Luk 6

Bhe Yésu ɔdhyá bhó ndra nɛ́Ɨ́nyɨ́ i nɛ́sabáto andrɛ

(Mat. 12.1-8; Mákɔ 2.23-28)

1 Átɛtɨánɛ kana i nɛ́sabáto andrɛ, Yésu a n'aáfa átɛ́ngáno ɛɨ́pwɔ́ nɛ́, bh'óudrwuaamɨ si bhándrɛ nɛ́ kérímá ká hɛ́ kɛ́vhʉa ɛ́ngánokpɔ, ká hɛ́ kááná ámɛ́kpɔ ányɔɔtɛ́ kɔ́rɔ, ká hɛ́ kɔ́ʉ́ká nɛ́. 2 Bh'ɛ́Mɔfarúsi akʉ́ɛ́ sɔ́ ɨ́ kɔ́dhya óudrwaamɨ kála bhó « Kábhá, asɔdhyɔ gyó i nya ú nyɛsɨ́a to nɔ́dhyɔ i nƆ́ʉbwɔ ka nápí bhó kɛ́sɨ́sɨ́ átɛsabáto tɨánɛ nɛ́ ! » 3 Bhe Yésu aátua kála bhó « Ka ká ɨ anyɛ́hyɛhya nɔ́dhyɔ i Davídi ɛsɨ́bwʉ ɨ́nɛ tɔ́kpɛ mavanɛhɛ kɔ́rɔ átadhɨnga i kábwʉ ɨ ánemo nɛ́ ? 4 Ɨ́n'ekíbwʉ ndrɛ ú átégyó i Angéle bha nɛ́, bh'ɛɨ́ngábwʉ ɛ́mápa si káboo Angéle ko nɛ́, bh'ɔnyá, bh'aáá bhu mavanɛhɛ kála. A nɛ́ nƆ́ʉbwɔ apía nyáá bhó ɛ́kɔána kɔ́ʉnyɔ́nyɔ́ sɨ́ hɛ ápye nɛ́. » 5 Bhe Yésu ɔdhyá kála tɔkana bhó « Ɨ́má nɛ́Ngwángwɛ i nÓmbí bha nɛ́ má nɛ́Ɨ́nyɨ́ átɛsabáto. »

Bhe Yésu ɛɨ́rá nómbí kana átɛsabáto tɨánɛ

(Mat. 12.9-14; Mákɔ 3.1-6)

6 Átɛsabáto tɨánɛ akʉ́nɛ́, bhe Yésu ekíbwʉ ndrɛ ú átɔ́ʉ́sɛ́myágyó i éMoyúda anyɛ, bh'erímá a n'aádha nɛ́. Bhe nómbí kana abwʉ égye, ándrɛtɛ́ aatɛ a nɛ́ ámɛ́bɔmbɔlɔ nɛ́. 7 Ɨ́ drɨ́ nɛ́, áadhaadhɔí si nƆ́ʉbwɔ anɛ bhu táo ɛ́Mɔfarúsi ká hɛ́ kánya mánya ánɛŋɔ kpákpárá bhó nyogwó ká, bisa Yésu ɛɨ́ra ɛɨ́ra nógómbíé átɛtɨánɛ i nɛ́sabáto andrɛ nɛ́, átɛmbanda i bhó nyogwó to asehíɛ gyó i nyoúwa to nɛ nɛ́. 8 Yésu abwʉ ú ɛɨ́tɨ́a ɛɨ́tɨ ányaámbáámbá. Ɨ́n'ɔdhya nómbí i abwʉ ánɛtɛ́ bɔmbɔlɔ nɛ́ ko bhó « Kɛnga ká bhe nyápa ká ndru drʉ átɔ́ɔ́rɨandrɛ i ómbi ndúbhu anyɛ drʉ. » Bhe nógómbíé nɛ́ ɛngá, bh'apá ndrɛ bha sɔ́. 9 Átámɛ́zaa, Yésu ɔdhya áadhaadhɔí bhu táo ɛ́Mɔfarúsi kála bhó « Máɨ́a aamɨ sɔ́ ɨ́ó ! NƆ́ʉbwɔ i bháɛ́ nɛ́ ɔdhyá ká bhásí, bhu nɔ́dhyɔ balí, bhu nɔ́dhyɔ biti, nánganɛ́ i a ámɔ́mɔ́mbɛ bhó kɛ́sɨ́ átɛsabáto tɨánɛ nɛ́ ? Bhu nómbí ándrɛ́ɨ́rɛ́ɨra, bhu nómbí ándrɔnzi ? » 10 Bh'anyá hɛ ɛ́kɛ́rrr ! Ɔdhya nógómbíé nɛ́ ko bhó « Kɛɛ́yɔ ándruɛ́tɛ́. » Bhe nógómbíé nɛ́ ɛɛ́yá ándrɛtɛ́, bh'ándrɛtɛ́ ɔrá. 11 Bhe áadhaadhɔí ánɛMɔfarúsi ányeisu kágbá náago, bhe kérímá ká hɛ́ kɔ́ʉ́ɨa nyɛ bhó nyɛsɨ́a ká bhásí Yésu.

Bhe Yésu ɔrwá ɔ́dhádhái tɛ́ɛ́vhɛ́ égí sóórúé

(Mat. 10.1-4; Mákɔ 3.13-19)

12 Abwʉ sɨ́ átékíní hɛ́ nɛ́, bhe Yésu eíká ú átooholokpɔ bhó ku ndrasɛmya. Bh'ɛsɨ́a égye nékini ndúbhu a n'asɛmya Angéle nɛ́. 13 Bh'aátadhɨnga i nébhúlobhú akyá ɨ nɛ́, bh'ongá óudrwaamɨ si bhándrɛ nɛ́, bhe kékúa, bh'ɔrwá kɔ́tɔ tɛ́ɛ́vhɛ́ égí sóórúé, bh'ongá hɛ bhó ɔ́dhádhái si nɛ́tʉ́ i Angéle bha nɛ́ andrɛ. Ɨ́n'abwʉ : 14 Simɔ́na ( bh'ongá nɔ́ɔ ɛ́rʉ akʉ́ɛ́ tɔkana bhó Pɛ́tɛrɔ ) bhu yánɛ́ngwɛ Ánderé, Yakóbho bhu Yɔáni, Filípo bhu Bateremí, 15 Matáyɔ bhu Tɔmá, Yakóbho Alafáyɔ ándrɛngwá, bhu Simɔ́na ( néi kábongo nɛ bhó nɛ́bhómbíé.) 16 Yúdi ( Yakóbho ándrɛngwá ), bhu Yúda Kariɔ́ta, néi oópúbwʉ nɛ́kaliombíé nɛ́.

Bhe Yésu aádhá ombirongwɛ, bh'ɛɨ́rá ógói

(Mat. 4.23-25)

17 Átámɛ́zaa, bhe Yésu ɛngá ánɔdhádhái hɛ́ kɔ́rɔ, bh'ɔɔ́dá nóoholo, bh'angápa ndrɛ átɛ́mápue sɛrɛ́gbá. Átámɛ́mápue, óudrwaamɨ si bhándrɛ nɛ́ kábwʉ drʉ ámóotu. Ómbi ndúbhu si néYudáya anɛ, bhu ési néYerusalɛ́mɛ anɛ bhe káapía drʉ kpukpurukpu a ká nɛ́ ! Bhu ómbi akʉ́ɛ́ si kɛ́ngábwʉ ú átéTírɛ bhu néSidɔ́na nɛ́, ɛ́gbɔtɔ si nɛ́dháobho kpɔkpɔ ándroobhuru anɛ. 18 Ómbi hɛ́ kékúbwʉ bhó ku nyɔgá Yésu, bhó bh'ɛɨ́ra to hɛ átógó si bhányɛ nɛ́. Bhe ómbi si óúdhúúdhú biti kábwʉ ú kááhúa hɛ nɛ́, bhe kɔ́rabwʉ bhu hɛ. 19 Nómbí na nómbí abɔnda nyáá bhó ndreíhi ngwɛ́ pɨ́tɛ́ Yésu ándreépí, outo nɛ́, sɨ́ nɛ́kpakpárá kana abwʉ ú abedi nɔ́tɔ a n'ɛɨ́ra hɛ pɨ́tɛ́ nɛ́.

Nɛ́ɨ́gyágyómbíé adhi bhe nɔ́dɔ́mbíé adhi ?

(Mat. 5.1-12)

20 Bhe Yésu eevhíngílía ánɛŋɔ bha ú óudrwaamɨ si bhándrɛ nɛ́ kábwʉ ɨ, ɔdhya bhó « Nya ánɛɨgyagya aamɨ, akiɛmʉ́dádákúái, sɨ́ nɛ́Ɨnyɨngwa i Angéle bha nɛ́ ɔgá aamɨ ! 21 Nya ánɛɨgyagya aamɨ si nya ánemo ro gaa ɨ́ drɨ́ nɛ́, sɨ́ mubhuba móbhu ánaányɔ́ ámóotu pima ! Nya ánɛɨgyagya aamɨ si nya ú mumua gaa ɨ́ drɨ́ nɛ́, sɨ́ mukiba móki ɛ́rɛdhɛ-rɛdhɛ ! 22 Nya ánɛɨgyagya ɨ́ drɨ́ ómbi kétía ɨ aamɨ, kókpua ɨ aamɨ, kóúnzía ɨ aamɨ, káádáádá ɨ akíɛ́rʉ únga ká sɨ́ ɛ́mao, bhó sɨ́ nya ú nyapía ɨ́má nɛ́Ngwángwɛ i nÓmbí bha nɛ́. 23 Amʉ́gá nɛ́ɨgyagya bhe mʉbha outo nɛ́, amúgwó ká ! Sɨ́ átɛtɨánɛ nɛ́, Angéle a ú ɛɨ́mbɛ́mbá nyala nóumbwu kpɔkpɔ ú átɔrɔ. Sɨ́ kɔ́kɔhɛ́hɛ kábɛsɨ́ ká énébi ámébiti sɨ́ɨ́sɔ́. 24 Bhe nya ánɔdɔ aamɨ mándátíi, sɨ́ mɨɨ́bambwú bhó nɛ́ɨgyagya akíé ! 25 Nya ánɔdɔ aamɨ si ákíɛ́hɔ́ ká mámáti mɔmbɛ́ gaa ɨ́ drɨ́ nɛ́, sɨ́ mubhuba móbhu ánemo. Nya ánɔdɔ aamɨ si nya ú nyeínva ki gaa ɨ́ drɨ́ nɛ́, sɨ́ mʉgaba mɔ́ga nɔ́dɔ bhe mumuba mómu ! 26 Hee nya ánɔdɔ átadhɨnga i ómbi ndúbhu kɔ́dhya ɨ bhó nya ómbi bali nɛ́, nya hɛ́ táo ómbi biti nɛ́. Sɨ́ kɔ́kɔhɛ́hɛ kábohi ká nyɛ sɨ́ɨ́sɔ́ áténébi si nɛ́ɨtɔ anɛ. »

Bhe Yésu ɔdhyá óudrwaamɨ si bhándrɛ nɛ́ kála bhó kɔ́ɔ́mʉ éetií

(Mat. 5.38-48; 7.12a)

27 Yésu ɔdhya tɔkana bhó « Nɔ́dhyɔkana, obhúa aamɨ si nya ú mʉga ma i nɛ́, anyɔ́ɔ́mʉ éetií si bhákíé nɛ́ ! Anyɛ́sɨ́ ómbi si kɔ́ɔ́mʉ́a bhó nyɛsɨ́ aamɨ ámébiti nɛ́ mɔmbɛ́ ! 28 Anyóúfu Angéle ánɔ́tɔrʉ ómbi si ká ú kódia aamɨ nékolóbhe nɛ́, anyasɛmya ómbi si ká ú káádá akíɛ́rʉ nɛ́ kála. 29 Nómbí kana aángatá andrúóngóóngó kana nɛ́, bhe nyéévhíngílía bhu nɔ́ɔ nákʉ́nɛ́ bh'atá nɛ sɨ́ɨ́sɔ́. Nómbí kana aángɛɨ́ngá bhó ndrúú pá nékóti nɛ́, mɨ́ɨ́ngaátʉ́ ndrɔɨ bhelé bhó nɛ́ɨ́nga bhu nésimísi. 30 Nómbí aángoni mɨ nédhu nɛ́, bhe múa nɔ́ɔ, nómbí aángɛɨ́ngá bhó ndrúú pá ɔ́dhyɔ́ si kɔ́gá mɨ nɛ́, mɨ́ɨ́ngɔdhyɔ́ bhó nɔ́ɔ bhelé tɔkana bhó kaátu mʉ́ zá. 31 Bhe nyɛsɨ́a ómbi akʉ́ɛ́ kála sɨ́ɨ́sɨ́ nyɔɔ́mʉ́a bhó kɛ́sɨ́ sɨ́ nyala. 32 Bhe nyɔɔ́mʉ́a sɨ́ ómbi si kɔ́ɔ́mʉ́a aamɨ n'ápye nɛ́, asoumbwu híɛ gyó i mubhua nya hɛ́ munvá bha ú Angéle a ɨ nɛ́ ? Bɛsɨ́ngɨ obhúa ká sɨ́ ɛ́másúmúi, kɔ́ɔ́mʉ́a ká sɨ́ ómbi si ká ú kɔ́ɔ́mʉ́a hɛ nɛ́. 33 Hee bhe nyɛsɨ́a sɨ́ ɔ́dhyɔ́ bali ápye ómbi si kɛ́sɨ́a nɔgɔ nyala ɔ́dhyɔ́ bali nɛ́ kála ápye nɛ́, asoumbwu híɛ gyó i mubhua nya hɛ́ munvá bha ú Angéle a ɨ nɛ́ ? Bɛsɨ́ngɨ obhúa ká sɨ́ ɛ́másúmúi, kɛ́sɨ́a ká sɨ́ɨ́sɔ́ ! 34 Bhe kófá ɛ́faránga sɨ́ ómbi si nya kɔ́tɔ ánaámbáámbá i bhó káátua aátu n'ápye nɛ́, asoumbwu híɛ gyó i mubhua nya hɛ́ munvá bha ú a ɨ nɛ́ ? Ɛ́másúmúi kófa ká bhu hɛ madáhɛ́ másúmúi ɛ́faránga sɨ́ɨ́sɔ́, átɛmbanda i bhó be káátu kála pá sɨ́ɨ́sɔ́ nyofóbá nɔgɔ hɛ nɛ́. 35 Nɔ́dhyɔkana, anyɔ́ɔ́mʉ éetií si bhákíé nɛ́, bhe nyɛsɨ́a kála ɔ́dhyɔ́ bali, bhe mufa hɛ ɛ́faránga ka nɛ́ ka ɨ aanyɔɔ́rɔ náámbáámbá i bhó káátua nyala aátu nɛ́. Bhe nóumbwu i bhákíé nɛ́ obhuba ámɛ́kpɔkpɔ pima, bhe nɛ́ n'aádha bhó nya ɛ́gyándrɛ́ si Angéle ndré ú bhó pima nɛ́ bha nɛ́, outo nɛ́, sɨ́ ɨ́n'a ánɔɔmʉ eísú bha ú ómbi nziobhó si káátu ka iisɔ́ nɛ́ ká ɨ. 36 Amúbhú a ánɔɔmʉ eísú sɨ́ɨ́sɔ́ Angéle, Nápá i bhákíé nɛ́, a ánɔɔmʉ eísú ro. »

Bhe Yésu ɔdhyá bhó mɨɨ́ngofo bhelé ómbi akʉ́ɛ́ ányɛngbanga

(Mat. 7.1-5)

37 Yésu ɔdhya bhó « Mɨɨ́ngofo bhelé ómbi ányɛngbanga b'Angéle aángofoba bhelé akíɛ́ngbanga. Miɨ́ngeídhé bhelé ómbi akʉ́ɛ́ átɛngbanga, b'Angéle aángeídheba aamɨ bhelé átɛngbanga. Anyéégi ómbi akʉ́ɛ́, b'Angéle néégiba aamɨ pá. 38 Amúo pá ómbi akʉ́ɛ́ kála, b'Angéle nóoba nyala pá. Bhe mɨɨ́ngoo áneísú balí nɛ́, ánɛmatabhísi ro nɛ́, bhe kóoba nɔgɔ nyala áneísú balí ro, ánɛmatabhísi ro. Outo nɛ́, sɨ́ɨ́sɔ́ sɨ́ mua ómbi akʉ́ɛ́ kála, Angéle ooba bhu nɛ nyala sɨ́ɨ́sɔ́. »

Óudrwaamɨ áménzúdhá bhu ámɛ́ɨtɔ́

39 Bhe Yésu ɔgá kála nɛ́tʉ́ ɔdhya bhó « Aáta aátɛ bhó nɛ́ŋɔʉtɛtombíé kana nɔ́mba nɛ́ŋɔʉtɛtombíé akʉ́nɛ́ néhí ? Aátɛ ka. Ɨ́hɛ kpɛ́ sóórúé kódha módhe átemugélu. 40 Bhe ka ɨ oudrwaamɨ kana i afá náadhaadhombíé i bhándrɛ nɛ́ nɛ́. Bhe óudrwaamɨ si ká hɛ́ káádhá hɛ mɔmbɛ́ nɛ́, kóópua oópu ɨ́hɛ kpɛ́ kaambá sɨ́ náadhaadhombíé i bhányɛ nɛ́. 41 Asɔdhyɔ gyó i nyá ú múgwá to pɨ́tɛ́ nédrúɛ́ngwɛ pɨɨ́dhɔ i ɨ́n'a yándrúngwɛ tándrɛŋɔ́ nɛ́, bhe ka nyáámbá átɛ́kɨ́rɛkpɔ i ɨ́n'a tándrúɛŋɔ andrúé nɛ́ ? 42 Ɨ́n'aáta bhásí bhó mʉ́dhyɔ yándrúngwɛ ko bhó ‹ Yándrángwɛ, kabha ká ma mɛ́ɨ́za nédrúɛ́ngwɛ pɨɨ́dhɔ i ɨ́n'a tándrúɛŋɔ nɛ́ ›, ka nɛ́ ka múgwó nɛ́kɨ́rɛkpɔ i ɨ́n'a tándrúɛŋɔ andrúé nɛ́ ? Andruɛɨtómbíé i gwa ! Kɛɨ́za ká pá nɛ́kɨ́rɛkpɔ i ɨ́n'a tándrúɛŋɔ nɛ́, hee be múgwoba pá éóró bhó ndrɛɨ́za nédrúɛ́ngwɛ i ɨ́n'a yándrúngwɛ tándrɛŋɔ́ nɛ́. 43 Sɨ́ nɛ́kɨ́rɛ balí ɔhɔ ka ɛ́ɨbhʉɛɨbhʉkpɔ́ amɔ́ŋwa, bhe nɛ́kɨ́rɛ biti ɔhɔ ka ɛ́ɨbhʉɛɨbhʉkpɔ́ bali. 44 Outo nɛ́, sɨ́ ɛ́kɨ́rɛ́ kána-káná kɛ́ɨ́tɨa nyɛ tányɛɨbhʉɛɨbhʉkpɔ́. Kɔ́pɛ ka ɛ́mánga átóóró obhúa to ɔ́yɔ́kpɔ átɛ́tɨ́lɨ nɛ́. 45 Sɨ́ɨ́sɔ́ drʉ, nómbí balí ɔdhya sɨ́ ɛ́tʉ bali, outo nɛ́, sɨ́ ɔ́dhyɔ́ si a ú aámbá nɛ́, ká ámɛ́bali. Bhe nómbí biti ɔdhya sɨ́ ɛ́tʉ biti, outo nɛ́, sɨ́ ɔ́dhyɔ́ si a ú aámbá nɛ́ ká ámébiti. Outo nɛ́, sɨ́ ɛ́tʉ ndúbhu si kédia átómbí ándretíkpɔ nɛ́, kɛ́nga átɔ́dhyɔ́ si ká ú kɛ́ɨ́nʉ́a ándreísú nɛ́. »

Yésu a ú aádha átɔ́bhʉ́i sóórúé

(Mat. 7.24-27)

46 Yésu ɔdhya bhó « Asɔdhyɔ gyó i nyoúnga ká to ma nyáá bhó ‹ Nɛ́Ɨ́nyɨ́ ! Nɛ́Ɨ́nyɨ́ ! › bhe nyɛsɨ́ ka táo sɨ́ mádhya nɛ́ ? 47 Hee gaa ɨ́ drɨ́, má ú máádha ká nyala, nómbí i ekua bha zá má ɨ nɛ́, bh'ɔgá ɛ́tʉ si bhándrá nɛ́ nɛ́, bh'ɛsɨ́a sɨ́ɨ́sɔ́ mádhya nɛ́ sɨ́ eegwá. 48 Ɨ́n'eegwá únga ká sɨ́ nómbí i abwʉ ú ɔbhʉa négyó nɛ́. Ɨ́sɛ́ɛ́lɛ́, ɔbyabwʉ ká pá nɛ́fɔndasyɔ́ ámétútúlú gbagba t'angáábɛ nóópíobho, bh'eídría to négyó. Átadhɨnga i nɛ́dháobho ɔsɨ́a ɨ nɛ́, bhe négwókpɔ otía átégyó nɛ́ éooo ! Bhe négwókpɔ nɛ́ kabwʉ nɛ́ɨngwá nɛ, outo nɛ́, sɨ́ nómbí nɛ́ abwʉ aángɔbhʉ́ négyó nɛ́ mɔmbɛ́ éngbú ! 49 Nɔ́dhyɔkana, nómbí i ɔgá ɛ́tʉ si bhándrá nɛ́, bh'ɛsía ka bha sɨ́ mádhya nɛ́, ɨ́n'eegwá kaambá sɨ́ nómbí i ɔbhʉ́bwʉ nyáá négyó i bhándrɛ nɛ́ átapɛ tápu, ka nɛ́ ka nɔ́bya to fɔndasɨ́ɔ́ nɛ́. Átadhɨnga i nɛ́dháobho ɔsɨbwʉ to nɛ́, bhe négwókpɔ adá négyó nɛ́ ɛ́tʉtʉrʉngagye, bh'ɔvhá nɛ ndúbhu ɛ́kpɛ́ngbɛ́lɛ́ngbɛ́ ! »