Luk 15

Bhe Yésu ɔgá kála nátámbá i nɛ́kandóló i ougíbwʉ nɛ́ andrɛ

(Mat. 18.12-14)

1 Hee bhe Ɛ́ndɔ́mbɛ si ɛ́páko anyɛ bhu ɛ́másúmúi, bhe ɨ́hɛ kpɛ́ kérímá ká hɛ́ kɔ́ʉ́sɨa nyɛ bha ú Yésu a ɨ bhó ku nyɔgá nɛ nɛ́. 2 Bhe ɛ́Mɔfarúsi bhu áadhaadhɔí si nƆ́ʉbwɔ anɛ kérímá ká hɛ́ kɔ́ʉ́dhya nyɛ nɛ́ bhó « Oudhu gyó i náasí i a ú ekpokpa to ɛ́másúmúi mɔmbɛ́, bh'a ú aánya kɔ́rɔ átɛ́mápuekana nɛ́ ? »

3 Bhe Yésu ɔgá kála nátámbá, ɔdhya bhó 4 « Bhe nómbí kana aanyɔɔ́tɔ obhúa ánɛkandóló nɛ́kámá kana, bhe kana oúgía. Abha ka bha mábha ɛ́kandóló akʉ́ɛ́ hɛ́ ányɛrɨ́ ɛ́tɛɛvhɛ téndelégí égí téndelégí nɛ́ nɛ́ ú átépómoóyé, bh'ɔa bh'angɔnda néi oúgía nɛ́ tó bha drɨ́ ogwá ɨ nɛ ? 5 Bhe átadhɨnga i ogwá ɨ nɛ nɛ́, bh'ɔgá nɛ́ɨgyagya ootu, bh'ɛɨ́nga nɛ bh'akpua nɛ tánɛtɛ́bhabha. 6 Bhe átadhɨnga i aátua ɨ ndrɛ bha ú bhándrɛ nɛ́, bh'onga ándragɔ́nɛ́hɛ bhu amaárɛ́nɛ́hɛ, bh'ɔdhyá kála bhó ‹ Mángá aamɨ ndó amʉ́gá máro nɛ́ɨgyagya átɛ́mápuekana, outo nɛ́, sɨ́ máángogwo nɛ́kandóló i bhándrá nɛ́ i ougíbá nɛ́ ! › 7 Má nɛ́ mádhyá nyala nɛ́, obhua ánɛɨgyagya sɨ́ɨ́sɔ́ ú átɔrɔ átɛ́másúmúómbíé kana i eevhíngílía ándreísú nɛ́, t'angɛpɛ nɛ́ɨgyagya i obhua nɔ́ átombi ɛ́tɛɛvhɛ téndelégí égí téndelégí si káámbá nyɛ bhó nya ámɛ́mɛ́yɔ nɛ́, ka ɨ kɔ́rɔ ɔdhyɔ i bhó nyeevhíngílí ányeisu nɛ́. »

Bhe Yésu ɔgá nátámbá i nándrɔ kana i ogwá nɛ́farángakpɔ i bhándrɛ nɛ́ nɛ́

8 Yésu ɔdhya bhó « Bhe nándrɔ kana obhúa ánɛfárángákpɔ́i tɛ́ɛ́vhɛ́, bhe kana azinga to ndrɔɨ. Ɔsʉ ka bha mɔ́sʉ nɛ́tála bhó ndrovhi nɔ́ ú gyɔ́tɔ, bh'ea négyó a n'ɔnda átɛmapú ɛ́kána-káná tó bha drɨ́ ogwá ɨ ámɛ́farángakpɔ nɛ́ ? 9 Bhe átadhɨnga i ogwá ɨ to ámɛ́farángakpɔ nɛ́ nɛ́, bh'onga ándragɔ́nɛ́hɛ bhu amaárɛ́nɛ́hɛ, bh'ɔdhya kála bhó ‹ Mángá aamɨ ndó amʉ́gá máro nɛ́ɨgyagya átɛ́mápuekana, outo nɛ́, sɨ́ máángogwo nɛ́farángakpɔ i bhándrá nɛ́ i azíngábá nɛ́ ! › 10 Ma nɛ́ mádhyá nyala nɛ́, áángelú si Angéle bha nɛ́ kóbhua ánɛɨgyagya sɨ́ɨ́sɔ́ átɛ́másúmúómbíé kana i eevhíngílía ándreísú nɛ́. »

Bhe Yésu ɔgá nátámbá i nɛ́ngwángwɛ kana ougíbwʉ to nɛ́

11 Bhe Yésu ɔdhyá tɔkana bhó « Náasí kana abwʉ ánɛgyándrɛ́ masí sóórúé. 12 Bhe ámɛ́záómbíé ɔdhyá apanɛ́ ko bhó ‹ Páápa, kaáo mʉ́ ɛ́ɨ́bhɔ́ndyá áná si nyá ú mʉ́rwá mʉ́ nɛ́ ! › Bhe ányapá oóbhúa hɛ átɔ́dhyɔ́ si abwʉ nɔ́ nɛ́. 13 Átɛzaa i ékíní pɨɨ́dhɔ anyɛ, bhe nɛ́ngwángwɛ záómbíé nɛ́ ɔʉ́hyá ɛ́ɨ́bhɔ́ndyá hɛ́ ndúbhu, bh'ɛngá bh'ɔá átápɛ́gɔ́ kana ndrɔ́ndrɔ́, bh'oópúa. A drʉ oópúa égye nɛ́, bh'aadádá ɛ́faránga si bhándrɛ nɛ́ a n'ɔrwa nɔ́ nɛ́gyágbá nɛ́. 14 A drʉ aádádá ɛ́faránga hɛ́ ndúbhu nɛ́, bhe némo mbámbó odhá átápɛ́gɔ́ nɛ́, hee bh'ɔtʉ́a bhó drɨ́ a n'ɔgá némo nɛ́. 15 Bh'ɔá bh'angékí némolo nómbí kana ko átombi si nápɛ́gɔ́ nɛ́ anɛ, bhe nómbí nɛ́ ɔá drɨ́ bh'ɔdhá nɛ bhó ku nɛ́ɨ́nyɛ nɔ́ɔ ɛ́ɛgɔ́ ú átɛ́fɨ́rɨmɨ mapú si bhándrɛ nɛ́. 16 Bhe ɨ́n'abwʉ ú ɔɔ́mʉ́a ɔɔ́mʉ bhó ndrɔnyɔ́ átáányɔ́ si ɛ́ɛgɔ́ kábɔnyɔ nɛ́, bhe kabwʉ ɨ ombí i aboo nɔ́ɔ nɛ́. 17 Hee bh'erímá a n'aámbá ndrɛ to nɛ́, ɔdhya bhó ‹ Híi ɨ́má mbá ! Émólói ndúbhu si páápa bha nɛ́ ká ánaányɔ́ ámóotu t'angɛpɛ, bhe ɨ́má, má i mánzía táo ánemo i nɛ́ ! 18 Má ú mɛ́nga mákʉ́ ú páápa a ɨ, bhe mádhya nɔ́ɔ ndó “Páápa, máábɛ́sɨ́ nɛ́masúmu bha ú Angéle a ɨ bhu áteetu i bhándrúé nɛ́ ! 19 Ka máátɛtɛ bhó ndra ndó múngo ma bhó andrúɛ́ngwá. Nyɔ́ɔ́mʉ́a nɛ́, kágba bhó ma nyáá únga ká sɨ́ némólómbíé kana átémólói si bhándrúé nɛ́.” › 20 Bh'ɛngá bh'ɔkʉ́a ú apanɛ́ a ɨ. Átadhɨnga i abwʉ ɨ ngwɛ́ nyáá ámɛ́ndrɔndrɔ nɛ́, bhe apanɛ́ eédrá bh'ogwá nɛ, bh'ɔgá ándrɔdɔ pima, bh'ohía átɛngɔ bh'angáamʉ́ ándrekórókpɔ. 21 Nɛ́ngwángwɛ ɔdhya nɔ́ɔ bhó ‹ Páápa, máábɛ́sɨ́ nɛ́masúmu bha ú Angéle a ɨ bhu áteetu i bhándrúé nɛ́. Ka máátɛtɛ bhó ndra ndó múngo ma bhó andrúɛ́ngwá… › 22 Bhe apanɛ́ ɔdhyá émógyá si bhándrɛ nɛ́ kála bhó ‹ Anyɛ́mba nɔ́ɔ nɛ́kánzo i a n'ɛpá átɔmbɛ nɛ́ zá tílé bhe nyɛɨndrá nɛ ɛ́gala ! Bhe mutia nɔ́ɔ nángí ándrɔ́tɛ́ngwɛ́kpɔ ɛ́gala, bhe nyɛɨndrá nɛ ékátárá^a ánɔ́tɔɔnzɔ ɛ́gala ! 23 Anyéi ánɛbágara ngwángwɛ dobhodobho, bhe mʉpwʉa nɛ ! Améíke náadhu, amáányɔ ká ! 24 Outo nɛ́, sɨ́ nɛ́ngwángwɛ i bhándrá nɛ́ i mugwa i nɛ́, abá aángonzí mónzi, bh'aángorú ! Abá aángougí, bhe máágogwo nɛ ! › Bhe kɔ́tʉ́a náadhu.

25 Ɔ́dhyɔ́ si drɨ́ nɛ́, ándrɛngwá abhulombíé abwʉ a n'ɛsɨ́a némolo ú átɛɨpwɔ nɛ́. Átadhɨnga i a n'ɛkʉ́a ɨ nɛ́, a n'ɔdhya bhó ndroópu bhó bha ú bharɨ́ nɛ́, bh'ɔgá ékpokpo ánabítá ká hɛ́ kɔ́hʉa, ómbi ká hɛ́ kódhia nɛ́ɔ mopúulú nɛ́. 26 Bh'ongá némólómbíé kana átémólói si apanɛ́ bha nɛ́, ɔɨa nɛ bhó ‹ Asaadhu gyó nɛ́ a ú ɛsɨ́a ndrɛ nɛ́ nɛ́ ? › 27 Némólómbíé nɛ́ ɔdhya nɔ́ɔ bhó ‹ Yándrúngwɛ aángɛkʉ́, bhe apándru aángɔdhyɔ́ bhó kɔ́pwʉ nɔ́ɔ nɛ́bágara ngwángwɛ dobhodobho bhó sɨ́ ndraángogwo nɛ a n'ɛkʉ́a áneépí kpákpárá nɛ́ ! › 28 Bhe nɛ́ngwángwɛ abhulombíé nɛ́ ándreísú agbá náago bh'ɛtʉ́a bhó ndrekí ka ndrɛ égye átaadhu nɛ́. Bhe apanɛ́ edía, bh'erímá a n'oúgegela ndrɛ nɔ́ɔ bhó nékí ká ndrɛ pá. 29 Bh'aátúa apanɛ́ ko bhó ‹ Kugwó ká, máábɔpwʉ́ drɨ́ ɛ́kárángá ootu má nɛ́ mádha ndra mɨ́o nɛ́, bhe ka ɨ́ máápwupwu andrúɛ́tʉ́ bhu pɨɨ́dhɔ ngwɛ ápye. Bɛsɨ́ngɨ obhúa ká sɔ́ sɨ́ máábɛsɨ́ drʉ, ka ɨ́ nyóúoo mʉ́ bhu amɛ́mɛ́ ngwángwɛ átɛmbanda i bhó mɛ́sɨ́ nɔ́ náadhu andrágɔ́ndrahɛ kɔ́rɔ nɛ́. 30 Bhe átadhɨnga i nɛ́ngwángwɛ i bhándrúé i nɛ́ aángɛkʉ́ ɨ nɛ́, ɨ́nɛ i aábáadádá ɔ́dhyɔ́ si bhándrúé nɛ́ átándrɔ́ ngádɔ́i nɛ́, bhe mɨ́ɨ́ngɔpwʉ́ nɔ́ɔ nɛ́bágara ngwángwɛ dobhodobho ! › 31 Apanɛ́ ɔdhya nɔ́ɔ bhó ‹ Ngwángwɛ i nándrá, ɨ́mɨ́, ma bha mɨ nyáá drɨ́ ɛ́tɨ́anɛ kpɛ́ ! Ɔ́dhyɔ́ ndúbhu si má nɔ́ nɛ́ kɔ́gá mɨ ! 32 Nɔ́dhyɔkana, aátáatɛ bhó amɛ́sɨ́ náadhu bhe maga nɛ́ɨgyagya, outo nɛ́, sɨ́ nɛ́yángwɛ́ i bhándrúé nɛ́ i nɛ́, abá aángonzí mónzi, bh'aángorú ! Abá aángougí, bhe gaa ɨ drɨ́ máángogwo nɛ ! › »