon, a be fatanden Ala yati le la. Wo kuma sɛnbɛ le be walila wole dɛnkɛnɛyabaganu ɲaama. 14 Wo butɔ, n nɛɛnɛdɔndɛnu, wo bata ma Ala la dɛnkɛnɛyabaga jama ladegenná la, minnu bata dɛnkɛnɛya a la mɔgɔ masubɛreŋɛ Isa ma Juda duge tɔ. Bayi, anu bareŋɛnu Yahudenu ka anu tɔɔrɔ le, awa wole tugun, wo bareŋɛnu ka wo tɔɔrɔ ɲɔgɔnna le. 15 Ande Yahudenu le ka nabiyonmɛnu nun Marige Isa faga nun. Anu ka mɔle tugun ɲagankata mɔ la kawandi wale tɔ. Wo butɔ, anu la ko bele diyaren Ala ye, anu bata kɛlɛ tɛgɛ mɔgɛ bɛ ma. 16 Wo kɛlɛ tɛgɛ butɔ, anu be diren mɔ ɲamɔla mɔ kana sii gbɛtɛnu kawandi alako wonu ni kisi. Wo butɔ, anu be anu la junube minnu mala bɔɔla bima, anu be a kɔnte kunmasala han a ni tanbi a tɔ. Kɔnɔ, Ala la dumɛ bata anu bita.
Tesaloniki dɛnkɛnɛyabaga tayen koe
17 Awa n nɛɛnɛdɔndɛnu, mɔle kan, mɔ be yanfayaren wo la ɲa la yeŋɛ la wagatinden kɔtɔ, kɔnɔ mɔ hakkile kan tɔ, mɔ bele yanfayaren wo la. Wo sɔgɔ bata mɔ bita koola. Mɔ bata koe bɛ ma alako mɔ mɛn ni wo tayen. 18 Mɔ bata di tasaagila nun wo dula. Nde Pɔlu yati dita le n ni ke wo dula kunɲama siyama, kɔnɔ Sentanɛ le ka mɔ matɔɔrɔ. 19 Adun, Marige Isa na luŋɛ, mɔ ɲan hakkile be sɔla Ala ma ɲɔmɔ le la ko la wo lun? Mɔ be ɲagalinna ɲɔmɔ le la ko la? Mɔ be sɛɛwa nun kunnawule sɔtɔla ɲɔmɔ le la ko la? Kaa, wole ma ba? 20 Iyon, wole len be maren mɔ la kunnawule nun mɔ la sɛɛwa la.