Hakkili bɛ sɔ koe Alatala ma
40
Dauda la beete do le ka, beeti bɔɔlanu la kuntige ye.
2 N bata n hakkile bɛ sɔ Alatala ma, a ni n dɛman;
a ka a tolomasɔ n na, a ka n kulɛ mɔɛ.
3 A ka n nayɛlɛ bɔɔla dinka banba makilandeŋɛ tɔ, bɔra tɔ.
A ka n kɛŋɛnu sɔ fata kunma, a ni n na kilanu lasabati.
4 Wo butɔ, a ka beeti nama sa n juse tɔ,
min be maren tantue la mɔ la Ala ye;
mɔgɔ siyama si a yen anu ni kilan a la,
anu ni anu yɛtɛ taaku Alatala la.
5 Hɛra be mɔgɛ ye, min be a yigi sɔren Alatala ma,
min te a kɔma tafɛlɛ fan nakoloyalá la,
a mɛn te sɔ kuye batulá kɔma.
6 Ee n Marige Alatala,
i be kabanako minnu maren anun i la miranu mɔ mafanna, wonu siyata.
I mulunɲɔgɔ yo bele.
Ka n ko n ni i la wale bɛ fɔ,
anu siyata kɔnte ma.
7 I bele diren sarika bɔɔ koe tun de ye,
i bele diren sarika bintannɛŋɛ nun junubu kafari sarika ye.
I bata n tole laka.
8 N ka a fɔ wo butɔ, n ko: «Awa nde le mu ka,
n bata na iko kitabu sɛbɛreŋɛ be n na ko fɔren ki min na.»
9 Ee n na Ala, a sɔgɔ be n na, n ni i sagona koe ma;
i la sariya be n sondoŋɛ daŋɛ tɔ.
10 N be i la teleŋɛ kibaru ɲinma lakela mamadɛn banba tɔ.
Ee Alatala a fɛlɛ,
i ka a lɔn n te n mɔdɛ wo la.
11 N te nɔ n mɔdɛla i la tɔɲa ma.
N si i la ko ɲinma nun i la malakisi koe fɔ le.
N te i la fonisireya nun i la tɔɲa dogon jama banba la.
12 Ee ile Alatala, i te balan kinikinila n ma;
i la fonisireya nun i la tɔɲa be n kantala tɛmuɛ bɛ.
13 Ko koroŋɛ bata n namilin min dan bele.
N na junube bata dusu n kunma,
han n te nɔ n ɲa layɛlɛla.
Anu bata siya n kunsige ko,
wolo ka limaniya ban n bolo feu.
14 Yandi Alatala, i ni sɔn i ni n nakisi;
Alatala, na n dɛman teriya la.
15 Minnu be fɛrɛ ɲinila n nɛ bɔɔ koe la,
wonu si malu ka kɔntɔfili ɲɔgɔn fɛ.
Anu be sɛɛwala n na tɔɔrɛ la,
anu si naa malu anu ni saagi.
16 A mɛn, anu be yola n na anu be a fɔla n ma: «Ee!»
awa maluya ni anu da balan.
17 Min bɛ be sɔren ile kɔma,
anu ni sɛɛwa ka ɲagalin i la ko la.
I la kise di minnu ye,
wonu si a fɔ tɛmuɛ bɛ, «Tantue be Alatala ye.»
18 Fondobɔnɛ nun misikinɛ le mu nde la,
kɔnɔ, Marige be a mirala n na ko la.
Ile le mu n dɛmanná la anun n nakisilá.
N Marige Ala, i kana mɛ n dɛman koe la!