I hakkile to Ala ma
27
Dauda la beete do le ka.
Alatala le mu n na kɛnɛ nun n nakisilá la.
N bɛnta kilanna ɲɔmɔ la?
Alatala le mu n natangalá la n na dunuya takunte butɔ.
N ɲan bɛnta kilanna ɲɔmɔ la?
2 N kɛlɛɲɔgɛnu anun n jaguenu,
minnu be ko koroŋɛ mala, ka wonu be nala n digii ma tɛmuɛ min tɔ,
alako anu ni n bale halagi feu,
anu le yɛtɛ le be surunna ka boe.
3 Hali kɛlɛlá jama banba madɛnta n kɛlɛ koe la,
kilaŋɛ te naa to n juse tɔ.
Hali n kɛlɛlá wulita n kɛlɛ koe la,
n si dɛnkɛnɛya le n natanga koe ma.
4 N be ko dɔndɔ le maɲininkala Alatala ma.
Min di n ɲɛ koola, wolo mu ka:
n ni Alatala la hɔrɔma boŋɛ labatu n na simaya bɛ butɔ,
n hakkile ni to Alatala la ɲinmaya ma,
n ni to a la batu boŋɛ yenna.
5 Tɔɔrɔ wagate, a si n natanga le a la boŋɛ tɔ,
a si n dogon de wo kɔtɔ;
a ni n nayɛlɛ fata kunma.
6 Awa, n jague minnu be n namilinden, n si kunnawule sɔtɔ le wonu kunma.
N ni sarikanu bɔɔ a la hɔrɔma dingira tɔ ka n kulɛ mayɛlɛ sɛɛwa la;
n ni ɲagalin beete bɔɔ, n ni beete bɔɔ Alatala ye.
7 Ee Alatala, i tolomasɔ n kulɛ la, n be nala i mataranna.
I ni kinikini n ma, i ni n jaabi.
8 N be n mirala i la kuma la, i ko:
«Wo ni kata bɛ ma wo ni to n ɲakɔtɔ.»
Awa Alatala, n juse be a fɔla wo butɔ:
n be kata bɛ mala n ni to i ɲakɔtɔ.
9 I kana i ɲakɔtɔ dogon n na;
i kana i la jondeŋɛ bee dumɛŋɛ la.
Ile tota n dɛmanna.
Awa n na malakisilá Ala,
i kana n aɲɛ, i kana n boloka.
10 Hali n nɛɛnɛ nun n baaba ka n boloka,
kɔnɔ Alatala kan si n jigan de.
11 Ee Alatala, i ni i la kila yita n na,
i ni n kun sɔ kila telendeŋɛ la,
n jaguenu kana sago sɔtɔ n kunma.
12 I kana n to n kɛlɛɲɔgɛnu sagoe tɔ,
bayi foniya fɔ seedenu bata wuli n digii ma,
nanbaratɔɛ le mu anu la.
13 Kɔnɔ n be laaren a la n si Alatala la ɲinmaya yen de,
n si a yen de kɛ dunuya butɔ, mɔgɔ balureŋɛnu tɛma.
14 Awa, i hakkile to Alatala ma,
i ni sɛnbɛ jigan, i ni limaniya i nɛɛ bɛ la.
Iyon, fɔ i ni i hakkile to Alatala ma.