Musa nun Harona taga koe Firauna bata
5
Wo tanbi kɔma, Musa nun Harona tagata Firauna taran Misira, anu ka a fɔ a ye: «Alatala la kuma le ka, bani Isirayila kaanu la Ala, a ko: aa i ni a la jama boloka anu ni taga, alako anu ni sale ma a la biliya butɔ, janfue tɔ.»
2 Firauna ka anu jaabi, a ko: «Ɲɔmɔ le mu kɛ Alatala la n si min kulɛ lamɔɛ han n ni bani Isirayila kaanu boloka? N ɲan ma Alatala lɔn, n mɛn te bani Isirayila kaanu boloka feu!»
3 Anu ka a jaabi, anu ko: «Heburenu la Ala bata a fan nabɔɔ mɔ ma. Yandi mɔ boloka, mɔ ni tele saba tagamaŋɛ ma janfue butɔ, sarika bɔɔdula Alatala ye, mɔ la Ala, alako a kana kaaka bandiya latugu mɔ la ka wo ma a ni mɔ faga faŋɛ la.»
4 Misira mansa ka a fɔ anu ye: «Musa nun Harona, wo be jama bɔɔla a la wale tɔ fenna? Wo ɲan ni taga wo la jon walenu madula.»
5 Firauna mɛn ko: «Bi, bani Isirayila kaanu to bata siya han, kɔtɛ wo be diren anu lasulenna anu la jon walenu la ba?»
Wale lasiya koe
6 Ale wo lun yati le, Firauna ka kɛ yamɔre dii Misira wali kuŋɛnu ma, anun bani Isirayila jama kun lanmanu ma, a ko:
7 «Wo kana biŋɛ don bitugun bani Isirayila jama bolo birike botege koe la, iko wo darita a la ki min na. Kɔtɛ, ande len yati bɛnta tagala anu ni biŋɛ bɔɔ anu yɛtɛ la.
8 Anu darita birike min kɔnte botegela nun wo mɛn si wo kɔnte le don anu bolo, wo kana fenfen bɔɔ a la, bayi anu mu fuyante le la. Wolo be a maren anu be belebelela, anu be a fɔla anu ni taga sarika bɔɔdula anu la Ala ye.
9 Wo do sa kɛ mɔgɛnu la ɲagankata wale kunma, anu ni sɔɔbɛ bita, alako anu kana anu hakkile to kɛ foniya kumanu ma.»
10 Misira wali kuŋɛnu anun bani Isirayila jama kun lanmanu tagata wo fɔ bani Isirayila jama ye, anu ko: «Firauna la kuma le ka, a ko: aa biŋɛ te don wo bolo bitugun.
11 Wole len yati ká taga biŋɛ ɲini wo yɛtɛ la, wo ka a yen kan do kan, kɔnɔ fenfen te bɔɔ wo la lɔɛ la.»
12 Wo butɔ, bani Isirayila jama mafatanta Misira duge butɔ bɛ tɔ, anu tagata kɔrɔ baka tɔnbɔndula biŋɛ faliŋɛ la.
13 Misira wali kuŋɛnu be anu lagbataala, anu tota a fɔla: «Wo wo la tele muru lɔɛ ban iko biŋɛ to be donna nun wo bolo.»
14 Hali Firauna la wali kuŋɛnu ka minnu sɔ bani Isirayila kaanu tɛma wali kun lanmanu la, anu ka wonu yati botege le, anu be a fɔla anu ma: «Fen de birikenu min kɔnte be saren wo ma, wo ma a ban botegela kunun nun bi, iko a fɔlɔnɛŋɛ?»
15 Wo butɔ, bani Isirayila kaanu la kuŋɛnu tagata anu fan madi Firauna ma, anu ko a ma: «Fen de i be i la joŋɛnu mala kɛ mɔɔle la?
16 Anu bele bin yo donden i la joŋɛnu bolo, anu nɔn be a fɔla le mɔ ye aa mɔ ni birikenu botege! Bɔɔ wo la, anu be i la joŋɛnu botegela. Kɔnɔ i la jama le bata tantan.»
17 Firauna ka anu jaabi, a ko: «Fuyante le mu wo la, fuyantenu! Wolo mu wo be a fɔla aa wo ni taga sarika bɔɔdula Alatala ye!
18 Kɔtɛ wo taga wo la lɔɛ tɔ, biŋɛ te don wo bolo bitugun, birikenu nɔn min kɔnte be saren wo ma wo be wolo botegela.»
19 Wo butɔ, bani Isirayila kaanu la kuŋɛnu ka a yen anu be ɲagankata le tɔ, bayi anu bata a fɔ anu ye, fenfen kɔnte te bɔɔ birikenu la min be saren anu ma lun go lun.
20 Anu bɔɔ tɛmuɛ Firauna bata, anu tagata Musa nun Harona taran; wonu be anu kɔnɔnden.
21 Anu ka a fɔ anu ye: «Alatala ni wo fɛlɛ a ni kiite sa. Wo bata mɔ lasɛɛya Firauna nun a la walilanu ye. Wo ɲan bata faŋɛ sa anu bolo butɔ anu ni mɔ faga.»