Lannanteya sa koe Isa dɔrɔn ma
3
Awa kɔtɛ, n nɛɛnɛdɔndɛnu, wo ni sɛɛwa wo Marige Isa la. Wo ka kuma min mɔɛ n na nun, n mɛn be saagila wondelen sɛbɛla. N te kori wo la. A munanfaŋɛ be wole tugun ye. 2 Wo ni wo mɛnni wali koron malanu ma, minnu be toren iko wulu fatiyareŋɛnu. Iyon, wo ni wo mɛnni wonu ma, minnu be diren mure lawalila tun, anu ni mɔgɛ sunna. 3 Wo mɔle le mu sii sunnareŋɛnu la a tɔɲa kii ma, wo mɔle minnu be Ala batula a Hakkili saniyandeŋɛ sabu la. Mɔ be ɲagalinna Ala la mɔgɔ masubɛreŋɛ Isa la ko la, wo butɔ mɔ bele laaren mɔ yɛtɛ wunde la.4 Awa, nde tugun, ka n dita a ye, n si nɔ laala n yɛtɛ la nun. Ka mɔgɔ do be a miraren a si nɔ laala a yɛtɛ la, min be nde bolo, wo fisa wo tigi tɛŋɛ ko. 5 Bayi, n sunnata n na sɔtɛ tele sagin luŋɛ le, Isirayila sɔtɔdeŋɛ le mu n na, min be bɔɔren Bunyamin bɔnsɛ tɔ. N sɔtɔ kɛɲa ma, Heburea yuge yati yati le be n bolo. Ala la sariya kan, n be sɔren wolo kɔma Farisi kuruŋɛ naamuŋɛ kɛɲa ma. 6 N ɲan naata kata bɛ ma n ni Isa la dɛnkɛnɛyabaganu ɲagankata. Teleŋɛ min na ko be fɔren sariya tɔ, n ma balan wo la, malakɔrɔsi koron yo bele n ma nun.
7 Kɔnɔ kɔtɛ, Ala la mɔgɔ masubɛreŋɛ la ko be a maren, n be koe min bɛ miraren ko ɲinmanu la nun, a bata ma n ɲɛ kasara la. 8 Iyon, koe bɛ ɲan bata ma n ɲɛ kasara la. Ala la mɔgɔ masubɛreŋɛ Isa, min mu n Marige la, wolo lɔn koe fisa koe bɛ ko! Ale le la ko be a maren, n bata sɔn kasara bɛ la. Koe bɛ bata ma n ɲɛ ko fufafu la. Kɔtɛ, n ni Ala la mɔgɔ masubɛreŋɛ la munanfaŋɛ sɔtɔ, 9 n ni to ale le la ko tɔ. Bayi n yɛtɛ sɛnbɛ te nɔ n matelenna Ala ye, a la sariya labatu koe la. Kɔnɔ Ala kan si nɔ n matelenna n tini dɛnkɛnɛya Ala la mɔgɔ masubɛreŋɛ ma. Wo teleŋɛ be fatanden Ala le ma dɛnkɛnɛya la ko sabu la. 10 Awa, n be diren min ye, n ni Isa lɔn. N ni a sɛnbɛ lɔn, min ka a tawuli fagabaganu tɛma. Nde nun ale ni to tɔɔrɛ mɔɔle dɔndɔ le tɔ. N mɛn ni to iko Isa be toren ki min na nun a faga tɛmuɛ. 11 Wo bɛ sɔgɔ be n na, alako nde tugun ni wuli le faga ma.
Taga koe ɲatɔ han ka sɔŋɛ sɔtɔ
12 N ma a fɔ n bata ban wo bɛ sɔtɔla betunna, n na ko tugun bele banden kamalila. Kɔnɔ n be katala taga koe la ɲatɔ, alako Ala la mɔgɔ masubɛreŋɛ Isa ka n masubɛ koe min na, nde tugun ni wolo tabe. 13 Tɔɲa le, n nɛɛnɛdɔndɛnu, n ka a lɔn n bele banden a bitala betunna. Kɔnɔ n be ko dɔndɔ le mala: min be kɔma, n ni wo to ɲɔ, min be ɲatɔ, n ni teriya wolo la. 14 N be katala geeni koe le la, alako n ni sɔŋɛ sɔtɔ. Saŋɛ tɔ Mansa Ala le be wo mɔ keleren wo la: wo mɔ ni a sɔtɔ Ala la mɔgɔ masubɛreŋɛ Isa sabu la.
15 Wo mɔ le minnu la dɛnkɛnɛya bata mɛ, a bɛnta wo mira le ni to wo mɔ bɛ bolo. Ka a dun tagata taran mɔ nun mɔgɔ do bele bɛnden ko dɔndɔ ma, Ala si naa wo tugun nabeeya le wo tigi ye. 16 Kɔnɔ wo bɛ butɔ, wo mɔ bata na han ka min na ka, han bi wo mɔ ni do sa wakkilɛ kunma, ⸂mɔ ni tagaman kɛɲa dɔndɔ le la, mira dɔndɔ ni to wo mɔ ye.⸃
17 N nɛɛnɛdɔndɛnu, wo bɛ ni n nadegen. Mɔgɛ minnu tagamanɲa be toren iko mɔ tɛŋɛ, wonu le ni ma misale la wo ye. 18 Bayi a siyama tagamanɲa be a yitala, Isa la sarika lɔgɔ bangalandeŋɛ tɔ, a munanfan yo bele anu ye. N ɲan bata wo fɔ wo ye kunɲama siyama. Kɔnɔ kɔtɛ n be a fɔla le wo ye n be dila, n ko: Ala la mɔgɔ masubɛreŋɛ jaguenu le mu anu la. 19 Anu la ban ɲa si ma anu ye halage la. Anu fan diyanankoenu bata ma anu la ala la. Anu be anu fan tajiganden min na, wolo be naala anu malula. Anu hajue be dunuya koenu le tun ma. 20 Kɔnɔ wo mɔle kan bata mu arijanna le la. Wo mɔ mɛn be mɔ la malakisilá min makɔnɔnden, Marige Isa Ala la mɔgɔ masubɛreŋɛ, wolo si na kabɔɔ saŋɛ tɔ, a ni na wo mɔ kɔma. 21 Koe bɛ be tola a sagoe tɔ a sɛnbɛ le la. Wo sɛnbɛ le si a ma, a si na wo mɔ bali nagasireŋɛnu masaradula, anu ni to nɔɔra butɔ iko a tɛŋɛ.