Luk 14

Bhe Yésu ɛɨ́rá nógómbíé kana átɛsabáto tɨánɛ

1 Abwʉ nɛ́tɨánɛ kana i nɛ́sabáto andrɛ, bhe Yésu ɔá ú nɛ́ɨ́nyɨ́ kana bha átɛɨnyɨ si ɛ́Mɔfarúsi anyɛ, bhó ku nyaányɔ. Bhe ómbi si kábwʉ égye nɛ́, bhe kérímá ká hɛ́ kánya nɛ ánɛŋɔ kpákpárá nɛ́. 2 Bhe náasí kana i a nɛ́ ánɛmadhómadhó nɛ́ abwʉ ú odría drʉ tándreetu drʉ. 3 Bhe Yésu agbá nɛ́mabelu, ɔɨa áadhaadhɔí si nƆ́ʉbwɔ anɛ bhu ɛ́Mɔfarúsi bhó « NƆ́ʉbwɔ i Mʉ́sɛ bha nɛ́ a ú apía pɨ́tɛ́ bhó kɛ́ɨ́ra nómbí átɛsabáto tɨánɛ, bhu átɔdhyɔ i bhó ka nápí nɛ́ ? » 4 Bhe ɨ́hɛ, kabwʉ kápí mabelu to. Hee bh'agbá nógómbíé nɛ́, bh'ɛɨ́rá nɛ, bh'aáá nɔ́ɔ néhíɛ bhó nɔ́kʉ́ ú bhándrɛ. 5 Átámɛ́zaa, ɔɨa hɛ bhó « Adhíngwɛ i aanyɔɔ́tɔ drʉ, néi ándrɛngwá obhúa to nɛ́bágara i bhándrɛ nɛ́ nɛ́, bh'odha átégwómugélu, bh'ɔsɛ ka nɛ bha sɨ́ nópwu sɨ́ drʉ, bɛsɨ́ngɨ obhúa sɨ́ nɛ́sabáto tɨánɛ nɛ́ ? » 6 Bhe kabwʉ ɨ kɔ́rɔ náátaátɛ́ i bhó nyaátu to nɔ́ɔ nɛ́mabelungwɛ kana nɛ́.

Bhe Yésu aáá nɔ́ʉbwɔ i nékibúlá andrɛ

7 Bhe Yésu ogwá ómbi si kóngóbwʉ hɛ átaadhu nɛ́, ká hɛ́ kóúria sɨ́ ɛ́mapú bali-bali sé bha ú éétú nɛ́ ápye nɛ́. Hee bha drɨ́ ɔgá ɨ kála nɛ́tʉ́ kana, ɔdhya bhó 8 « Átadhɨnga i nómbí onga ɨ mɨ átaadhu i náagɨ andrɛ nɛ́, mɨ́ɨ́ngɔɔ́ bhelé bhe mɨ́ngeíkekele ndru átɛ́mápue balí ndré bha ú éétú nɛ́. Outo nɛ́, sɨ́ nyɛ́ɨ́tɨ ka ndó anga sɨ́ aángongó ká bhu nóúgé kana i a ú ɛpá nɛ mɨ átɛkpɔkpɔ́ nɛ́. 9 Bhe átadhɨnga i nómbí nɛ́ onga aamɨ kpɛ́ akíɛ́rɨ́ sóórúé nɛ́ nɛ́ ekua ɨ, bh'angɔdhyɔ mɨ́o bhó ‹ Andrágɔ́, kandi ká pá nóúgé i átɔ́mɛ́ nɛ́ ! › Hee nyɛ́zá bhó drʉ ánaanyɛ ro ndúbhu bhe mɨ́ngodri átɛ́mápue ndré bha ú átabɛ́ nɛ́. 10 Nɔ́dhyɔkana, átadhɨnga i nómbí onga ɨ mɨ nɛ́, kʉ́ɔ́ ku múdrí átɛ́mápue ndré ú átabɛ́ nɛ́. Be átadhɨnga i oópua ɨ nɛ́, be nɔ́dhyɔ mɨ́o pá bhó ‹ Andrágɔ́, ku múdrí bha ú éétú ! › Bhe nɛ́ nɛ́ bh'edilia mɨ áteetu i ómbi ndúbhu si nyáága kɔ́rɔ átamísá nɛ́ ányɛŋɔ. 11 Outo nɛ́, sɨ́ nómbí i eíndría ndrɛ nɛ́, bhe kɛ́ɨ́rya nɛ. Bhe nómbí i ɛɨ́rya ndrɛ nɛ́, bhe kéíndría nɛ. »

Bhe Yésu ɔdhyá bhó kóngo ɛ́mʉ́dádákúái

12 Hee bhe Yésu ɔdhyá nɔgɔ nómbí i ongóbwʉ nɛ nɛ́ nɛ́ ko bhó « Átadhɨnga i nyá ú nyɔ́ʉ́ka ɨ ómbi ánaányɔ́ si nɛ́mʉtyáhɔ anɛ obhúa to ési náabhó anɛ nɛ́, mɨ́ɨ́ngongó bhelé andrúágɔ́ndruhɛ. Mɨ́ɨ́ngongó ká bhelé bhu mayándrúngwɛhɛ, mavandruhɛ, bɛsɨ́ngɨ obhúa ká bhu ɛ́mándátíi si nyá ú nyáárɛ́rá kɔ́rɔ nɛ́. Outo nɛ́, sɨ́ ɨ́hɛ nɔgɔ, kóngoba mɨ móngo sɨ́ɨ́sɔ́ bhe káátuba to mɨ́o nóumbwu. 13 Nɔ́dhyɔkana, átadhɨnga i nyá ú nyɔ́ʉ́ka ɨ náadhu nɛ́, kungo ɛ́mʉ́dádákúái, ómbi amɔ́dra, ɔ́ɔbá ánɛŋɔʉtɛtɛí kɔ́rɔ. 14 Múhía ndru sɔ́ nɛ́, múbhúba móbhu ánɛɨgyagya ro. Outo nɛ́, sɨ́ ka ɨ kɔ́rɔ híɛ i sɨ́ káátu to mɨ́o nɛ́. Bhe Angéle aátuba mɨ́o aátu nóumbwu átadhɨnga i eíruba ɨ ómbi amɛ́yɔ átonzi nɛ́. »

Bhe Yésu ɔgá nátámbá i náadhu kpɔkpɔ i nɛ́Ɨnyɨngwa i Angéle bha nɛ́ andrɛ

(Mat. 22.1-10)

15 A drʉ náasí kana átaasí si kábwʉ ú káágá Yésu ro átamísá nɛ́ ɔgá ɨ ɛ́tʉ hɛ́ sɔ́ nɛ́, ɔdhya nɔ́ɔ bhó « Nɛ́ɨgyagya ɨ́n'a átómbí i aányɔba átaadhu i nɛ́Ɨnyɨngwa i Angéle bha nɛ́ andrɛ nɛ́ ! » 16 Bhe Yésu ɔgá nɔ́ɔ nátámbá, ɔdhya bhó « Náasí kana sɔ́ ɨ́ ɔɔ́bwʉ, bh'eíká náadhu kpɔkpɔ, bh'ongá to ómbi ootu. 17 Bh'oópúa ndrɛ átadhɨnga i náányáányɔ́ andrɛ, bh'ɔdhá némólómbíé i bhándrɛ nɛ́ bhó ku nɔ́dhyɔ ómbi si ndrongóbwʉ hɛ nɛ́ kála bhó kéku táo, outo nɛ́, sɨ́ ɔ́dhyɔ́ ndúbhu ká bhó ámɛ́ɨ́mbɛmbɛ. 18 Átadhɨnga i ɔdhyá ɨ kála sɔ́ nɛ́, bhe ɨ́hɛ kpɛ́ kána-káná kɔ́tʉ́a ká hɛ́ kónía néégíeegi nɛ́. Nómbí ámɛ́káná ɔdhya nɔ́ɔ bhó ‹ Máábógé nɛ́ɨpwɔ kana sɔ́ ɨ́, bh'onía bhó máɔ ká pá ku mágwó. Mánía mɨ nékíkilíki ndó nyéégi ma. › 19 Bhe nómbí akʉ́nɛ́ ɔdhyá bhó ‹ Máábógé ɛ́bágara tɛ́ɛ́vhɛ́, bhe má ú máa kɔ́rɔ ndó ku mágwó sɨ́ kɔ́ɔ́bya nápɛ ú átɛɨpwɔ. Mánía mɨ nékíkilíki ndó nyéégi ma. › 20 Bhe nákʉ́nɛ́ tɔkana ɔdhyá bhó ‹ Máábɔ́gɨ́ nándrɔ, bha drɨ́, ka náátɛ ɨ máro bhó méku. › 21 Hee bhe átadhɨnga i némémólómbíé nɛ́ aátúa ɨ ndrɛ nɛ́, bh'odrwá ɔ́dhyɔ́ hɛ́ nɛ́ɨ́nyɨ́ i bhándrɛ nɛ́ ko. Hee bhe bhambómbíé ándreísú agbá náago. Ɔdhya némólólómbíé i bhándrɛ nɛ́ ko bhó ‹ Kʉ́ɔ́ ɛ́gala-gala átaasuaméi mapú, bhu átehiɛ́ mapú si nɛ́gbɔ́tɔ́ anɛ, bhe nyéítá mala ɛ́mʉ́dádákúái ánɔɔbá bhu ɛ́ŋɔʉtɛtɛí ánombi amɔ́dra zá. › Bhe némólómbíé nɛ́ ɔá, bh'ɛsɨ́a sɨ́ɨ́sɔ́, bh'ɛkʉ́a. 22 Átadhɨnga i ɛkʉ́a ɨ nɛ́, ɔdhya bhó ‹ Nɛ́ɨ́nyɨ́, máángɛsɨ́ sɨ́ɨ́sɔ́ mʉ́dhyɔ́nga, bhe ɛ́mapú ká nyáá ú kééká. › 23 Hee bha drɨ́ nɛ́ɨ́nyɨ́ ɔdhyá ɨ némólómbíé i bhándrɛ nɛ́ ko bhó ‹ Kʉ́ɔ́ bha ú átɛ́bhámoí sé bha ú bharɨ́ nɛ́, bhu átegongó si ɛ́ɨ́pwɔ́ anyɛ^a ányabɛ, ku nyéíté mala kpakpara-kpákpárá ómbi si nyáásúa kɔ́rɔ nɛ́, átɛmbanda i ndó négyó i bhándrá nɛ́ nɛ́ɨ́nʉ ánombi nɛ́. 24 Outo nɛ́, sɨ́ má nɛ́ mádhyá nyala nɛ́, ka ɨ ombí kana átombi hɛ́ mángóbá hɛ ɨ́sɛ́ɛ́lɛ́ nɛ́nɛ́ i aányɔba átaadhu i bhándrá nɛ́ nɛ́. › »

Onía bhó óudrwaamɨ si Yésu bha nɛ́ kéídi ányeisu átɔ́dhyɔ́ ndúbhu si ká nɔ́ nɛ́

(Mat. 10.37-38)

25 Átámɛ́zaa, bhe námbaza i ómbi anyɛ erímá a n'aámba Yésu ro átɛ́mápuekana nɛ́. Hee átadhɨnga i eevhíngílía ɨ ndrɛ bha ú ómbi hɛ́ ká ɨ nɛ́, ɔdhya kála bhó 26 « Nómbí i ekua bha zá má ɨ ka nɛ́ ka néídi ándreísú apanɛ́ to bhu yánɛ́ nɛ́, ándrandrɔ to bhu ánandra nɛ́, mayánɛ́ngwɛhɛ ámɛ́masí kɔ́tɔ bhu ámándrɔ́ nɛ́, ka nɛ́ ka néídi ándreísú bhu ndrɛ to tɔ́kpɛ nɛ́, ɨ́n'aátɛ ka bhó ndrobhú nóudrwaamɨ i bhándrá nɛ́. 27 Nómbí i ɔtá ka nékurúsi i bhándrɛ nɛ́, bh'edrwé ka andráhí nɛ́, ɨ́n'aátɛ ka bhó ndrobhú nóudrwaamɨ i bhándrá nɛ́. 28 Obhúa ká bhó nómbí kana aanyɔɔ́tɔ bh'ɔɔ́mʉa bhó ndrɔbhʉ négyó kpɔkpɔ bhóbhó nɛ́, ɨ́n'odrí ka ká bha pá bh'oútá ándreísú ? Odria módri bh'oútá ándreísú, átɛmbanda i bhó ndrɛɨ́tɨ bhó bisa ɛ́faránga kɔ́ra to bhásí bhó ndreíbi nɔ́ nɛ́. 29 Sɨ́ ka nɛ́sɨ́ sɔ́ nɛ́, bh'ɛsɨ́a nɛ́fɔndasyɔ́ i négyó nɛ́ andrɛ, ka nɛ́ ka néíbi ámɔ́bhʉ nɛ́, bhe ómbi ndúbhu si kóbhúa ká hɛ́ kógwá nɛ́, bhe kɔ́tʉ́a ká hɛ́ kéínva nɛ nɛ́. 30 Bhe kɔ́dhya bhó ‹ Náasí i ɔtʉbá nyáá nɔ́bhʉ, bhe kabá ɨ bhó táo nɔ́rɔ náátaátɛ́ i bhó ndreíbi nɔ́ ámɔ́bhʉ nɛ́ ! › 31 Sɨ́ɨ́sɔ́ tɔkana, átadhɨnga i nɛ́ɨ́nyɨ́ kana obhúa ɨ a n'ɛɨ́mbɛmba ndrɛ bhó ku ndreíndre nɛ́ɨ́nyɨ́ akʉ́nɛ́ nɛ́, ɨ́n'odrí ka ká bha pá, bh'oútá ándreísú ? Odria módri bh'oútá ándreísú, a n'ɔɨa ndrɛ bhó ‹ Má ánɛsʉdhá ékóto tɛ́ɛ́vhɛ́ ! Aáta máro pɨ́tɛ́ bhó máɔ ku mápyo nɛ́ɨ́nyɨ́ akʉ́nɛ́ i a ú ekua mʉ́ náapwʉ ánɛsʉdhá si bhándrɛ nɛ́ ékóto ɛ́tɛɛvhɛ sóórúé nɛ́ ? › 32 Ka náátɛ nɔ́rɔ nɛ́, bh'ɔdha ɔ́dhádhái sɨ́ átadhɨnga i nɛ́ɨ́nyɨ́ akʉ́nɛ́ nɛ́ obhúa ɨ nyáá ámɛ́ndrɔndrɔ nɛ, bhó ku kɔ́ɨ nɛ bhó nyɛsɨ́a bhásí átɛmbanda i bhó nyɛɛ́mbɛ nɛ́. » 33 Yésu ɔdhya táo tɔkana bhó « Hee bha drɨ́ ka ɨ ombí kana aanyɔɔ́tɔ i aátá bhó ndrobhú nóudrwaamɨ i bhándrá nɛ́, ɨ́ drʉ eídi ka ándreísú átɔ́dhyɔ́ ndúbhu si a nɔ́ nɛ́. »

34 « Nya ú nyɛɨ́tɨ́a ɛɨ́tɨ bhó nékú ɨ́n'a nédhu balí. Bhe ándrɛngyangyá aángedi bhó pá nɛ́, káátua bhó nɛ bhásí ? 35 Ka ɨ bhó nɛ dhu balí bhu ápye nápɛ ko, bɛsɨ́ngɨ obhúa ká bhu nɛ́ɨgbadha ko. Kámisa bhó nɛ mámisa ápye bha ú muto. Nómbí i ɨ́n'a ánɛbɨ́ amɔ́ga nɛ́, nɔ́gá ! »