Luki 3

Yaya la kawande

Awa, Rɔmu mansa banba Tibɛri la mansaya san tan nun looluɲɔgɛ, wo ka a taran, Pɔnsu Pilati be maren Juda duge mansa la. Herodu tugun be maren Galile duge kuŋɛ la. A kɔtɔ Filipu be maren Itori duge nun Tirakonidi duge kuŋɛ la, Lisaniyasi be maren Abilɛni duge kuŋɛ la,

2 Hanasi nun Kayifa tugun be sarika lakela kuntigiya tɔ. Awa, wo tɛmuɛ le, Ala la kuma keta Jakariyawa la den kayireŋɛ Yaya ma janfue butɔ.

3 Wo kɔma, Yaya tagata kawande ma Yurudɛn kɔɛɛ fɛfɛnu bɛ tɔ. A ka mɔgɛnu waajɛ, a ko: «Wo ni tuubɛ, wo ni suwɛ je tɔ, alako Ala ni wo la junubenu kafari.»

4 Kuma bata kamali Yaya la ko tɔ min be sɛbɛren annabi Esayi tɛn kuma kitabue tɔ, a ko:

Do si naa a kulɛ mayɛlɛ le janfue butɔ, a ni a fɔ:

«Wo kila tabɛn Marige Alatala ye!

Wo ni kila lanmanu bɛ latelen a ye!»

5 Fole bɛ ni lafa.

Kɔnkɛ nun tenteŋɛ bɛ ni da lakanya.

Kandula dalindeŋɛnu ni latelen.

Kuru tɔ kila ni tabɛn anu ni nungu.

6 Ka wo mata, Adamadeŋɛ bɛ si naa malakisila yen de

Ala be min nasanbaren.^a

7 Awa, jama banba bɔɔta, anu nata Yaya ma a ni anu lasuwɛ je tɔ. A ka a fɔ anu ye: «Wole kaa bɔnsɛ, ɲɔmɔ le ka a fɔ wo ye wo si kisi Ala la kiite ɲatɔ min be nala?

8 Kɔtɛ, ka wo bata tuubɛ yati, wo ni wali ɲinmanu ma, minnu si wo yita, iko lɔgɔ ɲinma si den ɲinma wolo ki min na. Wo mu mɔ benba Iburahima bɔnsɛ le la, kɔnɔ wo kana laa wo tun na. N ni a fɔ wo ye, hali kɛ kurenu Ala si nɔ anu yɛlɛmanna a ni anu ma Iburahima la deŋɛnu la.

9 Awa, tɛgɛraŋɛ ɲan be saren lɔgɔ kute kɔtɔ, a tɛgɛ koe la. Lɔgɛ min bɛ te den ɲinma wolo, wonu si tɛgɛ anu ni lafili ta tɔ.»

10 Mɔgɛnu tota Yaya maɲininkala, anu ko: «Mɔ bɛnta mɔ ni fen ma wo butɔ?»

11 Yaya tota anu jaabila, a ko: «Ka doroke fila be min bolo i ni dɔndɛ dii a bele min bolo. Dɔmɔ tige, wo tugun ni mɔgɛ kɔ ɲɔgɔn na.»

12 Duuti makelelanu tugun nata anu lasuwɛ je tɔ, anu ka Yaya maɲininka: «Karamɔgɔ, mɔle bɛnta mɔ ni fen ma?»

13 A ka a fɔ anu ye, a ko: «Wo kana duute kunma sa. Ka mansa ka wo yamɔri min bere makele koe la, wo a to wo ma.»

14 Sɔɔre donu tugun nata a maɲininka, anu ko: «Mɔle go? Mɔ bɛnta fen mala?» A ka anu jaabi, a ko: «Wo kana mɔgɔ yo bolofeŋɛ bita nɔɛ la anun mamafuya la. Wo ni wo wasadon wo la sɔŋɛ ma.»

15 Mɔgɛnu be anu hakkile sɔren Yaya ma, anu be a miraren anu juse tɔ tumado Ala la mɔgɔ masubɛreŋɛ le mu a la.

16 Wo butɔ, Yaya ka a fɔ anu bɛ ye, a ko: «Nde be wo lasuwɛla je le tɔ, kɔnɔ do si na min sɛnbɛ kolo nde ko. Wo be wo lasuwɛla Ala Hakkili saniyandeŋɛ le la anun ta. Biliya bele n bolo, hali a la samatanu jule fulen koe la.

17 A be toren iko mɔgɛ min na fɛɛtɛ be bitaren a bole la feeri ma koe la, alako a ni fondo kole nun a dele lafatan, a ni fondo kole madɛn bontoŋɛ tɔ, kɔnɔ a si a foroŋɛ bɛ bintan ta la. Wo ta te dufen abada.»

18 Awa, Yaya be kawande siyama donu saren kɛnu kunma, a be Ala la kibaru ɲinma lakela jama ma ɲɔgɔnna le.

19 Herodu jamanɛ kuŋɛ ka ko koroŋɛ mɔɔle bɛ ma, han a ka a kɔtɔ la muse Herodiya bita a bolo, a ka a sigi. Herodu mɛn ka ko koroŋɛ min bɛ ma, wolo ka a ma, Yaya ka a lajarabi wo bɛ la.

20 Awa, Herodu ka a sa geele tɔ, a ka wo ko koron dɔndɛ tugun sa a la ko koroŋɛ doenu kunma.

Isa lasuwɛ koe je tɔ

21 Jama bɛ lasuwɛta je tɔ dɔndɔ dɔndɔ wagate min tɔ, Isa tugun nata lasuwɛdula. A to be Ala mataraŋɛ tɔ, saŋɛ lakata,

22 Ala Hakkili saniyandeŋɛ jigita a ma a kɛɲa be toren iko legetere. Kumari kulɛ tugun bɔɔta saŋɛ tɔ, a ko: «N na den kayireŋɛ le mu ile la, n be min makanuren. N be ɲagalinden ile la koola.»

Isa benbanu

23 Isa la sɔtɛ ka san bi saba ɲɔgɔn bɔɔ wagate min tɔ, a ka a la wale fɔlɔ. Mɔgɛnu be a miraren de a mu Yusufu la den kayireŋɛ le la. Yusufu mu Heli la den kayireŋɛ le la.

24 Heli mu Matati la den kayireŋɛ le la. Matati mu Lewi la den kayireŋɛ le la. Lewi mu Meleki la den kayireŋɛ le la. Meleki mu Yanayi la den kayireŋɛ le la. Yanayi mu Yusufu la den kayireŋɛ le la.

25 Yusufu mu Matatiyasi la den kayireŋɛ le la. Matatiyasi mu Amosi la den kayireŋɛ le la. Amosi mu Nahumi la den kayireŋɛ le la. Nahumi mu Eseli la den kayireŋɛ le la. Eseli mu Nagayi la den kayireŋɛ le la.

26 Nagayi mu Maati la den kayireŋɛ le la. Maati mu Matatiyasi la den kayireŋɛ le la. Matatiyasi mu Semeyin na den kayireŋɛ le la. Semeyin mu Joseki la den kayireŋɛ le la. Joseki mu Joda la den kayireŋɛ le la.

27 Joda mu Yohanan na den kayireŋɛ le la. Yohanan mu Resa la den kayireŋɛ le la. Resa mu Sorobabɛli la den kayireŋɛ le la. Sorobabɛli mu Salatiyɛli la den kayireŋɛ le la. Salatiyɛli mu Nɛri la den kayireŋɛ le la.

28 Nɛri mu Meleki la den kayireŋɛ le la. Meleki mu Adi la den kayireŋɛ le la. Adi mu Kosamu la den kayireŋɛ le la. Kosamu mu Elimadamu la den kayireŋɛ le la. Elimadamu mu Eri la den kayireŋɛ le la.

29 Eri mu Yesu la den kayireŋɛ le la. Yesu mu Elisɛri la den kayireŋɛ le la. Elisɛri mu Yorimu la den kayireŋɛ le la. Yorimu mu Matati la den kayireŋɛ le la. Matati mu Lewi la den kayireŋɛ le la.

30 Lewi mu Simeyɔn na den kayireŋɛ le la. Simeyɔn mu Juda la den kayireŋɛ le la. Juda mu Yusufu la den kayireŋɛ le la. Yusufu mu Yonamu la den kayireŋɛ le la. Yonamu mu Eliyakimu la den kayireŋɛ le la.

31 Eliyakimu mu Meleya la den kayireŋɛ le la. Meleya mu Menna la den kayireŋɛ le la. Menna mu Matata la den kayireŋɛ le la. Matata mu Natan na den kayireŋɛ le la. Natan mu Dauda la den kayireŋɛ le la.

32 Dauda mu Jese la den kayireŋɛ le la. Jese mu Obɛdi la den kayireŋɛ le la. Obɛdi mu Bɔsu la den kayireŋɛ le la. Bɔsu mu Salimu la den kayireŋɛ le la. Salimu mu Naasɔn na den kayireŋɛ le la.

33 Naasɔn mu Amunadabi la den kayireŋɛ le la. Amunadabi mu Adimin na den kayireŋɛ le la. Adimin mu Arani la den kayireŋɛ le la. Arani mu Esurɔn na den kayireŋɛ le la. Esurɔn mu Perɛsi la den kayireŋɛ le la. Perɛsi mu Juda la den kayireŋɛ le la.

34 Juda mu Yaguba la den kayireŋɛ le la. Yaguba mu Isiyaka la den kayireŋɛ le la. Isiyaka mu Iburahima la den kayireŋɛ le la. Iburahima mu Tera la den kayireŋɛ le la. Tera mu Nakɔri la den kayireŋɛ le la.

35 Nakɔri mu Seruki la den kayireŋɛ le la. Seruki mu Reyu la den kayireŋɛ le la. Reyu mu Pelegi la den kayireŋɛ le la. Pelegi mu Hebɛri la den kayireŋɛ le la. Hebɛri mu Sela la den kayireŋɛ le la.

36 Sela mu Kayinamu na den kayireŋɛ le la. Kayinamu mu Arafasadi la den kayireŋɛ le la. Arafasadi mu Sɛmi la den kayireŋɛ le la. Sɛmi mu Nuha la den kayireŋɛ le la. Nuha mu Lameki la den kayireŋɛ le la.

37 Lameki mu Matisalɛmu la den kayireŋɛ le la. Matisalɛmu mu Enoki la den kayireŋɛ le la. Enoki mu Yaredi la den kayireŋɛ le la. Yaredi mu Malaleyeli la den kayireŋɛ le la. Malaleyeli mu Kenani na den kayireŋɛ le la.

38 Kenani mu Enosi la den kayireŋɛ le la. Enosi mu Sɛti la den kayireŋɛ le la. Sɛti mu Adama la den kayireŋɛ le la, Adama mu Ala la den kayireŋɛ le la.