Isa sɔtɔ tɛmuɛ
2
Awa, wo tɛmuɛ le, Rɔmu mansa banba Ogusiti ka yamɔre sa, a la jamanɛ mɔgɛ bɛ tɔgɛ ni sɛbɛ.
2 Wo tɔgɔ sɛbɛ fɔlɛ mata wagate min tɔ, wo ka a taran Kirinisi le mu Siri jamanɛ kuŋɛ laa.
3 Awa, mɔgɛ bɛ tagata a sɔtɔ saa tɔ, a tɔgɔ sɛbɛ koe la.
4 Wo butɔ, Yusufu tugun bɔɔta Nasarɛti saa tɔ, saa min be Galile duge tɔ, a ni taga han Dauda la saa tɔ ka min tɔgɔ Betilɛmu, Juda duge tɔ, bayi ale mu mansa Dauda bɔnsɛ nun a juruya le la.
5 A nun Mariyama tagata, anu tɔgɔ sɛbɛdula, a be min futula. Wo ka a taran, Mariyama be bue fɛ.
6 Awa, anu be wagate min tɔ Betilɛmu, Mariyama den sɔtɔ kare kamalita.
7 A kanata a la den kayiren fɔlɛ la. A ka kuta mamilin bɔɔbɛ ma, a ka a sa kolofeŋɛnu la dɔmɔ safeŋɛ butɔ, bayi anu be yigiyaren boŋɛ min tɔ anu ma dula sɔtɔ ɲɔ.
8 Wo tɛmuɛ, kolofen kantala donu be Betilɛmu la miliŋɛ tɔ. Anu be ɲagama butɔ, anu be anu la kolofeŋɛnu kantala sue tɔ.
9 Marige Alatala la maleka do nata anu ma kisanna. Marige Alatala la nɔɔra ka anu la miliŋɛ lamalan, anu kilanta koola.
10 Kɔnɔ maleka ka a fɔ anu ye, a ko: «Wo kana kilan! Wo tolomasɔ, n be kibaru ɲinma le fɔla wo ye, min si ma kɛ jamanɛ mɔgɛ bɛ ye sɛɛwa banba la:
11 malakisila bata sɔtɔ wo ye bi, mansa Dauda la saa tɔ. Ale le mu Ala la mɔgɔ masubɛreŋɛ la, mɔ Marige.
12 A seede mu min na: ka wo tagata wo si bɔɔbɛ taran saren kolofeŋɛnu la dɔmɔ safeŋɛ butɔ, kuta be mamilinden a ma.»
13 Wo dula tɔ ɲɔ kisanna, maleka jama bɔɔta saŋɛ tɔ ka na sa maleka fɔlɔnɛŋɛ kunma. Anu bɛ tota Ala tantula kɛ kuma la:
14 «Tantue be Ala ye saŋɛ tɔ.
Jususa be mɔgɛnu ye duge tɔ,
minnu la ko be diyaren Ala ye.»
15 Awa, malekanu to bɔɔta anu kunma saagi koe la saŋɛ tɔ, kolofen kantalanu tota a fɔla ɲɔgɔn ye: «Wo mɔ ke Betilɛmu. Marige Alatala bata kuma min nake mɔ ma, mɔ ni taga wo koe lasaga min mata.»
16 Anu tagata teriya la, anu ka Mariyama nun Yusufu yen, anu ka bɔɔbɛ tugun yen saren ale dɔmɔ safeŋɛ butɔ.
17 Anu ka a yen wagate min tɔ, kuma min fɔta anu ye, wo bɔɔbɛ la ko tɔ, anu ka a lake mɔgɛnu ma.
18 Minnu ka kolofen kantalanu la kuma mɔɛ, anu bɛ kaabɛta wo la.
19 Mariyama kan be kɛ kumanu bɛ mandiren a juse tɔ, a tota a mirala a hakkile tɔ.
20 Kolofen kantalanu saagita. Anu ka min bɛ mɔɛ, anun anu ka min bɛ yen, anu be Ala matɔgɔla wolo la, anu be a tantula. A fɔta anu ye ki min na, anu ka a taran ɲɔgɔnna le.
Isa to koe Ala bolo
21 Bɔɔbɛ la sɔtɛ tele sagin luŋɛ to kamalita, a bɛnta a ni sunna lun min na, anu ka a tɔgɔ sa Isa, maleka ka tɔgɛ min fɔ a nɛɛnɛ ye yannun a ni a bue jigan.
22 A bɛnta anu ni saniyan wagate min tɔ, iko Taureta Musa be a fɔren ki min na, wo tɛmuɛ to keta, Yusufu nun Mariyama ka bɔɔbɛ doni Darisalamu, a to koe la Marige Alatala bolo.
23 Anu ka a ma iko a be sɛbɛren Taureta tɔ ki min na, a ko: Muse la den kayiren fɔlɛ, wo ni wo deŋɛ to Marige Alatala bolo.b
24 Marige Alatala la sariya mɛn ko: Legetere fila ni bɔɔ sarika la, ka wo ma, gabu den fila.c Mariyama nun Yusufu ka wo sarika tugun bɔɔ.
Simeyɔn nun Anna
25 Wo ka a taran, kaye do be nun Darisalamu min tɔgɔ Simeyɔn. Wo kaye telenta, a mu Ala ɲala kilanna le la. A be bani Isirayila mɔgɛnu la jusu makimala kɔnɔnden. Ala Hakkili saniyandeŋɛ be a fɛ.
26 A bata lalɔn Ala Hakkili saniyandeŋɛ bolo, ka a fɔla, a te faga fanni a ma Marige Alatala la mɔgɔ masubɛreŋɛ yen.
27 Ala Hakkili saniyandeŋɛ ka a doni Ala batu bon banba tɔ. Isa tigenu ka bɔɔbɛ doni wagate min tɔ, anu ni sariya lakamali a ye,
28 Simeyɔn tugun ka Isa labita, a ka a wundɛ a jusukuŋɛ ma. A ka Ala tantu, a ko:
29 «Kɔtɛ, n Marige, i bata nde i la joŋɛ boloka,
n ni taga jususa butɔ,
bayi i ka lahire min jigan, a bata kamali:
30 N bata i la malakisilá yen n ɲa la,
31 i ka min tabɛn dunuya see bɛ ni a yen.
32 Kɛ malakisila si ma lanpue la
min si dunuya see bɛ labɔɔ dibe tɔ.
A si ma nɔɔra la
i la bani Isirayila mɔgɛnu ye.d»
33 Koe minnu fɔta bɔɔbɛ la ko tɔ, wo ka Yusufu nun a nɛɛnɛ makaabɛ.
34 Simeyɔn dubata anu ye, wo kɔma a ka a fɔ Isa nɛɛnɛ Mariyama ye, a ko: «A fɛlɛ, Ala bata a laɲini, bani Isirayila mɔgɛnu tɛma, kɛ deŋɛ la ko si mɔgɔ siyama laboe, a ni a siyama tugun mayɛlɛ. A si naa ma Ala seede la, mɔgɔ siyama te sɔn a la ko ma.
35 Wolo si a ma iko mira minnu be mɔgɔ siyama juse tɔ, wonu ni bɔɔ kɛnɛ tɔ. Ile tugun Mariyama, ko dumɛndeŋɛ si naa i masɔtɔ ɲa tɔ min si i tɔɔrɔ i juse tɔ. A si to iko fan kayanma tini i sɔgɔ.»
36 Awa, muse walue do tugun be nun, a tɔgɔ Anna. A mu Fanuyɛli la den musereŋɛ le la. A be bɔɔren Aseri bɔnsɛ le tɔ, a bata kɔtɔya koola. A sunkutun tɛmuɛ, a sigita a la kaye ye san wɔrɔwila, kaye fagata.
37 A la kaye la faga kɔma, a ka a la furuɲaya wali, a tota a fan tabitaren a ma sigi kaye yo ye bitugun han a la simaya ka san bisagin nun naani sɔtɔ. A bele fatanna Ala batu bon banba la, a be Ala batula sue nun tele, súŋɛ́ nun mamataraŋɛ la.
38 Awa, wo tɛmuɛ le, Anna nata ke ɲɔ, ale tugun ka Ala la wali sa. Min bɛ be Darisalamu mɔgɛnu kunka koe kɔnɔnden, a tota Isa la ko fɔla wonu ye.
Sagi koe la Nasarɛti
39 Yusufu nun Mariyama ka Marige Alatala la sariya bɛ ban mala wagate min tɔ, anu saagita anu bata saa tɔ, Nasarɛti, Galile duge tɔ.
40 Isa be koloyala ɲɔ, a be sɛnbɛ sɔtɔla, a hakkile be koloyala. Ala la nɛɛma be a ye.
Isa la taga Ala batu bon banba tɔ
41 San yo san, Isa tigenu si taga Darisalamu, Hɔrɔya Sale tɔ.
42 Isa la sɔtɛ ka san tan nun fila bɔɔ san min na, ale tugun tagata sale tɔ, a nun a tigenu, iko anu darita a la ki min na.
43 Sale la bandeŋɛ kɔma, anu be saagila wagate min tɔ, Isa dendeŋɛ tota Darisalamu, kɔnɔ a tigenu ma wo lɔn.
44 Anu ka a mira, a be anu biyasiɲɔgɛnu tɛma. Anu ka tele dɔndɔ tagamaŋɛ ma, anu tota a ɲinila anu bareŋɛnu nun anu lɔnbaganu tɛma.
45 Kɔnɔ anu to ma a yen, anu saagita Darisalamu anu tota a ɲinila.
46 Awa, a tele saba luŋɛ, anu ka a taran sigiren karamɔgɛnu tɛma, Ala batu bon banba butɔ, a be a tolomasɔla anu la, a be anu maɲininkala.
47 Min bɛ be a kulɛ mɔɛla, anu kaabɛta a la hakkilimaya nun a la jaabirenu ma.
48 A tigenu ka a yen wagate min tɔ, anu kaabɛta koola. A nɛɛnɛ ka a fɔ a ye, a ko: «N na den, i ka kɛ ma mɔ la fenna? I ma a yen, mɔ nun i baaba bata i ɲini, mɔ bata hanmɛ i la ko la.»
49 A ka a fɔ anu ye, a ko: «Wo be n ɲinila fenna? Wo ma a lɔn ba, a fɛrɛ bele fɔ n ni to n Baaba la boŋɛ tɔ le?»
50 Kɔnɔ a ka kuma min fɔ anu ye, anu ma a kɔtɔ lɔn.
51 Wo kɔma, a nun a tigenu jigita Nasarɛti. A be anu kulɛ bitaren. A nɛɛnɛ be wo koe bɛ mandiren a juse tɔ.
52 Isa hakkile nun a bali bangue tota koloyala. A la ko tagata diyala Ala ye anun mɔgɛnu.