Sarika lakelanu la sarika fɔlɛnu
9
Tele sagin luŋɛ, Musa ka Harona nun a la deŋɛnu sarika lakelanu, anun Isirayila kayibanu kele.
2 A ka a fɔ Harona ye, a ko: «I ni taga sarika fila jigan: tuuradeŋɛ anun saaka kontoŋɛ, lanjuru yo bele minnu la. Do be mala i la junubu kafari sarika la, doe be mala sarika bintannɛŋɛ la. I ni taga anu yita Alatala la.
3 I ni a fɔ Isirayila kaanu ye, i ko: ‹Wo ni sikule dɔndɔ bɔɔ junubu kafari sarika la. Wo ni tuuradeŋɛ nun saaka deŋɛ jigan minnu bata san dɔndɔ sɔtɔ, lanjuru bele minnu la, wo ni anu bɔɔ sarika bintannɛŋɛ la.
4 Wo mɛn ni tuura nun saaka kontoŋɛ bɔɔ kanunteya sarika la Alatala ye. Wo ni sugu kolo tugureŋɛ sarika tugun bɔɔ, tule be basanden min fɛ. Wo ni wo bɛ bɔɔ, bayi Alatala si naa a yɛtɛ labɔɔ le wo ma bi.›»
5 Musa ka sarika lakelanu nun jama yamɔri sarikanu minnu bɔɔ koe la, anu ka wonu doni hɔrɔma dingira dondula tɔ. Jama bɛ ka a madon, anu sɔta Alatala ɲala.
6 Musa ka a fɔ anu ye a ko: «Alatala ka wo yamɔri min na, wolo mu ka; wo ni a ma, a ni naa a la nɔɔra yita wo mɔ la.»
7 Wo butɔ, Musa ka a fɔ Harona ye a ko: «I madon sarika bintandula la. I ni junubu kafari sarika nun sarika bintannɛŋɛ bɔɔ kunsara la i yɛtɛ ye, anun jama ye. Wo kɔma, i ni wo sarika doe bɔɔ jama kunsara la, iko Alatala be a yamɔriren ki min na.»
8 Awa, Harona ka a madon sarika bintandula la, a nata tuuradeŋɛ kannatɛgɛ a yɛtɛ junubu kafari sarika la.
9 A la deŋɛnu ka tuura base don a bolo. A ka a bolo soliŋɛ lajigi base tɔ, a ka do lasulen binanu ma minnu be sarika bintandula tunku naanɛ tɔ. A ka base tɔɛ bɔn sarika bintandula lanbaŋɛ ma.
10 Kolofeŋɛ kɛ́ŋɛ́, anun a kɔkelenu nun laare min be juse ma, a ka wo bɛ bintan sarika bintandula kunma junubu kafari sarika la, iko Alatala be Musa yamɔriren ki min na.
11 Kɔnɔ a ka a sube nun a bolé bintan daaka kɔma la.
12 Wo tanbi kɔma, Harona ka sarika bintannɛŋɛ kannatɛgɛ. A la deŋɛnu ka wo base don a bolo, a naata a wussɛ sarika bintandula sɔngɔnu ma.
13 Anu ka sarika sube kuntenu nun a kuŋɛ don a bolo, a ka wo bɛ bintan sarika bintandula kunma.
14 A to banta a tetekenu nun a kɛŋɛnu lakola, a ka anu bintan anu nun sarika bintannɛŋɛ la sarika bintandula kunma.
15 A to ka wo ban, Harona ka jama tɛn sikule kannatɛgɛ, a ni ma junubu kafari sarika la jama ye. A ka wo ma le iko a ka a yɛtɛ tɛŋɛ ma ki min na.
16 Wo kɔma, a nata sarika bintannɛŋɛ bɔɔ a sariya kii ma.
17 A ka sugu kole tugureŋɛ bolo ɲa dɔndɔ kɔɔ, a naata a bintan sarika bintandula kunma, ka a sa sarika bintannɛŋɛ kunma min bɔɔta ɲɔ wo saguma.
18 Wo kɔma, a naata tuura nun saaka kontoŋɛ kannatɛgɛ kanunteya sarika la jama ye. A la deŋɛnu ka wo base don a bolo, a ka a wussɛ sarika bintandula sɔngɔnu ma.
19 Anu ka tuura nun saaka kontoŋɛ kɛ́ŋɛ́ jigan, min be anu fɔɲɛ nun anu teteke mafanna, anun anu kɔkelenu, anun laare min be anu juse ma,
20 anu ka wo bɛ sa sube siise kunma sarika bintandula kunma, anu ka a bɛ bintan.
21 Yannun Harona ni wo sarika subenu siise nun anu bolo ɲinma wote sa ɲɔ, a ka anu mayɛlɛ, a ka anu lindan Alatala ɲala a kɛrɛkɛrɛ koe la a ye, iko Musa ka a yamɔri ki min na.
22 Harona to banta junubu kafari sarika, sarika bintannɛŋɛ, nun kanunteya sarika bɔɔla, a nata a bolenu lafonti, a dubata jama ye, jɔnɔn a jigita sarika bintandula sɔngɔ la.
23 A la jigireŋɛ, ale nun Musa donta hɔrɔma dingira butɔ. Anu bɔɔta ɲɔ butɔ, anu fila bɛ naata duba jama ye. Wo tɛmuɛ le Alatala la nɔɔra yitata jama bɛ la.
24 Alatala ka ta lajigi sarika bintandula kunma, a ka sarika bintannɛŋɛ nun kɛ́ŋɛ́ bintan. Jama to ka wo yen, anu ka anu kulɛ mayɛlɛ ɲagaliŋɛ la, anu butinta duge ma.