Luk 8

Ándrɔ́ si káboudrwé Yésu nɛ́

1 Átámɛ́zaa, bhe Yésu erímá a n'eémbá átɛgbɔtɔ bhu átɛ́bhámoí a n'agyá, a n'oútia nɛ́tʉ́ balí i nɛ́Ɨnyɨngwa i Angéle bha nɛ́ andrɛ nɛ́. Óudrwaamɨ si bhándrɛ nɛ́ ányɛrɨ́ tɛ́ɛ́vhɛ́ égí sóórúé kábwʉ nɔ́rɔ. 2 Bhe ándrɔ́ sɔ́ ɨ́, ési ɛɨ́rábwʉ hɛ átóúdhúúdhú biti bhu átógó nɛ́, kábwʉ ú káboudrwé ká bhu hɛ nɛ. Ɨ́n'abwʉ Marɨ́a, néi kábongo nɛ bhó Marɨ́a i nɛ́Magadála andrɛ nɛ́, Yésu eídibwʉ nɔ́tɔ óúdhúúdhú biti tónórue nɛ́. 3 Ɨ́n'abwʉ bhu Záni Kúza ándrandrɔ, Kúza i abwʉ nɛ́kapíta i Ɛrɔ́dɛ bha nɛ́ nɛ́, bhu táo Suzána, ánandrɔ́ akʉ́ɛ́ móotu si kábɛɛ́wɛ Yésu bhu óudrwaamɨ si bhándrɛ nɛ́, ánɔdhyɔ́ si bhányɛ nɛ́ nɛ́.

Nátámbá i mɛdhɨama bha nɛ́

(Mat. 13.1-9; Mákɔ 4.1-9)

4 Ombirongwɛ kpukpurukpu abwʉ a n'ɔɔ́sɛsa ndrɛ nɛ́, ámómbi ká hɛ́ kɛ́nga átɛgbɔtɔ kána-káná ká hɛ́ kékua bha ú Yésu a ɨ nɛ́. Hee bh'ɔgá kála nátámbá, ɔdhya bhó 5 « Nɛ́mɛdhɨ́ama kana ɨ́n'abwʉ, bh'ɛngá bh'ɔá ú átɛɨpwɔ i bhándrɛ nɛ́ bhó ku ndramisa ɛ́mbɛ́lɛmʉ́kpɔ si bhándrɛ nɛ́. Bh'átadhɨnga i a ú amisa ɨ hɛ sɔ́ nɛ́, bhe ámɛ́kpɔ akʉ́ɛ́ kódhá átéhíɛ ándrɛkpɔ, bhe ómbi kóóká to, bh'arí mɔvhyá kɔ́ʉ́gá hɛ bhe kɛ́tɛ́tá hɛ. 6 Bh'ámɛ́kpɔ akʉ́ɛ́ kódhá átapɛ i ánoopi nɛ́, a drʉ kófa nɛ́, bhe kóndrúa sɨ́ kabwʉ ɨ to gwo. 7 Bh'ámɛ́kpɔ akʉ́ɛ́ kódhá átɛ́mápue i ɛ́tɨ́lɨkpɔ kábwʉ to nɛ́, bhe kófá átadhɨnga kana ánɛmbɛ́lɛmʉ́kpɔ, bh'ɛ́tɨ́lɨandra kákándá ɛ́dhɨ́andra bali. 8 Bh'ɛ́mbɛ́lɛmʉ́kpɔ akʉ́ɛ́ kódhá átapɛ balí, a drʉ kófa nɛ́, bhe kɛ́kpɔ́kpá, bhe kɔ́há ɛ́kpɔ nɛ́kámá ɨ́hɛ kpɛ́ kána-káná. » Hee bhe Yésu aádrwá tɔkana átáándáándó bhó « Nómbí i ɨ́n'a ánɛbɨ́ amɔ́ga nɛ́, nɔ́gá ! »

Yésu a ú ɔgá outo átamba ?

(Mat. 13.10-17; Mákɔ 4.10-12)

9 Bhe óudrwaamɨ si Yésu bha nɛ́ kɔ́ɨ́a nɛ bhó nátámbá nɛ́ ándredru ɨ́n'a ká bhásí ? 10 Ɔdhya kála bhó « Angéle aábaáo nyala nóumbwu i bhó anyɛ́ɨ́tɨ nɔ́ ɔ́dhyɔ́ oogye si nɛ́Ɨnyɨngwa i Angéle bha nɛ́ anɛ nɛ́. Nɔ́dhyɔkana, obhúa ómbi akʉ́ɛ́ nɛ́, kábɔ́gɔ kála sɨ́ átamba ápye átɛmbanda i bhó bɛsɨ́ngɨ kánya mánya ɔ́dhyɔ́ si má ú mɛ́sɨ́a nɛ́, kógwó ka, bhó bhe bɛsɨ́ngɨ kɔ́gá mɔ́ga ɔ́dhyɔ́ si má ú mádhya nɛ́, kɔ́tɨ ka to gba. »

Yésu a ú abɨngya nátámbá nɛ́ ándredru

(Mat. 13.18-23; Mákɔ 4.13-20)

11 Yésu ɔdhya tɔkana bhó « Nátámbá nɛ́ ándredru ɨ́n'a sɔ́ ɨ́ : Ɛ́mbɛ́lɛmʉ́kpɔ hɛ́ ká nɛ́tʉ́ i Angéle bha nɛ́. 12 Ómbi akʉ́ɛ́ kɔ́kʉ́a nyɛ únga ká sɨ́ néhíɛ ándrɛkpɔ i ɛ́mbɛ́lɛmʉ́kpɔ kódhá to nɛ́. Ká ú kɔ́gá nɛ́tʉ́ i Angéle bha nɛ́, bhe Sátana ekua bh'ɛɨ́za nɛ́tʉ́ balí nɛ́ tányeisu bhó sɨ́ kápía ɨ bhó bhe kángɔra nɛ́. 13 Bhe ómbi akʉ́ɛ́ kɔ́kʉ́a nyɛ únga ká sɨ́ nápɛ i óopi anyɛ i ɛ́mbɛ́lɛmʉ́kpɔ kódha to nɛ́. Nɔ́dhyɔkana, kápía nyáá átadhɨngangwɛ pɨɨ́dhɔ ápye, bhe átadhɨnga i nɔ́dhyɔ kpákpáálá aába ɨ hɛ nɛ́, bhe kábha nápíápí, sɨ́ ɨ́hɛ, kábha ka nɛ́tʉ́ nɛ́ bhó náábhitiri ndrɛ tányeisu únga ká sɨ́ nɛ́ɨ́vhʉ́ aábhitiria ndrɛ átapɛ. 14 Bhe ómbi akʉ́ɛ́ kɔ́kʉ́a nyɛ únga ká sɨ́ ɛ́tɨ́lɨkpɔ si ɛ́mbɛ́lɛmʉ́kpɔ kódha to nɛ́. Ká ú kɔ́gá nɛ́tʉ́ i Angéle bha nɛ́, bh'ányótodriodrí ká ú kákpa mákpɔ ápye ánaámbáámbá sɨ́ze-sɨ́zé, bhu nɔ́ɔmʉ i nɛ́mandati andrɛ, bhu némo i ɔ́dhyɔ́ si nápɛ i anɛ, ká ú kɛ́ɨ́bwʉa ányeisu bhó káángaarwá nyɛ bhelé. 15 Bhe ómbi akʉ́ɛ́ kɔ́kʉ́a nyɛ únga ká sɨ́ nápɛ balí i ɛ́mbɛ́lɛmʉ́kpɔ kódha to nɛ́. Ká ú kɔ́gá nɛ́tʉ́ i Angéle bha nɛ́ áneísú balí ro, ká sɨ́ hɛ́ káámbá to, ká hɛ́ ánɛmadhaumba ro tó kángɔhɔ sɨ́ mɔ́hɔ ɛ́kpɔ amóge nɛ́. »

Nátámbá i nɛ́tála andrɛ

(Mákɔ 4.21-25)

16 Bhe Yésu ɔdhyá tɔkana bhó « Nómbí ɔsʉ ka nɛ́tála bh'aria táo to némbwó bhu bhó ndreité bha ú átɛ́gɔ́ ándregóbe. Nɛ́ɨtɔ ! Nɔ́dhyɔkana, ɛɛ́ga nɛ bha átɛgbɔɔ́lá ándragá, átɛmbanda i bhó ómbi si kóbhúa ká hɛ́ kékía nyɛ bha ú gyɔ́tɔ nɛ́, bhó kógwó éóró nɛ́. 17 Sɨ́ outo nɛ́, sɨ́, ɔ́dhyɔ́ ndúbhu si ká ámóogye gaa ɨ́ nɛ́, kógwoba hɛ mógwo. Ɔ́dhyɔ́ ndúbhu si ómbi ka kɔ́tɨ gaa ɨ́ nɛ́, kɛ́ɨ́tɨba hɛ ɛɨ́tɨ, bhe kédiba médi ngbádhá átéíkó. 18 Hee anyɛ́ngɨrɨ táo átɔga gyó i sɨ́ nya ú mʉga nɛ́tʉ́ i Angéle bha nɛ́ nɛ́ ! Outo nɛ́, sɨ́ nómbí aángobhu ánɔdhyandrɛ nɛ́, bh'Angéle ooba nɔ́ɔ akʉ́ɛ́ ámóotu pima. Bhe nómbí i ka ɨ nɔ́rɔ bhu dhúngwɛ kana nɛ́, bhe Angéle ɔvhɛba ndrɔɨ bhu éngwandrɛ si a ú aambá bhó ndra nɔ́ nɛ́. »

Bhe Yésu yánɛ́ bhu mayánɛ́ngwɛhɛ kékúa bhó ku nyanya nɛ

(Mat. 12.46-50; Mákɔ 3.31-35)

19 Bhe Yésu yánɛ́ bhu mayánɛ́ngwɛhɛ kóópúa bha ú abwʉ ɨ, bhó ku nyanya nɛ, bhe kabwʉ kógwó híɛ i sɨ́ kóópu to tándrabɛ́ nɛ́ ánombi ányóótuoótú. 20 Bhe ómbi káabhúa nɔ́ɔ bhó « Yándru bhu mayándrúngwɛhɛ ká ú kápá nyɛ ú muto. Ká ú kɔ́ɔ́mʉ́a bhó nyaagwó nyɛ mɨ́ro. » 21 Bhe Yésu aátúa kála bhó « Yáa bhu mayándrángwɛhɛ ká ómbi ndúbhu si ká ú kɔ́gá nɛ́tʉ́ i Angéle bha nɛ́, bhe ká ú kɛ́sɨ́a sɨ́ɨ́sɨ́ nɛ́tʉ́ nɛ́ ɔdhyá nɛ́. »

Bhe Yésu omá námbimbató

(Mat. 8.23-27; Mákɔ 4.35-41)

22 Nɛ́tɨánɛ kana, bhe Yésu bhu óudrwaamɨ si bhándrɛ nɛ́, bhe kóká átékókó kana sɔ́ ɨ́. Ɔdhya kála bhó « Amádo bha ú átátú ándregyapɛ akʉ́nɛ́. » Hee bhe kérímá ká hɛ́ kóda nátú i nɛ́Galiláya andrɛ nɛ́. 23 Átadhɨnga i kábwʉ ɨ ká hɛ́ kóda nɛ́, bhe Yésu ɔgá ndrɛ átɛ́yɛ́ bh'edhá. Ká nɔ́dá bha mɔ́da nɛ́, bhe námbimbató erímá a n'obwua átátu ándrɛhɔ nɛ́, bhe nékókó erímá a n'ɛɨ́nʉa ánegwo nɛ́, bhe kóópúa átɔʉmbanga ándrɛhɔ. 24 Bhe óudrwaamɨ kɔ́ʉ́sɨ́a nyɛ bha Yésu to ɔʉ́ndɨ́, bhe kéírúa nɛ ká hɛ́ kɔ́dhya bhó « Náadhaadhombíé, náadhaadhombíé, meebía eebí ! » Hee bhe átadhɨnga i orúa ɨ nɛ́, bh'ɔʉngbá námbimbató nɛ́ ko bhu égwo si kábwʉ ú kábɛsɨ́ nyɛ ɛ́kpʉkʉ́-kpʉkʉ́ nɛ́ kála, bhe kɔ́ʉkʉ́a ɛ́gbɔɔɔ, bhe nɛ́dháobho ándrɛhɔ eégyá ébi ! 25 Átámɛ́zaa, Yésu ɔdhya kála bhó « Nápíápí i bhákíé nɛ́ ɨ́n'a zenge ? » Bhe nɛ́ɛrʉ agbá hɛ i sɔ́ ɨ́ nɛ́, bhe kámbángá mámbanga gbagba, bhe káádhyá tányɛrɨ́ bhó « Náasí i ɨ́n'a ká asaasí báságyó ? Ɨ́n'a ú ɛɨ́kpa tó bhu námbimbató gbagba bhu táo négwókpɔ bhe kɛ́sɨ́a sɨ́ɨ́sɔ́ s'ɨ́n'a ú ɔdhya nɛ́ ! »

Bhe Yésu ɛɨ́rá nɛ́masí kana i ánoúdhúúdhú biti kɔ́rɔ nɛ́

(Mat. 8.28-34; Mákɔ 5.1-20)

26 Hee bhe Yésu bhu óudrwaamɨ si bhándrɛ nɛ́ kóópúa ú Gɛrásaro^a , néi aányá ndrɛ ánɛGaliláya nɛ́, átátú ándregyapɛ akʉ́nɛ́. 27 Átadhɨnga i Yésu abwʉ ɨ a n'eíka bha ú éégírí nɛ́, bhe nɛ́masí kana sɔ́ ɨ́, néi abwʉ nómbí i nɛ́gbɔ́tɔ́ nɛ́ andrɛ n'ekúa, bhe kángáasú bha nɛ. Nɛ́masí nɛ́ ɨ́n'abwʉ ánoúdhúúdhú biti kɔ́rɔ. Sɨ́ atá abwʉ, abɔndrɔ ka bhó ogi, bh'aboudhó ka bhó gyó to, nɔ́dhyɔkana, aboudrí bhó sɨ́ ú átɛ́múgélúápɛ́ ápye. 28 Átadhɨnga i ogwá ɨ Yésu nɛ́, bh'erímá a n'opa átangba nɛ́, bh'odhá Yésu tánɔɔnzɔ, bh'ɔdhyá a n'eígéígé ándrɛtʉ́ kpárá nɛ́ bhó « Yésu, nɛ́Ngwángwɛ i Angéle ndré ú bhó pima nɛ́ bha nɛ́, asɔdhyɔ gyó i nyá ú mʉ́nda máto nɛ́ ? Má nɛ́ mánía mɨ nɛ́, mɨ́ɨ́ngaáo mʉ́ bhelé néngbólú. » 29 Ɔdhyɔ́bwʉ sɔ́, outo nɛ́, sɨ́ Yésu abwʉ aángɔkpa nóudhuudhu biti nɛ́ bhó nédi nɔ́tɔ. Nóudhuudhu biti nɛ́ abwʉ sɨ́ aángahʉ́ nɛ ámémírí ámóotu. Káboti ánɛtɛ́ ánɛmangbɛnzɨ bhe kábɔgbʉ ánɔɔnzɔ átékpókpó, ká sɨ́ hɛ́ kónvá nɛ átɔmbanda i bhó aángɔrɔ́ bhelé nɛ́, bh'abɔʉ́sɛ nyáá ɔ́dhyɔ́ si káboti to nɛ nɛ́, bhe nóudhuudhu biti nɛ́ aboti nyáá ándredru bha ú átouma mapú ápye. 30 Bhe Yésu ɔɨ́a nɛ́masí nɛ́ bhó « Anúɛ́rʉ ká bhásí ? » Ɨ́n'aátua nɔ́ɔ bhó « Anárʉ ká bhó kpukpurukpu ! » Ɔdhyɔ́bwʉ sɔ́, sɨ́ óúdhúúdhú biti ootu kábwʉ sɨ́ káángekí nyɛ nɔ́tɔ. 31 Bhe óúdhúúdhú biti hɛ́ kérímá ká hɛ́ kóúgégélá nyɛ Yésu ko átɛmbanda i bhó aángɔkpa hɛ bhelé bhó nyɔɔ ú átemugélu i óúdhúúdhú biti kɔ́nyɔ́ba to nɔ́dɔ nɛ́. 32 Ɔ́dhyɔ́ si drɨ́ nɛ́, nɛ́ɛgɔ́^b ɛɛpɛ kpɔkpɔ kana abwʉ átɛmapú hɛ́, a n'asiridha ɛ́mapú ú átooholokpɔ nɛ́. Bhe óúdhúúdhú biti hɛ́ kóúgégélá nyɛ Yésu ko bhó nápí kála bhó nyekí nyɛ átɛɛgɔ́ hɛ́. Hee bh'apía kála. 33 Bhe óúdhúúdhú biti hɛ́ kédía átɛmasí nɛ́, bhe kékía nyɛ átɛɛgɔ́ hɛ́. Bhe nɛ́ɛpɛ i éri hɛ́ anyɛ ɛngá átɛngɔ ú áténdúndúli ándrɛkɨ́ bh'ɔɔ́dá bha ú átátú étooo, bhe kónzía.

34 Átadhɨnga i árɨarɨí si ɛ́ɛgɔ́ hɛ́ anyɛ kógwá ɨ sɔ́ nɛ́, bhe kókpúa nyɛ bhe kángódrwe némbólí nɛ́ ú átɛ́gbɔ́tɔ́ bhu ú átɛ́fɨ́rɨmɨ mapú. 35 Hee bhe ómbi kédía táo bhó ku nyogwó asɔdhyɔ gyó i aángɛsɨ́ ndrɛ nɛ́. Bhe kóópúa ú Yésu abwʉ ɨ, bhe káámbwúa náasí i óúdhúúdhú biti kédibwʉ nɔ́tɔ nɛ́ a n'odría Yésu tánɔɔnzɔ, a n'ɔndrá bhó ógí nɛ́, ándrakɨra a bhó nɛ́ mɔmbɛ́ nɛ́, bhe nɛ́ɛrʉ agbá hɛ ! 36 Bhe ómbi si kógwobwʉ nɔ́dhyɔ nɛ́ nɛ́, bhe kódrwá kála únga ká sɨ́ Yésu ɛɨ́rábwʉ nómbí i abwʉ ánoúdhúúdhú biti nɛ́. 37 Hee bhe ómbi ndúbhu sé ú Gɛrɛ́saro nɛ́, kɔ́dhya Yésu ko bhó nyonía nɛ bhó nédi kála ú bhányɛ, outo nɛ́, sɨ́ nɛ́ɛrʉ mbámbó abwʉ sɨ́ aángagbá hɛ. Bha drɨ́ Yésu oká ɨ átékókó bhó ndraátu ndrɛ. 38 Bhe nɛ́masí i óúdhúúdhú biti kédibwʉ nɔ́tɔ nɛ́ bh'erímá a n'onía Yésu bhó nyoubhúbhú bhó bha nɛ nyáá ápye átɛ́mápuekana nɛ́. Bhe Yésu aáa nɔ́ɔ néhíɛ, ɔdhya nɔ́ɔ bhó 39 « Kaátu ndru ú bhándrúé bhe múdrwá ɔ́dhyɔ́ ndúbhu si Angéle ɛsɨ́a mɨ́o nɛ́. » Hee bhe náasí nɛ́ ɔá, a n'agyá ɔ́dhyɔ́ kpɛ́ si Yésu ɛsɨ́a nɔ́ɔ nɛ́, átɛ́gbɔ́tɔ́ ándrɛhɔ ndúbhu.

Bhe Yésu ɛɨ́rá nándrɔ kana, bh'eírúa nándrɔ ngwángwɛ i Yaíro bha nɛ́

(Mat. 9.18-26; Mákɔ 5.21-43)

40 Átadhɨnga i Yésu oópúa ɨ ú átátú ándregyapɛ akʉ́nɛ́ nɛ́, bh'ombirongwɛ ekpókpá nɛ, outo nɛ́, sɨ́ ómbi hɛ́ kpɛ́ kábwʉ ú kónvá nɛ mónvo. 41 Átadhɨnga nɛ́, bhe nɛ́masí kana ánɛrʉ bhó Yaíro oópúa ú Yésu a ɨ. Ɨ́n'abwʉ nɛ nɛ́ɨ́nyɨ́ i nɔ́ʉ́sɛ́myágyó i éMoyúda si nɛ́bha nɛ́ anɛ. Bh'aágá ánɛkaatí bha Yésu tándreetu, bh'erímá a n'oúgegela ndrɛ nɔ́ɔ bhó néku ká ngwɛ́ pá ú bhándrɛ, 42 outo nɛ́ sɨ́, nándrɔ ngwángwɛ nɛ́ bhándrɛ nɛ́ nɛ́ abwʉ ámómógo, ándreísú a n'ɔnda bhó ndrase bhó nɛ́, bh'abwʉ nyáá ánandrɔ ngwángwɛ ogó nɛ́ kana ápye, a n'ɔnda bhó ɛ́kárángá si tɛ́ɛ́vhɛ́ égí sóórúé nɛ́.

Átadhɨnga i Yésu abwʉ ɨ a n'ɔa égye Yaíro bha nɛ́, ombirongwɛ a n'ɛɨ́bwa nɛ ɛɨ́bwʉɔ ngangá nɛ́. 43 Hee bhe nándrɔ kana abwʉ drʉ átombi ányeígo, a nɛ́ ánandrógo átangwɛ́ ándrogwo ɛ́kárángá tɛ́ɛ́vhɛ́ égí sóórúé nɛ́, bh'ɛɨ́rɔ́bwʉ émándátí si bhándrɛ nɛ́ ndúbhu ɛ́mʉ́nganga kála, bhe kabwʉ ɨ ombí kana i aátɛbwʉ bhó ndrɛɨ́ra nɛ nɛ́. 44 A drʉ ogwá nápúmá nɛ́, bh'ɔʉ́sɨ́a ndrɛ bha Yésu to ɔʉ́ndɨ́ bha ú eingu-eíngú, bh'eíhía nógi i bhándrɛ nɛ́ ándrabɛ́, bhe nálíkpɔ^c ɛɨdʉ́a nɔ́tɔ nédíédi ékwé ! 45 Yésu ɔɨa bhó « Adhíngwɛ i eíhía ma nɛ́ ? » Bhe ómbi pɨ́tɛ́ káátúa nɔ́ɔ bhó ka bha aama si meihía mɨ nɛ́. Pɛ́tɛrɔ ɔdhya bhó « Náadhaadhombíé, mʉ́ɨa bhásí nɔ́dhyɔ gyó nɛ́, a nɛ́ ombirongwɛ a n'ombwúa mɨ, a n'ɛɨ́bwa mɨ sɔ́ nɛ́ ? » 46 Yésu ɔdhya bhó « Nómbí kana aángeíhí ma eíhi ! Outo nɛ́, sɨ́ máángaagá aágá ndó néibwua kana aángedi máto. » 47 A drʉ nándrɔ nɛ́ ɛɨ́tɨ́a bhó káángakí nɛ átɔdhyɔ i ɛsɨ́a nɛ́, bh'ekúa a n'ɔngwá mɔ́ngwa ɛ́kpa-kpa-kpa nɛ́, bh'aágá ánɛkaatí Yésu tándreetu, bh'odrwá áteetu i ómbi ndúbhu anyɛ nɔ́dhyɔ i eíhía to nɛ nɛ́, bhu táo sɨ́ ɔɔ́sá sɨ́ nɔ́ra átadhɨnga i eíhía ɨ to nɛ nɛ́. 48 Yésu ɔdhya nɔ́ɔ bhó « Yáa, sɨ́ mɨ́ɨ́ngapí ma nɛ́, mɨ́ɨ́ngɔra. Kʉ́ɔ́ átɔdhyɔ kpílíbhíndí ándrɛhɔ. »

49 Yésu a sɨ́ n'ɔdhya nɛ́, bhe náasí kana ɛngá ú Yaíro bha, bh'oópúa, ɔdhya Yaíro ko bhó « Nándrɔ ngwángwɛ i bhándrúé nɛ́ aángonzí bhó. Mɨ́ɨ́ngaáhú bhó bhelé náadhaadhombíé. » 50 Bhe Yésu ɔgá némbólí nɛ́, ɔdhya Yaíro ko bhó « Mɨ́ɨ́ngɛɛ́rʉ́ bhelé, kubhú nyáá ánapíápí ápye bhe nɛ́ngwángwɛ andrɔ i bhándrúé nɛ́ ɔrá ! » 51 Átadhɨnga i Yésu oópúa ɨ ú Yaíro bha nɛ́, kabwʉ nápí ómbi akʉ́ɛ́ kála bhó ndrekí ndrɛ kɔ́rɔ ú gyɔ́tɔ, apíbwʉ sɨ́ Pɛ́tɛrɔ ko ápye, bhu Yɔáni, bhu Yakóbho, bhu nɛ́ngwángwɛ apanɛ́ bhu yánɛ́ kála ápye, bhó ndrekí ndrɛ kɔ́rɔ. 52 Ómbi ndúbhu kábwʉ ká hɛ́ kómua, ká hɛ́ kɛ́dɔ́dá nyɛ átɛ́ngwángwɛ nɛ́ ándrɔdhyɔ nɛ́. Yésu ɔdhya kála bhó « Anyábha nómu. Ka nónzí, nɔ́dhyɔkana, a ú edhá ! » 53 Bhe kérímá ká hɛ́ kéínva Yésu nɛ́, sɨ́ kábwʉ ú kɛ́ɨ́tɨ́a ɛɨ́tɨ bhó aángonzí mónzi. 54 Átadhɨnga i Yésu agbá ɨ nándrɔ ngwángwɛ nɛ́ tándrɛtɛ́ nɛ́, bh'eigá ándrɛtʉ́, ɔdhya bhó « Yáa, kuru ! » 55 Bh'ándroudhuudhu aátúa ndrɛ, bh'ɔɔ́sá sɨ́ nɛ́ngɛ́nga, Yésu ɔdhya yánɛ́ ko bhó kóo nɔ́ɔ dhúngwɛ amɔ́nyɔ. 56 Bh'apanɛ́ bhu yánɛ́ kámbángábwʉ mámbanga gbagba i sɔ́ ɨ́ nɛ́, bh'avhúa ányɛbɨ́ bhó káángɔdhyɔ́ bhelé ombí kana ko asɔdhyɔ gyó i aángɛsɨ́ ndrɛ nɛ́.