7
Alatala ka a fɔ Musa ye, a ko: «I tolomasɔ, n bata i ma n faliŋɛ la Firauna ye, i kɔtɔ Harona tugun be mala i la kuma matanbila le la.
2 N be i yamɔrila min bɛ la, ile be wolo fɔla i kɔtɔ Harona ye. Ale tugun si naa wo tafɔ Firauna ye, alako a ni bani Isirayila kaanu boloka anu ni bɔɔ a la duge tɔ.
3 Kɔnɔ nde si Firauna hakkile labɛlɛya le. Hali n ka n na tɔnkumanu anun n na kabanakoenu lasiya Misira duge tɔ,
4 Firauna te a tolomasɔ wo la. N si naa n bole sa le Misira ma, n mɛn si naa n na mamadɛŋɛ labɔɔ Misira duge tɔ, wolo be tabɛnden bani Isirayila kaanu ma, n na jama. N si Misira kaanu jihadi le a ɲinma la.
5 N tini n bole sa anu ma, n mɛn tini bani Isirayila kaanu labɔɔ anu tɛma, Misira kaanu si naa a lɔn de, nde le mu Alatala la.»
6 Musa nun Harona ka a ma ɲɔgɔnna le iko Alatala ka anu yamɔri ki min na.
7 Anu be tagala kumala Firauna ye wagate min tɔ, wo ka a taran Musa bata san bisagin sɔtɔ, Harona tugun bata san bisagin anun saba sɔtɔ.
Harona la tungare
8 Alatala ka a fɔ Musa nun Harona ye, a ko:
9 «Ka Firauna ka a fɔ wo ye: ‹Wo kabanako dɔndɔ ma!›, ile Musa si a fɔ Harona ye a ni a la tungare tajigan a ni a lafili Firauna ɲala, wo si naa ma kaa la.»
10 Musa nun Harona tagata Firauna bata, anu ka a ma iko Alatala ka anu yamɔri ki min na. Harona ka a la tungare lafili Firauna nun a la walilanu ɲala, wo tungare mata kaa la.
11 Kɔnɔ Firauna tugun ka Misira keuyantenu nun durenu kele, wonu tugun ka wo ko dɔndɛ ma anu la keuya sabu la.
12 Anu bɛ ka anu la tungare lafili duge tɔ, tungarenu yɛlɛmanta kaanu la. Kɔnɔ Harona la tungare ka anu tɛn tungarenu kunun.
13 Kɔnɔ wo bɛ butɔ, Firauna hakkile be bɛlɛyaren tun, a ma Musa nun Harona kulɛ lamɔɛ; Alatala ka a fɔ ɲɔgɔnna le nun.
Jihadi fɔlɛ, je ma koe base la
14 Wo tanbi kɔma, Alatala ka a fɔ Musa ye, a ko: «Firauna hakkile be bɛlɛyaren, a be balanden bani Isirayila kaanu bolokala anu ni taga.
15 Taga Firauna dula sinan saguma, a tini be naala bɔɔla a bata, tagala kɔɛɛ dala. Ile tugun ni taga, a ni i taran Nili kɔɛɛ dala, i ni tungare bita i bole la min yɛlɛmanta kaa la nun.
16 I mɛn si a fɔ Firauna ye, i ko: ‹Heburenu Marige Alatala ka n kii i ma, aa n ni a fɔ i ye, aa i ni a la jama boloka anu ni taga alako anu ni a batu janfue tɔ. Kɔnɔ han kɔtɛ i bele a kulɛ lamɔɛla.
17 Wolo mu Alatala ka a fɔ, a ko: aa i si naa a lɔn kɛ-lɛ la ale len mu Alatala la: nde si naa Nili kɔɛɛ je botege le n na tungare la min be bitaren n bole la, a je si naa yɛlɛman base la.
18 Yɛgɛnu minnu be Nili kɔɛɛ tɔ anu si naa faga le, wolo be Nili kɔɛɛ kuɲɛ labɔɔla. Misira kaanu si naa kata le, kɔnɔ anu te nɔ Nili kɔɛɛ je minna.› »
19 Alatala ka a fɔ Musa ye: «A fɔ Harona ye: ‹I la tungare tajigan i ni i bole lafonti Misira duge jenu kunma: a kɔɛɛnu ba, Nili kɔɔ folenu ba, a dalanu ba, anun ji dulanu bɛ kunma, anu si naa yɛlɛman de base la. Base si naa to le Misira duge bɛ tɔ, a si naa to hali ji safeŋɛ lɔgɔnɛŋɛnu anun kurunɛŋɛ butɔ.› »
20 Musa nun Harona ka a ma iko Alatala ka anu yamɔri ki min na. Harona ka tungare tajigan, a ka Nili kɔɛɛ je botege Firauna ɲala anun a la walilanu ɲala, kɔɛɛ je bɛ yɛlɛmanta base la.
21 Yɛgɛnu minnu be nun Nili kɔɛɛ tɔ, anu fagata, Nili kɔɛɛ kuɲɛ bɔɔta. Misira kaanu ma nɔ Nili kɔɛɛ je minna bitugun. Base naata to Misira duge bɛ tɔ.
22 Kɔnɔ Misira durenu tugun ka wo ko dɔndɛ ma anu la keuya sabu la. Firauna hakkile bɛlɛyata, a ma Musa nun Harona kulɛ lamɔɛ; Alatala ka a fɔ ɲɔgɔnna le nun.
23 Firauna wulita a ka a kɔ sɔ a saagita a la boŋɛ tɔ. A ɲan haju ma to wo koe tɔ feu.
24 Kɔnɔ Misira kaanu bɛ ka dinkanu masoe Nili kɔɛɛ fɛfɛnu tɔ ka anu si ji minnɛŋɛ yen, bayi anu te nɔ Nili kɔɛɛ je minna.
25 Alatala la Nili kɔɛɛ botege kɔma, a mata han tele wɔrɔwila.
Jihadi filaɲɔgɛ: langansarimanu
26 Wo tɛmuɛ le, Alatala ka a fɔ Musa ye, a ko: «Taga don Firauna bata, i si kɛ fɔ a ye: ‹Alatala la kuma le ka, a ko: aa i ni a la jama boloka anu ni taga alako anu ni a batu.
27 Ka i ma sɔn anu bolokala anu ni taga feu, a ko, aa a si naa i la jamanɛ bɛ kunnatiɲa langansarimanu la.
28 Nili kɔɛɛ si naa lafa langansarimanu la anu si naa yɛlɛ, anu ni don i la boŋɛ butɔ, i la kiridula tɔ han i la benbe tɔ. Anu si don i la walilanu la boŋɛnu tɔ anun i la jama bata, i la dɛgɛ bintandulanu han a botegedulanu butɔ.
29 Langansarimanu si naa yɛlɛ i ma, i la jama ma a nun i la walilanu bɛ ma.› »