N be kan do kan, Ala ka a lɔn
139
Dauda la beete do le ka, beeti bɔɔlanu la kuntige ye.
Alatala, i be n jusu butɔ koe fɛlɛla,
i ɲan be n lɔnden han n daŋɛ tɔ!
2 Ka n sigita, i ka a lɔn; ka n wulita, i ka a lɔn.
Yannun n be n mirala, i ka n na mira bɛ lɔn.
3 Ka n be tagamanna le, ka n be saren de, i ka a lɔn.
N be fenfen tɔ, i ka a lɔn.
4 Yannun kuma ni bɔɔ n da tɔ,
ile Alatala ɲan bata a bɛ lɔn.
5 I be sansaŋɛ donden n ma, ɲatɔ nun kɔma.
Iyon, i be n makantaren.
6 Ko lɔn belebele le wo la, a luggɛta,
n hakkile te nɔ min bitala.
7 N ɲan si taga mina le ba n ni yanfaya i la?
N ɲan si bori n ni taga mina le ba, ile bele ka min na?
8 Ka n tagata yɛlɛ saŋɛ tɔ nun, i be ɲɔ la.
Ka n ɲan tagata aligiyama nun, ɲɔ tugun i be n taranna le.
9 Ka n teriyata tagala tele yɛlɛ,
ka wo ma n tagata to tele jige tɔ,
10 ɲɔ tugun i bole be n natagamanna
i bolo sɛnbɛma te n boloka.
11 Hali n ni n mira, n ko n ni taga dogon dibe tɔ,
alako kɛnɛ min be n na miliŋɛ tɔ, a ni yɛlɛman dibe la,
12 yaga, hali dibe le, a ma fin ile ye.
Hali sue si lakɛnɛ i ye iko tele tɔ.
Dibe ba, kɛnɛ ba, a bɛ si kan i ye.
13 Ile le ka n da, i ka n dogon n nɛɛnɛ bue tɔ.
14 N be i tantula le, bayi n da ɲa makaabɛta, a majabuta.
Iyon, i la daalenu bɛ majabuta han,
n be wo lɔnden i ye.
15 I to be n bangue lamulanna tɛmuɛ min tɔ
i ni n da gundo tɔ,
n bale bele dogonden i la.
16 N to be n tonbi kii ma, n kɛɲa yo bele nun,
wo tuma i ɲanu be n yenden,
i be lɔ́gɛ́ kɔnte min diila n ma,
a bɛ sɛbɛreŋɛ le mu i bolo i la bukke butɔ,
wo ka a taran anu hali dɔndɔ bele fɔlɔren nun.
17 Ee Ala, i la miranu te lɔn, anu siyata.
18 Ka n be anu kɔntila le nun,
anu siyata mɛɲɛn kolenu ko.
Tɛmuɛ bɛ n tini kunɛn, n hakkile be tola ile len ma.
19 Ee Ala, yandi, i ni mɔgɔ koroŋɛnu faga!
Wo mɔgɔ fagalánu, anu ni anu matuntun n na!
20 Bayi, i jaguenu le mu anu la, anu be i tɔgɛ fɔla mɔgɛnu janfa koe la,
anu be anu kalila i tɔgɛ la foniya kunma.
21 Alatala, mɔgɛnu minnu be i kɔnna, a ma bɛn ba nde ni wonu kɔn?
Minnu be i kɛlɛla, wo mɔgɛnu la ko te sɛɛya n ɲɛ ba?
22 N be wonu kɔnna le kɔnnɛnteya bɛ la;
anu bata ma n jaguenu la.
23 Ee Ala, n juse butɔ lasaga, i ni n lɔn!
Iyon, n fɛsɛfɛsɛ, n be kɔntɔfiliren min na, i ni a lɔn.
24 A fɛlɛ ka n be kila koroŋɛ le kunma.
N bata i táran: min mu kila ɲinma la, i ni n sɔ wolo tɔ abada.