Luk 13

Bhe Yésu ɔdhyá bhó ómbi kéevhíngílí ányeisu

1 Sɨ́ átadhɨnga nɛ́ kana nɛ́ nɛ́, bhe ómbi sɔ́ ɨ́ kékúa bhe kángódrwe Yésu ko sɨ́ Piláto ɔpwʉ́bwʉ ómbi si nɛ́Galiláya anɛ, ési kábwʉ ú kábɔsʉ nɛ́mɔ́bɔma Angéle ko nɛ́ ányɔdhyɔ. 2 Bhe Yésu akɛ́lyá kála bhó « Nyaambá ki bhó sɨ́ kɔ́pwʉ́bwʉ ómbi si nɛ́Galiláya anɛ sɔ́ nɛ́, ɔdhyá bhó ndrɔdhyɔ bhó kábwʉ hɛ ánɛmasúmu pima t'angɛpɛ ómbi akʉ́ɛ́ ndúbhu si nɛ́Galiláya anɛ ? 3 Gbagba, ka ɨ nɛ sɔ́ ! Nɔ́dhyɔkana, má nɛ́ mádhyá nyala nɛ́, ka anyéevhíngílí akíéisu nɛ́, aamɨ ndúbhu munziba ká bhu aamɨ sɨ́ɨ́sɔ́ ɨ́hɛ. 4 Bhu ómbi akʉ́ɛ́ tɛ́ɛ́vhɛ́ égí bhɔgɨna si négyó kpɔkpɔ bhóbhó i néSiloé andrɛ odhébwʉ kɔ́tɔ bh'ɔpwʉ́bwʉ hɛ nɛ́, nyaambá ki bhó kɛ́pɛbwʉ hɛ ómbi akʉ́ɛ́ ndúbhu si néYerusalɛ́mɛ anɛ átáádaádá ? 5 Gbagba, ka ɨ nɛ sɔ́ ! Nɔ́dhyɔkana, má nɛ́ mádhyá nyala nɛ́, ka anyéevhíngílí akíéisu nɛ́, aamɨ ndúbhu munziba ká bhu aamɨ sɨ́ɨ́sɔ́ ɨ́hɛ. »

Bhe Yésu ɔgá nátámbá i néfígi ɛtɨ́ i ɔhɔ ka nɛ́ andrɛ

6 Bhe Yésu ɔgá kála tɔkana nátámbá i, ɔdhya bhó « Náasí kana abwʉ ánefígi ɛtɨ́ kana ú átévínyɔ ɛɨpwɔ i bhándrɛ nɛ́. Bh'ɔá bhó ku ndrɔnda to éfígikpɔ bhó ndrɔpɛ, bhe kabwʉ nógwó to. 7 Hee ɔdhya némólómbíé i névínyɔ ɛɨpwɔ nɛ́ andrɛ ko bhó ‹ Kugwó ká, a bhó ɛ́kárángá sɔ́ta má nɛ́ mékua ndó ku mánda éfígikpɔ átéfígi ɛtɨ́ i, ka nɛ́ ka máábɛ to kpɔ nɛ́. Kʉgɔ nɛ mbagya ! Oudhu gyó i obhua to nyáá a n'aátʉ́a átapɛ tápu sɔ́ nɛ́ ? › 8 Bhe némólómbíé i névínyɔ ɛɨpwɔ andrɛ akɛ́lyá nɔ́ɔ bhó ‹ Nɛ́ɨ́nyɨ́, kabha ká ngwɛ́ nɛ pá átɛkaránga i, tó bha drɨ́ mábya ɨ to nápɛ ékílílí bhe métua to nɛ́ɨ́gbádhá apɛ. 9 Ogyakʉnɛ bh'angɔhɔba ɛ́kpɔ átékíní sé bha ú éétú nɛ́. Ka nɔ́hɔ ɨ bhó táo nɛ́, bhe mʉ́gɔba ɨ nɛ. › »

Bhe Yésu ɛɨ́rá nándrɔ amɔ́dra kana átɛsabáto tɨánɛ

10 Yésu abwʉ a n'aádha átɔ́ʉ́sɛ́myágyó kana i éMoyúda anyɛ átɛsabáto tɨánɛ nɛ́. 11 Hee bhe nándrɔ kana ɨ́n'abwʉ drʉ, néi nóudhuudhu biti ɛɨdrábwʉ nɛ ɛ́kárángá tɛ́ɛ́vhɛ́ égí bhɔgɨna nɛ́. Abwʉ a n'aká mákɔ ámégumbe nɛ́, ka nɛ́ ka ɨ nɔ́rɔ aátáatɛ i bhó ndrɛyɔ ndrɛ ɛ́tɛrrrr nɛ́. 12 Átadhɨnga i Yésu ogwá ɨ nɛ nɛ́, bh'ongá nɛ, ɔdhya nɔ́ɔ bhó « Yáa, mɨ́ɨ́ngɔra átogo i bhándrúé nɛ́. » 13 Bh'akpúa nɔ́tɔ ánɛtɛ́, bh'ɔɔ́sá ndrɛ sɨ́ nɛ́yɛ́yɔ, bh'erímá a n'ɔʉ́bwá Angéle nɛ́. 14 Bhe nɛ́ɨ́nyɨ́ i nɔ́ʉ́sɛ́myágyó andrɛ ándreísú ɛndrɨ́a nɛ, bhó sɨ́ Yésu aángɛɨ́rá nómbí átɛsabáto tɨánɛ. Hee ɔdhya ombirongwɛ i abwʉ drʉ nɛ́ kála bhó « Átɛ́pɔ́sɔ kana, ékíní si aátá bhó amadha to ɛ nɛ́ ká tɛ́ngwɛkana. Ɨ́n'a bhó anyékuku táo átékíní hɛ́ bhó ku kɛ́ɨ́ra aamɨ átógó si bhákíé nɛ́, ka nɛ́ ka bha átɛsabáto tɨánɛ nɛ́ ! » 15 Bhe nɛ́Ɨ́nyɨ́ Yésu akɛ́lyá nɔ́ɔ bhó « Akiɛ́ɨ́tɔ́ gwa ! Aamɨ kpɛ́ kána-káná átɛsabáto tɨánɛ, nya ka bha bha ú nyadúa mádú ɛ́bágara, bɛsɨ́ngɨ obhúa ká épúnda si bhákíé nɛ́ átɛmapú si káánya to nɛ́, bhe mʉmba hɛ bhó ku kɔ́mbwɔ́ égwo ? 16 Náyá i, ɨ́n'a bhu nɛ nɛ́ngwángwɛ i Ábaráma bha nɛ́, bhe ɨ́n'a bhó ɛ́kárángá tɛ́ɛ́vhɛ́ égí bhɔgɨna sɨ́ Sátana ɔʉrɨ́bwʉ nɛ ! Bɛsɨ́ngɨ obhúa ká sɨ́ átɛsabáto tɨánɛ, kanga nóní bhó mádú nɛ átɛmʉgbɛ́lɛ́ nɛ́ ? » 17 A drʉ Yésu ɔdhya sɔ́ nɛ́, bhe éetií si bhándrɛ nɛ́ kɔ́gá náanyɛ kpɔkpɔ, bhe ombirongwɛ ndúbhu erímá a n'ɔgá nɛ́ɨgyagya átɔ́dhyɔ́ amámbanga ndúbhu si abwʉ ú abɛsɨ́ nɛ́.

Bhe Yésu ɔgá nátámbá i némutádi kpɔ andrɛ

(Mat. 13.31-32; Mákɔ 4.30-32)

18 Yésu ɔdhya tɔkana bhó « Nɛ́Ɨnyɨngwa i Angéle bha nɛ́ eegwá ká sɨ́ oudhu ? Oudhu gyó i máábhúa ká to nɛ nɛ́ ? 19 Ɨ́n'eegwá sɨ́ némutádi kpɔ i náasí kana ɛɨ́ngábwʉ, bh'okpúa bha átɛɨpwɔ i bhándrɛ nɛ́ nɛ́. Bhe nɛ́ngbɔngbɔ kpɔ nɛ́ ofá, bh'ɛkpɔ́kpá, bh'oópúa néóngwɛ[néo ɛtɨ́], bhe árí mɔvhyá kékúa bhe kángɔ́bhʉ égyo átámɔ́pa. »

Bhe Yésu ɔgá nátámbá i nélevírɛ andrɛ

(Mat. 13.33)

20 Bhe Yésu ɔdhyá tɔkana bhó « Oudhu gyó i máábhú ká to nɛ́Ɨnyɨngwa i Angéle bha nɛ́ nɛ́ ? 21 Ɨ́n'eegwá sɨ́ nélevírɛ i nándrɔ kana ɛɨ́ngábwʉ, bh'ɔrwá nɔ́ ékiló ɛ́tɛɛvhɛ sóórúé égí tɔ́zɛrɛna si nɛ́farínɛ anɛ, bhe ámédhóngó ndúbhu ɛfʉ́a nɛ́. »

Bhe Yésu aádhá bhó ómbi kékí nyɛ átégyónɔ pwʉpwʉ

(Mat. 7.13-14, 21-23)

22 Bhe Yésu erímá a n'aáfa átɛgbɔtɔ bhu átɛ́bhámoí, a n'aádha nɛ́tʉ́ i Angéle bha nɛ́, a n'ɔa mɔ́ɔ bha ú áteYerusalɛ́mɛ nɛ́. 23 Hee bhe nómbí kana ɔɨ́a nɛ bhó « Nɛ́ɨ́nyɨ́, ómbi si kɔ́rába nɛ́, kóbhuba ngwɛ́ nyáá ámámábhú andrɛ ápye ? » Yésu aátua kála bhó 24 « Amúndre kpárá átɛmbanda i bhó anyékí ki átégyónɔŋɔ pwʉpwʉ nɛ́. Outo nɛ́, sɨ́ má nɛ́ mádhyá nyala nɛ́, ómbi ootu kɔ́ndaba néhíɛ i bhó nyekí nyɛ nɛ́, bh'aátɛba ka ndrɛ kɔ́rɔ. 25 Nádhɨnga kana a ú oópuba, bhe bhambómbíé ɛngaba, bh'atɔ́ba négyónɔ. Átámɛ́zaa, bhe mʉtʉba nya hɛ́ nyapapa ki ú muto, nya hɛ́ mupya négyónɔ, nya hɛ́ mʉdhya bhó ‹ Nɛ́Ɨ́nyɨ́, kapú mala négyónɔ ! › Bh'akɛlyaba nyala bhó ‹ Ka mɛ́ɨ́tɨ nándrá ndó nya madhíandrɛ, ndó bhe nyɛngá bha ze ! › 26 Hee bhe mʉdhyɔba bhó ‹ Mabwʉ maángaányɔ́ bhe maambwɔ́bwʉ mɨ́ro átɛ́mápuekana, bhe nyáádhɔ́bwʉ átaasuaméi mapú si bháɛ́ nɛ́. › 27 Bh'ɔdhyɔba nyala tɔkana bhó ‹ Ka mɛ́ɨ́tɨ nándrá ndó nya madhíandrɛ, ndó bhe nyɛngá bha ze ! Anyɛ́zá mʉ́ drʉ, aamɨ ndúbhu si muhia ki ámébiti nɛ́ ! › 28 Átadhɨnga nɛ́, mʉgwoba Ábaráma bhu Isáka, bhu Yakóbho, bhu énébi ndúbhu, átɛƗnyɨngwa i Angéle bha nɛ́. Bhe nɔ́dhyɔkana, aamɨ, mugwoba ki ká hɛ́ kódhía aamɨ bha ú muto nɛ́. Égye, obhuba sɨ́ ómú ápye bhu ɛ́kɨ́ aáká. 29 Hee bhe ómbi kɛ́ngaba ú zebhó, bhe akʉ́ɛ́ kɛ́ngaba bha ú zebu, bhe ómbi akʉ́ɛ́ kɛ́ngaba bha ú kolóto, bhe akʉ́ɛ́ kɛ́ngaba bha ú mbóngoto^a , bhe kángaányɔba átaadhu i nɛ́Ɨnyɨngwa i Angéle bha nɛ́ andrɛ. 30 Hee ómbi akʉ́ɛ́ si ká ú kátá nɛ́zaa^b ɨ́ drɨ́ gaa ɨ́ drɨ́ nɛ́, kɔ́dhaba bhó hɛ néetu^c , bhe ómbi akʉ́ɛ́ si ká ú kɔ́dhá néetu ɨ́ drɨ́ gaa ɨ́ drɨ́ nɛ́, kátɔ́ba bhó hɛ nɛ́zaa. »

Kɔ́pwʉa énébi ú áteYerusalɛ́mɛ

(Mat. 23.37-39)

31 Sɨ́ átadhɨnga nɛ́, bhe ɛ́Mɔfarúsi sɔ́ ɨ́ kɔ́ʉ́sɨ́a nyɛ bha Yésu to ɔʉ́ndɨ́, bhe kɔ́dhyá nɔ́ɔ bhó « Kɛzá drɨ́ bhe nyáápɨa ndru ánehíɛ ro tɔkana, outo nɛ́, sɨ́ Ɛrɔ́dɛ a ú ɔnda bhó ndrɔpwʉ mɨ. » 32 Bhe Yésu ɔdhyá kála bhó « Amʉ́ɔ ku amʉ́dhyɔ nángɔ nɛ́ ko ndó mádhyá sɔ́ ɨ́ó ‹ Má zá mágyá óúdhúúdhú biti, bhe má zá mɛ́ɨ́ra ómbi átékíní si, bhe átékíní hɛ́ bha égye nɛ́ nɛ́, bhe méíbia. 33 Bɛsɨ́ngɨ obhúa bhásí, átékíní si, ɨ́n'onía bhó máágba ndra ánehíɛ ro bha ú áteYerusalɛ́mɛ, outo nɛ́, sɨ́ ɨ́n'ɛsɨ́ ka ndrɛ bhó kɔ́pwʉ nénébi kana átɛ́mápue akʉ́nɛ́, ka nɛ́ ka bha bha ú áteYerusalɛ́mɛ nɛ́. › »

34 Yésu ɔdhya tɔkana bhó « Kɛngwɛ́mbɛ́ magyo akiombi si néYerusalɛ́mɛ anɛ ! Kɛngwɛ́ magyo ! Angéle a ú ɛdha nyala énébi, bhe nyɔʉ́pwʉa hɛ, bh'ɛdha nyala ɔ́dhádhái, bhe nyoúpya hɛ ánoopi ! Máábɔnda ká pá bhásí ámémírí ndó mɔ́ɔ́sɛ aamɨ átɛ́mápuekana andrɔ́tabɛ́, únga ká sɨ́ náálɛ́ androkúé ɔɔ́sa ánandra bh'abhʉa kɔ́tɔ, ka nɛ́ ka anyápí nɛ́ ! 35 Hee bha drɨ́ Angéle a ú abha ɨ nɛ́bha i bhákíé nɛ́. Má nɛ́ mádhyá nyala nɛ́, mugwoba ka bhó ma tó bha drɨ́ nádhɨnga atɛba ɨ, néi mʉdhyɔba to bhó ‹ Angéle nóúfu nómbí i a ú ekua ɨ́nɛ nɛ́Ɨ́nyɨ́ Angéle ánɔ́tɔrʉ nɛ́ ! › »