6
Alatala ka a fɔ Musa ye: «I si a yen kɔtɛ n be naala min mala Firauna la, n sɛnbɛ le be naala a mala a ni bani Isirayila jama boloka, wo sɛnbɛ le mɛn be a mala a ni anu bee a la duge tɔ.»
Ala la fan nabɔɛ Musa ma
2 Ala mɛn kumata Musa ye, a ko a ma: «Nde le mu Alatala la, nde.
3 N ka n yɛtɛ makɛnɛn de nun Iburahima nun Isiyaka nun Yaguba ye iko Ala sɛnbɛ tige, kɔnɔ n ma nde Alatala tɔgɛ kan nabɔɔ anu ma.
4 N mɛn ka n na lahire tugun kiti nde nun anu tɛma, n si naa Kanana duge dii anu ma, anu ka anu la simaya takuntu luntanya la ka min na.
5 Kɔtɛ, nde bata bani Isirayila kaanu la ɲagankata dire mɔɛ, Misira kaanu be jonya sigila anu ma, n mɛn ka n na wo lahire talɔn.
6 Wolo mu, i si a fɔ bani Isirayila kaanu ye, i ko: ‹Nde len mu Alatala la, n si naa wo labɔɔ le wali bɛlɛŋɛ tɔ Misira kaanu be min sigiren wo ma. N si naa wo lafulen jonya tɔ, Misira kaanu be min sigiren wo ma. N si naa wo kunka le n bolo sɛnbɛma la, n si Misira kaanu bita le kiiti bɛlɛŋɛ la.
7 N si naa wo jigan de wo ni ma n na jama la, nde tugun si ma le wo la Ala la. Wo mɛn si a lɔn de ka a fɔla, nde len mu Alatala la, wo la Ala, min ka wo bɔɔ wali bɛlɛŋɛnu tɔ Misira.
8 N si naa wo ladon de duge tɔ n bata n kali duge min dii koe la Iburahima, Isiyaka anun Yaguba ma. N si naa a dii le wo ma a ni to wo sagoe tɔ. Nde len mu Alatala la.› »
9 Awa, Musa ka Ala la kuma latanbi bani Isirayila kaanu ma ɲɔgɔnna le. Kɔnɔ anu ma Musa kulɛ lamɔɛ, bayi jonya wali bɛlɛŋɛ bata sigi anu ma, wolo ka limaniya ban anu bolo.
10 Wo kɔma, Alatala kumata Musa ye, a ko:
11 «Taga kuma Firauna ye Misira mansa, alako a ni bani Isirayila kaanu boloka anu ni bɔɔ a la duge tɔ.»
12 Musa ka Alatala jaabi, a ko: «Ka bani Isirayila kaanu ma n kulɛ mɔɛ, Firauna kan go? A si n kulɛ lamɔɛ kama le, nde min nɛŋɛ be biliyaren kuma dula?»
13 Kɔnɔ Alatala kumata Musa nun Harona ye, a ka anu yamɔri anu ni taga bani Isirayila kaanu taran anun Firauna Misira mansa, alako ka a si bani Isirayila kaanu labɔɔ Misira duge tɔ.
Musa nun Harona benbanu
14 Bani Isirayila bɔnsɛ ɲatɔ sɔlanu le mu ka. Yaguba la den fɔlɛ Rubɛn, a la den kayireŋɛnu le ka: Hanoki, Palu, Heseron, anun Karami. Rubɛn bɔnsɛ mu wondelen na.
15 Simeyon tugun na den kayireŋɛnu le ka: Yemuyeli, Yamin, Ohadi, Yakin, Soyara, anun Sayulu. Kɔnɔ Sayulu mu Kanana muse la deŋɛ le la. Simeyɔn bɔnsɛ mu wondelen na.
16 Lewi la den kayireŋɛnu tɔgɛ le ka, anu nun anu juruyanu: Gerison, Kehata anun Merari. Lewi la simaya bɛ labɛndeŋɛ mata san kɛmɛ san bi saba nun wɔrɔwila le la.
17 Gerison na den kayireŋɛnu mata Libini anun Simiya la anun anu bɔnsɛnu.
18 Kehata la den kayireŋɛnu mata Amarami, Yitihari, Heburɔn, anun Usiyɛli la. Kehata la simaya bɛ labɛndeŋɛ mata san kɛmɛ san bi saba nun saba le la.
19 Merari la den kayireŋɛnu mata Mahili anun Musi la. Awa, Lewi bɔnsɛnu le wo la anun anu juruya.
20 Amarami ka Yokebeti jigan a la muse la, a yaye. Wo ka Harona anun Musa sɔtɔ a ye. Amarami la simaya bɛ labɛndeŋɛ mata san kɛmɛ san bi saba nun wɔrɔwila la.
21 Yitihari la den kayireŋɛnu le ka: Kora, Nɛfɛgi, anun Sikuri.
22 Usiyɛli la den kayireŋɛnu le ka: Misayɛli, Elisafan, anun Sitiri.
23 Harona ka Aminadabi la den musereŋɛ Eliseba jigan a la muse la, Naasɔn barenmuse; wo ka den kayireŋɛnu sɔtɔ a ye: Nadabi, Abihu, Elasari anun Itamari.
24 Kora la den kayireŋɛnu le ka: Asiri, Elikana anun Abiyasafi. Koora kaanu bɔnsɛ mu wondelen na.
25 Harona la den kayireŋɛ Elasari ka Putiyeli la den musereŋɛ dɔndɔ jigan a la muse la, wo ka den kayireŋɛ sɔtɔ a ye, a tɔgɔ Pinasi.
Awa, Lewi kaanu bɔnsɛ anun a ɲatɔ sɔlanu le mu wonu la.
26 Awa, Harona nun Musa le ka, Alatala ka a fɔ minnu ye: «Wo bani Isirayila kaanu labɔɔ Misira duge tɔ bɔnsɔ bɔnsɔ.»
27 Kɛndelen be kumala Firauna ye, Misira mansa, bani Isirayila kaanu labɔɔ koe la Misira duge tɔ. Awa, ale Musa nun Harona le ka.
Musa nun Harona la na Firauna bata