Luk 12

Bhe Yésu ɔdhyá óudrwaamɨ kála bhó káángobhu bhelé ɛ́ɨ́tɔ́i

(Mat. 10.26-27)

1 Sɨ́ átádhɨ́ngá hɛ́ Yésu abaádhɔ ɨ nɛ́ nɛ́, bhe ombirongwɛ aadhúdhúa ndrɛ ékóto ékóto, néi ká hɛ́ kóóka bhó nyɛ to oóke ányɛrɨ́ nɛ́. Bhe Yésu erímá a n'ɔdhya ká pá sɨ́ óudrwaamɨ si bhándrɛ nɛ́ kála ápye nɛ́ bhó « Anyárɨ́ ki aamɨ tɔ́kpɛ átɛɨtɔ i ɛ́Mɔfarúsi anyɛ, néi ɔkʉ́a ndrɛ únga ká sɨ́ nélevírɛ nɛ́. 2 Ɔ́dhyɔ́ ndúbhu si ká ámóogye nɛ́, ómbi kógwoba hɛ mógwo ngbádhá, bhe ɔ́dhyɔ́ ndúbhu si ómbi ka kɔ́ɔ́mʉ bhó ómbi kɛ́ɨ́tɨ nɛ́, kɛ́ɨ́tɨba hɛ ɛɨ́tɨ. 3 Bha drɨ́, ɔ́dhyɔ́ ndúbhu si nya ú mʉdhya átekini bodi nɛ́, ómbi kɔ́gaba hɛ mɔ́ga ngbádhá átéíkó, bhe ɔ́dhyɔ́ ndúbhu si nya ú mʉdhya átɛ́ɛ́rɛ́ nómbí ko átoopipoló nɛ́, kágyóba hɛ mágyó átɛ́mʉ́hɔkpɔ. »

Adhíngwɛ i aátá bhó anyɛ́ɛ́rʉ nɛ nɛ́ ?

(Mat. 10.28-31)

4 « Má nɛ́ mádhyá nyala nɛ́, akiaangwɛ si bhándrá nɛ́, mɨɨ́ngɛɛ́rʉ́ bhelé ómbi si kɔ́pwʉa sɨ́ néépí ápye nɛ́, ka nɛ́ ka ɨ bhó táo kɔ́rɔ aátáatɛ i bhó nyɛsɨ́ bhó nɔ́dhyɔ akʉ́nɛ́ nɛ́. 5 Hee má ú máádha ká nyala nómbí i aátá bhó anyɛ́ɛ́rʉ nɛ nɛ́ : anyɛ́ɛ́rʉ Angéle, sɨ́ ɨ́n'a nɛ ánaátáatɛ i bhó átɛzaa i nónzi andrɛ, bhó ndrodhi aamɨ áténgbólú mápue i ɛ́ɨ́zɛ́ kpɛ́ anyɛ nɛ́ ! Nzúdhá, má nɛ́ mádhyá nyala nɛ́, ɨ́n'a táo nɛ nómbí i aátá bhó anyɛ́ɛ́rʉ nɛ nɛ́ ! 6 Ndó kɔ́ʉ́hya ka bha ɔʉ́hya ɛ́mayéyé tɔ́zɛrɛna átɛ́fárángákpóíandrɛ sóórúé ? Bhe Angéle ka néégi to bhu kana ápye ! 7 Bhe bɛsɨ́ngɨ obhúa ká bhu aamɨ, Angéle a ú ɛɨ́tɨ́a ɛɨ́tɨ mɔmbɛ́ bhó akíédrúɛ́ kpanga kána-káná ká bhásí ányɛrɨ́. Mɨɨ́ngɛɛ́rʉ́ bhelé, nya ú nyɛpá mɛ́pɛ ɛ́mayéyé ootu átɛkpɔkpɔ́ Angéle ánɔ́tɔŋɔ. »

NÓudhuudhu Sáátu ɛɛ́wa nɛ óudrwaamɨ bhó kápí Yésu

(Mat. 10.32-33; 12.32; 10.19-20)

8 Yésu ɔdhya tɔkana bhó « Má nɛ́ mádhyá nyala nɛ́, nómbí i ɔdhya ngbádhá áteetu i ómbi anyɛ bhó ndra nóudrwaamɨ i bhándrá nɛ́ nɛ́, ɨ́má nɛ́Ngwángwɛ i nÓmbí bha nɛ́ mádhyɔba nɔgɔ bhu má ngbádhá áteetu i áángelú si Angéle bha nɛ́ anyɛ ndó ɨ́n'ɔga ma. 9 Bhe nómbí i ɛtʉa ngbádhá áteetu i ómbi anyɛ nɛ́ bhó ka ndrɛɨ́tɨ ma nɛ́, mɛ́tʉba nɔgɔ ngbádhá sɨ́ɨ́sɔ́ áteetu i áángelú si Angéle bha nɛ́ anyɛ ndó ka mɛ́ɨ́tɨ nɛ́ nándrá. 10 Bhe nómbí i ɔdhya nɛ́tʉ́ biti kana átɛ́Ngwángwɛ i nÓmbí bha nɛ́ nɛ́, Angéle eégiba nɔ́ɔ eégi nɛ́tʉ́ biti nɛ́. Nɔ́dhyɔkana, nómbí i oúnzía nÓudhuudhu Sáátu nɛ́, Angéle eégibhú ka nɛ épí ! 11 Átadhɨnga i ká ú kɔ́mba ɨ aamɨ bhó ku kófo akíɛ́ngbanga ú átɔ́ʉ́sɛ́myágyo si éMoyúda anyɛ nɛ́, obhúa to áteetu i ézózi anyɛ, obhúa to áteetu i ɛ́ɨnyɨ anyɛ nɛ́, akíéisu káángodi bhelé bhó nyɛgya nyɛ bhásí, bhu bhó mubia bhásí ámɛ́ngbanga, bhu bhó mʉdhya bhásí. 12 Outo nɛ́, sɨ́ átadhɨnga i kóúwoba ɨ aamɨ nɛ́, nÓudhuudhu Sáátu aádhɔba nɛ nyala asɔdhyɔ gyó i aátá sɨ́ amʉ́dhyɔ drʉ nɛ́. »

Nátámbá i nɛ́mándátíómbíé maó andrɛ

13 Hee bhe nómbí kana átéígo i ombirongwɛ andrɛ ɔdhya Yésu ko bhó « Náadhaadhombíé, kʉdhyɔ ká mʉ́ yándrángwɛ ko ndó amóóbhu ká bha nɛ átɛ́ɨ́bhɔ́ndyá si páápa abhábwʉ mala nɛ́ ! » 14 Yésu ɔdhya nɔ́ɔ bhó « Andrágɔ́ngwɛ gwa ! Ka ɨ ma zózi i bhákíé nɛ́ i bhó mábhú drʉ máfa ɛ́ngbángá si bhákíé nɛ́, bhu bhó mábhú drʉ móóbhua aamɨ átɛ́ɨ́bhɔ́ndyá si bhákíé nɛ́ nɛ́. » 15 Hee ɔdhya ómbi ndúbhu kála bhó « Anyɛ́ngɨrɨ bhe nyarɨ́a ki átéísú aádá i ɔ́dhyɔ́ anyɛ, outo nɛ́, sɨ́ bɛsɨ́ngɨ múbhúa ánɔdhyɔ́ ootu, ɔ́dhyɔ́ hɛ́ kɛ́ɨ́pwʉ ka bha hɛ bhó anúékíní kɔ́dá zá átapɛ i. » 16 Hee bh'ɔgá kála nátámbá kana, ɔdhya bhó « Náasí mándátíómbíé kana ɨ́n'abwʉ ánɛ́ɨ́pwɔ́ si kéídibwʉ nɔ́ɔ nɛ́mɛ́lɛ́ kpɔkpɔ i sɔ́ ɨ́ nɛ́. 17 Bh'erímá a n'ɔɨa ndrɛ nɛ́ bhó ‹ Má ú mɛ́sɨ́a ká bhásí ? Outo nɛ́, sɨ́ ka ɨ máro ɔmɛ́ i sɨ́ máánʉ́ to nɛ́mɛ́lɛ́ i bhándrá nɛ́ nɛ́. › 18 Ɔdhya tɔkana bhó ‹ Haaa ! Má ú mɛ́sɨ́a sɔ́ ɨ́ : má ú mávha ébongiro si bhándrá nɛ́, bhe mábhʉa ési ká ámɛ́kpɔ́kpɔ́ pima nɛ́, bhe máánʉ́a to nɛ́mɛ́lɛ́ ndúbhu bhu ɔ́dhyɔ́ akʉ́ɛ́ si bhándrá nɛ́. 19 Bhe mádhya táo andréísú ko ndó : Andréísú gwa ! Nyá bhó ánɔdhyɔ́ móotu si nyá ú nyóógyá bhó ndrɛɛ́wɛ nɔ́ ndru átɛ́kárángá ootu nɛ́. Kʉhɔ ká ngwɛ́ táo, kaányɔ, kʉmbwɔ́, kɛɨ́gyagya ndru ! › 20 Nɔ́dhyɔkana, Angéle ɔdhya nɔ́ɔ bhó ‹ Andruabɨ́bɨ́ i gwa ! Sɨ́ átekini i, má ú mádrwa andrúóudhuudhu. Ɔ́dhyɔ́ ndúbhu si nyáapípíría ndru ko i nɛ́, múngá ndru bhó ndrɛsɨ́ba ká nɔ́ sɨ́ mɛ́sɨ́ nédhu ? › » 21 Hee bha drɨ́ Yésu aádrwá ɨ bhó « Ɨ́n'a sɨ́ɨ́sɔ́ átómbí i aápípíría sɨ́ ndrɛ ko ápye nɛ́mandati, bh'obhú ka ɨ táo nɔ́rɔ mandati Angéle ánɔ́tɔŋɔ nɛ́. »

Óudrwaamɨ si Yésu bha nɛ́ kétu ányeisu bha ú Angéle a ɨ

(Mat. 6.25-34)

22 Átámɛ́zaa, Yésu ɔdhya óudrwaamɨ si bhándrɛ nɛ́ kála bhó « Hee amúgwó ká nɔ́dhyɔ i mádhya to nyala ndó akíótodriodrí, akíéisu káángodi bhelé átáányɔ́ sɨ́ amʉ́nyɔ́ nɛ́ ányɔdhyɔ, bɛsɨ́ngɨ obhúa ká átɔdhyɔ i ógí si akíéepi anyɛ. 23 Outo nɛ́, sɨ́ nɔ́ra i nómbí bha nɛ́, a ú ɛpá náányáányɔ́, bhe néépí a ú ɛpá ógí. 24 Amúgwó ká ookiro árí, kɛ́dhɨ ka bhe kánʉ́ ka ká bhu ɛɨbhʉ́ɛ́ɨ́bhʉ́kpɔ, ka ɨ kɔ́rɔ bhu mbaga bhe ka ɨ kɔ́rɔ bhu bóngíró, bhe Angéle a ú ɛɨ́nya hɛ. Bhe nya ú nyɛpá ká pá bhásí árí átɛkpɔkpɔ́ ! 25 Adhíngwɛ i aanyɔɔ́tɔ átéísú amágyambala, aátaátɛ bhó ndrakpu nádhɨngangwɛ pɨɨ́dhɔ átékíní si bhándrɛ nɛ́ zá átapɛ i nɛ́ ? 26 Obhúa táo bhó ka ɨ aanyɔɔ́rɔ aátáatɛ átɔdhyɔngwɛ sasa gyó nɛ́ nɛ́, oudhu gyó i akíéisu ká ú kódia to átɔ́dhyɔ́ akʉ́ɛ́ nɛ́ ? 27 Amúgwó ka ookiro sɨ́ émbóóro kédia ú átɛmɔvhyá : kɛ́sɨ́ ka ká bhu molo i bhó nya ú nyɔʉ́dha ógí nɛ́, bhe má nɛ́ mádhyá nyala nɛ́, bɛsɨ́ngɨ obhúa ká nɛ́ɨ́nyɨ́ Salɔmɔ́ ánɛmándátí ndúbhu si abwʉ nɔ́ nɛ́, kabwʉ ɨ to néi afobwʉ átémbóóro si kana átɔmbɛ nɛ́. 28 Angéle a nɛ nɛ i ɛɨ́ndrá ɛ́ɛ́sɛ́bɨ́ si ká ú átɛmɔvhyá átɛtɨánɛ i nɛ́, obhúro ká hɛ́ kókpua hɛ átaago nɛ́. Hee ɛgya táo ndrɛ bhásí bhó Angéle aángɛɨndrɔ́ aamɨ bhelé ? Hííi ! Aamɨ ombi si ánapíápíngwɛ sasa nɛ́ mbá ! 29 Hee mɨɨ́ngaáhú ki bhelé nya hɛ́ mʉnda bhó nyáá ádhɨ́ngɔ́mɛ kpɛ́ bhó nyɔnya oudhu, bhó bhe nyɔmbwa oudhu nɛ́. 30 Outo nɛ́, sɨ́ ɔ́dhyɔ́ hɛ́ ndúbhu nɛ́ nɛ́, ɛ́pagáno si zá átapɛ i nɛ́, ká ú kɔ́nda hɛ ádhɨ́ngɔ́mɛ kpɛ́, obhúa aamɨ nɛ́, Angéle nÁpá i bhákíé nɛ́ a ú ɛɨ́tɨ́a bhó nya ánamémo ro. 31 Amʉ́nda ká pá nɛ́Ɨnyɨngwa i Angéle bha nɛ́, bhe Angéle aáoba nyala ɔ́dhyɔ́ akʉ́ɛ́ hɛ́ ndúbhu t'angɛ́pɛ. »

Amʉ́nda bhó nyobhú ánɛmándátí sé ú átɔrɔ nɛ́

(Mat. 6.19-21)

32 « Nya ngwɛ́ nɛ́ɛpɛ sasa, nɔ́dhyɔkana, mɨɨ́ngɛɛ́rʉ́ bhelé, outo nɛ́, sɨ́ Angéle aábɔrwa aamɨ bhó anyékí ki átɛƗnyɨngwa i bhándrɛ nɛ́. 33 Anyɔ́ʉ́hya ɔ́dhyɔ́ si bhákíé nɛ́, bhe mua ámɛ́faránga ɛ́mʉ́dádákúái kála. Anyɛ́sɨ́ ookiro ɛ́pɔtɔmɔnɨ́ si kɔ́gwɛ́ ka nɛ́, nɛ́mandati i eebíbhú ka nɛ́, ú Angéle a ɨ, ú nɛ́ɛ́gʉ́ aátɛ ka ɨ bhó ndrɔʉ́dɨ, bhu ú ɔ́bhɔ́rɔ́ aátɛ ka ɨ bhó nyɔnyɔ́. 34 Outo nɛ́, sɨ́ nɛ́mápue i nɛ́mandati i bhándrúé nɛ́ a ká to nɛ́, andrúéísú obhua bhu nɛ sɨ́ égye. »

Óudrwaamɨ kɛ́ngɨrɨ átɛkʉ́ámɛ́ i nɛ́Ngwángwɛ i nÓmbí bha nɛ́ andrɛ

35 « Anyáarɨ́ akíáábhɔ́ ánɛmʉkábha, ɛ́talá si bhákíé nɛ́ kóbhú áméívho, 36 bhe mubhua únga ká sɨ́ émólói si ká ú kónvá nɛ́ínyɨ́ i bhányɛ nɛ́, néi a ú ɛkʉ́a ú ɔɔ́bwʉ ɨ ú átaadhu kana i náagɨ andrɛ nɛ́. Ká ú kónvá nɛ átɔmbanda i bhó átadhɨnga i oópua ɨ nɛ́, bhó bh'opya négyónɔ nɛ́, bhó bhe nyɔɔ́sa nɔ́ɔ sɨ́ nápúápú ɛ́gala. 37 Nɛ́ɨgyagya ɨ́n'a átémólói si, átadhɨnga i nɛ́ɨ́nyɨ́ i bhányɛ nɛ́ oópua ɨ nɛ́, bh'aába hɛ ká hɛ́ kórúa nɛ́ ! Nzúdhá, má nɛ́ mádhyá nyala nɛ́, nɛ́ɨ́nyɨ́ nɛ́ ɔndrɔba némólogi i bhándrɛ nɛ́, bh'ɔlaba kála námísá, bh'ɔtʉba a n'oóbhua hɛ átáányɔ́ nɛ́ ! 38 Nɛ́ɨgyagya átémólói hɛ́, ɨ́ drɨ́ nɛ́ɨ́nyɨ́ ɛkʉ́a ɨ, bisa átekinihɔ, bisa átoobhuɔdhyɔ́ nɛ́, bh'aámbwua hɛ nyáá ká hɛ́ kɛ́ngɨ́rɨ́a nɛ́ ! 39 Anyɛ́ɨ́tɨ mɔmbɛ́ bhó ‹ Bhambómbíé angobhu a n'ɛɨ́tɨ́a nádhɨnga nánganɛ́ i nɛ́ɛ́gʉ́ ekua to ú bhándrɛ bhó ku ndrɛ́gʉ ú átégyó i bhándrɛ nɛ́ nɛ́, b'abha ka nɛ bhó nékí ndrɛ sɔ́. › 40 Bhu aamɨ, mɨɨ́ngeégi ki bhelé ! Outo nɛ́, sɨ́ nɛ́Ngwángwɛ i nÓmbí bha nɛ́ ɛkʉ́ba átadhɨnga i ka nɛ́ ka anyáambá to nɛ́. »

Nɛ́kapíta amɛ́yɔ i ánakɨra nɛ́

(Mat. 24.45-51)

41 Hee Pɛ́tɛrɔ ɔɨa Yésu bhó « Nɛ́Ɨ́nyɨ́ ! Ndó mʉ́gá sɨ́ mala ápye nátámbá nɛ́ aama oudrwaamɨ, bhu i bhó mʉ́gá ómbi ndúbhu kála nɛ́ ? » 42 Bhe nɛ́Ɨ́nyɨ́ Yésu aátúa nɔ́ɔ bhó « Nɛ́kapíta nánganɛ́ i a ámɛ́mɛ́yɔ bh'a ánakɨra nɛ́ ? Ɨ́n'a nɛ i nɛ́ɨ́nyɨ́ etua nɛ bhó nárɨ́ nɔ́ɔ négyó i bhándrɛ nɛ́ nɛ́, bhó bh'aáa áányɔ́ émólói akʉ́ɛ́ kála átadhɨnga i aáta ndrɛ nɛ́. 43 Nɛ́ɨgyagya átɛkapíta nɛ́, ɨ́ drʉ nɛ́ɨ́nyɨ́ i bhándrɛ nɛ́ ɔa néhí, bh'abha nɛ a n'etúa nɛ bhó nárí nɔ́ɔ négyó i bhándrɛ nɛ́ nɛ́, bh'ɛkʉ́a bh'aámbwua nɛ a n'ɛsɨ́a némolo nɛ́ sɨ́ɨ́sɔ́ drʉ nɛ́ ! 44 Nzúdhá, má nɛ́ mádhyá nyala nɛ́, etua nɛ métu nɛ́ɨ́nyɨ́ átɔ́dhyɔ́ si bhándrɛ nɛ́ ndúbhu. 45 Obhúa bhe némólómbíé nɛ́ ɔa drɨ́ bh'ɔdhya tándreísú bhó ‹ Nyɔɔmbɛ́ ! Nɛ́ɨ́nyɨ́ a ú oónúa ká pá oónu, ka ká ɨ nɛ́kʉ́ ká pá ›, hee bh'ɔtʉ́a bhó drɨ́ a n'oda bhó émólói akʉ́ɛ́ ámɛ́masí ánamándrɔ́ nɛ́, a n'aánya ámámbámbó, a n'ɛɨ́mbwá ndrɛ, a n'adaa nɛ́. 46 Hee nɛ́ɨ́nyɨ́ i bhándrɛ nɛ́ ɛkʉ́ba átɛtɨánɛ i ka ɨ nɛ ú avhɨ́a to nɛ nɛ́, bhu átadhɨnga i ka ɨ nɛ ú aámbá to nɛ́. Bh'eíndreba nɛ ámámbámbó, bh'aáoba nɔ́ɔ néngbólú átɛ́mápuekana ánombi si ka kápí Angéle nɛ́. 47 Nɛ́kapíta i a ú ɛɨ́tɨ́a ɛɨ́tɨ ɔ́dhyɔ́ si nɛ́ɨ́nyɨ́ i bhándrɛ nɛ́ a ú ɔɔ́mʉ́a nɛ́, bhe ka nɛ́ɨ́mbɛmbɛ ndrɛ bhó ndrɛsɨ́ sɨ́ɨ́sɨ́ nɛ́ɨ́nyɨ́ i bhándrɛ nɛ́ ɔɔ́mʉ́a nɛ́, kódoba nɛ mopúulú. 48 Nɔ́dhyɔkana, nɛ́kapíta i ka nɛ́ɨ́tɨ ɔ́dhyɔ́ si nɛ́ɨ́nyɨ́ i bhándrɛ nɛ́ a ú ɔɔ́mʉ́a nɛ́, bh'obhúa a n'ohia ndrɛ nóhíámɛ́ gyó i aáta to aátɛ sɨ́ kódo to nɛ mopúulú nɛ́, kódoba bhó ngwɛ́ nɛ nyáá pɨɨ́dhɔ ápye. Nómbí i kááa nɔ́ɔ ɔ́dhyɔ́ ámóotu nɛ́, kóniba nɔgɔ nɛ ɔ́dhyɔ́ sɨ́ ámóotu. Nómbí i kɛ́ɨ́gba nɛ ɔ́dhyɔ́ ámóotu bhó nárɨ́ nɛ́, kóniba nɔgɔ nɛ ɔ́dhyɔ́ sɨ́ ámóotu pima. »

Ómbi káándi aándi Yésu tándrɔdhyɔ

(Mat. 10.34-36)

49 Yésu ɔdhya bhó « Mékúa ndó ku mádhi náago ɨ́ zá átapɛ i, bhe má ú mɔ́ɔ́mʉ́a ɔɔ́mʉ ndó nóbhú bhó aángovhó bhó ! 50 Má ú mágba nɛ́batísimo^a , bhe nɛ́ nɛ́ ɨ́n'a máto néebili tó bha drɨ́ ámɔdhyɔ ɛsɨ́a ɨ ndrɛ. 51 Nyaambá ki bhó mékúa ndó ku métu nɔ́dhyɔ kpílíbhíndí átapɛ i ? Ka ɨ nɛ bha bha sɔ́ ! Nɔ́dhyɔkana, má nɛ́ mádhyá nyala nɛ́, mékúa ndó ku métu náándíaandi átombi ányeígo. 52 Outo nɛ́, ɔtʉ́a ndrɛ gaa ɨ́ drɨ́, nákʉʉtyɛ́ i a nɛ́ ánombi tɔ́zɛrɛna nɛ́, káándiba aándi tányɛrɨ́ : andrɔ́tɔdhyɔ, ómbi sɔ́ta kétíba métí ómbi sóórúé, bhe ómbi sóórúé kétíba métí ómbi sɔ́ta. 53 Bhe nápá etíba métí ándrɛngwá masí, bhe nɛ́ngwá masí etíba métí apanɛ́. Bhe náyá etíba métí ándrɛngwá ámándrɔ, bhe nɛ́ngwángwɛ andrɔ etíba métí yánɛ́. Bhe nɛ́masí yánɛ́ etíba métí ándrɛngwá ándrandrɔ, bhe nɛ́ngwá ándrandrɔ etíba métí ándrɛmasí yánɛ́. »

Onía bhó ombirongwɛ nɛ́ɨ́tɨ nádhɨngɔmɛ́ i ándredru

(Mat. 16.2-3)

54 Bhe Yésu erímá a n'ɔdhya ká bhu ombirongwɛhɛ kála bhó « Átadhɨnga i mugwa ɨ nákpuruakpuru kana a n'ɛnga bha ú zebu nɛ́, bhe nyɔɔ́sa sɨ́ nɔ́dhyɔ bhó ‹ Nɛ́kʉ́má a ú osua gaa ɨ́, bh'ɛsɨ́a ndrɛ sɨ́ɨ́sɔ́. › 55 Bhe átadhɨnga i nyaagá ɨ nábwubwu a n'ɛnga bha ú mbóngoto a n'obwua nɛ́, bhe mʉdhya bhó ‹ Néimode mbámbó a ú ɛsɨ́a gaa ɨ́, bh'ɛsɨ́a ndrɛ sɨ́ɨ́sɔ́. › 56 Akiɛɨ́tɔ́i gwa ! Nyaátaátɛ bhó nyɛɨ́tɨ sɨ́ nápɛ bhu nɔ́rɔ sɨ́ kéégwá. Bh'ɛgyá ndrɛ bhásí i ka anyɛ́ɨ́tɨ to nádhɨngɔmɛ́ i ándredru nɛ́ ?

Kʉnda ndó anyáagá ki bhu néetiombíé

(Mat. 5.25-26)

57 Oudhu gyó i aamɨ tɔ́kpɛ nyabɨngya ka to ɔ́dhyɔ́ gyó si aáta bhó anyɛ́sɨ́ nɛ́ ? 58 Obhua bhó néetiombíé i bhándrúé nɛ́ a ú ɔmba mɨ áteetu i nɛ́ɨ́nyɨ́ bha nɛ́ nɛ́, kʉnda kpárá ndó anyáagá ki bha nɛ sɨ́ átéhíɛ, sɨ́ ka nyɛ́sɨ́ sɔ́ nɛ́, ɔa bh'angeídhe mɨ átɛngbanga átézózi ánɛŋɔ, bhe nézózi ɔa bh'angɛɨ́gba mɨ átepolísi ánɛtɛ́, bhe népolísi ɔa nɔgɔ bh'angodhi mɨ ú átɔ́gbʉ́gyó nɛ́. 59 Má nɛ́ mádhyá mɨ́o nɛ́, nyédiba ka égye épí, ka nɛ́ ka nyááge ndru bha pá tó mɨ́ngeíbi ɛ́faránga ndúbhu si kófa mɨ nɛ́. »