Sarika lakelanu sɔ sarika
8
Alatala kumata Musa ye, a ko:
2 «Harona nun a la deŋɛnu kele hɔrɔma dingira dondula tɔ. I ni anu la donfen saniyandeŋɛnu nati, anun tulu saniyandeŋɛ, anun tuura min be bɔɔla junubu kafari sarika la, anun saaka konton fila, anun boroŋɛ, dɛgɛ lɛbini bɔnɛnu be min butɔ.
3 I ni Isirayila jama bɛ madɛn hɔrɔma dingira dondula tɔ.»
4 Musa ka Alatala la yamɔre lakamali, jama tugun madɛnta hɔrɔma dingira dondula tɔ.
5 Musa ka a fɔ jama ye, a ko: «Alatala bata n yamɔri n ni kɛ ma.»
6 Awa, Musa ka Harona nun a la deŋɛnu madon, a ka anu saniyan je la.
7 Kuta saniyandeŋɛnu butɔ, a ka doroki banba kɔtɔnɛŋɛ fɔlɔ lajigi Harona ma, a nata a tɛ kiti bɛlɛte la, a nata jannanke lajigi a ma, a nata sarika lake doroki bolobɔnɛ lajigi wo tugun kunma, ka a tɛ kiti kuta lenpeŋɛ la.
8 Wo kɔma, a ka jusukun mabutinfeŋɛ lajigi a kaŋɛ la, a ka fondo bɛlɛma filaa sa wo butɔ minnu be Ala sagoe yitala.
9 A ka kuntarɛfeŋɛ milin Harona kuŋɛ la, a ka sanu wala lanma sa wo ma, min be mala a la saniyaŋɛ tɔnkuma la, iko Alatala ka Musa yamɔri ki min na nun.
10 Musa ka tulu saniyandeŋɛ jigan, a ka do sa Ala la hɔrɔma dingira ma, anun feŋɛ min bɛ be a butɔ. A ka wonu lasaniyan ɲɔgɔnna le.
11 A ka tule mapunpun sarika bintandula ma kunɲama wɔrɔwila. A mɛn ka do sa sarika bintandula walifeŋɛnu ma, ji madɛnfeŋɛ belebele, anun a sigifeŋɛ, alako anu ni saniyan.
12 Wo kɔma, a ka Harona kɛrɛkɛrɛ a ni ma sarika lakelá kuŋɛ la, a ka tule do bɔn a kuŋɛ tɔ.
13 Musa nata Harona la deŋɛnu madon, a ka doroki banba lajigi ande tugun ma. A ka anu tɛ nun anu kuŋɛ kiti kuta la, iko Alatala be a yamɔriren ki min na.
14 Wo kɔma, Musa nata tuura madon a ni naa ma junubu kafari sarika la. Harona nun a la deŋɛnu ka anu bolenu sa wo tuura kun tɛma.
15 Musa ka a kannatɛgɛ, a ka a base do jigan, a nata a sa sarika bintandula binanu ma minnu be nun sarika bintandula tunku naanɛ ye. A ka wo ma a bolo soliŋɛ la, alako a ni sarika bintandula lasaniyan. A ka basi tɔɛ bɔn sarika bintandula lanbaŋɛ ma. A ka sarika bintandula lasaniyan ɲɔgɔnna le, alako a ni ma junubu kunsara dula le la.
16 Kɛ́ŋɛ́ min bɛ be ninge tetekenu mabutinden, Musa mɛn ka wo jigan anun laare min be a juse ma, anun kɔkele fila nun anu kɛ́ŋɛ́. A ka wo bɛ sa ta tɔ sarika bintandula kunma.
17 Kɔnɔ tuura tɔɛ kan, a bolé, a sube, nun a jaaɲɛ, a ka wolo bintan ta la daaka kɔma, iko Alatala ka a yamɔri ki min na nun.
18 Wo kɔma, Musa nata saaka kontoŋɛ madon min si naa ma sarika bintannɛŋɛ la. Harona nun a la deŋɛnu ka anu bolenu sa wo saaka kun tɛma.
19 Musa ka a kannatɛgɛ, a ka a base wussɛ sarika bintandula sɔngɔnu ma.
20 A ka saaka makuntu kuntu mɛsɛŋɛnu la. A kuŋɛ, a kuntenu nun a kɛ́ŋɛ́ min be sube ma, a ka wolonu bintan ta la.
21 A ka saaka tetekenu nun a kɛŋɛnu lako, a naata na saaka kontoŋɛ wunde bɛ bintan ta la sarika bintandula kunma sarika bintannɛŋɛ la, min kuɲɛ di Alatala ye. A ka wo bɛ ma le iko Alatala ka a yamɔri ki min na nun.
22 Musa nata saaka konton filaɲɔgɛ jigan min si sɔdula dii mɔgɛ ma sarika lake wale la. Harona nun a la deŋɛnu nata anu bole sa wo saaka kun tɛma.
23 Musa ka a kannatɛgɛ, a ka a base do jigan, a ka a sa Harona bolo ɲinma tole kɔtɔ, anun a bolo ɲinma bolo kunkuruba ma, anun a bolo ɲinma kɛn kunkuruba ma.
24 A ka Harona la deŋɛnu tugun madon, a ka base do sa anu bolo ɲinma tolenu kɔtɔ, anun anu bolo ɲinma bolo kunkuruba ma, anun anu bolo ɲinma kɛn kunkuruba ma, a ka a base tɔɛ wussɛ sarika bintandula sɔngɔnu ma.
25 Kɛ́ŋɛ́ min be wo saaka sube ma, a nata wo jigan, anun a fɔɲɛ, anun kɛ́ŋɛ́ min be a tetekenu ma, anun laare min be a juse ma, anun a kɔkele filanu nun anu kɛ́ŋɛ́, anun a bolo ɲinma wote.
26 Musa mɛn ka boroŋɛ jigan dɛgɛ lɛbinibɔnɛnu be min butɔ, min be sigiren Alatala ɲatɔ. A ka dɛgɛ lɛbinibɔnɛ dɔndɔ bɔɔ a la, anun dɛgɛ tigilindeŋɛ dɔndɔ a tulunɛŋɛ, anun dɛgɛ lanma. A ka anu sa wo saaka kɛ́ŋɛ́ nun a bolo ɲinma wote kunma.
27 A ka wo bɛ don Harona nun a la deŋɛnu bolo, anu ka wo lindan Alatala ɲala alako a ni lɔn ma a be kɛrɛkɛrɛren ale le ye.
28 Wo tanbi kɔma, Musa ka anu labita anu bolo, a ka anu sa sarika bintandula kunma a ni bintan anun sarika bintannɛŋɛ do. Sarika lakelá sɔ sarika le mu, min bintan kuɲɛ di Alatala ye.
29 Musa ka saaka kontoŋɛ siise jigan wo sarika lakelá sɔ sarika tɔ, a ka a lindan Alatala ɲala a lɔn koe la a bata kɛrɛkɛrɛ a ye, jɔ a nata ma Musa tɛŋɛ la, iko Alatala ka a yamɔri ki min na.
30 Wo kɔma, Musa ka tulu saniyandeŋɛ do jigan, anun base do, min sata nun sarika bintandula kunma, a ka a punpun Harona nun a la deŋɛnu ma, anun anu la kutanu tugun ma. A ka Harona nun a la kutanu lasaniyan ɲɔgɔnna le, anun a la deŋɛnu nun wonu tɛn kutanu.
31 Musa ka a fɔ Harona nun a la deŋɛnu ye, a ko: «Wo sube ni taba hɔrɔma dingira dondula tɔ, wo ni a dɔmɔ ɲɔ, anun dɛgɛ min be boroŋɛ butɔ min mu sarika lakelá sɔ sarika la. N bata yamɔre sa, ile Harona nun i la deŋɛnu le be wo dɔmɔla.
32 Dɛgɛ nun sube min tota, wo si wo tɔɛ bintan.
33 Wo kana bɔɔ hɔrɔma dingira dondula tɔ tele wɔrɔwila kɔtɔ, wo ni to ɲɔ han wo wagate tini kamali. Bayi, fɔ tele wɔrɔwila tini kamali, wo si a taran wo bata ban sɔla.
34 Wo bɛ butɔ, Alatala be wo yamɔriren kɛ koenu la, iko min mata bi. Anu be mala wo junube kunsara le la ko la.
35 Wolo mu, wo ni to hɔrɔma dingira dondula tɔ sue nun tele han tele wɔrɔwila, iko Alatala ka n yamɔri ki min na. Wo butɔ, wo si to baluren Alatala sagoe tɔ, wo te faga ɲɔ.»
36 Awa, Harona nun a la deŋɛnu ka Alatala la yamɔre bɛ ma ɲɔgɔnna, a ka min yita anu la Musa sabu la.