Pɔlu la toe Malita sure tɔ
28
Mɔ la kisireŋɛ kɔma, mɔ ka a mɔɛ ka a fɔla wo sure tɔgɔ le Malita.
2 Awa, ɲɔ dugudeŋɛnu ka kanunteya banba yita mɔ la: anu ka mɔ bɛ madɛn ta banba kɛnna anu ka min nabita sange la ko la min bata fɔlɔ nala, anun kima la.
3 Pɔlu to ka lɔgɔ boliŋɛ balareŋɛ donu madɛn, a ka anu sa ta tɔ, tanbalunbe bɔɔta wuyeŋɛ la ko la, a kondota a bole la.
4 Wo dula dugudeŋɛnu to ka wo sabaafeŋɛ yen kondoren Pɔlu bole la, anu be a fɔla ɲɔgɔn ye: «Sikkɛ bele a tɔ, kɛ kaye mu mɔgɔ fagalá le la. Hali a to bata kisi ba tɔ, mɔ la batufeŋɛ Kiiti Salá te sɔn a ni balu.»
5 Kɔnɔ Pɔlu ka wo kaa lisan ta tɔ; fenfen koron ma a yen.
6 Ɲɔ kaanu yili be a ma a si yiti, ka wo ma a fagareŋɛ ni boe kisanna; kɔnɔ anu to ka a kɔnɔn han anu bele fenfen koron yenna a la, wo butɔ anu hakkile masarata, anu ko: «Mɔ la batufeŋɛ do le mu kɛ la!»
7 Awa, wo sure mansa, min tɔgɔ Pubiliyusi, a la duge be wo dula kɛnna. A ka mɔ labɛn, a ka mɔ yigiya a jusu ɲinma la tele saba kɔtɔ.
8 Wo ka a taran, Pubiliyusi baaba be saren, a bale be bandiren, salima tugun be gbaaren a la. Pɔlu tagata don a kunma, a ka Ala mataran, a ka a bolenu sa a kunma, a ka a lakendeya.
9 Kɛ to mata, sure tɔ bandibaga bɛ tugun tota nala, wonu tugun kendeyata.
10 Wo butɔ, anu ka mɔ biliya buuɲa banba la. A mɛn, mɔ bɔɔ tɛmuɛ ɲɔ, mɔ hajue be koe minnu ma, anu ka wonu dii mɔ ma.
Pɔlu ke koe Rɔmu saa tɔ
11 Mɔ to ka kari saba latanbi Malita sure tɔ, kuluŋɛ do min be bɔɔren nun Alɛsandiri saa tɔ, a ka sama latanbi wo sure tɔ, mɔ tagata wo tɔ. Kuye fila be malasɛren a ma tɔnkuma la, anu tɔgɔ Fɛrɛŋɛnu.
12 Mɔ tagata ke Sirakusi saa tɔ, mɔ ka tele saba ma ɲɔ.
13 Mɔ bɔɔta ɲɔ, mɔ ka ba da jokki han mɔ ka Regiyo saa masɔtɔ. Wo tabantaka bolo ɲinma fɔɲɛ tota bɔɔla. Wolo ka a ma, mɔ ka tele fila tagamaŋɛ ma han mɔ keta Pusɔlu saa tɔ.
14 Mɔ ka nɛɛnɛdɔndɛ diinaɲɔgɛ donu taran ɲɔ, anu ka mɔ madiya, mɔ ni tele wɔrɔwila ma anu fɛ. Awa, mɔ tanbita ɲɔgɔnna le tagala Rɔmu.
15 Mɔ nɛɛnɛdɔndɛ diinaɲɔgɛnu minnu be Rɔmu, wonu to ka mɔ la ko mɔɛ, anu nata mɔ labɛndula han ka min tɔgɔ Apiyusi Makite anun Yigiya bon saba. Pɔlu to ka anu yen, a ka limaniya sɔtɔ, a ka Ala lawali sa.
16 Mɔ la kereŋɛ Rɔmu, mansanu sɔnta Pɔlu ni to a dɔrɔn anun sɔɔri dɔndɔ min be a kantala.
Pɔlu to koe Rɔmu
17 Tele saba tanbi kɔma, Pɔlu ka ɲɔ Yahude kuntigenu makele. Anu to madɛnta, a ka a fɔ anu ye, a ko: «N bareŋɛnu, hali n to ma fenfen koron ma wo mɔ la jama la, ka wo ma wo mɔ benbanu la naamuŋɛnu la, n mata gelemanɛ la Darisalamu, n donta Rɔmu kaanu bolo.
18 Wonu to ka n na ko tefi, a sɔgɔ be anu la anu ni n boloka, bayi anu ma fenfen yen n na ko tɔ n bɛnta fagala min na.
19 Kɔnɔ Yahudenu to be sɔsɔre mala, a fɛrɛ bele fɔ n ni tanbi Rɔmu mansa banba bata. Kɔnɔ n bele diren n bɔnsɛ tɔɲɛgɛla feu.
20 Awa, n be wo makeleren kɛ surute le la, n ni wo yen ka kuma wo ye. Wo ni a lɔn mɔle bani Isirayila kaanu yige be saren min ma, wolo la ko be a maren n be kitiren kɛ jɔlɔnkɔŋɛ la.»
21 Anu ka a fɔ a ye: «Mɔ ma bataakɛ yo sɔtɔ i la ko tɔ bɔɔla Juda duge tɔ. Mɔ bareŋɛ hali dɔndɔ tugun ma ke yan a ni i la ko kiila koroŋɛ fɔ, ka wo ma, ka kuma fɔ i la ko tɔ a koroŋɛ la.
22 Kɔnɔ a sɔgɔ be mɔ la, mɔ ni i la mira lɔn, bayi mɔ ka a lɔn mɔgɛnu be sɔsɔre mala i la kɛ diina la ko la dula bɛ tɔ.»
23 Awa, anu ka lun dɔndɔ lakoti Pɔlu ye. Wo luŋɛ to keta, anu siyama tagata a ma a yigiya tɔ. A tota seedeɲɔgɔya bɔɔla kabɔɔ saguma han wura la, a be Ala la mansabaya la ko ɲatabɔla anu ye. Wo butɔ, a be katala a ni anu lalaa ka a fɔla Isa yati le mu Ala la mɔgɔ masubɛreŋɛ la, Taureta Musa nun nabiyonmɛnu la kitabuenu sabu la.
24 A ka donu lalaa anu tɔ a la kuma fɔreŋɛ la, kɔnɔ donu ma dɛnkɛnɛya.
25 Anu fatan wagate, anu bele bɛnden ɲɔgɔn ma. Wo butɔ, Pɔlu ka kɛ kuma dɔndɛ fɔ anu ye, a ko: «Ala Hakkili saniyandeŋɛ kumata le wo benbanu ye tɔɲa la, annabi Esayi sabu la, a ko:
26 ‹Taga kɛ jama dula, i ni a fɔ anu ye:
wo si a mɔɛ han wo si a mɔɛ, kɔnɔ wo te fenfen fahamu.
Wo si a fɛlɛ han wo si a fɛlɛ, kɔnɔ wo te fenfen yen.
27 Iyon, kɛ mɔgɛnu hakkile bata bɛlɛya,
anu tolenu bata dese,
anu bata anu ɲanu tagun,
alako anu kana a yen anu ɲanu la,
anu kana a mɔɛ anu tolenu la,
ka fahamu sɔtɔ anu hakkile tɔ,
han anu kana anu yɛtɛ lasaagi n ma tugun,
alako n kana anu lakendeya.›a»
28 Pɔlu mɛn ko: «Wolo mu wo ni a lɔn, Ala la kɛ malakise kibare bata lasanba sii gbɛtɛ mɔgɛnu le ma; wonu kan si a mɔɛ le.» ⸂
29 A to banta kɛ fɔla, Yahudenu bɔɔta, anu be ɲɔgɔn masɔsɔla koola.⸃