Ala la Isirayila jama lahɔrɔya koe
105
Wo Alatala batu, wo ni a matɔgɔ!
Wo ni dunuya bɔnsɛnu lalɔn a la ko belebelenu la a bata minnu ma.
2 Wo ni sige sa a ye, wo ni beete bɔɔ a ye,
wo ni wo mira a la kabanakoenu bɛ ma.
3 Wo ni sɛɛwa a tɔgɔ saniyandeŋɛ la.
Mɔgɛ minnu be Alatala ɲinila, ɲagaliŋɛ ni to anu juse tɔ.
4 Wo Alatala nun a sɛnbɛ ɲini,
wo ni to a ɲala tɛmuɛ bɛ.
5-6 Wole Iburahima bɔnsɛ, a la walilá;
wole Yaguba la deŋɛnu, a la mamasubɛreŋɛnu,
wo ni a la kabanakoenu talɔn;
a la wali belebelenu anun a bata kiite minnu sa a da la, wo mira wonu la.
7 Ale Alatala mu wo mɔ Marige Ala la,
a la kiitenu be tagamanna dunuya bɛ tɔ.
8 A be a hakkile toren a la lahire ma tɛmuɛ bɛ,
a be mɛnniren a la kuma tugun ma han bɔnsɔ wulu dɔndɔ.
9 A ka lahire min jigan Iburahima ye,
a mɛn ka a kali Isiyaka ye,
10 a bata wo nátá yita Yaguba tugun na,
a ni ma bani Isirayila ye abada lahire la,
11 a fɔ koe: «N bata Kanana duge dii i ma
a ni ma wo la kɛɛ la min dagɛta wo ye.»
12 Bani Isirayila benbanu ma siya nun,
anu dɔgɔ, anu be tola ɲɔ iko luntaŋɛ;
13 Anu be tagala sigila jamanɛ jamanɛ le,
ka bɔɔ mansa saa do tɔ, ka taga jama do dula.
14 Ala ma sɔn feu anu ni to mɔgɔ do la jonya kɔtɔ,
a ka mansa donu ɲagankata le anu la ko la.
15 A ka a fɔ: «Wo kana maga n na jama masubɛreŋɛ la de!
Wo kana ko koron ma n na nabiyonmɛnu la.»
16 A ka kɔnkɛ ladon jamanɛ la,
a ka anu balue sɔtɔ koe bɛ tiɲa.
17 A ka mɔgɛ do lataga anu ɲatɔ, min tɔgɔ Yusufu,
anu ka min mayita a jonya kii ma.
18 Anu ka a kɛŋɛnu balan nɛgɛ la,
anu ka jɔlɔnkɔŋɛ lajigi a kaŋɛ la.
19 A be wolo tɔ, han a la kuma be lakamalila tɛmuɛ min tɔ,
Alatala kulɛ be a layɛlɛla kɔrɔrɛ tɔ tɛmuɛ min tɔ.
20 Mansa ka yamɔre sa anu ni a boloka,
dugu tige ko, anu ni a fulen.
21 Wo mansa ka Yusufu ma a la boŋɛ kuŋɛ la,
a ni a harige bɛ yamɔri.
22 Alako a la gominɛnu ni to a sagoe tɔ,
duge kayibanu ni hakkile sɔtɔ ale sabue la.
23 Wo tanbi kɔma, bani Isirayila nata Misira,
ale Yaguba tagata ɲɔ, Hima la duge tɔ.
24 Ala ka a la jama ma den siyama sɔtɔlá la,
a ka anu sɛnbɛ lakoloya tanbi anu kɛlɛlanu la.
25 A ka Misira kaanu juse masara, anu ni a la jama kɔn,
anu ni a la joŋɛnu bita a koroŋɛ la.
26 Awa, a naata a la jondeŋɛ Musa kii,
anun Harona, a ka min masubɛ.
27 Wonu ka Ala la tɔnkuma siyama ma anu ɲala,
anu ka ko makabɛreŋɛnu le ma Hima duge tɔ.
28 Anu ma murutɛ Alatala la kuma la feu.
Wo butɔ, Ala ka dibe lajigi, banta finta diki,
29 A ka ɲɔ jenu masara base la,
a ka anu la yɛgɛnu bɛ faga.
30 A ka anu la duge lafa langansarimanu la,
han mansa la boŋɛnu bɛ butɔ.
31 A mɛn ka yamɔre dii, siisa da kunamanu bɔɔta,
taasenu tuguta duge bɛ la.
32 A ka sangi kure le lasanba, a ni ma anu ye sange la,
anun balamantaŋɛ, a tuguta duge bɛ la.
33 A ka anu la beere lɔgɛnu nun anu la toore lɔgɛnu tiɲa,
a ka lɔgɔ kutenu mafara wo duge tɔ.
34 Ala mɛn ka yamɔre dii, tugumɛnu nata
kɔnti bele min ma,
35 wonu ka ɲagama bɛ dɔmɔ wo duge tɔ
lɔgɔ wole bɛ minnu be ɲɔ duge tɔ, anu ka a bɛ dɔmɔ.
36 A ka den fɔlɛnu bɛ faga wo duge tɔ,
anu ka minnu sɔtɔ sɛnbɛ be anu la tɛmuɛ min tɔ.
37 A ka a la jama labɔɔ wo duge tɔ, kaalise nun sanuɛ be anu bolo,
hali mɔgɔ dɔndɔ ma surun kila la a la jama tɔ.
38 Misira kaanu sɛɛwata anu bɔɔ koe la,
bayi anu bata kilan nun bani Isirayila la.
39 A ka luuture lafonti, a ni a la jama mabutin.
Saŋɛ tɔ ta ni ɲɔ lakɛnɛ anu ye sue tɔ.
40 Anu to ka Ala mataran, a ka kɔnkɔlɛ sube lasanba,
a ka anu balu dɛgɛ tugun na, min be bɔɔren saŋɛ tɔ.
41 A ka fata laka, je bɔɔta,
a woyita wo janfu mabalareŋɛ tɔ iko kɔɛɛ.
42 Bayi a bata a mira lataga a la lahiri saniyandeŋɛ ma,
a ka min jigan a la jondeŋɛ Iburahima ye.
43 A ka a la jama labɔɔ anu be sɛɛwaren,
a la mɔgɔ masubɛreŋɛnu ni ɲagalin beete bɔɔ.
44 A ka sii donu la duge dii anu ma,
anu ka wo mɔgɛnu la wale munanfaŋɛ sɔtɔ,
45 alako anu ni anu hakkile to a la yamɔrenu ma,
ka a la sariyanu mɛnni.
Wo Alatala tantu!