Alatala la kuma telenbalenu la ko tɔ
12
Dauda la beete do le ka beeti bɔɔlanu la kuntige ye, a ni a bɔɔ kɔra julu kolo sagiŋɛ tɔ.
2 Alatala, i ni dɛmare ma,
lannanteya bele bitugun,
tɔɲa fɔlanu bata ban duge kunma.
3 Bɛ be ɲɔgɔn tɔɲɛgɛla.
Kuma diyama be anu da tɔ,
kɔnɔ anu juse tɔ, filankafuya kuma le be fɔla.
4 Anu be kuma diyama fɔla anu da min na, Alatala ni wo balan,
anu nɛŋɛ ni wasunteya kuma banba fɔ koe dan.
5 Anu ka a fɔ, «Mɔ sɛnbɛ kolo kuma dula.
Mɔ da mu mɔ yɛtɛ tɛŋɛ le la.
Ɲɔmɔ si nɔ sɔtɔ mɔ ma?»
6 Alatala ko: «Anu be tɔɔrɔbaganu majuguyala ki min na,
anun fugarenu nuunu kulɛ min be bɔɔla anu da tɔ,
wolo be n nawulila kɔtɛ,
n ni anu lakisi mɔgɛnu ma, minnu be anu ɲagankatala.»
7 Alatala la kumanu mu kuma saniyandeŋɛ le la,
iko kaalise min be lakunɛnden sigi wɔrɔwila,
a boee bɛ bata ban bɔɔla a tɔ.
8 Ee Alatala, i ni tɔɔrɔbaganu kanta,
i ni mɔ lakisi kɛ mɔgɔ koroŋɛnu ma kudai.
9 Kɛ wagate, ko koron malá banba bata siya adamadeŋɛnu tɛma,
ko koron malanu be tagamanna dula bɛ tɔ.