Luk 11

Yésu a ú aádha óudrwaamɨ si bhándrɛ nɛ́ sɨ́ kásɛmya

(Mat. 6.9-13; 7.7-11)

1 Nɛ́tɨánɛ kana, Yésu abwʉ átɛ́mápue kana sɔ́ ɨ́ a n'asɛmya nɛ́. A drʉ eíbia nɔ́ʉsɛmya nɛ́, bhe nóudrwaamɨ kana átoudrwaamɨ si bhándrɛ nɛ́, ɔdhya nɔ́ɔ bhó « Nɛ́Ɨ́nyɨ́, Yɔáni Mɔbátísí aábaádhɔ óudrwaamɨ si bhándrɛ nɛ́ sɨ́ kásɛmya. Ɨ́mɨ́ nɔgɔ, kaádhɔ ká aama únga ká sɨ́ aátá bhó amásɛmya Angéle. » 2 Yésu ɔdhya kála bhó « Átadhɨnga i nya ú nyasɛmya ɨ nɛ́, amʉ́dhyɔ ndó ‹ Páápa Angéle, ómbi kɛ́ɨ́tɨ bhó nyá sáátu. Aátá bhó nɛ́Ɨnyɨngwa i bhándrúé nɛ́ néku. 3 Kaáo mala áányɔ́ si káátá nyɛ aamɔɔ́rɔ ɛ́tɨ́anɛ kpɛ́ nɛ́. 4 Keégi mala ɛ́masúmu si bháɛ́ nɛ́, outo nɛ́, sɨ́, aama tɔ́kpɛ ma ú meégia ómbi pɨ́tɛ́ si ká ú kɛ́sɨ́a aama ámébiti nɛ́. Bhe mɨ́ɨ́ngabhá aama bhelé bhó amádhe átáábháabhɔ ándrɛhɔ. › »

Nómbí i onía nɛ́, bh'agba

5 Yésu ɔdhya kála tɔkana bhó « Bhe ɨtá obhúa ká sɔ́ ɨ́ó : bhe múbhúa ánaángwɛ́ kana, bhe mʉ́a ú bhándrɛ átekinihɔ bhó ndrɔdhyɔ nɔ́ɔ bhó ‹ Náángwɛ́, kɛɛ́wɛ ká ma ánedhúngwɛ amɔ́nyɔ ro ! 6 Outo nɛ́, sɨ́ náángwɛ́ i bhándrá nɛ́ kana a ú ɔa néhí, bh'aángoópú mʉ́, bhe ka ɨ máro dhúngwɛ i sɨ́ mááo nɔ́ɔ nɛ́. › 7 Hee bhe nómbí ndré ú gyɔ́tɔ nɛ́ ɔa drɨ́ bh'angakɛlya mɨ́o bhó ‹ Mɨ́ɨ́ngaáhú ma bhelé ! Gaa ɨ́ drɨ́, máángɔpɨ bhó négyónɔ. Bhe ɨ́má ánɛgyándrɛ́ si bhándrá nɛ́, maángédhó bhó, bhe ka náátɛ bhó máro bhó mɛ́nga mááo mɨ́o dhu. › » 8 Hee bhe Yésu aádrwá, ɔdhya bhó « Má nɛ́ mádhyá nyala nɛ́, bɛsɨ́ngɨ kanga nɛ́nga bhó ndroo mɨ́o dhu átéi ɨ́n'a to náángwɛ́ i bhándrúé nɛ́ nɛ́, ɨ́n'ɛnga mɛ́nga sɨ́ nyá ú múnía ánɛkɛkɛlɛ ro, bh'aáa mɨ́o ɔ́dhyɔ́ ndúbhu si nyá ánamémo ro nɛ́. 9 Bhe ɨ́má, má ú mádhya nyala ndó amúní ɔ́dhyɔ́ ndúbhu si nya ánamémo ro nɛ́, bhe kááa nyala. Amʉ́nda bhe mugwa. Amúpyo néhóli, bhe kápúa nyala négyónɔ. 10 Outo nɛ́, sɨ́ nómbí i onía nɛ́, bh'ambwua. Bhe nómbí i ɔnda nɛ́, bh'ogwá. Bhe kápúa mápú négyónɔ nómbí i opya néhóli nɛ́ ko. 11 Nápá nánganɛ́ i aanyɔɔ́tɔ ándrɛngwá onía nɛ nɛ́ngɛrɛ bh'aáa bhó nɔ́ɔ nɛ́ngyá^a nɛ́ ? 12 Bh'obhúa ká tɔkana bhó ándrɛngwá nóní nɛ nɛ́balakaka nɛ́, aáa nɔ́ɔ aáo nɛ́zɛ́zɛ́kʉlɛ́ ? 13 Néi aamɨ si nya ómbi biti nɛ́ nya ú mua bhó sɨ́ aamɨ akiandra kála ɔ́dhyɔ́ bali nɛ́, ka náfo nɔgɔ átɔmbɛ bhó nÁpá ndré ú átɔrɔ nɛ́ nɛ́dha nÓudhuudhu Sáátu átombi si kónía nɛ nɛ́ kála ? »

Néibwua i Yésu bha nɛ́ a ú ɛnga ze ?

(Mat. 12.22-30; Mákɔ 3.22-27)

14 Nɛ́tɨánɛ kana, Yésu abwʉ a n'agyá nóudhuudhu biti kana i atɔ́bwʉ nómbí ándrekóró ka nɛ́ ka nɔ́dhyɔ bhó nɛ́. Átadhɨnga ɨ nóudhuudhu biti nɛ́ edía ɨ nɛ́, bhe nómbí nɛ́ ɔtʉ́a a n'ɔdhya nɛ́, bhe ombiro i abwʉ drʉ nɛ́, ambángábwʉ mámbanga gbagba i sɔ́ ɨ́ nɛ́. 15 Nɔ́dhyɔkana, ómbi akʉ́ɛ́ átéígo i bhányɛ nɛ́, kɔ́dhya bhó « Belezebúba^b , nɛ́ɨ́nyɨ́ i óúdhúúdhú biti anyɛ, a nɛ nɛ i aáa nɔ́ɔ néibwua i a ú agyá nɔ́ óúdhúúdhú biti hɛ́ nɛ́ ! » 16 Bhe ómbi akʉ́ɛ́ kɔ́ndá bhó nyonúe Yésu, kɔ́dhya nɔ́ɔ bhó néíhwe ká kála nándálá kana amámbanga i a n'aádhá bhó Angéle aáá nɛ nɔ́ɔ néibwua nɛ́ nɛ́. 17 Bhe Yésu ɛɨ́tɨ́a ányaámbáámbá, ɔdhya kála bhó « Nɛ́ɨnyɨngwa i ámómbi kóbhúa ká hɛ́ káápwʉa nyɛ tányɛrɨ́ nɛ́, odria t'angodhe, bhe ámégyo káda nyɛ ɛ́tʉtʉrʉgyɛ, néi múdhe dánɛ́ to, néndré múdhe nɔgɔ dánɛ́ to. 18 Sátana obhúa ká a n'eíndra ká sɨ́ nɛ ndrɛ tɔ́kpɛ nɛ́, nɛ́ɨnyɨngwa i bhándrɛ nɛ́ apa ndrɛ bhásí ? Sɨ́ nya ú mʉdhya bhó néibwua i Belezebúba bha nɛ́ a nɛ nɛ i má ú mágyá nɔ́ óúdhúúdhú biti nɛ́ ! 19 Nɔ́dhyɔkana, obhúa bhó néibwua i Belezebúba bha nɛ́ a nɛ nɛ i má ú mágyá nɔ́ óúdhúúdhú biti nɛ́, óudruaamɨ si bhákíé nɛ́ ká ú kágyá ká bhu hɛ óúdhúúdhú biti. Ɔdhyá bhó ndrɔdhyɔ bhó ká ú kágyá hɛ áneibwua i Belezebúba bha nɛ́ ? Nɛ́ɨtɔ. Hee kanga náátɛ bhó amʉ́dhyɔ bhó má ú mágyá óúdhúúdhú biti áneibwua i Belezebúba bha nɛ́. Bha drɨ́ óudrwaamɨ tɔ́kpɛ si bhákíé nɛ́, kófoba sɨ́ hɛ akíɛ́ngbanga ! 20 Obhúa nzúdhá bhó néibwua i Angéle bha nɛ́ a nɛ nɛ i má ú mágyá nɔ́ óúdhúúdhú biti nɛ́, ɔdhyá bhó ndrɔdhyɔ bhó nɛ́Ɨnyɨngwa i Angéle bha nɛ́ ɨ́n'a bhó átéígo i bhákíé nɛ́. 21 Átadhɨnga i náasíngwɛ kpákpárá kana obhúa ɨ a n'ombwúa ndrɛ ánaápwú adhutí si bhándrɛ nɛ́ mɔmbɛ́ nɛ́, a n'arɨ́a nɔ́ nɛ́bha i bhándrɛ nɛ́ nɛ́, ɔ́dhyɔ́ si bhándrɛ nɛ́ ndúbhu kóbhua ámámárɨ́. 22 Bhe náasíngwɛ kana akʉ́nɛ́ i a n'ɛpá nɛ nɛ átɛkpakpárá nɛ́, bh'ɔa drɨ́, bh'odha nɔ́ɔ náapwʉ bh'apya nɛ. Bh'ɔa átáápwʉ́ adhutí si etúbwʉ to ándreísú nɛ́, bh'ɔvha hɛ. Bh'ɔa átáápwʉ́ adhutí si ɔvha ándrɔɨ nɛ́ ndúbhu, bh'oóbhua to ómbi ɛ́sɛ́. 23 Nómbí i ka ɨ nɛ máro átɛ́mápuekana nɛ́, be ɨ́n'a néetiombíé i bhándrá nɛ́, bhe nómbí i ka ɨ nɛ ú ɛɛ́wa ma átɛkandóló ányárɨ́árɨ́ nɛ́, b'a ú ɔvha nɛ hɛ. »

Bhe nóudhuudhu biti aátua ndrɛ tɔkana

(Mat. 12.43-45)

24 « Átadhɨnga i nóudhuudhu biti aángedi ɨ átómbí nɛ́, bh'ɔa bh'angɔʉngá áteingongoro mapú, a n'ɔnda nɛ́mápue i bhó ndrɔhɔ to ébiii nɛ́. Ka nógwó mápue nɛ́, bh'aámbá ndrɛ bhó ‹ Má ú máátua ká ndra ú átégyó i bhándrá nɛ́ i médibá to nɛ́. › 25 Átadhɨnga i aátua ɨ ndrɛ égye nɛ́, bh'aámbwua négyó a n'eá ndrɛ, a n'ɛɨ́mbɛ́mbá ndrɛ mɔmbɛ́ nɛ́, 26 hee ɔa bhó nyáá bh'angongo óúdhúúdhú biti akʉ́ɛ́ ányɛrɨ́ tónórue, ési ká hɛ́ kɛ́pá hɛ nɛ átebitibítí nɛ́. Bhe kékua bhe kékía nyɛ átégyó nɛ́ ɨ́hɛ kpɛ́, bhe kángodri. Bhe nómbí nɛ́ ándrobhuobhú oópua ámébiti t'angɛpɛ ɨ́ drɨ́ abwʉ ɨ ɨ́sɛ́ɛ́lɛ́. »

Nɛ́ɨgyagya áménzúdhá ɨ́n'a átési ká ú kɛ́sɨ́a sɨ́ nɛ́tʉ́ i Angéle bha nɛ́ ɔɔ́mʉ́a nɛ́

27 Átadhɨnga i Yésu a ú ɔdhya ɨ ɔ́dhyɔ́ hɛ́ nɛ́, bhe nándrɔ kana eigá ándrɛtʉ́ átéígo i ómbi anyɛ, ɔdhya nɔ́ɔ bhó « Nándrɔ i ɔhɨ́bwʉ mɨ bh'eíndrúbwʉ mɨ nɛ́, ɨ́n'a nzúdhá gbagba ánɛɨgyagya ! » 28 Yésu ɔdhya nɔ́ɔ bhó « Nɛ́ɨgyagya ɨ́n'a táo átési ká ú kɔ́gá nɛ́tʉ́ i Angéle bha nɛ́, bhe ká ú kɛ́sɨ́a sɨ́ɨ́sɔ́ nɛ́tʉ́ nɛ́ ɔɔ́mʉ́a nɛ́. »

Bhe Yésu etía bhó ndrɛsɨ́ nándálá amámbanga

(Mat. 12.38-42)

29 Átadhɨnga i ombirongwɛ ɔʉmbá ɨ ndrɛ, bh'aadhúdhúa ndrɛ Yésu ándrótoobhuru nɛ́, bh'erímá a n'ɔdhya kála bhó « Ómbi si nádhɨngɔmɛ́ i anɛ ká ómbi biti. Ká ú kónía nándálá amámbanga kana i a n'ɛngá ú Angéle a ɨ nɛ́, nɔ́dhyɔkana, kógwóba ka ándálá akʉ́nɛ́, kógwoba sɨ́ nándálá gyó i ɛsɨ́bwʉ ndrɛ nénébi Yɔ́na to ápye nɛ́. 30 Outo nɛ́, sɨ́ɨ́sɨ́ nɔ́dhyɔ gyó i ɛsɨ́bwʉ ndrɛ Yɔ́na to nɛ́, aádhɔ́bwʉ ómbi si néNinívɛ anɛ kála bhó Yɔ́na abwʉ nándálá i Angéle bha nɛ́, ɨ́má nɛ́Ngwángwɛ i nÓmbí bha nɛ́, mábhúba nɔgɔ nándálá i ómbi si nádhɨngɔmɛ́ i anɛ kála nɛ́. 31 Átɛtɨánɛ i Angéle ofoba to ómbi ányɛngbanga nɛ́, nɛ́ɨ́nyɨ́ andrɔ i nɛ́Sabá andrɛ apaba ndrɛ áteetu i ómbi si nádhɨngɔmɛ́ i anɛ anyɛ, bh'eídheba hɛ, outo nɛ́, sɨ́ ɛngábwʉ átɛ́bhá ányedrú, bh'ekúa bhó ku ndrɔgá ákɨ́rá tʉ si Salɔmɔ́ bha nɛ́. Má nɛ́ mádhyá nyala nɛ́, nómbí i a n'ɛpá Salɔmɔ́ nɛ́ ɨ́n'a drɨ́. 32 Átɛtɨánɛ i Angéle ofoba to ómbi ányɛngbanga nɛ́, ómbi si néNinívɛ anɛ kápaba nyɛ áteetu i ómbi si nádhɨngɔmɛ́ i anɛ anyɛ, bhe kéídheba hɛ, outo nɛ́, sɨ́ kábwʉ káángeevhíngílí ányeisu átáádhɔ́ i nénébi Yɔ́na bha nɛ́. Má nɛ́ mádhyá nyala nɛ́, nómbí i a n'ɛpá Yɔ́na nɛ́ ɨ́n'a drɨ́. »

Ɛ́ŋɔ ká nɛ́tála i néépí andrɛ

(Mat. 5.15; 6.22-23)

33 « Ka ɨ ombí kana i ɔsʉa nɛ́tála bhó ndroógye bhu bhó ndrari to némbwó nɛ́. Nɔ́dhyɔkana, kɔ́sʉa nɛ́tála bhe kéíka nɛ bha átamísá, átɛmbanda i bhó ómbi si ká ú kékía nyɛ ú gyɔ́tɔ nɛ́ kógwó nóngongó nɛ́. 34 Nɛ́tála i andrúéépí andrɛ, ɨ́n'a anúɛ́ŋɔ. Anúɛ́ŋɔ káángobhu mɔmbɛ́ nɛ́, andrúéépí ndúbhu obhua ká bhu nɛ átongongó ándrɛhɔ, nɔ́dhyɔkana, anúɛ́ŋɔ ka kɔ́mbɛ nɛ́, andrúéépí ndúbhu obhua ká bhu nɛ átekinibodi. 35 Bha drɨ́, aátá bhó nyárɨ́ ndru mɔmbɛ́ bhó nóngongó nóbhú mɨ́to, ka nɛ́ ka bha kinibodi nɛ́. 36 Andrúéépí ndúbhu obhúa átongongó ándrɛhɔ nɛ́, ka nɛ́ ka ɨ to mápuengwɛ kana i a nɛ́ átekinibodi nɛ́, andrúéépí ndúbhu obhua átongongó ándrɛhɔ únga ká sɨ́ átadhɨnga i nɛ́tála a ú ovhia ɨ mɨ ándrongongó ro nɛ́. »

Bhe Yésu abákpá ɛ́Mɔfarúsi ánaadhaadhɔí si nƆ́ʉbwɔ anɛ

(Mat. 23.1-36; Mákɔ 12.38-40)

37 A drʉ Yésu eíbia nɛ́mabelu nɛ́, bhe nɛ́Mɔfarúsi kana ongá nɛ bhó ku náányɔ ú bhándrɛ. Bh'ekúa, bh'ekía ndrɛ ú gyɔ́tɔ bh'angódri ú átaanyámɛ́. 38 Átadhɨnga i nɛ́Mɔfarúsi ogwá ɨ Yésu ka nɛ́ ka nɔ́ʉ́baba ndrɛ ɨ́sɛ́ɛ́lɛ́ i bhó ndraányɔ sɨ́ɨ́sɨ́ nƆ́ʉbwɔ i bhányɛ nɛ́ ɔɔ́mʉ́a nɛ́, bh'ambángábwʉ i sɔ́ ɨ́ nɛ́. 39 Bhe nɛ́Ɨ́nyɨ́ Yésu ɔdhyá nɔ́ɔ bhó « Amúgwó ká táo ookiro akiɔdhyɔ akiɛMɔfarúsi ! Nya ú mʉba nékópo bhu nɛ́saáni palá ányeepi sɨ́ bha ú muto ápye, bhe akíóteisu nya ú nyɛɨnʉ́a ɛɨ́nʉ ánekumá bhu nénziobho. 40 Akiabɨ́da si gwa ! Angéle i ɛsɨ́a nómbí ándreépí nɛ́, ɛsɨ́a ká sɨ́ nɛ ándreísú. 41 Amúo táo Angéle ko bhu ɛ́mʉ́dádákúái kála ɔ́dhyɔ́ si nya nɔ́ nɛ́, bhe ɔ́dhyɔ́ ndúbhu si nyɛsɨ́a nɛ́ bhe kóbhúa ámɔ́mɔ́mbɛ Angéle ko. 42 Nya átɔdɔ akiɛMɔfarúsi ! Sɨ́ nya ú mua Angéle ko nédímɛ i ɔ́dhyɔ́ si bhákíé nɛ́ anyɛ, únga ká sɨ́ nélumbalúmba, nésitrɔnɛ́lɛ, bhu ɛ́kpɛ́dhɛ́kpɛ́dhɛ́ ndúbhu si nɛ́ɨpwɔ anɛ, bhe nya ú nyeégía eégi bhó nyobhú ómbi amɛ́yɔ bhu bhó nyɔɔ́mʉ Angéle. Nɛ́ nɛ́ a táo nɛ i onínga bhó anyɛ́sɨ́ nɛ́, ka nɛ́ ka anyábha bha mábha ɔ́dhyɔ́ akʉ́ɛ́ nɛ́. 43 Nya átɔdɔ akiɛMɔfarúsi ! Sɨ́ nyɔɔ́mʉ́a nyáá ápye bhó nyoudrídrí sɨ́ átekití si ɔ́ʉ́sɛ́myágyo anyɛ sé bha ú kétú nɛ́ ápye, bhó b'ómbi kóugwógwó aamɨ pá. Bhe nyɔɔ́mʉ́a bhó ómbi kábhɨkya aamɨ átɛbala mapú únga ká sɨ́ ómbi kpɔ́kpɔ́. 44 Nya átɔdɔ akiɛMɔfarúsi ! Mʉkʉ́a ki sɨ́ émúgélúápɛ́ si kɛ́ɨ́tɨ ka bhó nyɛ nɛ́, bhe ómbi kóólia to anyɛ ka nɛ́ ka kɛ́ɨ́tɨ nɛ́ ! »

45 Náadhaadhombíé kana i nƆ́ʉbwɔ andrɛ ɔdhya Yésu ko bhó « Náadhaadhombíé, ɛ́tʉ gyó hɛ́ nyá ú mʉ́dhya ɛ́Mɔfarúsi kála sɔ́ nɛ́ nɛ́, ɔdhyá bhó ndrɔdhyɔ bhó nyá ú nyábakpa ká bhu aama ! » 46 Yésu akɛlya nɔ́ɔ bhó « Nya bhu aamɨ átɔdɔ akiaadhaadhɔí si nƆ́ʉbwɔ anɛ sɨ́ nya ú nyɛɨtá ómbi éébílí ngbóngbó, bhe ka ɨ aamɨ ú nyaábha bhó nyori ká ngwɛ́ gbagba átéébílí hɛ́ akíɔ́ɔtɛ́ngwɛ́kpɔ kana ro. 47 Nya átɔdɔ ! Nya ú mʉbhʉa émúgélúápɛ́ si énébi anyɛ si mapakíhɛ kɔ́pwʉ́bwʉ nɛ́, 48 nɛ́ nɛ́ nyɛsɨ́a sɔ́ drʉ nɛ́ nɛ́, a ú aádhá bhó nya ú nyapía mápí gbagba ánɔdhyɔ́ biti si mapakíhɛ kɛ́sɨ́bwʉ nɛ́. Outo nɛ́, sɨ́ ɨ́hɛ, kɔ́pwʉ́bwʉ énébi, bhe aamɨ, nya ú mʉbhʉa ámémúgélúápɛ́. 49 Hee bha drɨ́, Angéle átakɨra i bhándrɛ nɛ́, ɔdhyá ɨ bhó ‹ Mádhaba kála mɔ́dha énébi bhu ɔ́dhádhái. Bhe átéígo i bhányɛ nɛ́, kɔ́pwʉba mɔ́pwʉ ákʉ́ɛ́, bhe kéíndreba eíndre ákʉ́ɛ́. › 50 Átɔ́dhyɔ́ hɛ́ kpɛ́ nɛ́ nɛ́, ómbi si nádhɨngɔmɛ́ i anɛ, kánziba mánzi nálíkpɔ i énébi ndúbhu anyɛ i kɔ́kɔhɛ́hɛ kɛ́tʉ́bwʉ nɛ́ ándrɔdhyɔ, ɔtʉ́a ndrɛ sɨ́ átɔtʉ́ámɛ́ i négí i andrɛ, 51 átálíkpɔ i Abɛ́lɛ bha nɛ́ tó bha átéi Zakarɨ́a bha nɛ́, néi kɔ́pwʉ́bwʉ nɛ átɛ́bálá gbagba i náángélégyó kpɔkpɔ andrɛ nɛ́ ! Nzúdhá, má nɛ́ mádhyá nyala nɛ́, ómbi si nádhɨngɔmɛ́ i anɛ, kánziba mánzi nálíkpɔ nɛ́ ndúbhu. 52 Nya átɔdɔ akiaadhaadhɔí si nƆ́ʉbwɔ anɛ ! Mɨɨ́bɔdrʉa néifungúla i kápúa nɔ́ négyónɔ i kɛ́ɨ́tɨa to Angéle nɛ́, bhe aamɨ tɔ́kpɛ, ka anyékí ki, bhe nya ú nyaátʉ́a ká bhu ómbi si ká ú kɔ́ɔ́mʉ́a bhó nyekí nyɛ nɛ́ ányɔɨ bhó kékí nyɛ. »

53 Átadhɨnga i Yésu edía ɨ ú átégyó i nɛ́Mɔfarúsi nɛ́ bha nɛ́ nɛ́, bhe áadhaadhɔí ánɛMɔfarúsi ányeisu kérímá ká hɛ́ kɛ́ndrɨa hɛ Yésu to ámámbámbó i sɔ́ ɨ́ nɛ́, bhe kérímá ká hɛ́ kɔ́ʉ́ɨa nɛ átɔ́dhyɔ́ ootu-ootu nɛ́, 54 ká hɛ́ kégyá to nɛ bhó bisa ándrɛtʉ́ ɛrya ka átɔdhyɔ kana i bhó nyɔngá to nɛ nɛ́.