Harona la den fila bintan koe Alatala la ta la
10
Harona la deŋɛnu tɛma, fila be ɲɔ, Nadabi nun Abihu. Wonu ka sorayi bintanfeŋɛnu jigan, anu ka ta kenbue sa anu butɔ, anu naata sorayi bintan Alatala ɲala. Kɔnɔ anu ma wo ta jigan Ala la sariya kila la.
2 Wolo ka a ma, Alatala ka ta lajigi anu ma, wo ta ka anu faga Alatala la hɔrɔma dingira dula saniyandeŋɛ butɔ.
3 Musa ka a fɔ Harona ye a ko: «Alatala ka wo lalɔn de nun kɛ la, a to ka a fɔ, ‹Minnu be madonden n na, anu ni a lɔn n saniyanta, anu ni n biliya jama bɛ ɲakɔtɔ.›» Harona ka a mɔdɛ jen.
4 Musa ka Misayɛli nun Elisafan kele, Harona baaba dɔgɔ Usiyɛli la deŋɛnu. A ka a fɔ anu ye a ko: «Wo na, wo ni wo baabadɔndɛnu fure doni daaka kɔma la, ka min yanfata dula saniyandeŋɛ la.»
5 Awa, anu ka anu furenu doni daaka kɔma, iko Musa ka anu yamɔri ki min na. Anu ka sarika lake kutanu to anu fure ma.
6 Wo kɔma, Musa ka a fɔ Harona nun a la den kayiren tɔɛnu ye, Elasari nun Itamari, a ko: «Wo kana wo kunsige laboloka, wo kana wo la kutanu tugun fara. Wo kana fenfen ma min si nɔ suunɛ yitala kɛ mɔgɛnu faga koe la, alako Alatala kana dumɛn jama ma, a ni wole tugun faga. Wo nɛɛnɛdɔndɛnu Isirayila kaanu kan si nɔ suunula le kɛ mɔgɛnu la ko la Alatala ka minnu faga ta la.
7 Wo kana bɔɔ Ala la hɔrɔma dingira dondula tɔ taga koe la kan do kɛ lanuma, ka wo ma wo si faga le, bayi wo be kɛrɛkɛrɛren Alatala ye a la mɔgɔ masubɛreŋɛnu le mu wo la.» Anu ka Musa la yamɔre labatu.
8 Alatala kumata Harona ye, a ko:
9 «Wo kana beere mɔɔli yo min wo siisireŋɛ ni naa don Ala la hɔrɔma dingira butɔ. Ka wo ka wo ma, wo si faga le. Wo sariya te tiɲa wo bɔnsɛ ye abada.
10 Wolo si a ma wo si nɔ a tɛtɛgɛbɔla, min be saniyanden Alatala ye, anun a be min tola adamaden tɛŋɛ la; saniyaŋɛ nun saniyanbaliya.
11 Wolo mɛn si a ma wo si nɔ Isirayila kaanu karanna Alatala la yamɔrenu la, a be minnu diiren anu ma Musa sabu la.»
12 Musa ka a fɔ Harona nun a la den tɔmanu ye, Elasari nun Itamari, a ko: «Sugu kolo sarika min be bɔɔren bɔɔla Alatala ye, a tɔɛ min ma bintan ta la, wo ni wo tɔɛ dɔmɔ sarika bintandula sɔngɔ. Wo kana lɛbinɛ sa a kunma, bayi a saniyanden han a tanbita a tɔ.
13 Wo ni a dɔmɔ dula saniyandeŋɛ le tɔ, bayi sarikanu tɛma minnu be kɛnɛ bintanna Alatala ye, a be a yamɔriren kɛ sarika tɔɛ ni ma i tɛŋɛ nun i la deŋɛnu tɛŋɛ le la.
14 Kanunteya sarika sube siise nun a wote wo ka min lindan Ala ɲala, ka a kɛrɛkɛrɛ a ye, wo mɛn ni wo dɔmɔ dula do tɔ ka min be saniyanden, wonu mu wo tɛŋɛ le la; ile, i la den kayireŋɛnu, anun i la den musereŋɛnu. Ala bata wo yamɔre dii Isirayila kaanu ma anu la kanunteya sarikanu la ko la.
15 Wote min be bɔɔla yo, anun siise min be lindanna yo, wonu ni sa kɛ́ŋɛ́ kunma min be bintanna, anu ni wo bɛ yita Alatala la betunna. Wo kɔma, anu ni naa ma wole tɛŋɛ la: ile nun i la deŋɛnu wo ni a dɔmɔ, iko Alatala be a yamɔriren ki min na. Sariya le mu min te tiɲa abada.»
16 Awa, Musa to ka sikule la ko maɲininka, min be bɔɔren junubu kafari sarika la, a naata a mɔɛ aa anu bata a bɛ bintan ta la. Wo butɔ, a dumɛnta Elasari nun Itamari ma, Harona la deŋɛnu minnu ma faga. A ka a fɔ wonu ye a ko:
17 «Fen de wo ma kɛ junubu kafari sarika tɔɛ dɔmɔ dula saniyandeŋɛ do tɔ? Wo sarika be saniyanden han a tanbita a tɔ. Alatala be a diiren wole le ma, alako Isirayila jama junube ni kafari, a ni ma kunsara la anu ye Alatala ɲala.
18 Kɛ sarika base bele donden dula saniyandeŋɛ tɔ, tanta kɔtɔ. Awa a bɛnta le nun wo ni a sube dɔmɔ dula saniyandeŋɛ tɔ, iko n be a yamɔriren ki min na nun.»
19 Harona ka Musa jaabi a ko: «Bi n na deŋɛnu bata anu la junubu kafari sarika nun anu la sarika bintannɛŋɛ bɔɔ Alatala ɲala. Kɔnɔ kɛ ko bɛlɛŋɛ mɔɔle to be n masɔtɔren, ka nde si junubu kafari sarika sube dɔmɔ bi, kɔnɔ Ala si sɔn de wo la ba?»
20 Musa to ka wo jaabire mɔɛ, a sɔnta a la.