Haramu malanu anun Ala la jama
14
Dauda la beete do le ka, beeti bɔɔlanu la kuntige ye.
Hakkili bɔnɛnu be a fɔla anu juse tɔ, aa Ala bele feu.
Anu be tiɲaren de!
Anu mu haramu malanu le la,
hali dɔndɔ bele ko ɲinma mala!
2 Alatala bata a ɲa sɔ adamadeŋɛnu la kabɔɔ saŋɛ tɔ,
a ni a fɛlɛ ka hakkilima do be, min be Ala ɲinila.
3 Kɔnɔ anu bɛ bata kila ɲinma boloka, anu bɛ bata sama.
Ko ɲinma malá yo bele,
hali mɔgɔ dɔndɔ, a bele.
4 Yaga, hakkilima yo bele ko koron malanu tɛma?
Anu be n na jama ɲagankatala,
ka a la geenɛ dɔmɔ tun!
Wo butɔ, anu te Alatala mataran.
5 I ma a yen, kilaŋɛ banba be anu tɔ,
bayi Ala be telenbaganu tɛma.
6 Wo dita tɔɔrɔbaganu la yige tiɲala le ba?
Kɔnɔ Alatala le mu anu yige la.
7 Ee, Isirayila la malakise ni na kabɔɔ Siyɔn kɔnkɛ tɔ!
Alatala ni a la jama bɔɔ anu jaguenu bolo!
Wo lun, Yaguba bɔnsɛ si sɛɛwa le.
Iyon, ale Isirayila la jama si ɲagalin de.