Luk 7

Bhe Yésu ɛɨ́rá némogya i nɛ́kapiténi kana bha nɛ́

(Mat. 8.5-13)

1 A drʉ Yésu eíbia ɛ́tʉ ndúbhu si bhándrɛ nɛ́ ómbi kála nɛ́, bh'ɛngá, bh'ɔá táo ú átɛ́gbɔ́tɔ́ i nɛ́Kaparnaúma andrɛ. 2 Égye, nɛ́kapiténi kana i nɛ́Rɔ́ma andrɛ abwʉ ánemogya kana i a n'ɛɨ́gɨ́a pima ándrɔdhyɔ nɛ́. Bhe némogya nɛ́ abwʉ ánogo ro dhɛdhɛ i nónzi andrɛ. 3 Átadhɨnga i ɔgá ɨ ká hɛ́ kɔ́dhya Yésu andrɔdhyɔ nɛ́, bh'ongá átaasí oúgé si éMoyúda anyɛ, bh'ɔdhá hɛ ú Yésu a ɨ, bhó néku bhó ku nɛ́ɨ́ra ká nɔ́ɔ némogya i bhándrɛ nɛ́. 4 A drʉ óúgé hɛ́ kóópua ú Yésu a ɨ nɛ́, bhe kóúgégélá nyɛ nɔ́ɔ ká hɛ́ káádrwédrwá aadrwédrwé nɛ́ bhó « Kapiténi ɨ́n'a nómbí i aátá aátɛ bhó nyɛ́ɛ́wɛ nɛ nɛ́ ! 5 Sɨ́ ɨ́n'a ú ɔɔ́mʉ́a nɛ́bha i bháɛ́ nɛ́ bhe ɨ́n'ɔbhʉ́a ká sɨ́ nɛ mala nɔ́ʉ́sɛ́myágyó i bháɛ́ nɛ́ ! »

6 Hee bhe Yésu aámbá ánoúgé hɛ́ kɔ́rɔ átɛ́mápuekana. Ká bhó hɛ́ ɔʉ́ndɨ́-ɔʉ́ndɨ́ bhó nyoópu átámɛ́bha nɛ́, bhe nɛ́kapiténi ɔdhá ándragɔ́nɛ́hɛ bhó ku kɔ́dhyɔ nɔ́ɔ bhó « Nɛ́Ɨ́nyɨ́, mɨ́ɨ́ngaáhú bhó mɨ́ ndru bhelé ! Outo nɛ́, sɨ́ ka ɨ ma ombí tɛtɛrɛ i aátá ndrɛ bhó nyékí ndru átégyó i bhándrá nɛ́ nɛ́, 7 bha ɨ́, ámɔdhyɔ a nɛ nɛ i ɨ́má tɔ́kpɛ kanga mápí ndó móópu to ú nyá ɨ nɛ́. Nɔ́dhyɔkana, kʉdhyɔ ká nyáá nɛ́tʉ́ngwɛ kana ápye bhe némogya i bhándrá nɛ́ ɔrá. 8 Ɨ́má nɔgɔ tɔ́kpɛ, má átɛ́ɨ́nyɨ́ akʉ́nɛ́ ándregóbe, bhe má ánɛsʉdhá si ká ú kóólia átɔʉbwɔ i bhándrá nɛ́ nɛ́. Mádhya kana ko ndó ‹ Kʉ́ɔ́ bha ú ! › bh'ɔa sɨ́ɨ́sɔ́. Bhe mádhya nákʉ́nɛ́ ko ndó ‹ Kei bha zá ! › bh'ekua sɨ́ɨ́sɔ́. Bhe átadhɨnga i mádhya ɨ némogya i bhándrá nɛ́ ko ndó ‹ Kɛsɨ́ né i ! › nɛ́, bh'ɛsɨ́a sɨ́ɨ́sɔ́. »

9 A drʉ Yésu ɔgá ɛ́tʉ hɛ́ sɔ́ nɛ́, bh'ambángá mámbanga átɔdhyɔ i Kapiténi bha nɛ́. Bh'eevhíngílía ndrɛ bha ú ombirongwɛ i abwʉ ú aboudrwé nɛ nɛ́ a ɨ, ɔdhya kála bhó « Má nɛ́ mádhyá nyala nzúdhá nɛ́, bɛsɨ́ngɨ obhúa ká átéígo i éÍsraɛ́lɛ gyándrɛ́ anyɛ, ka ɨ́ móúgwógwó nómbí kana i a ánapíápí kpákpárá sɨ́ kapiténi bha nɛ́ nɛ́. » 10 A drʉ ómbi hɛ́ Kapiténi ɔdhábwʉ hɛ nɛ́ nɛ́ káátua nyɛ bha ú bharɨ́ nɛ́, bhe káámbwúa némogya ándreépí ékyépéré !

Bhe Yésu eírúa néigwa andrɔ kana ándrɛngwá masí

11 Hee bhe átámɛ́zaa, bhe Yésu ɛngá bh'ɔá ú átɛ́gbɔ́tɔ́ kana ánɛrʉ bhó nɛ́Naína. Abwʉ a n'aámba átéhíɛ ánoudrwaamɨ si bhándrɛ nɛ́ kɔ́rɔ nɛ́, bhu táo námbaza i ómbi ootu anyɛ ! 12 A drʉ Yésu ɔʉ́ndɨa bhó ndroópu bha ú átɛ́gbɔ́tɔ́ ándrɛŋɔ nɛ́, bh'aásúa ánombi ká hɛ́ kɔ́a ánábwu kana bhó ku nyoté nɛ́. Nɛ́masíángwɛɛ ogó nɛ́ kábwʉ ú kábɔɔ ándrabwu ro nɛ́ nɛ́, abwʉ néigwa andrɔ kana ándrɛngwá. Bhe ombirongwɛ bíbírí i nɛ́gbɔ́tɔ́ nɛ́ andrɛ, abwʉ ú abɔɔ áneigwa andrɔ nɛ́ ro átɛ́mápuekana. 13 Átadhɨnga i nɛ́Ɨ́nyɨ́ Yésu ogwá ɨ néigwa andrɔ nɛ́ nɛ́, bh'ándreísú ɔgá nɔ́tɔ nɔ́dɔ, ɔdhya nɔ́ɔ bhó « Mɨ́ɨ́ngomú bhelé yáa ! » 14 Bh'ɔʉ́sɨ́a ndrɛ bha átɛsɛrɛkɛ́ i kɔ́tabwʉ to nábwu nɛ́ nɛ́ ɔʉ́ndɨ́, bh'akpúa to ándrɛtɛ́. Bhe ómbi si kábwʉ ú kɔ́tá nɛ nɛ́ kápá nyɛ. Yésu ɔdhya bhó « Gbámá i gwa, má nɛ́ mádhyá mɨ́o nɛ́, kuru ! » 15 Bhe nɛ́gbámá nɛ́ onzíbwʉ nɛ́ nɛ́ bh'ɛngá bh'odría, bh'ɔtʉ́a a n'ɔdhya nɛ́. Bhe Yésu aáá nɛ yánɛ́ ko. 16 Hee bhe nɛ́ɛrʉ agbá ómbi ndúbhu, bhe kérímá ká hɛ́ kɔ́ʉ́bwá Angéle, ká hɛ́ kɔ́dhya bhó « Nénébi kpɔkpɔ aábédi átéígo i bháɛ́ nɛ́ ! », bhó « Angéle aángekú bhó ku ndrɛɛ́wɛ ómbi si bhándrɛ nɛ́! » 17 Bhe Yésu ándrɔdhyɔ okúbwʉ átɔ́dhyɔ́ si abwʉ ú abɛsɨ́ nɛ́, ú áteYudáya ndúbhu bhu ánoóbhúrú.

Yésu a ú aádha Yɔáni Mɔbátísí tándrɔdhyɔ

(Mat. 11.2-19)

18 Bhe óudrwaamɨ si Yɔáni Mɔbátísí bha nɛ́ kódrwebwʉ nɔ́ɔ ɔ́dhyɔ́ amámbangasi Yésu abwʉ ú abɛsɨ́ nɛ́ ndúbhu. Bhe Yɔáni ongá ómbi sóórúé átéígo i óudrwaamɨ si bhándrɛ nɛ́ anyɛ, 19 bh'ɔdhá hɛ bha ú nɛ́Ɨ́nyɨ́ Yésu a ɨ bhó ku kɔ́ɨ ká nɛ bhó « Ɨ́mɨ́, nyá Masíya i énébi kɔ́dhyɔ́bwʉ bhó a ú ekua nɛ́, bisa aátá bhó amánvo nómbí akʉ́nɛ́ nɛ́ ? » 20 Átadhɨnga i ómbi hɛ́ kóópúa ɨ ú Yésu a ɨ nɛ́, kɔ́dhya nɔ́ɔ bhó « Yɔáni Mɔbátísí ɛdhá aama bhó ku amáɨ ká mɨ bhó ‹ ɨ́mɨ́, nyá Masíya i énébi kɔ́dhyɔ́bwʉ bhó a ú ekua nɛ́, bisa aátá bhó amánvo nómbí akʉ́nɛ́ nɛ́ ? › » 21 Sɨ́ átadhɨnga nɛ́, bhe Yésu ɛɨ́rá ógói móotu bhu ákʉ́ɛ́ si kábwʉ áneépí amɛ́ndrɨndrɨ nɛ́, ánesi kábwʉ ánoúdhúúdhú biti nɛ́, bh'ɛɨ́rá ɛ́ŋɔʉtɛtɛí móotu bhe kógwá. 22 Hee bhe, bh'aátúa nɛ́tʉ́ óudrwaamɨ si Yɔáni bha nɛ́ kála bhó « Amʉ́ɔ ku amúdrwé Yɔáni ko ɔ́dhyɔ́ si mɨɨ́ngogwo bhe mɨɨ́ngɔga nɛ́ : Ɛ́ŋɔʉtɛtɛí ká ú kógwá, ómbi amɔ́dra ká ú kóólia bhó mɔmbɛ́, bh'ɛ́magbulúi ká ú kɔ́rá, bh'ɛ́bɨɔʉtɔí ká ú kɔ́gá, bhe ómbi amónzi ká ú kórua tɔkana, bh'ɛ́mʉ́dádákúái ká ú kámbwua nɛ́tʉ́ balí i Angéle bha nɛ́. 23 Nɛ́ɨgyagya átómbí i abha ka nápíápí i bhándrɛ nɛ́ máto nɛ́ ! »

24 Átadhɨnga i ɔ́dhádhái si Yɔáni bha nɛ́ káátúa ɨ nyɛ nɛ́, bhe Yésu erímá a n'ɔdhya ombirongwɛhɛ si kábwʉ drʉ nɛ́ kála Yɔáni ándrɔ́tɔdhyɔ nɛ́. Ɔdhya bhó « Asɔdhyɔ gyó i mʉɔ́bá nógwóyé ú átóúmá nɛ́ ? Nómbí ɛɛrʉ́ i eegwá sɨ́ nénzénzelé i nábwubwu a ú ɛɨ́ngwá nɛ́ ? Nɛ́ɨtɔ ! 25 Hee bhe, mʉɔ́bá táo oudhu gyó ándrogwóyé? Nómbí i a ú ɔndrá ógí bali-bali nɛ́ ? Nɛ́ɨtɔ, sɨ́ ómbi si kɔ́ndrá ógí si ánɛbhangwɛ mbámbó nɛ́, ká hɛ́ ánɛmándátí móotu nɛ́, kóúdría átɛbasa si ɛ́ɨnyɨ kála nɛ́. 26 Bhe mʉɔ́bá bhó ku nyogwó oudhu gyó ? Nénébi kana sɔ́ ɨ́ ? Hiii. Má nɛ́ mádhyá nyala nɛ́, mɨbá mɨɨ́ngogwo nómbí kana i a ú ɛpá mɛ́pɛ nénébi nɛ́. 27 Sɨ́ Yɔáni a nɛ nɛ i Angéle ɔdhyá tándrɔdhyɔ ándrɛngwá ko átébúku i bhándrɛ nɛ́ bhó ‹ Kugwó ká ! Má ú mádha nɔ́dhádhómbíé i bhándrá nɛ́ áteetu i bhándrúé nɛ́, néi ɛɨ́mbɛmbɛba mɨ́o néhíɛ nɛ́. › » 28 Yésu ɔdhya kála tɔkana bhó « Má nɛ́ mádhyá nyala nɛ́, átéígo i ómbi si nándrɔ a n'ɔhɨ́a nɛ nɛ́ anyɛ, ka ɨ ombí kana i ɛpá Yɔáni átɛkpɔkpɔ́ nɛ́, nɔ́dhyɔkana, nómbí i a ámɛ́sasangwɛ átɛɨnyɨngwa i Angéle bha nɛ́ nɛ́, ɨ́n'a ámɛ́kpɔkpɔ t'angɛ́pɛ nɛ. »

29 Bhe ómbi ndúbhu bɛsɨ́ngɨ obhúa ká ɛ́ndɔ́mbɛ si nɛ́páko anɛ si kábwʉ káángɔga Yésu nɛ́, bhe kágbábwʉ nɛ́batísimo i Yɔáni bha nɛ́ nɛ́, bhe kɛ́ɨ́tɨ́a bhó náámbáámbá i Angéle bha nɛ́ a ámɔ́mɔ́mbɛ. 30 Bh'ɛ́Mɔfarúsi ánaadhaadhɔí si nƆ́ʉbwɔ anɛ kétía nɔ́dhyɔ i Angéle ɔɔ́mʉ́bwʉ bhó ndrɛsɨ́ kála nɛ́, outo nɛ́, sɨ́ ɨ́hɛ kábwʉ kágba nányɛ nɛ́batísimo i Yɔáni bha nɛ́.

31 Yésu ɔdhya tɔkana bhó « Máábhú ká ómbi si nádhɨngɔmɛ́ i anɛ adhíngwɛ ro ? Kéégwá ká sɨ́ adhíngwɛ ? 32 Ká ú kéégwá kaambá sɨ́ ɛ́gyándrɛ́ si ká ú kódría átɛ́bálá bhe ká ú káángonga nyɛ ányɛrɨ́ ká hɛ́ kɔ́dhya bhó ‹ Mapyónga nyala ɛ́kpándíngbá bhe kanga amʉ́bhɛ, bhe malyánga ɔ́dɔ́ ɔ́lyá bhe kanga amúmu ! › 33 Sɨ́ Yɔáni Mɔbátísí aábékú drɨ́, a n'embwua némo, ka nɛ́ ka nɔ́mbwɔ́ ɔgálá nɛ́, bhe mʉdhyá bhó ‹ Ɨ́n'a ánoudhuudhu biti ro ! › 34 Bhe ɨ́má nɛ́Ngwángwɛ i nÓmbí bha nɛ́, mékúa má nɛ́ máánya, má nɛ́ mámbwá nɛ́, bhe mʉdhyá bhó ‹ Amúgwó ká kiro nɛ́ndɔrombíé ɔʉdáómbíé i, ɨ́n'a ɛ́ndɔ́mbɛ si nɛ́páko anɛ bhu ɛ́másúmúi akʉ́ɛ́ ányagɔ́hɛ́. › 35 Nɔ́dhyɔkana, nákɨra i Angéle bha nɛ́ ɨ́n'a ámɛ́mɛ́yɔ ɛ́gyándrɛ́ ndúbhu si bhandɛ nɛ́ si ká ú kápía nɛ nɛ́ kála. »

Bhe nándrɔ másúmúómbíé kana aámbwúa Yésu ú Simɔ́na ámɛ́Mɔfarúsi bha

36 A bhó nyáá nɛ́, bhe nɛ́Mɔfarúsi kana ongá Yésu ú bhándrɛ átɛmbanda i bhó ku nyaányɔ bha nɛ nɛ́. Átadhɨnga i ekía ɨ ndrɛ ú gyɔ́tɔ nɛ́, bhe káádhá nɔ́ɔ náanyámɛ́ bh'angódri to. 37 Bhe nándrɔ másúmúómbíé kana abwʉ átɛ́gbɔ́tɔ́ nɛ́. Átadhɨnga i ɔgá ɨ bhó Yésu ɨ́n'a ú aánya ú nɛ́Mɔfarúsi bha nɛ́, bh'ekúa ánesúpa kana i ká hɛ́ kóúkpúa nɛ átóópí i ánɛbhangwɛ mbámbó nɛ́, néi kónga bhó náalabátɛrɛ^a nɛ́, ɛ́dhɛɛ ánɛmalásɨ. 38 Bh'ɔá, bh'angápa ndrɛ bha ú zaá Yésu ánɔ́tɔɔnzɔ ɔʉ́ndɨ́. Bh'eríma a n'omua nɛ́, a n'ɛɨ́nvá ɛɨ́nvɔ́ Yésu ánɔonzɔ ánɔndrwá kɔ́rɔ nɛ́, a n'ɔʉ́wa hɛ ɔʉ́wa ánoodrúɛ́ kɔ́rɔ, a n'aámʉ́a hɛ aámʉ́ bhó ndraádhɔ to nédidílí nɛ́, a n'aya hɛ máyɔ ánɛmalásɨ hɛ́ kɔ́rɔ nɛ́^b .

39 Átadhɨnga i nɛ́Mɔfarúsi i ongóbwʉ Yésu nɛ́ ogwá ɨ sɔ́ nɛ́, ɔdhya tándreísú bhó « Bhe nómbí i angobhu ze nénébi nzúdhá nɛ́, b'aángɛɨ́tɨ́ bhó asandrɔ básáhíé i a ú agbagba nɛ i nɛ́, outo nɛ́, sɨ́ ɨ́n'a nándrɔ másúmúómbíé ! » 40 Yésu ɔdhya nɛ́Mɔfarúsi ko bhó « Simɔ́nagwa, má ánɔdhyɔ kana i ndó mádhyɔ mɨ́o nɛ́! » Simɔ́na aátua nɔ́ɔ bhó « Náadhaadhombíé, kʉdhyɔ nyáá ! »

41 Bhe Yésu ɔdhyá nɔ́ɔ bhó « Ómbi sóórúé sɔ́ ɨ́ kábwʉ ánedhéni i nɛ́fárángómbíé kana bha nɛ́ sɔ́ ɨ́. Nómbí ámɛ́káná abwʉ ánedhéni ro ɛ́fárángákpɔ́i ɛ́kama tɔ́zɛrɛna bhe nákʉ́nɛ́ ɛ́tɛɛvhɛ tɔ́zɛrɛna. 42 Sɨ́ ɨ́hɛ kpɛ́ sóórúé kabwʉ ɨ kógwó híɛ i sɨ́ káátu to nédhéni nɛ́ nɛ́, bhe nɛ́fárángómbíé nɛ́ eégía kála nédhéni nɛ́. Átogwo i bhándrúé nɛ́, átombi hɛ́ sóórúé nɛ́ nɛ́, adhíngwɛ i ɔɔ́mʉ́a nɛ́fárángómbíé nɛ́ t'angɛ́pɛ nɛ́ ? » 43 Simɔ́na aátua nɔ́ɔ bhó « Máambá ndra ndó nómbí i abwʉ ánedhéni t'angɛ́pɛ nɛ́. » Yésu ɔdhya nɔ́ɔ bhó « Mɨ́ɨ́ngakɛ́lyá mɔmbɛ́. »

44 Bhe Yésu eevhíngílía ndrɛ bha ú nándrɔ nɛ́ a ɨ, ɔdhya Simɔ́na ko bhó « Mɨ́ɨ́ngogwo nándrɔ i ? Mékínga ndra zá bhándrúé, bhe kanga múo mʉ́ gwo bhó mɔ́ʉ́ba to anɔ́ɔnzɔ átɛmbanda i bhó ndredili to ma nɛ́. Bhe nándrɔ i aángɔʉ́bá nɛ mʉ́ ápye anɔ́ɔnzɔ ánɔndrwá si bhándrɛ nɛ́ kɔ́rɔ, bh'ɔʉ́wá ánoodrúɛ́. 45 Bhe kanga nyáámʉ́ ma, bhe ɨ́nɛ, sɨ́ mékínga ndra zá gyɔ́tɔ, ka nábha bhó ndraamʉ́ anɔ́ɔnzɔ. 46 Bhe kanga nyɛ́tʉ́ ká bhu páázo tándrádru, bhe ɨ́nɛ, ɛtʉ́nga nɛ ɛ́malásɨ tánɔ́ɔnzɔ^c . 47 Bha drɨ́, má nɛ́ mádhyá mɨ́o nɛ́, nɔ́ɔmʉ ootu i ɔɔ́mʉ́a ma nɛ́, a nɛ nɛ i a ú aádhá bhó máábéégi ɛ́masúmu ootu si bhándrɛ nɛ́ nɛ́. Nɔ́dhyɔkana, Angéle aángeégí ɛ́masúmu si nómbí bha nɛ́ pɨɨ́dhɔ nɛ́, nómbí nɛ́ ɔɔ́mʉ́a ngwɛ́ sɨ́ pɨɨ́dhɔ. »

48 Hee bhe Yésu ɔdhyá nándrɔ nɛ́ ko bhó « Máábéégi mɨ́o ɛ́masúmu si bhándrúé nɛ́. » 49 Hee bhe ómbi si abwʉ ú aágá kɔ́rɔ átamísá nɛ́, bhe kérímá ká hɛ́ kááɨa nyɛ tányeisu nɛ́ bhó « Nómbí i ɨ́n'a ká adhíngwɛ i onga ndrɛ bhó ndreégiégi ɛ́masúmu i nɛ́ ? » 50 Bhe Yésu ɔdhyá tɔkana nándrɔ nɛ́ ko bhó « Sɨ́ mííngapí ma nɛ́, mɨ́ɨ́ngɔra. Kʉ́ɔ́ átɔdhyɔ kpílíbhíndí ándrɛhɔ. »