Luk 9

Bhe Yésu ɔdhá ɔ́dhádhái tɛ́ɛ́vhɛ́ égí sóórúé

(Mat. 10.5-15; Mákɔ 6.7-13)

1 Nɛ́tɨánɛ kana, bhe Yésu ongá ɔ́dhádhái tɛ́ɛ́vhɛ́ égí sóórúé, bh'aáá kála néibwua bhu náátaátɛ́ i bhó kágyó nɔ́ óúdhúúdhú biti ndúbhu bhó bhe kɛ́ɨ́ra ómbi átógó nɛ́. 2 Hee bh'ɔdhá hɛ bhó kɔ́ɔ ku kágyó nɛ́Ɨnyɨngwa i Angéle bha nɛ́ bhó bhe kɛ́ɨ́ra ógói. 3 Bh'ɔdhyá kála bhó « Mɨɨ́ngɛɨ́ngá bhelé dhu kana bhó nyɔɔ nɔ́, únga ká sɨ́ nɛ́kyɔ́kpɔ, nɛ́mbágálá, náanyɔ, bɛsɨ́ngɨ obhúa ká bhu ɛ́faránga, bhe nómbí kana aángobhu bhelé ánesímísí sóórúé. 4 Bhe átégyó i kékpokpa to aamɨ nɛ́, mɨɨ́ngodho bhelé tó bha drɨ́ nyedia ɨ égye átɛ́gbɔ́tɔ́ nɛ́. 5 Ómbi si kékpokpoba ka aamɨ nɛ́, anyédi átɛ́gbɔ́tɔ́ i bhányɛ nɛ́ nɛ́, bhe mupya néibhwé i akíɔ́ɔnzɔ anyɛ^a , átɛmbanda i bhó anyáádhɔ to kála bhó káángodhé átɛngbanga nɛ́. » 6 Hee bhe óudrwaamɨ kágbá táo néhíɛ bhe kɔ́á, ká hɛ́ káfa átɛ́bhámoí, ká hɛ́ kágyá nɛ́tʉ́ balí i Angéle bha nɛ́, ká hɛ́ kɛ́ɨ́ra ógói, átabɛbɛi kpɛ́ nɛ́.

Bhe Ɛrɔ́dɛ ándreísú ɔvhá ndrɛ Yésu tándrɔdhyɔ

(Mat. 14.1-12; Mákɔ 6.14-29)

7 Átadhɨnga i Ɛrɔ́dɛ, néi ɔnyɛbwʉ ú átɛGaliláya nɛ́ ɔgá ɨ ɔ́dhyɔ́ ndúbhu si Yésu abwʉ ú abɛsɨ́ nɛ́, bhe ándraámbáámbá adúa. Outo nɛ́, sɨ́ ómbi ákʉ́ɛ́ kábwʉ ú kábɔdhyɔ bhó « Yɔáni Mɔbátísí aábórú átonzi ! » 8 Ákʉ́ɛ́ bhó « Nénébi Elíya aábéíhwé ndrɛ tɔkana ! » Ómbi ákʉ́ɛ́ tɔkana bhó « Nénébi kana áténébi ámɛ́ɨ́sɛ́ɛ́lɛ́ aábórú átonzi ! » 9 Bhe Ɛrɔ́dɛ ɔdhyá bhó « Ɨ́má, máfobá má Yɔáni ándredru ! A ká bhó adhíngwɛ akʉ́nɛ́ nɛ́ mágá bhó tɔkana ɔ́dhyɔ́ amámbanga gyó hɛ́ tándrɔdhyɔ nɛ́ nɛ́ ? » Bh'erímá a n'ɔnda bhó ndrogwó Yésu nɛ́.

Bhe Yésu ɛɨ́nyá ombirongwɛ ootu

(Mat. 14.13-21; Mákɔ 6.30-44; Yɔá. 6.1-14)

10 Bhe átadhɨnga i ɔ́dhádhái kɛ́kʉ́a ɨ to ú kɔ́ɔ́bwʉ ɨ nɛ́, bhe kódrwá Yésu ko ɔ́dhyɔ́ ndúbhu si kɛ́sɨ́bwʉ égye nɛ́. Bhe Yésu ɛɨ́ngá hɛ bh'oótwá ndrɛ kɔ́rɔ bha ú átɛ́gbɔ́tɔ́ kana i ánɛrʉ bhó nɛ́Bɛtɛsaída nɛ́ ándrabɛ́. 11 A drʉ ombirongwɛ ootu ɛɨ́tɨa sɔ́ nɛ́, bhe kódrwá nɛ. Bhe Yésu ekpókpá hɛ, bh'erímá a n'ɔdhya kála átɛƗnyɨngwa i Angéle bha nɛ́ ándrɔdhyɔ, a n'ɛɨ́ra ógói si kábwʉ ánemo i nɔ́ra andrɛ nɛ́. 12 A drʉ néíkó ɔtʉ́a a n'odha nɛ́, bhe ɔ́dhádhái kɔ́ʉ́sɨ́a nyɛ bha ú Yésu a ɨ, bhe kɔ́dhyá nɔ́ɔ bhó « Kaátu ómbi ndúbhu si átɛmbanda i bhó kɔ́ɔ átɛ́bhámoí bhu átɛ́fɨ́rɨmɨ ányoóbhúrú, ku kɔ́nda to pá nɛ́mápue i sɨ́ kédho to nɛ́ bhu dhu i sɨ́ kɔ́nyɔ́ nɛ́. Outo nɛ́, sɨ́ ma drɨ́ átóúmá mápue. » 13 Bhe Yésu ɔdhya kála bhó « Amúo s'aamɨ kála dhu i sɨ́ kɔ́nyɔ́ nɛ́. » Ɔ́dhádhái kɔ́dhya bhó « Aátɛ ka, sɨ́ ma nyáá ápye ánɛmápa tɔ́zɛrɛna bhu ɛ́ngɛrɛ sóórúé, be maá ɨ mɔ́ɔ ápye áányɔ́ ányogéyé ómbi si kála ndúbhu. » 14 Sɨ́ ɛ́masí kábwʉ drʉ^b , ká hɛ́ kɔ́ndá mɔ́nda ékóto si tɔ́zɛrɛna nɛ́. Yésu ɔdhya óudrwaamɨ si bhándrɛ nɛ́ kála bhó « Anyéídri ómbi átéíkúdhúmú si ómbi ká hɛ́ to ɛ́tɛɛvhɛ tɔ́zɛrɛna, tɔ́zɛrɛna nɛ́. » 15 Hee bhe kɛ́sɨ́a sɨ́ɨ́sɔ́, bhe kéídría hɛ ndúbhu. 16 Hee bhe Yésu ɛɨ́ngá ɛ́mápa hɛ́ tɔ́zɛrɛna nɛ́ nɛ́ bhu ɛ́ngɛrɛ hɛ́ sóórúé nɛ́ nɛ́, bh'aandría ánɛŋɔ bha ú bhó, bh'ɔʉbwá Angéle átáányɔ́ hɛ́. Bh'oukía hɛ, bh'erímá a n'ɛɨ́gbagba óudrwaamɨ bhó ku kóóbhu to ómbi nɛ́. 17 Hee bhe kɔ́nyá, bhe ányɛhɔ́ kátía ɨ́hɛ kpɛ́. Bhe óudrwaamɨ káapípía ámégí eingili-eingili si kéekékébwʉ nɛ́, bhe kɛ́ɨ́nʉ́a to ɛ́ɨ́kɔlya tɛ́ɛ́vhɛ́ égí sóórúé.

Bhe Pɛ́tɛrɔ ɔdhyá bhó Yésu ɨ́n'a Masɨ́ya

(Mat. 16.13-19; Mákɔ 8.27-29)

18 Nɛ́tɨánɛ kana, Yésu oótúa ndrɛ bhó ku ndrasɛmya, bhe óudrwaamɨ si bhándrɛ nɛ́ kábwʉ tándroobhuru. Ɔɨa hɛ bhó « Ómbi ká ú kɔ́dhya ká bhó má adhíngwɛ ? » 19 Óudrwaamɨ kákɛlya nɔ́ɔ bhó « Ómbi akʉ́ɛ́ kɔ́dhya bhó nyá Yɔáni Mɔbátísí, ákʉ́ɛ́ bhó nyá Elíya, bhe ákʉ́ɛ́ ká ú kɔ́dhya ká bhu bhó nyá nénébi kana áténébi ámɛ́ɨ́sɛ́ɛ́lɛ́, néi orúa átonzi nɛ́. » 20 Hee ɔɨa táo hɛ bhó « Ɨtá aamɨ aákíé nɔgɔ, nya ú mʉdhya bhó má adhíngwɛ ? » Pɛ́tɛrɔ ɔdhya bhó « Nyá Masɨ́ya i nɛ́Ɨ́nyɨ́ Angéle ɔdhyɔ́bwʉ bhó ndra ú ndrɛdhaba nɛ́. » 21 Bhe Yésu avhúa ányɛbɨ́ kpárá bhó káángɔdhyɔ́ bhelé nɔ́dhyɔ nɛ́ nómbí kana ko.

Yésu a ú aábhúa bhó ndronziba mónzi bhó bhe ndroruba móru

22 Bh'ɔdhyá kála tɔkana bhó « Onía bhó ɨ́má, nɛ́Ngwángwɛ i nÓmbí bha nɛ́ mágá nɛ́ɛ́ndrɨɛɛ́ndrɨ́ pima. Bhe óúgé, ánɛkɔána kpɔ́kpɔ́ bhu táo áadhaadhɔí si ɔ́ʉ́bwɔ́ si Mʉ́sɛ bha nɛ́ anɛ, kétíba ma métí bhe kɔ́pwʉba ma mɔ́pwʉ. Bhe átɛtɨánɛ ámɛ́sɔ́tá, bhe máruba. » 23 Átámɛ́zaa, ɔdhya ómbi ndúbhu si kábwʉ drʉ nɛ́ kála bhó « Nómbí i a ú ɔɔ́mʉ́a bhó ndradrwé ma nɛ́, nétí ká pá s'ɨ́nɛ ndrɛ tɔ́kpɛ, bh'ɔtá nékurúsi i bhándrɛ nɛ́ ɛ́tɨ́anɛ kpɛ́, bh'adrwá ma. 24 Outo nɛ́, sɨ́ nómbí i a ú ɔɔ́mʉ́a bhó ndrɛɨ́ra ndrɛ nɛ́, ambwuba ka nɔ́ra i ɛ́ɨ́zɛ́ kpɛ́ anyɛ. Bhe nómbí i a ú apía bhó ndronzí átɛmbanda i bhándrá nɛ́ nɛ́, bh'ɔrába. 25 Asoumbwu gyó i nómbí obhúa nɔ́ ɨ́ drʉ ambwʉa négí i ndúbhu, bh'ɔa táo bh'oúgía, bh'onzía nónzi i ɛ́ɨ́zɛ́ kpɛ́ anyɛ nɛ́ ? 26 Outo nɛ́, sɨ́ nómbí i ɔgá máto náanyɛ bhu átɛtʉ si má ú mádhya nɛ́, hee bhe ɨ́má nɔgɔ, nɛ́Ngwángwɛ i nÓmbí bha nɛ́ mágaba nɔ́tɔ náanyɛ átadhɨnga i mékuba ɨ ánekémbó i bhándrá nɛ́ nɛ́, bhu néi Páápa bha nɛ́ bhu néi áángelú sáátu si bhándrɛ nɛ́ anyɛ. 27 Má nɛ́ mádhyá nyala nzúdhá nɛ́, ómbi akʉ́ɛ́ ká aanyɔɔ́tɔ drɨ́, kónzíba ka tó kángogwo nɛ́Ɨnyɨngwa i Angéle bha nɛ́. »

Bhe Pɛ́tɛrɔ, bhu Yɔáni bhu Yakóbho kógwá Yésu átékémbó i Angéle bha nɛ́

(Mat. 17.1-8; Mákɔ 9.2-8)

28 A drʉ Yésu ɔdhya ɛ́tʉ hɛ́ nɛ́, átɛzaa i ékíní únga ká bhɔgɨna, bh'ɛɨ́ngá Pɛ́tɛrɔ, Yɔáni bhu Yakóbho, bh'eíká kɔ́rɔ átooholokpɔ kana bhó ku ndrasɛmya. 29 A sɨ́ n'asɛmya nɛ́, bhe ánɛŋɔ kérímá ká hɛ́ kándia bhó síze, bhe ógí si bhándrɛ nɛ́ kóúbhúa ébulúuu, ká hɛ́ kándia únga ká sɨ́ nágbára nɛ́. 30 Ka nɔ́dá bha mɔ́da nɛ́, bhe ɛ́masí sóórúé kérímá ká hɛ́ káádhya nɔ́rɔ nɛ́, ɨ́n'abwʉ Mʉ́sɛ bhu Elíya. 31 Kédibwʉ ánekémbó ro, ká hɛ́ káádhya Yésu ro ándrɔ́tɔɔ ndré ú áteYerusalɛ́mɛ nɛ́ ándrɔdhyɔ, únga ká sɨ́ a ú ɔa nónzíyé sɨ́ɨ́sɨ́ Apanɛ́ ɛdhábwʉ nɛ. 32 Ɔ́dhyɔ́ si drɨ́ nɛ́, Pɛ́tɛrɔ bhu amoolíánɛ́hɛ kábwʉ ká hɛ́ káákʉ́ aákʉ́ nányɛ ánɛyɛ́ nɛ́. A drʉ kórua nɛ́, bhe kógwá Yésu ándrekémbó bhu Elíyahɛ bhu Mʉ́sɛ ká hɛ́ káápá nyɛ nɔ́rɔ nɛ́. 33 Átadhɨnga i kábwʉ ɨ ká hɛ́ káándia Yésu ro nɛ́, Pɛ́tɛrɔ ɔdhya bhó « Náadhaadhombíé, ɨ́n'afá átɔmbɛ bhó amábhú bhó nyáá náɛ́ drɨ́ ! Ma ú mapa ɛ́wɛ́ma^c sɔ́ta, bhándrúé nɛ́ kana, Mʉ́sɛ bha nɛ́ kana bhu Elíya bha nɛ́ kana. » Kabwʉ nɔ́tɨ táo asɔdhyɔ gyó i abwʉ ú abɔdhyɔ nɛ́. 34 Átadhɨnga i abwʉ ɨ a n'ɔdhya sɔ́ nɛ́, bhe néndulí aká kɔ́tɔ bh'erímá a n'ɔʉ́pɨa hɛ ándroozízí ro nɛ́, bhe nɛ́ɛrʉ agbá óudrwaamɨ hɛ́ átadhɨnga i kékía ɨ nyɛ átendulí nɛ́ nɛ́. 35 Bhe nɛ́tʉ́ kana ɔgá ndrɛ átendulí ándrɛhɔ, bhó « Néi ɨ́n'a nɛ́Ngwángwɛ i bhándrá nɛ́ i márwá nɛ nɛ́, amʉ́gá nɛ. » 36 Átɛzaa i nɛ́tʉ́ nɛ́ ɔgá ɨ ndrɛ sɔ́ nɛ́, bhe óudrwaamɨ kógwá Yésu a n'eeká bhó nyáá zɨndrɛ ápye nɛ́. Átékíní hɛ́, bhe óudrwaamɨ kéégyébwʉ ékpílíbhíndí átɔ́dhyɔ́ si kógwobwʉ nɛ́, ka nɛ́ ka kódrwé to ombí kana ko nɛ́.

Bhe Yésu ɛɨ́rá nɛ́ngwángwɛ kana i abwʉ ánoudhuudhu biti ro nɛ́

(Mat. 17.14-18; Mákɔ 9.14-27)

37 A drʉ oópua ndrɛ átébhúlobhú nɛ́, bhe Yésu ánoudrwaamɨ hɛ́ sɔ́ta nɛ́ nɛ́ késyá ú átooholokpɔ, bhe ombirongwɛ ootu ekúa bhe kángáasú nɔ́rɔ. 38 Hee bhe nómbí kana átéígo i ombirongwɛ andrɛ eigá ándrɛtʉ́, ɔdhya bhó « Náadhaadhombíé, mánía mɨ ndó nyánya ká ngwɛ́ mʉ́ nɛ́ngwángwɛ masí i bhándrá nɛ́, outo nɛ́, sɨ́ ɨ́n'a nɛ́ngwángwɛ ogóngwɛ kana i má nɔ́ nɛ́ ! 39 Nóudhuudhu biti kana obhua a n'ahʉ́a nɛ tílé-tílé nɛ́, ɔdá ka bha mɔ́da, bh'ɔtʉ́a a n'eípa nɛ́, a n'ɛɨ́ngwá nɛ kpárá, a n'apya nɛ, bh'ɔtʉ́a a n'edia nɔ́tɔ népúlu tándretíkpɔ nɛ́. Bh'atuuta nɛ nyááááá, ka nɛ́ ka nábha nɛ ɛ́gala nɛ́. 40 Bhe mánínga óudrwaamɨ si bhándrúé nɛ́ ndó kéídi nɛ nɔ́tɔ, bhe kanga náátɛ kɔ́rɔ. » 41 A drʉ Yésu ɔgá sɔ́ nɛ́, bh'opá bhó « Kábhá meísihɛ, aamɨ si nádhɨngɔmɛ́ i anɛ ka ɨ aanyɔɔ́rɔ apíápí bhe nya ómbi biti ! Mábhúba aanyɔɔ́rɔ tó bha ze ? Bhe mɔ́ɔ́ngɔngɔba aanyɔɔ́rɔ tó bha ze ? » Ɔdhya nápá nɛ́ ko bhó « Kɛmba mʉ́ andrúɛ́ngwá bha zá ! » 42 Átadhɨnga i nɛ́ngwángwɛ nɛ́ abwʉ ɨ a n'ɔʉ́ndɨa nɛ nɛ́, bhe nóudhuudhu biti nɛ́ bh'apyá nɛ bha átapɛ épwú, bh'ɛɨ́ngwá nɛ kpárá. Hee bhe Yésu ɔʉngbá táo nóudhuudhu biti nɛ́ ko, bh'ɛɨ́rá nɛ́ngwángwɛ nɛ́, bh'aátúa nɛ apanɛ́ ko. 43 Bhe ómbi ndúbhu kámbángábwʉ mámbanga gbagba i sɔ́ ɨ́ nɛ́, áteibwʉa kpɔkpɔ i Angéle bha nɛ́ kógwobwʉ nɛ́.

Bhe Yésu aábhúa ámémiri ámésóórúé bhó ndra ú ndronziba

(Mat. 17.22-23; Mákɔ 9.30-32)

Ómbi pɨ́tɛ́ kábwʉ ká hɛ́ kámbanga mámbanga átɔ́dhyɔ́ ndúbhu si Yésu abɛsɨ́ nɛ́, hee ɔdhya óudrwaamɨ si bhándrɛ nɛ́ kála bhó 44 « Amʉ́gá mɔmbɛ́ ɛ́tʉ si má ú mádhya nyala gaa ɨ́ drɨ́ nɛ́. Outo nɛ́, sɨ́ ɨ́má nɛ́Ngwángwɛ i nÓmbí bha nɛ́, ká ú kóa ma átombi ányɛtɛ́. » 45 Nɔ́dhyɔkana, óudrwaamɨ kabwʉ kɔ́tɨ nɛ́tʉ́ i abwʉ ú abɔdhyɔ nɛ́ ándredru, sɨ́ Angéle abwʉ aángoogyé nɛ nyɔɨ átɛmbanda i bhó káángɔtɨ bhelé nɛ́, bhe kábwʉ ká bhu ánɛɛrʉ bhó nyɔɨ to nɛ.

Adhíngwɛ i ɨ́n'a ámɛ́kpɔkpɔ pima nɛ́ ?

(Mat. 18.1-5; Mákɔ 9.33-37)

46 Átámɛ́zaa, bhe óudrwaamɨ kérɨ́má ká hɛ́ káádhya átéígo i bhányɛ nɛ́ nɛ́ bhó adhíngwɛ i ɛpá kɔ́tɔ átɛkpɔkpɔ́ nɛ́. 47 A drʉ Yésu ɛɨ́tɨa ányaámbáámbá nɛ́, bh'ɛɨ́ngá nɛ́ngwángwɛ sasa, bh'apá nɛ tándrabɛ́. 48 Bh'ɔdhyá kála bhó « Nómbí i edilia nɛ́ngwágwɛ sasa gyó i ánɔ́tɔrʉ nɛ́, b'aángedílí ma. Bhe nómbí i edilia ma nɛ́, b'aángedílí nÓmbí i ɛdhá ma nɛ́. Outo nɛ́, sɨ́ nómbí i a ú ogwá ndrɛ ámɛ́sasangwɛ pima átéígo i bhákíé nɛ́ ndúbhu nɛ́, ɨ́n'a nɛ nómbí kpɔkpɔ gbagba. »

Nómbí i ka nétí aamɨ nɛ́, b'a ú ɔɔ́mʉ́a aamɨ

(Mákɔ 9.38-40)

49 Hee Yɔáni aáfa, ɔdhya bhó « Náadhaadhombíé, mabá maángogwo nómbí kana a n'eídia óúdhúúdhú biti anúɔ́tɔrʉ nɛ́, bhe mamobá nɛ ndó nábha, outo nɛ́, sɨ́ ka ɨ nɛ aamɔɔ́rɔ átɛ́mápuekana. » 50 Yésu ɔdhya nɔ́ɔ bhó « Mɨɨ́ngomo nɛ bhelé ! Outo nɛ́, sɨ́ nómbí i ka nétí aamɨ nɛ́, b'a ú ɔɔ́mʉ́a aamɨ. »

Bhe Yésu agbá néhíɛ ndré bha ú áteYerusalɛ́mɛ nɛ́

51 Hee bh'oópúa ndrɛ átadhɨnga i bhó ékíní si bhó Yésu ndrɛzá to átapɛ i bhó bhe ndraátua ndrɛ bha ú Apanɛ́ a ɨ bhó kátɛ nɛ́, a sɨ́ n'ɛɨ́tɨ́a ɛɨ́tɨ bhó ndra ú ndrɔa nónzíyé nɛ́, bh'agbá néhíɛ ndré bha ú áteYerusalɛ́mɛ nɛ́, ándreísú ro kana. 52 Bh'ɔdhá óudrwaamɨ akʉ́ɛ́ bhó kádhádhá bhó ku kɛ́ɨ́mbɛmbɛ nɔ́ɔ ándrekúámɛ́ ú átɛ́bhámoóyé kana ú Samarɨ́airo. 53 Nɔ́dhyɔkana, bhe ómbi hɛ́ égye nɛ́ nɛ́ kabwʉ kápí bhó Yésu néku kála ú bhányɛ, sɨ́ ɨ́n'abwʉ ú abɔɔ bha ú áteYerusalɛ́mɛ. 54 Átadhɨnga i óudrwaamɨ sóórúé átoudrwaamɨ si bhándrɛ nɛ́, Yakóbhohɛ bhu Yɔáni kɔ́gá ɨ sɔ́ nɛ́, kɔ́dhya bhó « Nɛ́Ɨ́nyɨ́ ! Nyɔ́ɔ́mʉ́a kpɛ́ bhó amádhyɔ bhó náago nɛ́nga ú átɔrɔ, bhó nésya kɔ́tɔ bhó bh'ɔsʉa ká hɛ mɔ́sʉ ɛ́ngarábodi ? » 55 Bhe Yésu eevhíngílía ndrɛ bha ú ká ɨ, bh'ɔʉngbá kála. 56 Hee bhe kɔ́á bhó nyáá bha ú átɛ́bhámoóyé akʉ́nɛ́.

Ómbi si kɔ́ɔ́mʉ́a bhó nyadrwé Yésu nɛ́, kágyó nɛ́Ɨnyɨngwa i Angéle bha nɛ́

(Mat. 8.19-22)

57 Bhe átadhɨnga i Yésu ánoudrwaamɨ si bhándrɛ nɛ́ ká ú kɔ́a ɨ nɛ́, náasí kana ɔdhya Yésu ko bhó « Móúdrwéba mɨ nyáá átɛmapú ndúbhu si mʉ́ɔba to nɛ́. » 58 Yésu ɔdhya nɔ́ɔ bhó « Ángɔ́ ká ánegbogbo, bhe árí mɔvhyá ká ánegyo kɔ́rɔ, nɔ́dhyɔkana, ɨ́má, nɛ́Ngwángwɛ i nÓmbí bha nɛ́ ka ɨ márɔ ɔmɛ́ i sɨ́ mákpu to andrádru nɛ́. » 59 Yésu ɔdhya náasí akʉ́nɛ́ ko bhó « Kadrwé ma ! » Bhe náasí nɛ́ aátúa nɔ́ɔ bhó « Nɛ́Ɨ́nyɨ́ ! Kabha ká ma pá, máɔ ká pá ku máté páápa. » 60 Yésu ɔdhya nɔ́ɔ bhó « Kabha ómbi amónzi kóté sɨ́ hɛ ómbi amónzi si bhányɛ nɛ́, bhe ɨ́mɨ́ kʉ́ɔ́ ku nyágyó nɛ́Ɨnyɨngwa i Angéle bha nɛ́. » 61 Náasí akʉ́nɛ́ ɔdhya nɔ́ɔ tɔkana bhó « Nɛ́Ɨ́nyɨ́ ! Mádrwéba mɨ sɨ́ módrwe, nɔ́dhyɔkana, kabha ká ngwɛ́ ma pá ku máábhú ndra mavandrahɛ kála ! » 62 Yésu ɔdhya nɔ́ɔ bhó « Nómbí i a ú oódha ánekóngo bh'anya bha ú zaá nɛ́, obhú ka ɨ nɔ́rɔ molo átɛƗnyingwa i Angéle bha nɛ́. »