Bandiyabaga la Ala mataraŋɛ
41
Dauda la beete do le ka, beeti bɔɔlanu la kuntige ye.
2 Hɛra be mɔgɛ ye min be a hakkile toren tɔɔrɔbaganu ma.
Alatala si a latanga le tɔɔrɛ tɛmuɛ.
3 Alatala si a mɛnni, a si a balu
han a ni to hɛra tɔ dunuya.
I te a to a jaguenu sagoe tɔ.
4 Ka a ma kende, Alatala si a dɛman a la safeŋɛ tɔ.
A la bande wagate, a be nala a sa ɲa bɛ tabɛnna.
5 N ko: «Alatala i ni kinikini n ma,
i ni n nakendeya hali n to n bata junube ma i la.»
6 N jaguenu be kuma koroŋɛ fɔla n ma, anu ko:
«Ee, kɛ be nala fagala muntuma?
A tɔgɛ ni muttɛ kisanna!»
7 Ka anu dɔndɔ nata n yendula, a ni foniya kuma fɔ n ɲɛ,
kɔnɔ a juse tɔ, a be ko koroŋɛ le fɔla.
A tini bɔɔ n kunma, a ni naa wo ɲamakaran a filaɲɔgɛnu ye.
8 N kɔnbaganu bɛ be n na ko kɔyɛkɔyɛla ɲɔgɔn tɛma;
anu be n tɔɔrɔ fɛrɛ ɲinila.
9 Anu be a fɔla: «Bandiya koroŋɛ bata a bita.
A be kɛ sa min maren ka, a te wuli bitugun.»
10 Hali n kɔnpini ɲinma n be laaren min na,
n nun min tota dɔmɔre mala nun kan dɔndɔ,
wo bata a kɔ sɔ n na.
11 Kɔnɔ ile Alatala, i ni kinikini n ma i ni n nawuli,
alako n ni n jaguenu sɔŋɛ lasagi anu ma.
12 Ka n jague ma taga nɔ sɔtɔ n ma,
n si a lɔn wolo la ka a fɔla i bata sɛɛwa n na.
13 I si n kɔtɔ sɔ le, i si a taran kɔnɔ yo bele n na,
i bata n nasigi i ɲala kudai.
14 Tantue be Alatala ye bani Isirayila kaanu la Ala, ka bɔɔ a fɔlɛ ma, han kudai.
Amina, amina.