Suunu beete Babilɔn jamanɛ tɔ
137
Babilɔn saa kɔɛɛnu dala,
mɔ be sigiren ɲɔ le nun,
mɔ be mɔ mirala Siyɔn na ko la,
mɔ ni kɛnɛ dila.
2 Mɔ be mɔ la kɔndiŋɛnu aɲɛren,
ka anu bakku lɔgɛnu kanna wo kɔɛɛnu da fɛ.
3 Awa, ɲɔ le mɔ bitalanu tota mɔ maɲininkala,
aa mɔ ni beetenu bɔɔ;
mɔ tɔɔrɔlanu be a fɔla mɔ ye, anu ko:
«Wo ni Siyɔn sɛɛwa beete donu bɔɔ mɔ ye!»
4 Kɔnɔ ee, mɔ ɲan si nɔ beete bɔɔla Alatala ye kama le luntan jamanɛ tɔ?
5 N ko n fan ma: Darisalamu saa, ka n ɲinata i ma feu,
n bolo ɲinma bole tugun ni ɲina n ma.
6 Darisalamu saa, ka n ma n na mira lataga i ma feu,
ka n ma n na ɲagalin fisamante lataga i ma feu,
awa, n nɛŋɛ ni nara n nɛgɛraŋɛ la.
7 Alatala, i kana ɲina Edɔmi kaanu la kuma ma de,
anu tota min fɔla Darisalamu saa tiɲa luŋɛ, anu ko:
«Wo a tiɲa! Wo a tiɲa han a daŋɛ tɔ!»
8 Ile, Babilɔn saa majabureŋɛ,
min be naala tiɲala kɔtɛ,
hɛra be mɔgɛ ye
min be i la wali koroŋɛ ɲɔgɛ lasaagila i ma,
i ka min ma mɔ la nun.
9 Hɛra be mɔgɛ ye
min be i la deŋɛnu bitala,
a ni anu muɲunkun fata tɔ.