Ala be a la mɔgɛnu dankunna
28
Dauda tɛŋɛ.
Ee Alatala, n ka n kulɛ labɔɔ i ma.
Ile min mu n na fata la, i kana i tole bɔɔ n na kuma kɔtɔ.
Ka i ka i mɔdɛ n na,
n si to iko minnu bata jigi dinka butɔ.
2 Ka n ka n bolenu mayɛlɛ i la dula saniyandeŋɛ mafanna,
n ka n kulɛ labɔɔ i ma tɛmuɛ min tɔ,
i ni a lamɔɛ, i ni n na mamataraŋɛ jigan n ɲɛ.
3 I kana n sa mɔgɔ koroŋɛnu nun ko koron malanu ma.
Wonu be hɛra la ko fɔla anu sigiɲɔgɛnu ye, kɔnɔ ko koroŋɛ be anu juse tɔ.
4 I ni anu la walenu nun anu la ko koroŋɛ lasaagi anu ma.
I ni a ma anu la, iko anu la mare be ki min na.
Anu sɔŋɛ nun min si kan, i ni wo ma anu la.
5 Anu to ma Alatala la walenu dankun,
Alatala sɛnbɛ ka koe min ma,
wolo mu a si anu laboe anu te nɔ wulila bitugun.
6 Tantue be Alatala ye,
bayi a bata n na mamataran kulɛ mɔɛ.
7 Alatala le mu n sɛnbɛ nun n natangalá la;
n juse bata lannanteya sa a ma, n ka dɛmanná sɔtɔ.
Kɔtɛ, n juse be ɲagalinden koola,
n ni a tantu n na beete la.
8 Alatala le mu a la jama sɛnbɛ la;
a mata a la mɔgɔ masubɛreŋɛ makantalá la, alako wo tigi ni kisi.
9 Alatala, i ni i la mɔgɛnu lakisi, i ni barikɛ sa i la jama la ko tɔ;
i ni ma anu dankunná la, i ni anu kɔtɔ sɔ kudai.