Isa la misale
2
Wo butɔ, wo nun Ala la mɔgɔ masubɛreŋɛ la kafue bata limaniya do dii wo ma ba? A la kanunteya bata wo lalimaniya ba? Bɛnɲɔgɔya bata to ba wo nun Ala Hakkili saniyandeŋɛ tɛma? Kanunteya nun kinikinɛ tugun bata fɔlɔ tola wo tɛma ba? 2 Awa kɔtɛ, sɛɛwa min be n ɲɛ wo la ko tɔ, n bata wo tárán wo ni a lakamali bɛnɲɔgɔya butɔ. Hakkili dɔndɔ ni to wo tɛma, anun kanunteya dɔndɔ, anun tagamanɲa dɔndɔ. 3 Wo kana ɲɔgɔn siinaya fenfen na. Wo kana wasu fenfen na. Fɔ wo ni wo yɛtɛ majigi ɲɔgɔn ye, ka fisamanteya dii ɲɔgɔn ma. 4 Wo kana wo fan na munanfaŋɛ le ɲini, kɔnɔ wo ni wo kafuɲɔgɛ la munanfaŋɛ ɲini.5 ⸂Wo butɔ,⸃ wo yuge ni to ɲɔgɔn tɛma iko Ala la mɔgɔ masubɛreŋɛ Isa tɛŋɛ.
6 A be nun Ala kɛɲa le.
Wo sɔdula butɔ, a nun Ala si kan,
kɔnɔ a ma wo sɔdula jigan fondo la a si kankan min ma.
7 A diɲata wo sɔdula nun kunnawule bɛ ma,
a sɔnta tola a joŋɛ kɛɲa ma.
Wo butɔ, a sɔtɔta dunuya adamadeŋɛ kɛɲa ma.
8 A la nareŋɛ adamadeŋɛ kɛɲa ma,
a ka a yɛtɛ majigi.
A tota Ala sagoe tɔ,
han a ka saya sɔtɔ wo butɔ;
a faga ɲa ɲan, anu ka a banban lɔgɔ bangalandeŋɛ le tɔ.
9 Wolo ka a ma, Ala ka a mayɛlɛ sɔdula fisamante tɔ.
A ka tɔgɛ dii a ma, min fisa tɔgɛnu bɛ ko.
10 Wolo si a ma, bɛ ni kimisirin a kɛn kɔtɔ:
minnu be saŋɛ tɔ,
minnu be duge kunma,
minnu be duge kɔtɔ,
anu bɛ ni biliya dii Isa tɔgɛ ma.
11 Anu bɛ ni a yita ka a fɔla,
«Ala la mɔgɔ masubɛreŋɛ Isa le mu Marige la.»
Anu to si wo fɔ, wo ni ma mamatɔgɛ la Baaba Ala ye.
Dɛnkɛnɛyabaganu la Ala sagoe ma koe
12 Awa, n kanunteŋɛ ɲinmanu, wo ka Ala sagoe ma tɛmuɛ bɛ. Wo ka wo ma n be wo tɛma wagate min tɔ, kɔnɔ n to bele wo ɲaama ka, wo la wakkilɛ ɲan ni fisaya doe ko. Wo ni to wakkilɛla wo lakisi koe la, wo ni to Ala kɔma a ɲalakilaŋɛ la. 13 Ale Ala le be koe lagirila wo tɛma alako wo hanige ni bɛn a tɛŋɛ ma, wo ni a diyanan koe ma. 14 Wo butɔ, wo tini be fenfen mala, wo kana wo yagasede masa wo kana sɔnkɔ, 15 alako saniyaŋɛ ni to wo ye, kɔnɔ yo kana to wo ma. Wo butɔ, wo ni ma Ala la den ɲinmanu la, kɛ dunuya mɔgɔ koroŋɛ telenbalenu ɲaama. Wo mɛn ni malan iko loolenu be malanna ki min na dibe tɔ, 16 wo ni to kisi kuma fɔla tɛmuɛ bɛ. Wolo si a ma, n ni ɲagalin wo la koola Ala la mɔgɔ masubɛreŋɛ na luŋɛ ɲatɔ, ka a fɔla n ma n na kiilaya wale lakamali tɔɔrɛ butɔ fufafu la. 17 Tumado n ɲan si naa faga le. Kɔnɔ hali wolo mu, n na faga si naa ma sarika la, min be sala wo tɛn sarika kunma, wo be min bɔɔla ka dɛnkɛnɛya. Wolo be n nasɛɛwala. Iyon, n be sɛɛwaren wo bɛ fɛ. 18 Wole tugun ni sɛɛwa, wo mɔ bɛ ni sɛɛwa ɲɔgɔn fɛ.
Timote nun Epaforodite kii koe
19 N bata yigi sa Marige Isa ma, ka a fɔla a banba bele toren, n ni Timote kii wo ma, alako a tini tasaagi nala n bata, n ni naa wo la ko kibare mɔɛ, wo tɛmuɛ nde tugun si limaniya jigan. 20 Mɔgɔ yo bele n bolo yan, mɔ nun min mu hakkili dɔndɔ la, wo la ko mira be min ye yati, fɔ ale Timote. 21 Wo butɔ, bɛ be diren a yɛtɛ tɛn munanfaŋɛ le ye, anu bele Ala la mɔgɔ masubɛreŋɛ Isa la munanfaŋɛ ɲinila. 22 Kɔnɔ Timote kan, wole yɛtɛ ka a lɔn, a bata a timiladiya tɔɔrɛ butɔ Ala la kibaru ɲinma lake koe la. Wo bɛ butɔ, a bata to n kɛnna iko deŋɛ min be a baaba jokkila. 23 Wolo mu, a sɔgɔ be n na, n na ko tini ban makɛnɛnna, n ni ale le kii wo ma. 24 N ɲan be laaren a la, a banba bele toren, Marige ni a lagiri nde yɛtɛ tugun ni taga wo dula.
25 Hali wolo, n ka n mira a fɛrɛ bele, fɔ n ni n nɛɛnɛdɔndɛ Epaforodite le kii wo ma. A mu n waliɲɔgɛ le la, mɔ mɛn bɛ be kata mɔɔle dɔndɔ le tɔ. Bayi wole le fɔlɔ ka a kii n ma, a ni n dɛman n hajue be min ma. 26 Wo bɛ sɔgɔ bata a bita koola. A juse be makasaren bayi wo bata a bandi koe mɔɛ. 27 A dun tɔɲa le: a bandita le a koroŋɛ la han a dita fagala. Kɔnɔ Ala kinikinita a ma. Ale dɔrɔn tun ma, a kinikinita nde tugun ma, alako suunɛ nun n na tɔɔrɛ kana sa ɲɔgɔn kunma. 28 Wolo ka a ma, n bata teriya a kii koe la wo ma, alako wo tini a yen, wo mɛn ni taɲagalin. Wo butɔ, nde tugun juse ni sa donden. 29 Wo ni a labɛn Marige tɔgɛ la sɛɛwa banba butɔ. Wo ni kɛ mɔgɛ mɔɔle biliya, 30 bayi a ka a nɛɛ dii Ala la mɔgɔ masubɛreŋɛ la wale lakamali koe la, hali a mata a ye faga la. A bata n dɛman wole yɛtɛ te nɔ n dɛmanna koe minnu la.