Ala la a sɛnbɛ yita koe Musa la
4
Musa mɛn ka Ala jaabi, a ko: «Kɔnɔ ee! bani Isirayila kaanu te naa laa n na, anu mɛn te naa n kulɛ lamɔɛ. Anu mɛn si naa a fɔ aa Alatala ma a fan nabɔɔ n ma.»
2 Alatala ko a ma: «I be fen bitaren i bole la?» A ko: «Tungare le.»
3 Alatala ko: «A lafili duge tɔ!» Musa ka a lafili duge tɔ, tungare yɛlɛmanta kaa la. Musa ka a matuntun a la kisanna.
4 Alatala ko Musa ma: «I bole lafonti i ni kaa bita a fɔɲɛ ma.» A ka a bole lafonti a ka kaa bita. Kaa tamata tungare la a bole tɔ kisanna.
5 Alatala ko: «Ka i ka wo ma, anu si laa le ka a fɔla nde Alatala ka n fan nabɔɔ le i ma, nde min mu anu benbanu la Ala la, Iburahima anun Isiyaka anun Yaguba la Ala.»
6 Alatala mɛn ko Musa ma: «I bole sa i jusukuŋɛ tɔ ba.» A ka a bole lasori a la doroke kɔtɔ a jusukuŋɛ tɔ, a mɛn ka a tabɔɔ. A ka a yen, baliwuleŋɛ mɔɔle do be a bole ma, a be beeyaaren iko nɔnɛ.
7 Alatala ko: «I mɛn ni i bole sa i jusukuŋɛ tɔ.» A mɛn ka a bole lasori a la doroke kɔtɔ a jusukuŋɛ tɔ, a mɛn ka a tabɔɔ. A ka a yen, a bole mɛn tasaagita a la, iko a be ki min na nun.
8 Alatala ko: «Ka bani Isirayila kaanu ma laa i la, anu ma i kulɛ lamɔɛ kabanako fɔlɛ la, anu si laa i la, kabanako filaɲɔgɛ kan na.
9 Ka anu ma laa kɛ kabanako fila bɛ la, anu mɛn ma i kulɛ lamɔɛ, i si Nili kɔɛɛ je do jigan i ni a bɔn kɛnɛ tɔ. Wo tɛmuɛ, i ka je min jigan Nili kɔɛɛ tɔ, a si yɛlɛman base la kɛnɛ tɔ.»
10 Kɔnɔ Musa ko Alatala ma: «Ee! n Marige, n bata i táran i ni diɲa n ɲɛ. Nde sɛnbɛ ma kolo kumare la, bɔɔla n be dendenya tɔ, han n na koloyareŋɛ, han i be kumala nde i la jondeŋɛ ye ka min na ka, n sɛnbɛ ma kolo kumare la. N da nun n nɛŋɛ be biliyaren kuma la.»
11 Alatala ko Musa ma: «Ɲɔmɔ le ka da dii mɔgɛ ma? Ɲɔmɔ le be mɔgɛ mala bobe la, ka wo ma tolobɔnɛ la? Ɲɔmɔ le be a ɲanu lakala, ka wo ma a ni a ma ɲabɔnɛ la? Kaa nde Alatala ma?
12 Awa kɔtɛ taga. I tini be kumala, n si to i fɛ. A bɛnta i ni min fɔ n si i degen a la.»
13 Musa mɛn ka a fɔ: «Ee, n Marige, n bata i táran, mɔgɔ do lasanba!»
14 Wo kɔma, Alatala juse yɛlɛta Musa ma han, a ko a ma: «I kɔtɔ Harona go? i nun min mu Lewi bɔnsɛ la? N ka a lɔn, a kusan kumala a ɲinma la, a ɲan a fɛlɛ ale yɛtɛ be nala i fɛlɛdula. Ka a ka i yen, a si sɛɛwa a juse tɔ.
15 Wo tanbi kɔma, i si naa kuma a ye. A bɛnta min fɔla, i si naa wo fɔ a ye. Nde yati si naa to wo fɛ ka wo be kumala wagate min tɔ, n mɛn si wo degen de wo be naala min mala.
16 Ale le be naala kumala jama ye i faliŋɛ la. A si naa ma i la kuma matanbilá la, ile si naa to iko nde Ala le be kumala a ye.
17 Awa, wo tungare bita i bole la, i si naa kabanakoenu ma min na.»
Musa saagi koe Misira
18 Wo kɔma, Musa saagita a bitan kaye Yetoro bata, a ka a fɔ a ye: «I ni diɲa, n ni saagi n bareŋɛnu dula Misira, alako n ni a yen ka han kɔtɛ anu be baluren.» Yetoro ko Musa ma: «Awa, taga hɛra tɔ.»
19 Alatala ka a fɔ Musa ye Madiyana duge tɔ: «Saagi, i ni taga Misira, bayi min bɛ dita i fagala ɲɔ, a bɛ bata faga.»
20 Wo butɔ, Musa ka a la muse nun a la den kayireŋɛnu jigan, a ka anu layɛlɛ sofale kanna, anu saagita Misira jamanɛ tɔ. Ala ka tungare min jigan koe fɔ a ye nun, a ka wo bita a bole la.
21 Alatala mɛn ko Musa ma: «N ka yamɔre don i bolo kabanakoe mɔɔlenu bɛ ma koe la. I to be saagila Misira, i ni i hakkile to a ma, i ni anu ma Firauna ɲala. Wo kɔma, nde si Firauna hakkile labɛlɛya, a te bani Isirayila kaanu boloka anu ni taga.
22 Wo butɔ, i si naa a fɔ Firauna ye, i ko: ‹A fɛlɛ, Alatala be min yitaren, a ko: aa a la den kayiren fɔlɛ le mu bani Isirayila jama la.
23 Aa a bata a fɔ i ye i ni a la den kayireŋɛ boloka a ni taga a batu, kɔnɔ i ma sɔn a bolokala a ni taga. Awa aa a si naa i la den kayiren fɔlɛ faga.› »
24 Kɔnɔ Musa la tagamaŋɛ butɔ, a kita kan do. Alatala ka a madon Musa la, a dita a fagala.
25 Wo butɔ, a la muse Sefura ka kuru ŋaɲama jigan a ka a la den kayireŋɛ sunna, a ka a maga Musa wote la, a ka a fɔ, a ko: «I mu n na kaye la, kɛ base le la ko la!»
26 Wo ma kɔma, Alatala ka a tuntun Musa la, a ma a faga. Sefura to ka a la deŋɛ sunna, wolo mu a ka a fɔ nun: «I mu n na kaye la, kɛ base le la ko la.»
27 Alatala ka a fɔ Harona ye: «Taga Musa labɛn dula janfue tɔ.» A tagata, a bɛnta Musa la Ala la kɔnkɛ tabɛŋɛ tɔ, anu milimilita ɲɔgɔn ma.
28 Alatala ka Musa kii kuma minnu la, anun a ka a yamɔri kabanakoenu minnu la, a ka wonu bɛ ɲamakaran Harona ye.
29 Wo kɔma, Musa nun Harona tagata Misira. Anu la kereŋɛ ɲɔ, anu ka bani Isirayila kuntige bɛ madɛn.
30 Harona ka kuma bɛ fɔ anu ye dɔndɔ dɔndɔ iko Alatala ka a yita Musa la ki min na. A mɛn ka kabanakoenu ma jama ɲala.
31 Jama laata. Anu to ka a lɔn, ko Alatala bata bani Isirayila kaanu la tɔɔrɛ yen, a mɛn nata hinnɛ anu la, anu ka anu majigi, anu sujuduta duge ma.