8
Alatala ka a fɔ Musa ye, a ko: «A fɔ Harona ye, a ni a la tungare bita a bole la a ni a lafonti kɔɛɛnu kunma, Nili kɔ folenu kunma, anun dalanu kunma, a ni langansarimanu layɛlɛ Misira duge kunma.»
2 Awa, Harona ka a bole lafonti Misira kɔɛnu kunma, langansarimanu yɛlɛta, anu ka Misira duge bɛ mabutin.
3 Kɔnɔ durenu tugun ka wo ko dɔndɛ ma anu la keuya sabu la: anu ka langansarimanu layɛlɛ Misira duge tɔ.
4 Firauna ka Musa nun Harona kele, a ka a fɔ anu ye: «Wo taga Alatala mataran alako a ni langansarimanu bɔɔ nde nun n na jama kɔma. Wo kɔma, n si naa i la jama boloka le, anu ni taga sarika bɔɔ Alatala ye.»
5 Musa ka a fɔ Firauna ye, a ko: «Mansa, i sago! I be diren de ba langansarimanu ni lamuttɛ i bata anun i la boŋɛnu tɔ, anu ni naa to Nili kɔɛɛ le tɔ? Awa, a bɛnta n ni taga tɛmu miniman de Alatala matarandula, ile nun i la walilanu anun i la jama la ko la?»
6 A ka a jaabi, a ko: «Sinan.» Musa ka a fɔ: «A be naala mala ɲɔgɔnna le. Wo butɔ, i si a lɔn Alatala, mɔ la Ala ɲɔgɔn bele.
7 Langansarimanu si naa yanfaya i la, anun i la boŋɛnu la, anun i la walilanu nun i la jama la. Anu si naa to Nili kɔɛɛ le tɔ.»
8 Musa nun Harona bɔɔta Firauna bata. Musa ka a kulɛ labɔɔ Alatala ma langansarimanu la ko la, a ka minnu lana Firauna ma.
9 Alatala ka Musa la mamataraŋɛ jigan a ye. Langansarimanu sɔntɔta boŋɛnu butɔ, sansaŋɛnu butɔ, anun ɲagama butɔ.
10 Anu ka anu madɛn kurun kurun, anu kuɲɛ koroŋɛ tuguta duge bɛ la.
11 Kɔnɔ Firauna to ka a yen suleŋɛ donden bata ma, a mɛn ka a hakkile labɛlɛya. A ma sɔn Musa nun Harona kulɛ lamɔɛla; Alatala ka a fɔ ɲɔgɔnna le nun.
Jihadi sabaɲɔgɛ: taasenu
12 Awa, Alatala ka a fɔ Musa ye, a ko: «A fɔ Harona ye, a ni a la tungare lafonti, banbaŋɛ min be duge tɔ a ni a botege. A si yɛlɛman de taase la Misira duge bɛ butɔ.»
13 Anu ka a ma ɲɔgɔnna: Harona ka a bole nun a la tungare lafonti, banbaŋɛ min be duge tɔ a ka a botege. Wo bɛ mata taasenu la, anu tuguta mɔgɛnu nun kolofeŋɛnu la. Banbaŋɛ min bɛ be duge kunma, a bɛ mata taasenu la, Misira duge bɛ butɔ.
14 Durenu katata anu la keuya sabu la, ande tugun ni taasenu ɲiɲa, kɔnɔ anu ma nɔ. Taasenu be tuguren mɔgɛnu nun kolofeŋɛnu la.
15 Wo kɔma, durenu ka a fɔ Firauna ye, anu ko: «Ala sɛnbɛ le mu!» Kɔnɔ wo bɛ, Firauna hakkile mɛn be bɛlɛyaren tun, a ma sɔn Musa nun Harona kulɛ lamɔɛla; Alatala ka a fɔ ɲɔgɔnna le nun.
Jihadi naaniɲɔgɛ: siisa da kunamanu
16 Wo kɔma, Alatala ka a fɔ Musa ye, a ko: «I ni wuli sinan saguma piri, i mɛn ni taga Firauna yen. A tini be bɔɔla tagala kɔɛɛ tɔ, i ni a fɔ a ye: ‹Alatala la kuma le ka, a ko: aa i ni a la jama boloka alako anu ni taga a batu.
17 Ka i ma sɔn a la jama bolokala anu ni taga, awa, a si naa siisa da kunamanu boloka le ile nun i la walilanu anun i la jama ma anun i la boŋɛnu butɔ. Misira kaanu la boŋɛnu anun anu la dugenu si naa fa le siisa da kunamanu la.
18 Kɔnɔ wo lun, Ala si fatanfase ma le Gosɛn jamanɛ ye, a la jama be sabatiren ka min na. Siisa da kunamanu te to ɲɔ, alako i mɛn ni a lɔn Alatala be kɛ duge tɔ.
19 A si a la jama lakisi le jihade ma, min be naala wo masɔtɔla. Wo kabanakoe be mala sinan de.› »
20 Alatala ka a ma ɲɔgɔnna le. Siisa da kunama nata anu kurun kuruŋɛ banba dan bele min na ka tugu Firauna nun a la walilanu la boŋɛnu butɔ la, anun Misira duge butɔ bɛ. Siisa da kunamanu ka duge bɛ kunnatiɲa.
21 Wo sabu la, Firauna ka Musa nun Harona kele a ka a fɔ anu ye, a ko: «Wo taga wo la sarika bɔɔ wo la Ala ye, kɔnɔ n na duge butɔ de!»
22 Musa ka a jaabi, a ko: «A te bɛn ɲɔgɔnna de! I ni a lɔn mɔ be kolofeŋɛnu minnu bɔɔla sarika la, wonu sarika bɔɔ koe mu tana le la Misira kaanu ye. Mɔ tini wo sarikanu mɔɔle bɔɔ Misira kaanu ɲala, kaa anu te mɔ mabun de kurenu la?
23 Mɔ be tele saba tagamaŋɛ le mala janfue tɔ, mɔ ni naa sarikanu bɔɔ Alatala ye. Ka mɔ la Ala tagata a yita mɔ la ki min na, awa.»
24 Firauna ka a fɔ Musa ye, a ko: «Awa, nde si naa wo boloka, wo ni taga janfue tɔ sarika bɔɔdula Alatala ye, wo la Ala. Kɔnɔ, ka wo be tagala, wo kana yanfaya de! Wo mɛn ni Ala mataran n ɲɛ.»
25 Musa ka a fɔ, a ko: «N bata sɔn. N tini be bɔɔla i bata, n si Alatala mataran de. Siisa da kunamanu si yanfaya le ile Firauna la sinan, anun i la walilanu la, anun i la jama la. Kɔnɔ, fɔ ile Firauna ni bɔɔ mɔ majuguyala, balan koe la jama ni taga sarika bɔɔdula Alatala ye.»
26 Wo kɔma, Musa bɔɔta Firauna bata, a ka Alatala mataran.
27 Musa ka Alatala mataran min na, Alatala ka a ma le a ye: siisa da kunamanu yanfayata Firauna nun a la walilanu la, sa a la jama kunma. Hali dɔndɔ a ma to.
28 Kɔnɔ wo bɛ butɔ kɛ biyase tugun, Firauna ka a hakkile labɛlɛya, a ma sɔn jama bolokala feu.