Luk 10

Bhe Yésu ɔdhá óudrwaamɨ akʉ́ɛ́ ɛ́tɛɛvhɛ tónórue égí sóórúé

1 Átámɛ́zaa, bhe nɛ́Ɨ́nyɨ́ Yésu ɔrwá óudrwaamɨ akʉ́ɛ́ ányɛrɨ́ ɛ́tɛɛvhɛ tónórue égí sóórúé^a , bh'ɔdhá hɛ sóórue-sóórúé bhó kádhádhá bha ú átɛgbɔtɔ ndúbhu bhu átɛmapú ndúbhu si abwʉ ú abɔdhyɔ bhó ndrɔɔ to sɨ́ ɨ́nɛ tɔ́kpɛ nɛ́. 2 Ɨ́sɛ́ɛ́lɛ́ i bhó nyɛnga nɛ́, ɔdhya kála bhó « Ɛ́ɨbhʉɛɨbhʉkpɔ́ ɔɔ́yɔ́ ká bhó móotu, bhe émólói si sɨ́ kɛ́vhʉ nɛ́ ka kɛ́byɛ́. Hee amúní táo ɛɨpwɔmbómbíé ndó nɔ́dha émólói akʉ́ɛ́ tɔkana bhó ku kɛ́vhʉ ɛ́ɨbhʉɛɨbhʉkpɔ́ ɔɔ́yɔ́ si bhándrɛ nɛ́. 3 Amʉ́ɔ, má ú mádha aamɨ únga ká sɨ́ ɛ́kandóló átéígo i óókóndo anyɛ ! 4 Mɨɨ́ngɛɨ́ngá bhelé pɔtɔmɔnɨ́, bɛsɨ́ngɨ obhúa ká nɛ́mbágálá, bɛsɨ́ngɨ obhúa ká sɨ́ ɛ́kátárá akʉ́ɛ́. Mɨɨ́ngɛɨ́rɔ́ bhelé nádhɨnga nya hɛ́ mʉɨa sɨ́ ómbi ápye átéhíɛ nɛ́ ! 5 Átadhɨnga i nya ú nyekía ɨ ki átégyó kana i nómbí bha nɛ́ nɛ́, amʉ́dhyɔ ká pá ɨ́sɛ́ɛ́lɛ́ ndó ‹ Nɔ́dhyɔ kpílíbhíndí i Angéle bha nɛ́ nóbhú aanyɔɔ́rɔ átégyó i ! › 6 Obhúa bhó nómbí kana nóbhú égye bh'ekpokpa aamɨ ánɔdhyɔ kpílíbhíndí nɛ́, bhe nɔ́dhyɔ kpílíbhíndí i Angéle aáa nɛ́ bh'obhúa nɔ́rɔ. Ka nékpokpo aamɨ ánɔdhyɔ kpílíbhíndí nɛ́, ambwu ka nɔ́dhyɔ kpílíbhíndí i Angéle bha nɛ́. 7 Bhambómbíé i négyó andrɛ ekpókpá aamɨ ánɔdhyɔ kpílíbhíndí nɛ́, amúdrí drʉ, mɨɨ́ngoudhó bhelé ngangá, anyáányɔ, amʉ́mbwɔ́ ɔ́dhyɔ́ ndúbhu si kóa nyala égye nɛ́, outo nɛ́, sɨ́ némólómbíé aátá sɨ́ ánoumbwu ro^b . 8 Bhe átɛ́gbɔ́tɔ́ kana i nyekía to ki bhe kékpokpa aamɨ nɛ́, amʉ́nyɔ́ ɔ́dhyɔ́ ndúbhu si kóa nyala nɛ́. 9 Anyɛ́ɨ́ra ógói si nɛ́gbɔ́tɔ́ nɛ́ anɛ, bhe mʉdhya ómbi si nɛ́gbɔ́tɔ́ nɛ́ anɛ kála ndó ‹ Nɛ́Ɨnyɨngwa i Angéle bha nɛ́ ɨ́n'a bhó aanyɔɔ́rɔ. › 10 Nɔ́dhyɔkana, nyekía ki átɛ́gbɔ́tɔ́ kana bhe kékpokpo ka aamɨ nɛ́, bhe mʉa átaasuamɛ́i mapú si bhányɛ nɛ́ bhe mʉdhya ndó 11 ‹ Maángopyó nyala néibhwé i nɛ́gbɔ́tɔ́ i bhákíé nɛ́ andrɛ i a ú otía táɔ́ɔnzɔ^c nɛ́. Néi a nɛ pá nɛ́, anyɛ́ɨ́tɨ mɔmbɛ́ ndó nɛ́Ɨnyɨngwa i Angéle bha nɛ́ ɨ́n'a bhó aanyɔɔ́rɔ drɨ́ ! › 12 Má nɛ́ mádhyá nyala nzúdhá nɛ́, átɛtɨánɛ i Angéle ofoba to ómbi ányɛngbanga nɛ́, néngbólú i ómbi si nɛ́gbɔ́tɔ́ nɛ́ anɛ obhuba móotu t'angɛpɛ néi ómbi si nɛ́Sɔdɔ́mɛ anɛ kɔ́gába nɛ́. »

Ɛ́gbɔtɔ si ká ú kétía bhó nyapí nɛ́

(Mat. 11.20-24)

13 « Nya ánɔdɔ aamɨ si nɛ́Kɔrazínɛ anɛ ! Nya ánɔdɔ aamɨ si nɛ́Bɛtɛsaída anɛ ! Outo nɛ́, sɨ́ ɔ́dhyɔ́ amámbanga si káábɛsɨ́ nyɛ ú bhákíé nɛ́ kábobhu káángɛsɨ́ nyɛ ú átɛ́gbɔ́tɔ́ i néTírɛ andrɛ bhu táo néi néSidɔ́na andrɛ^d nɛ́, be ka bha ndí sɨ́ kéevhíngílíbwʉ ányeisu ká hɛ́ kɔ́ndrá négonía, nógi i nɔ́dɔ andrɛ, ká hɛ́ kódría átápú nɛ́^e . 14 Bha drɨ́, átɛtɨánɛ i Angéle ofoba ɨ to ómbi ányɛngbanga nɛ́, néngbólú i néTírɛ andrɛ bhu néi néSidɔ́na andrɛ, ándrambambó oópuba ka sɨ́ néi bhákíé nɛ́. 15 Bhe aamɨ si nɛ́Kaparanaúma anɛ, mungá ki bhó Angéle eindríba aamɨ eídrí tó bha ú átɔrɔ ? Nɛ́ɨtɔ, ɛɨ́ryaba aamɨ ɛɨ́rya tó bha ú ɔ́pɛ́iro ú burú. » 16 Bhe Yésu ɔdhyá tɔkana óudrwaamɨ kála bhó « Nómbí i a ú ɔgá aamɨ nɛ́, be a ú ɔgá ma, bhe nómbí i a ú etía aamɨ nɛ́, b'a ú etía ma. Bhe nómbí i a ú etía ma nɛ́, b'a ú etía ká bhu nÓmbí i ɛdhá ma nɛ́. »

Bhe óudrwaamɨ hɛ́ ɛ́tɛɛvhɛ tónórue égí sóórúé nɛ́ nɛ́ kɛ́kʉ́a

17 Átadhɨnga i óudrwaamɨ hɛ́ ɛ́tɛɛvhɛ tónórue égí sóórúé nɛ́ nɛ́, kɛ́kʉ́a ɨ nɛ́, kábwʉ ánɛɨgyagya ro. Kɔ́dhya Yésu ko bhó « Nɛ́Ɨ́nyɨ́, bɛsɨ́ngɨ obhúa ká bhu óúdhúúdhú biti, kánga ú kɛ́ɛ́drwa aama átadhɨnga i manga ɨ ú mangaáo kála ɔ́ʉ́bwɔ́ anúɔ́tɔrʉ nɛ́. » 18 Hee Yésu aátua kála bhó « Mábá ú mábógwo mógwo Sátana, a n'ɛnga ú bhó, a n'odha zá burú únga ká sɨ́ nágbára esya nɛ́^f . 19 Amʉ́gá, máábááo nyala aáo nɛ́kpakpárá i bhó anyóóke nɔ́ átɛ́tátálá bhu átɛ́zɛ́zɛ́kʉlɛ́ akíɔ́ɔnzɔ kɔ́rɔ, bhu nɛ́kpakpárá i bhó anyɔ́ʉ́pwʉ nɔ́ néibwua ndúbhu i néetiombíé bha nɛ́ nɛ́ ! Bhe ka ɨ dhu kana i aáta bhó ndraáhwa aamɨ nɛ́. 20 Bhe mɨɨ́ngobhu bhelé ánɛɨgyagya ro bhó sɨ́ óúdhúúdhú biti ká ú kɛ́ɛ́drwá aamɨ, nɔ́dhyɔkana, amúbhú táo ánɛɨgyagya ro bhó sɨ́ Angéle aábɔhɛ́ akíɛ́rʉ^g ú átɔrɔ. »

Bhe Yésu ɔgá nɛ́ɨgyagya

(Mat. 11.25-27; 13.16-17)

21 Sɨ́ átámádhɨnga, bhe Yésu ɛɨ́nʉ́a ánɛɨgyagya i nÓudhuudhu Sáátu andrɛ, ɔdhya bhó « Hiii sɔ́ Páápa Angéle ! Máángɔʉbwɔ́ mɨ nɛ́Ɨ́nyɨ́ i nɔ́rɔ bhu nápɛ i andrɛ, outo nɛ́, sɨ́ nyá ú nyóógyá ɔ́dhyɔ́ hɛ́ ómbi si kónga nyɛ bhó nya ánakɨra i nómbiombí andrɛ nɛ́ ányɔɨ, bhe nyá ú nyóógyá ká bhu ési ká ánakɨra i ɔ́dhyɔ́ ɛɨ́tɨ anyɛ nɛ́ ányɔɨ. Bhe nyápúa ɔ́dhyɔ́ hɛ́ ngbádhá ɛ́gyándrɛ́ sásá kála. Hiii, ɨ́n'a sɨ́ɨ́sɔ́ Páápa Angéle, sɨ́ nyɔ́ɔ́mʉ́bwʉ bhó nóbhú sɔ́ ! 22 Ɔdhya ómbi si kábwʉ drʉ nɛ́ kála bhó ‹ Páápa Angéle i bhándrá nɛ́ aábaáo mʉ́ ɔ́dhyɔ́ ndúbhu. Bhe ka ɨ ombí kana i a ú ɛɨ́tɨ́a nɛ́Ngwángwɛ i Angéle bha nɛ́ nɛ́, ka nɛ́ ka bha sɨ́ Apanɛ́ Angéle ápye nɛ́. Bhe ka ɨ ombí kana i a ú ɛɨ́tɨ́a Páápa nɛ́, ka nɛ́ ka bha sɨ́ nɛ́Ngwángwɛ i Angéle bha nɛ́ ápye nɛ́, bhu ési nɛ́Ngwángwɛ ɔɔ́mʉ́a bhó ndrapú kála Apanɛ́ bhó kɛ́ɨ́tɨ nɛ nɛ́. › » 23 Hee bh'eevhíngílía táo ndrɛ bha ú óudrwaamɨ kábwʉ ɨ, bh'ɔdhyá sɨ́ kála ápye bhó « Nya ánɛɨgyagya sɨ́ nya ú mugwa akiɔ́ɔŋɔ kɔ́rɔ ɔ́dhyɔ́ amámbanga si nya ú mugwa i nɛ́ ! 24 Outo nɛ́, má nɛ́ mádhyá nyala nɛ́, énébi ootu ánɛɨnyɨ ootu kɔ́ɔ́mʉ́bwʉ bhó nyogwó ɔ́dhyɔ́ si nya ú mugwa i nɛ́, bhe kabwʉ kógwó. Bhe kɔ́ɔ́mʉ́bwʉ bhó nyɔgá ɔ́dhyɔ́ si nya ú mʉga i nɛ́, bhe kabwʉ kɔ́gá. »

Nátámbá i nómbí balí i nɛ́Samarɨ́a ndrɛ andrɛ

25 Bhe náadhaadhombíé kana i ɔ́ʉ́bwɔ́ si Mʉ́sɛ bha nɛ́ anɛ ɛngá. Ɨ́drɨ́ nɛ́, a ú ɔnda nákɨra i bhó ndreídhe Yésu nɛ́, ɔɨa nɛ bhó « Náadhaadhombíé kpɔkpɔ, onía bhó mɛ́sɨ́ bhásí bhó ku mágba nɔ́ra i ɛ́ɨ́zɛ́ kpɛ́ anyɛ ? » 26 Yésu ɔɨa nɛ bhó « Átadhɨnga i nyá ú nyɛ́hya ɨ ɔ́ʉ́bwɔ́ si Mʉ́sɛ bha nɛ́ nɛ́, ká ú kɔ́há to bhásí égye ? » 27 Bhe náadhaadhombíé nɛ́ aátúa nɔ́ɔ bhó « Onía bhó nyɔ́ɔ́mʉ nɛ́Ɨ́nyɨ́ Angéle andrúéísú ro ndúbhu, andrúóudhuudhu ro ndúbhu, andrúéibwua ro ndúbhu bhu andrúáámbáámbá ro ndúbhu. Bhó bhe nyɔ́ɔ́mʉa dándru kaambá sɨ́ɨ́sɔ́ ɨ́mɨ́^h . » 28 Bhe Yésu ɔdhyá nɔgɔ nɔ́ɔ bhó « Mɨ́ɨ́ngaátu mɔmbɛ́ ! Nyɛ́sɨ́a bhó pá sɔ́ nɛ́, bhe nyágba nɔ́ra áménzúdhá i Angéle bha nɛ́. » 29 Nɔ́dhyɔkana, náadhaadhombíé i ɔ́ʉ́bwɔ́ anyɛ ɔndabwʉ bhó ndreíhwe ándrɛbalibálí átɔ́dhyɔ́ eibu. Ɔɨa Yésu bhó « Dándra ɨ́n'a adhíngwɛ ? » 30 Bhe Yésu ɔgá nɔ́ɔ nátámbá, ɔdhya nɔ́ɔ bhó « Náasí kana abwʉ ú abɛnga bha ú átɛ́gbɔ́tɔ́ i néYerusalɛ́mɛ andrɛ, a n'ɔɔ́da bha ú átɛ́gbɔ́tɔ́ i néYeríko andrɛ nɛ́, bh'ɔá, bh'ɔá, bhe ɔ́ɔ́gʉ́ kónzá nɔ́tɔ ɛ́mbʉlɛ ! Bhe kódá nɛ, bhe kóda nɛ, bhe kóda nɛ, bhe kɔ́vhá ɔ́dhyɔ́ ndúbhu si abwʉ nɔ́ nɛ́, bhe kábhá nɛ a n'ɔʉ́má ánonzi ro bha sɔ́ nɛ́, bhe kɔ́á. 31 Ka nɔ́dá nɛ́, nɛ́kɔána kana i Angéle bha nɛ́, abwʉ ú abɔɔ́dɛ bhu nɛ átéhíɛ nɛ́ kana nɛ́ nɛ́. Átadhɨnga i ogwá ɨ náasí nɛ́ sɔ́ nɛ́, bh'akpángbálá bh'angésya bha ú kétú bh'ɔá. 32 Bhe néMolévi kana i abwʉ ú abeku bhu nɛ sɨ́ átéhíɛ nɛ́ nɛ́, bh'ogwá meí nɛ́ ɔ́ɔ́gʉ́ kódobwʉ nɛ nɛ́ nɛ́, bh'akpángbálá bhu nɛ, bh'angésya bha ú kétú, bh'ɔá. 33 Nɔ́dhyɔkana, nómbí kana i nɛ́Samarɨ́a i andrɛ abwʉ ú abobu ká bhu nɛ átéhíɛ nɛ́ nɛ́, bh'oópúa bhu nɛ drʉ. Átadhɨnga i ogwá ɨ náasí nɛ́ aɨ́bwʉ ébi nɛ́ nɛ́, bhe ándreísú ɔgá nɔ́dɔ pima. 34 Bh'ɔʉ́sɨ́a ndrɛ bha nɔ́tɔ kʉ́ndɨ́ gbagba, bh'ɛtʉ́a nɛ́páázo bhu évínyo átebi hɛ́, bh'aátítía ánɛbánde. Átámɛ́zaa, bh'oría nɛ ɛ́saka, bh'eíká nɛ bha átérí i bhándrɛ nɛ́. Bh'ɔmbá nɛ ú átɔɔtɛ́lɛ a n'arɨ́a nɛ nɛ́. 35 A drʉ afa nékini kana nɛ́, átébhúlobhú akʉ́nɛ́, bh'opwúa ɛ́fárángákpɔ́i sóórúéⁱ bh'aáá ɔɔtɛ́lɛmbómbíé ko. Ɔdhya nɔ́ɔ bhó ‹ Karɨ́ mʉ́ nómbí i. Átadhɨnga i mɛ́kʉ́ba ɨ nɛ́, bhe mábuba bha zá, ɛ́faránga akʉ́ɛ́ si múbhúa sɨ́ mɨ́ɨ́ngɛɨ́rɔ́ nɔ́tɔ nɛ́, bhe máátuba mɨ́o. › » 36 Átámɛ́zaa, Yésu ɔɨa náadhaadhombíé i ɔ́ʉ́bwɔ́ anyɛ bhó « Átombi hɛ́ sɔ́ta nɛ́ nɛ́, átáámbáámbá i bhándrúé nɛ́, adhíngwɛ i múgwá sɨ́ ɨ́n'a náasí i ɔ́ɔ́gʉ́ kódobwʉ nɛ nɛ́ dánɛ́ nɛ́ ? » 37 Náadhaadhombíé nɛ́ aátua nɔ́ɔ bhó « Ɨ́n'a nómbí i ɔgabwʉ náasí i ɔ́ɔ́gʉ́ kódobwʉ nɛ nɛ́ ándrɔdɔ nɛ́. » Bhe Yésu ɔdhyá nɔ́ɔ bhó « Hee kʉ́ɔ́ bhu mɨ́, bhe nyɛ́sɨ́a sɨ́ɨ́sɔ́ ! »

Yésu a ú ɔa bhó ku ndranya Maratáhɛ bhu Marɨ́a

38 Átadhɨnga i Yésu bhu óudrwaamɨ si bhándrɛ nɛ́ kábwʉ ɨ átemoolia bha ú áteYerusalɛ́mɛ nɛ́, bh'ekía ndrɛ átɛ́bhámoóyé kana. Égye, bhe nándrɔ kana ánɛrʉ bhó Maratá, bh'ekpókpá nɛ bha ú bhándrɛ. 39 Ɨ́n'abwʉ yánɛ́ngwɛ ámándrɔ ro kana ánɛrʉ bhó Marɨ́a, bhe ɨ́nɛ Marɨ́a abobhu nɔgɔ nyáá nándrɛ a n'odría nɛ́Ɨ́nyɨ́ Yésu ánɔ́tɔɔnzɔ ɔʉ́ndɨ́, a n'ɔgá ɔ́dhyɔ́ si abɔdhyɔ nɛ́. 40 Ɔ́dhyɔ́ si drɨ́ nɛ́, Maratá a n'ovhía ndrɛ ánemóló si némbwodhi anɛ nɛ́. Ka nɔ́dá nɛ́, bh'ɔɔ́sá sɨ́ nékúeku bha ú Yésu a ɨ, ɔdhya bhó « Nɛ́Ɨ́nyɨ́, ka ɨ mɨ ú nyáámbá máto átɔdhyɔ i yándrángwɛ Marɨ́a abhá to ma nyáá zɨndra bhó mɛ́sɨ́ sɨ́ ɨ́má ápye némolo ootu gyó i nɛ́ ? Hee kʉdhyɔ táo nɔ́ɔ ndó néku ku nɛ́ɛ́wɛ ma ! » 41 Nɛ́Ɨ́nyɨ́ Yésu aátua nɔ́ɔ bhó « Ɨ́mɨ́, ɨ́mɨ́, ɨ́mɨ́, ɨ́mɨ́ Maratá gwa ! Andrúéísú a ú aáhúa pima, a n'agyambala átɔ́dhyɔ́ ootu-ootu nɛ́ ! 42 Bhe nyɛ́ɨ́tɨa mɔmbɛ́ bhó, nédhu kana a ú afá nɛ ápye átɔmbɛ. Bhe ɨ́n'a nɛ nɛ i Marɨ́a aángɔrwa nɛ́, bhe ka ɨ ombí kana i ɔvhɛba nɛ ándrɔɨ nɛ́. »