Ala la nɔɔra
8
Dauda la beete do le ka, beeti bɔɔlanu la kuntige ye, a ni a bɔɔ anun kɔra mɔɔle do la.
2 Mɔ Marige Alatala!
Tɔgɔ banba tige le be tabɛnden i ma dunuya bangu munge kunma,
ile min be i la nɔɔra yitala saŋɛ tɔ.
3 Deŋɛnu nun bɔɔbɛnu be i sɛnbɛ matɔgɔla,
i be i jaguenu anun i kɛlɛlanu da balanna wolo la.
4 Ka n be saŋɛ fɛlɛla, i be min daren i bole la,
i ka kare nun loolenu sɔ a tɔ,
5 n si n yɛtɛ maɲininka le:
Fen de mu mɔgɛ la, i to be i mirala a la ko la?
Fen de mu adamadeŋɛ la, i to be a la ko bitala?
6 I be a daren ki min na, a banba bele toren a ni ma maleka la.
I ka a kunnawuli nɔɔra nun fisamanteya la.
7 I bata yamɔre to a bolo i la dalifeŋɛ bɛ kunma.
I bata dunuya ma a kɛn sɔ feŋɛ la:
8 saakanu, ningenu, a bɛ labɛndeŋɛ,
hali burun butɔ subenu,
9 kondeŋɛ bɛ minnu be yilɛla kantɔ,
yɛgɛ bɛ minnu be tagamanna ba tɔ.
10 Mɔ Marige Alatala!
Tɔgɔ banba tige le be tabɛnden i ma dunuya bangu munge kunma!