Fan nasaagi sarika la ko sariya
7
«Fan nasaagi sarika sariya le ka: sarika le mu min be saniyanden han a tanbita a tɔ.
2 Fan nasaagi sarika be kannatɛgɛla sarika bintannɛŋɛ be kɛnɛ kannatɛgɛla ka min na le. A base ni wussɛ sarika bintandula sɔngɔnu ma.
3 A kɛ́ŋɛ́ bɛ, a fɔɲɛ nun a kɛ́ŋɛ́ min be a tetekenu ma,
4 a kɔkele fila anun kɛ́ŋɛ́ min be anu ma, anun laare min be a juse mabutinden, wo bɛ ni bɔɔ subu fagareŋɛ ma.
5 Sarika lakelá ni wo bɛ ma sarika bintannɛŋɛ la sarika bintandula tɔ nde Alatala ye. Fan nasaagi sarika le mu.
6 Kaye sarika lakelanu tun de be wo dɔmɔla dula saniyandeŋɛ tɔ, bayi sarika le mu min be saniyanden han a tanbita a tɔ.
7 Junubu kafari sarika nun fan nasaagi sarika bɛ sariyanu mu dɔndɔ le la: sarika lakelá min bata wo kunsara lake, ale le be wo sube dɔmɔla.
8 Sarika bintannɛŋɛ bolé tugun be tola sarika lakelá le bolo min be wo sarika lakela.»
9 «Sugu kole sarika tugun, a tabareŋɛ yo, a yilandeŋɛ yo, wonu tugun si ma le sarika lakelá tɛŋɛ la, min be wo sarikanu lakela.
10 Sugu kole sarika min bele tabaren, anun min bele yilanden, ka tule be saren a tɔ ba, ka tulu bele saren a tɔ ba, a be mala Harona la deŋɛnu bɛ tɛŋɛ le la.»
Kanunteya sarika la ko sariya
11 «Kanunteya sarika sariya le ka, min si bɔɔ nde Alatala ye.
12 Ka mɔgɛ be diren a bɔɔla nde Alatala tantu koe la, sa dalifeŋɛ kunma a be min bɔɔla sarika la, a mɛn ni dɛgɛ lɛbinɛnu tugun ɲiɲa tule la, anun dɛgɛ mɛsɛŋɛnu tule be saren minnu ma, anun dɛgɛ mɛsɛŋɛnu minnu be ɲiɲaren tule la.
13 A be kɛ sarika bɔɔla tɛmuɛ min tɔ, a ni dɛgɛ tugun sa a kunma lɛbinɛ be min tɔ. Kɛ sarika tugun be maren kanunteya sarika mɔɔle do le la.
14 Do ni bɔɔ wo dɛgɛ mɔɔle bɛ la, a ni kɛrɛkɛrɛ nde Alatala ma. Wo dɛgɛ be nala mala sarika lakelá le tɛŋɛ la, min be kanunteya sarika base wussɛla sarika bintandula sɔngɔnu ma.
15 Wo kanunteya sarika a be min bɔɔla nde Alatala tantu koe la, a sube be dɔmɔla a be bɔɔla lun min na le, a tɔɛ te to han saguma.»
16 «Kɔnɔ ka mɔgɛ be kanunteya sarika bɔɔla lahiri lakamali koe le la, ka wo ma a yɛtɛ hanige la, wo sube ni dɔmɔ a bɔɔ luŋɛ, kɔnɔ ka do tagata to, wo kan si nɔ dɔmɔla le saguma.
17 Ka a tɔɛ tagata to han wo tugun tabantaka, wo sube bɛ ni bintan gbikki wo tele saba luŋɛ.
18 Ka a tagata taran mɔgɔ do be wo sube dɔmɔla wo lɔgɔ sabaɲɔgɛ, nde Alatala bele a la sarika fɛ. A be tola le iko a bele sarika yo bɔɔren, bayi wo sube bata ma fondo manɛfireŋɛ la. Mɔgɛ min be wo mala a si junube sɔtɔ le wo tɔ.»
19 «Sarika sube min magata fondo saniyanbale la, a ma bɛn wo sube ni dɔmɔ. A bɛnta bintanna le gbikki. Mɔgɔ saniyandeŋɛ le si nɔ wo kanunteya sarika sube dɔmɔla.
20 Kɔnɔ min tini to saniyanbaliya tɔ, wo tigi te nɔ nde Alatala la kanunteya sarika dɔmɔla. Ka a nɔn tagata a dɔmɔ, a si bɔɔ le Isirayila jama ɲaama.
21 Mɔgɛ min tini maga fondo saniyanbale la min be bɔɔren adamadeŋɛ ma, ka wo ma a magata subu saniyanbale la, ka wo ma fondo gbɛtɛ la min bele saniyanden, ka wo tigi tagata kanunteya sarika dɔmɔ min be kɛrɛkɛrɛren nde Alatala ye, wo tigi si bɔɔ le Isirayila jama ɲaama.»
Base nun kɛ́ŋɛ́ dɔmɔ koe tɔŋɛ
22 Alatala kumata Musa ye, a ko:
23 «A fɔ bani Isirayila kaanu ye, i ko: ‹Wo kana kolofen yo kɛ́ŋɛ́ dɔmɔ; a mata ninge la ba, a mata saaka la ba, a mata baa la ba.
24 Kolofeŋɛ min fagata a yɛtɛ ma, ka wo ma subu fatima do bata a faga, wo si nɔ a kɛ́ŋɛ́ lawalila wo be diren a ye ki min na, kɔnɔ wo ɲan kana a kɛ́ŋɛ́ dɔmɔ feu.
25 Mɔgɔ yo ka kɛ́ŋɛ́ dɔmɔ, min be bɔɔla sarika bintannɛŋɛ la nde Alatala ye, wo tigi be labɔɔla le Isirayila jama ɲaama.
26 Wo be sabatila kan do kan, a ma bɛn tugun wo ni kondeŋɛ base min, ka wo ma kolofeŋɛ base.
27 Mɔgɔ yo be base minna, wo tigi be labɔɔla le bani Isirayila jama ɲaama.›»
28 Alatala kumata Musa ye, a ko:
29 «A fɔ bani Isirayila kaanu ye, i ko: ‹Min yo be kanunteya sarika bɔɔla Alatala ye, a ni Alatala tɛŋɛ dii a ma wo sarika bɔɔreŋɛ la.
30 Awa, kolofeŋɛ kɛ́ŋɛ́ min be nala sala ta tɔ, a ni a doni Alatala dula, a nun kolofeŋɛ siise. A bɛnta a ni wo kolofeŋɛ siise lindan Alatala ɲala, ka a kɛrɛkɛrɛ Alatala ye.
31 Sarika lakelá ni wo kɛ́ŋɛ́ bintan sarika bintandula kunma. Wo kolofeŋɛ siise be tola Harona nun a la deŋɛnu sarika lakelanu le ye.
32 Wo la kanunteya sarikanu butɔ, wo ni kolofeŋɛ bolo ɲinma wote dii sarika lakelá ma.
33 Kɛ sarika lakelá min bata base nun kɛ́ŋɛ́ bɔɔ kanunteya sarika la, kolofeŋɛ bolo ɲinma wote be mala wolo tɛŋɛ la.
34 Alatala bata nátá min jigan a te tiɲa abada, wolo mu ka: Isirayila kaanu la kanunteya sarika butɔ, anu be kolofeŋɛ siise min lindanden Alatala ɲala, anun kolofeŋɛ bolo ɲinma wote anu be min bɔɔren, wo bɛ be mala Harona sarika lakelá nun a bɔnsɛ tɛŋɛ le la.
35 Bɔɔla Harona ma, han a bɔnsɛ bɛ, min yo be mala sarika lakelá la lun min na, a be wolo sɔtɔla sarika bintannɛŋɛnu tɔ.
36 Anu to be sɔla sarika lakelanu la, Alatala ka wo yamɔre dii bani Isirayila kaanu ma anu ni kɛnɛ wo diila anu ma. Yamɔre le mu min te tiɲa abada.›»
37 Awa, sariya le mu wo la, sarikanu la ko tɔ, sarika bintannɛŋɛ, sugu kole sarika, junubu kafari sarika, fan nasaagi sarika, sarika lakelá sɔ sarika nun kanunteya sarika.
38 Alatala bata wo bɛ ɲamakaran nun Musa ye Turisinina kɔnkɛ kunma a to ka Isirayila kaanu yamɔri anu ni sarikanu nati Turisinina janfue tɔ.