Alatala kumari kulɛ
29
Dauda la beete do le ka.
Ee wole maleka sɛnbɛmanu,
wo biliya dii Alatala ma;
wo Alatala biliya, wo ni a sɛnbɛ talɔn!
2 Wo ni Alatala tɔgɔ biliyareŋɛ tantu;
Wo ni sujudu Alatala ye, a la nɔɔrɔ saniyandeŋɛ butɔ.
3 Alatala kumari kulɛ be jenu kunma;
ale biliya tige bata saŋɛ kulɛ labɔɔ.
Alatala be ji banbanu kunma.
4 Alatala kumari kulɛ sɛnbɛ kolo;
Alatala kumari kulɛ mamirinta.
5 Alatala kumari kulɛ be lɔgɔ kutu banbanu katila.
Iyon, Alatala be lɔgɔ kutu banbanu makatila minnu be Liban jamanɛ tɔ.
6 A ni a ma Liban kɔnkɛnu ni tun, iko ningi deŋɛnu;
Siriyon kɔnkɛ tugun ni tun, iko sɛgɛ ningi deŋɛnu.
7 Alatala kumari kulɛ be ta mɛlɛŋɛ malansanna.
8 Alatala kumari kulɛ sɛnbɛma be wula lasɛrɛnna;
Alatala be Kadesi wula ladinbila.
9 Alatala kumari kulɛ be minaŋɛ sɔla den sɔtɛ ma,
a be lɔgɔ kute boliŋɛnu bɔɔla a ma.
A la hɔrɔma dingira boŋɛ tɔ, bɛ be a fɔla
aa biliya be Alatala ye.
10 Alatala be majigiren a la mansa tintiŋɛ tɔ banbaraŋɛ na tɛmuɛ;
Alatala be majigiren a la mansa tintiŋɛ tɔ, a ni mansaya ma kudai.
11 Alatala le be sɛnbɛ diila a la mɔgɛnu ma;
Alatala le be hɛra mala anu ye jususa butɔ.