Luk 16

Bhe Yésu ɔgá nátámbá i nɛ́kapíta dímándó andrɛ

1 Nɛ́tɨánɛ kana, Yésu ɔdhya óudrwaamɨ si bhándrɛ nɛ́ kála bhó « Náasí mándátíómbíé kana ɨ́n'abwʉ ánɛkapíta i bhándrɛ nɛ́. Bhe ómbi kékúa bhe kángóúwo nɛ́kapíta nɛ́ bhó a ú aádádá ɔ́dhyɔ́ si bhándrɛ nɛ́. 2 Bhe náasí mándátíómbíé nɛ́ ongá nɛ, ɔdhya nɔ́ɔ bhó ‹ Asɔdhyɔ gyó i má ú mágá ká andrúɔ́tɔdhyɔ nɛ́ ká ? Kɛhya ká mʉ́ ɔ́dhyɔ́ si nyá ú nyárɨ́a ká nɛ́ ká ! Outo nɛ́, sɨ́ nyárɨ́ ka bhó ɔ́dhyɔ́ si bhándrá nɛ́ épí ! › 3 Nɛ́kapíta nɛ́ ɔdhya tándreísú bhó ‹ Há ! Mɛ́sɨ́ ká bhásí ? Sɨ́ nɛ́ɨ́nyɨ́ i bhándrá nɛ́ a ú ɛɨ́za ma átemolo i ɔ́dhyɔ́ amárɨ́ anyɛ. Néi bhó mɛ́dhɨ nɛ́ɨpwɔ nɛ́, ka ɨ máro ámɛ́kpakpárá ! Néi bhó mábhú drʉ móúnía ɔ́dhyɔ́ nɛ́, mábhúa to móbhu ánaanyɛ ro. 4 Hiii ! Máángɛɨ́tɨ́ asɔdhyɔ gyó i má ú mɛ́sɨ́a átɛmbanda i bhó átadhɨnga i kɛ́ɨ́zaba ɨ ma átemolo i ɔ́dhyɔ́ amárɨ́ anyɛ nɛ́, be mábhú pɨ́tɛ́ ánombi si aátá bhó máɔba ú bhányɛ bhe kɛ́ɛ́wɛba ma nɛ́. › 5 Hee bh'erímá a n'oúnga ómbi kpɛ́ kána-káná, ési kábwʉ ánedhéni i nɛ́ɨ́nyɨ́ i bhándrɛ nɛ́ bha nɛ́ nɛ́. Bhe nómbí ámɛ́káná ekúa, ɔdhya nɔ́ɔ bhó ‹ Onía bhó nyáátu nɛ́ɨ́nyɨ́ i bhándrá nɛ́ ko ɔ́dhyɔ́ bhásí ? › 6 Nómbí nɛ́ ɔdhya nɔ́ɔ bhó ‹ Éngbongolo si nɛ́páázo anɛ nɛ́kámá^a . › Nɛ́kapíta ɔdhya nɔ́ɔ bhó ‹ Ɨ́ndá nɛ́mʉkandá i nédhéni i bhándrúé nɛ́ andrɛ ! Kudrí ɛ́gala bhe mʉ́ha nɛ́mʉkandá adya ndó ndra nɔ́ ɛ́tɛɛvhɛ tɔ́zɛrɛna ! › 7 Ɔdhya nómbí akʉ́nɛ́ ko bhó ‹ Bhe ɨtá ɨ́mɨ́ nɔgɔ, onía bhó nyáátu mɨ́ bhásí nándrúé ? › Bhe nómbí nɛ́ ɔdhya nɔ́ɔ bhó ‹ Ɛ́ngáno sakɨ́ nɛ́kámá. › Ɔdhya nɔ́ɔ bhó ‹ Ɨ́ndá nɛ́mʉkandá i nédhéni i bhándrúé nɛ́ andrɛ ! Kʉhɛ nɛ́mʉkandá adya ndó ndra nɔ́ ɛ́tɛɛvhɛ bhɔgɨna. › 8 Bhe nɛ́mándátíómbíé nɛ́ abɨ́a nɛ́kapíta biti nɛ́ bhó sɨ́ ɨ́n'aángohí ndrɛ ánakɨra ro. Outo nɛ́, sɨ́ ómbi si nápɛ i anɛ ká ánakɨra i kóhia to nyɛ áteetu i madáhɛ́hɛ anyɛ, tó kángɛ́pɛ ómbi si néíkó i Angéle bha nɛ́ a ú ovhia hɛ nɛ́ anyɛ. »

Bhe Yésu ɔdhyá bhó mɨɨ́ngobhu bhelé émógyá si ɛ́faránga anyɛ

9 Hee bhe Yésu aádrwá tɔkana bhó « Ɨ́má, má nɛ́ mádhyá nyala nɛ́, amúti nándragɔ ánombi kɔ́rɔ, nya hɛ́ nyɛɛ́wa hɛ ánɛfaránga malemale si nápɛ i anɛ nɛ́. B'oópúba ndrɛ átadhɨnga i obhúba ka ɨ bhó to faránga nɛ́, be kékpokpoba aamɨ pá ú átegyo si ɛ́ɨ́zɛ́ kpɛ́ anyɛ ú Angéle bha. 10 Nómbí i obhúa ámɛ́mɛ́yɔ átɔ́dhyándrɛ sásá nɛ́, obhua nɔgɔ sɨ́ ámɛ́mɛ́yɔ átɔ́dhyɔ́ kpɔ́kpɔ́. Bhe nómbí i obhú ka ɨ nɛ ámɛ́mɛ́yɔ átɔ́dhyándrɛ sásá nɛ́, obhú ka ɨ nɔgɔ nɛ ámɛ́mɛ́yɔ átɔ́dhyɔ́ kpɔ́kpɔ́. 11 Obhúa néi bhó kabwʉ ɨ aamɨ ómbi amɛ́yɔ átɛfaránga malemale si nápɛ i anɛ nɛ́, adhíngwɛ i aáoba táo nyala ándrɛmandati áménzúdhá nɛ́ ? 12 Obhúa tɔkana bhó kabwʉ ɨ aamɨ ómbi amɛ́yɔ átedhu i nómbí akʉ́nɛ́ andrɛ nɛ́, adhíngwɛ i ooba nyala akíédhu akíé i a n'ɔgá aamɨ nɛ́ ? 13 Ka ɨ bɔ́ɨ kana i aáta bhó ndrɔdha ndrɛ ɛ́ɨnyɨ sóórúé kála nɛ́. Aábhá bhó ndrɛsɨ́ sɔ́ nɛ́, bh'etía nɛ́ɨ́nyɨ́ kana, bh'ɔɔ́mʉa nákʉ́nɛ́. Obhúa to nɛ́, bh'oa ndrɛ nɛ́ɨ́nyɨ́ kana ko ándreísú ro ndúbhu, bh'ogwá nákʉ́nɛ́ tápu. Nyaátɛ ka bhó nyɔdha ki Angéle ko nya ká hɛ́ bhu émógyá si ɛ́faránga anyɛ nɛ́. »

Bhe Yésu ɔdhyá ɛ́tʉ akʉ́ɛ́

(Mat. 11.12-13; 5.31-32; Mákɔ 10.11-12)

14 Bhe ɛ́Mɔfarúsi si kábwʉ ú kábɔga ɛ́tʉ hɛ́ ndúbhu nɛ́ nɛ́, kábwʉ ká hɛ́ kéínva eínvo Yésu nɛ́, sɨ́ kábwʉ ú kɔ́ɔ́mʉ́a nɛ́fárángɔ́dhyɔ pima. 15 Bhe Yésu ɔdhyá kála bhó « Aamɨ nya ú nyeegwá ki átombi ányɛŋɔ únga ká sɨ́ ómbi amɛ́yɔ, nɔ́dhyɔkana, Angéle a ú ɛɨ́tɨ́a ɛɨ́tɨ akíéisu mɔmbɛ́. Outo nɛ́, sɨ́ nédhu i ómbi ká ú kógwá ándrɔdhyɔ sɨ́ ɨ́n'a ámɛ́kpɔkpɔ nɛ́, ɨ́n'a nédhu bibiti Angéle ánɔ́tɔŋɔ. 16 NƆ́ʉbwɔ i Mʉ́sɛ bha nɛ́ bhu áádhɔ́ si énébi anyɛ káábaádhɔ néhíɛ i kɛ́ɨ́tɨ́a to Angéle nɛ́, tó bha átadhɨnga i nénébi Yɔáni Mɔbátísí bha nɛ́. Ɔtʉ́a ndrɛ drʉ, ká ú kágyá nɛ́tʉ́ balí i nɛ́Ɨnyɨngwa i Angéle bha nɛ́ andrɛ, bhe ómbi ootu ká ú kɛ́sɨ́a kpárá bhó nyekí nyɛ átɛƗnyɨngwa nɛ́. 17 Obhuba ɔdhyɔ kpákpáálá bhó nɔ́rɔ bhu nápɛ i bhó káfo ɛ́yambu ! Nɔ́dhyɔkana, bh'obhúba ámɛ́kpákpáálá pima t'angɛ́pɛ bhó kɛ́ɨ́zaba nɛ́ngɨ́nzɛngwɛ kana átƆʉbwɔ. 18 Outo nɛ́, nɛ́masí i ɔa bh'eísya ándrandrɔ bh'ɔgɨa nándrɔ nákʉ́nɛ́ nɛ́, b'aángɛsɨ́ ámébiti. Bhe nómbí i ɔgɨa nándrɔ i ándrɛmasí a n'eísyá nɛ nɛ́, b'aángɛsɨ́ ámébiti. »

Bhe Yésu ɔgá nátámbá i nɛ́mándátíómbíéhɛ bhu nɛ́mʉ́dádákúómbíé Láázaró andrɛ

19 Bhe Yésu ɔgá tɔkana nátámbá akʉ́nɛ́, ɔdhya bhó « Náasí mándátíómbíé kana ɨ́n'abwʉ, abɔndrɔ ógí bali-bali si ká hɛ́ kɛ́pá mɛ́pɛ átɛbhangwɛ nɛ́. Bhe átɛ́tɨ́ánɛ́ kpɛ́, abobhu nyáá nándrɛ ápye a n'ɔgá nɛ́ɨgyagya, a n'aánya mɔmbɛ́ i sɔ́ ɨ́ nɛ́ ! 20 Bhe nɛ́mʉ́dádákúómbíé kana abwʉ bhu nɛ́ drʉ, ánɛrʉ bhó Láázaró, ándreépí ndúbhu a nɛ́ sɨ́ ébi ápye nɛ́. Abobhu nyáá a n'edhá bha sɔ́ átégyónɔŋɔ ándrabɛ́ i nɛ́bha i nɛ́mándátíómbíé nɛ́ bha nɛ́ andrɛ. 21 Abwʉ a n'ɔnda mɔ́nda bhó ndrɔnyɔ́ áányɔ́ pɛnzɛ si káboódhe átamísá i nɛ́mándátíómbíé nɛ́ bha nɛ́ ándregóbe nɛ́. Nɔ́dhyɔkana, ésí kábeku sɨ́ hɛ ápye ká hɛ́ kémba ébi si bhándrɛ nɛ́ nɛ́. 22 Hee a bhó nyáá nɛ́tɨánɛ kana nɛ́, bhe nɛ́mʉ́dádákúómbíé nɛ́ ɔá drɨ́ bh'onzía ! Bhe áángelú kékúa, bhe kɛ́ɨ́ngá ándroudhuudhu bhe kɔ́mbá nɛ Ábaráma ándrɔ́tabɛ́. Bhe nɛ́mándátíómbíé nɛ́ onzía ká bhu nɛ, bhe kótá nɛ. 23 A sɨ́ n'ogwá néngbólú ú ɔ́pɛ́iro nɛ́, hee bh'eédrá sɨ́ égye, bh'ogwá Ábaráma ú ndrɔ́ndrɔ́ bhu táo Láázaró a nɛ́ ándrɔ́tabɛ́ nɛ́. 24 A drʉ ogwá hɛ sɔ́ nɛ́, bh'odhía ándrekóróyé, ɔdhya bhó ‹ Páápa Ábaráma gwa ! Kʉgá ká ngwɛ́ mʉ́ nɔ́dɔ bhe mʉ́dha ká mʉ́ Láázaró ndó ku nápɨ ká ngwɛ́ ándrɛtɛ́ngwɛ́kpɔ ándrabɛ́ átegwo, ndó néínzi ká ngwɛ́ nɔ́ mʉ́ andráadra ! Outo nɛ́, sɨ́ má ú mágwá néngbólú ɨ́ zá átaago i ! › 25 Ábaráma aátua nɔ́ɔ bhó ‹ Ngwángwɛ i nándrá, kaambá ká ! Átadhɨnga i nyábwʉ ɨ to ú átapɛ nɛ́, nyábwʉ nyá nɛ́ mʉ́gá nɛ́ɨgyagya i bhándrúé nɛ́ nɛ́. Obhúa Láázaró nɛ́, a n'ɔgá nándrɛ nɔ́dɔ ootu nɛ́. Bhe gaa ɨ́ drɨ́, ándreísú a zá ámómorwe, obhúa ɨ́mɨ́ nɛ́, nyá ú mʉ́gwá nɔgɔ néngbólú. 26 Bhe nédhu akʉ́nɛ́ i a nɛ́, Angéle aábaasí némugélu kpɔkpɔ kana átɔ́ɔ́rɨandrɛ i bháɛ́ nɛ́ aama aanyɔɔ́rɔ, átɛmbanda i bhó ómbi si kɔ́dhya bhó nyovhi bha égye nya ɨ nɛ́, aátɛ ka ndrɛ kɔ́rɔ. Bhe ómbi si kɔ́dhya bhó nyovhi égye nya ɨ bha zá ma ɨ nɛ́, aátɛ ka ndrɛ kɔ́rɔ. › 27 Nɛ́mándátíómbíé nɛ́ ɔdhya Ábaráma ko bhó ‹ Obhúa sɔ́ nɛ́, mánía mɨ ndó mʉ́dha ká ngwɛ́ mʉ́ Láázaró ú páápa bha, 28 outo nɛ́, sɨ́ má mayándrángwɛhɛ kɔ́rɔ égye ányɛrɨ́ tɔ́zɛrɛna. Nɔ́ɔ ku nɔ́ʉ́ngɨrɨ hɛ átɛmbanda i ndó káángekúba bhó bhelé bhu hɛ zá átɛ́mápue i néngbólú andrɛ i nɛ́ ! › 29 Ábaráma ɔdhya nɔ́ɔ bhó ‹ Mayándrúngwɛhɛ ká égye ánƆʉbwɔ i Mʉ́sɛ bha nɛ́ bhu táo áádhɔ́ si énébi anyɛ bhó kɔ́ʉ́ngɨrɨ hɛ. Kɔ́gá ka hɛ ! › 30 Nɛ́mándátíómbíé ɔdhya bhó ‹ Ka náátɛ sɔ́ páápa Ábaráma ! Nɔ́dhyɔkana, obhúa bhó nómbí aángɛngá zá ɔpɛ́iro, bh'ɔa bh'angaábɛ hɛ nɛ́, kéevhíngílía eevhíngílí ányeisu ! › 31 Ábaráma ɔdhya nɔ́ɔ bhó ‹ Ka kɔ́gá bhó Mʉ́sɛhɛ bhu énébi nɛ́, bɛsɨ́ngɨ nómbí ɛnga mɛ́nga zá ɔ́pɛ́iro bh'orua, kápí ka bhó nyeevhíngílí ányeisu. › »