Ala tantu beete a la teleŋɛ la ko la
9
Dauda la beete do le ka, beeti bɔɔlanu la kuntige ye. A ni a bɔɔ iko beete min tɔgɔ «Den faga beete» be bɔɔla ki min na.
2 Alatala, n si i tantu n sondoŋɛ bɛ la,
n si i la kabanakoe bɛ masifɛ mɔgɛnu ye.
3 N si sɛɛwa, n ni ɲagalin i la ko la,
ile Alatala min mayɛlɛta, n ni i matɔgɔ beete tɔ.
4 N jaguenu bata saagi kɔma kɔma la.
Anu to borita i la,
anu kɛŋɛ ma nɔ sabatila duge tɔ, anu bata halagi.
5 Iyon, i ka n kunmafɔ teleŋɛ le butɔ;
i be majigiren mansa tintiŋɛ tɔ, i ka kiite sa teleŋɛ le butɔ.
6 I bata see doenu lasogi, i be ko koron malanu halagila le,
i si anu tɔgɛ lamuttɛ le kudai.
7 Jaguenu bata sama feu,
anu la saa tiɲareŋɛnu be labokolaren,
anu la ko bata ɲina mɔgɛnu la.
8 Kɔnɔ Alatala la mansaya kan be sabatiren, dan bele a la.
A be majigiren a la tintiŋɛ tɔ a ni kiite sa ɲɔ.
9 Ale be dunuya makiitila teleŋɛ le butɔ,
a be kiite sala seenu ma ka tɔɲa yati makɛnɛn.
10 Tɔɔrɔbaganu latangalá le mu Alatala la,
anu makantalá mu ale len na anu la kɔntɔfile butɔ.
11 Alatala, i lɔnná be laaren i la,
bayi minnu be i ɲinila, i te wonu boloka.
12 Wo mɔ ni Alatala tantu beete bɔɔ, min be majigiren Siyɔn.a
A bata koe minnu ma, wo mɔ ni a ɲamakaran see bɛ ye.
13 Ala ka basi bɔndeŋɛ talɔn, a be wo yɔgɔla le.
A te ɲina tɔɔrɔbaganu diri kulɛ la.
14 Ee Alatala kinikini n ma,
n na ɲagankata fɛlɛ min be fatanden n kɔnnanu la.
Ile min si n nakisi saya bonda ma,
15 alako n ni i tantu Siyɔn saa jama bɛ tɛma,
n ni sɛɛwa kulɛ mayɛlɛ i la kise la.
16 Sii koroŋɛnu ka dinka min soe, anu yɛtɛ boeta wo butɔ.
Anu ka jala min nafonti, ande yɛtɛ bitata wo la.
17 Alatala be lɔnden a la teleŋɛ le la,
telenbalenu be bitala anu yɛtɛ bolo baa le sabu la.
I ni i sulen, serede kulɛ ni bɔɔ.
18 Ko koron mala minnu be ɲinaren Ala ma,
Ala mu wo see Ala lɔnbalenu fagala, anu la ko ni ban feu.
19 Iyon, Ala si naa tɔɔrɔbaganu la ko talɔn de.
Minnu be lannanteya sala a ma, a te ɲina anu ma feu.
20 Alatala, yandi i ni wuli, mɔgɛ kana nɔ sɔtɔ i ma.
I ni see doenu makiiti.
21 Ee Alatala, i ni anu makilan,
alako see doenu ni a lɔn ka a fɔla anu mu mɔgɔ tun de la.
I sulen.