Luk 5

Bhe Yésu ongá óudrwaamɨ ámɛ́ɨ́sɛ́ɛ́lɛ́

(Mat. 4.18-22; Mákɔ 1.16-20)

1 Átɛtɨánɛ kana,Yésu a n'apá ndrɛ átátú i nɛ́Gɛnɛzarɛ́tɛ andrɛ ándroobhuru nɛ́, bh'ombirongwɛ erímá a n'ɛɨ́bwa bha ú a ɨ bhó ku nyɔgá nɛ́tʉ́ i Angéle bha nɛ́ nɛ́. 2 Bh'ogwá ékoko sóórúé átɛ́dháobho ándrabɛ́, ámɛ́makangó ká hɛ́ káángesya, ká hɛ́ kɔ́ʉ́ba ádɔ́ si bhányɛ nɛ́ nɛ́. 3 Bhe Yésu oká átekoko hɛ́ kana, néi ɔgɔbwʉ Simɔ́na nɛ́, ɔdhya nɔ́ɔ bhó nɔ́ʉ́sɨ ká ngwɛ́ pá átékókó pɨɨ́dhɔ bha ú átɛ́dháhɔ. Bh'odría átékókó ándrɛhɔ, bh'erímá tɔkana a n'aádha ombirongwɛhɛ si kábwʉ drʉ nɛ́. 4 Átadhɨnga i eíbía ɨ to nɛ́mabelu nɛ́, ɔdhya Simɔ́na ko bhó « Kɔʉ́sɨ ká ngwɛ́ pá átékókó bha ú átɛɨpa, bhe nyapɨa ádɔ́ si bhákíé nɛ́, amúpwu to ɛ́ngɛrɛ. » 5 Simɔ́na aátua nɔ́ɔ bhó « Nóúgé, maángogwo dhu átekini ndúbhu ka nɛ́ ka amapwu ngɛrɛngwɛ nɛ́ ! Nɔ́dhyɔkana, sɨ́ mʉ́dhyá bhó mɛ́sɨ́ sɔ́ nɛ́, má ú mápɨa ádɔ́. » 6 A drʉ kápɨa ádɔ́ nɛ́, bhe kópwúa ɛ́ngɛrɛ móotu, bh'ádɔ́ si bhányɛ nɛ́ kérímá nɔ́ʉ́sɔʉsɛ. 7 Bhe kɛ́gá ányɔɔtɛ́ kɔ́rɔ madáhɛ́hɛ si kábwʉ átékókó akʉ́nɛ́ nɛ́, bhó kéku ku kɛ́ɛ́wɛ hɛ. Bhe kékúa bhe kɛ́ɨ́nʉ́a kɔ́rɔ ékoko hɛ́ sóórúé nɛ́ nɛ́ ɛ́dhɛ-dhɛ-dhɛ, dhɛdhɛ bhó kégi ánaméngbongbó ro. 8 A drʉ Simɔ́na Pɛ́tɛrɔ ogwá sɔ́ nɛ́, bh'aágá ánɛkaatí Yésu tándreetu, ɔdhya bhó « Koótue ká ndru máto pá nɛ́Ɨ́nyɨ́, outo nɛ́, sɨ́ má nɛ́másúmúómbíé ! » 9 Ɔdhyɔ́bwʉ sɔ́, outo nɛ́ sɨ́, ɨ́nɛ, ánaasí ndúbhu si kábwʉ nɔ́rɔ nɛ́, kábwʉ ú kábadi ánɛmadumbe ro átɛngɛrɛ ootu si kábwʉ káángopwú nɛ́. 10 Bɛsɨ́ngɨ obhúa ká Yakóbho bhu Yɔáni, Zɛbɛdáyɔ ánandra, ési kábwʉ Simɔ́na madánɛ́hɛ nɛ́, kábwʉ ú kábadi ká bhu hɛ sɨ́ɨ́sɔ́. Hee bhe Yésu ɔdhyá Simɔ́na ko bhó « Mɨ́ɨ́ngɛɛ́rʉ́ bhelé ! Ɔtʉ́a ndrɛ ɨ́ drɨ́ gaa ɨ́ drɨ́, mɨ́bópwu bhó ómbi. » 11 Bhe kéíká ékoko bha ú éégírí, bhe kábhá ɔ́dhyɔ́ ndúbhu si bhányɛ nɛ́, bhe kádrwá Yésu.

Bhe Yésu ɛɨ́rá nɛ́magbuluombíé

(Mat. 8.1-4; Mákɔ 1.40-45)

12 Átɛtɨánɛ akʉ́nɛ́, Yésu a nɛ́ átɛ́gbɔ́tɔ́ kana nɛ́, nómbí kana a n'égye, ándreépí ndúbhu a nɛ́ sɨ́ ɛ́magbulú ápye nɛ́. A drʉ ogwá Yésu nɛ́, bh'odhá bha tándreetu, bh'oúgégélá ngwɛ́ ndrɛ nɔ́ɔ bhó « Nɛ́Ɨ́nyɨ́, nyɔ́ɔ́mʉ́a nɛ́, nyá ánaátáatɛ bhó ndrɔʉ́ba ma évhúúú ! » 13 Bhe Yésu ɛɛ́yá ándrɛtɛ́, bh'agbá nɛ, ɔdhya bhó « Má ú mɔ́ɔ́mʉ́a, kubhú ámómóngo ! » Sɨ́ átámádhɨnga, bhe ɛ́magbulú kɛ́zá nɔ́tɔ ɛ́wáyá. 14 Bhe Yésu avhúa ánɛbɨ́ bhó « Mɨ́ɨ́ngɔdhyɔ́ bhelé ombí ko bhó mɛ́ɨ́rá má mɨ, nɔ́dhyɔkana, mʉ́kʉ́a nɛ́, keíhwe sɨ́ mɨ́ ndru tɔ́kpɛ nɛ́kɔána ko, bhe nyááa nɛ́bandʉlɛ i nɔ́ʉ́bá i bhándrúé nɛ́ andrɛ sɨ́ɨ́sɨ́ Mʉ́sɛ aáobwʉ nƆ́ʉbwɔ, átɛmbanda i bhó nyáádhɔ to kála bhó ndraángɔra nɛ́. » 15 Hee bhe Yésu ánɛrʉ kókúa táo pima t'angɛ́pɛ ! Bhe ombirongwɛhɛ kérímá ká hɛ́ kɔ́ʉmbá táo nyɛ kpukpurukpu a ká nɛ́ bhó ku nyɔgá nɛ, bhó bh'ɛɨ́ra to hɛ átógó si bhányɛ nɛ́. 16 Ɨ́nɛ, bh'erímá a n'egedhepa ndrɛ bha ú átouma mapú, a n'asɛmya nɛ́.

Bhe Yésu ɛɨ́rá nɛ́masí kana i ándreépí a n'odá nɛ ɛ́bɔmbɔlɔ nɛ́

(Mat. 9.1-8; Mákɔ 2.1-12)

17 A bhó nyáá átɛtɨánɛ akʉ́nɛ́ nɛ́, Yésu a n'aádha nɛ́, ɛ́Mɔfarúsi ánaadhaadhɔí si nƆ́ʉbwɔ anɛ, kábwʉ drʉ. Kɛ́ngábwʉ átɛ́bhágɔ pɨ́tɛ́ si nɛ́Galiláya anɛ, néYudáya anɛ, bhu táo ési néYerusalɛ́mɛ anɛ, néibwua i nɛ́Ɨ́nyɨ́ Angéle bha nɛ́ a nɛ́ nɔ́rɔ nɛ́, a n'ɛɨ́ra nɔ́ ógói nɛ́. 18 Bhe áasí sɔ́ ɨ́ kóópúa ká hɛ́ káatá átesongó nɛ́masí kana i ándreépí abwʉ a n'odá nɛ ɛ́bɔmbɔlɔ nɛ́, ká hɛ́ kɔ́nda bhó nyeité nɛ ú gyɔ́tɔ bhó bhe nyetua nɛ Yésu tándreetu nɛ́. 19 Drʉ kabwʉ kógwó híɛ i sɨ́ nyeité to nɛ nɛ́, ánombi ányóótuoótú ro nɛ́, bha ɨ́ kóká ɨ bhe káándía népólo átégyódrukpɔ, bhe kéísyá nɛ átɔ́ɔ́rɨandrɛ i ómbi anyɛ, ánesongó i bhándrɛ nɛ́ ro ndúbhu, áteetu i Yésu bha nɛ́. 20 A drʉ Yésu ogwá nápíápí i bhányɛ nɛ́ sɔ́ nɛ́, ɔdhya nógómbíé ko bhó « Andrágɔ́ ! Máángeégi mɨ́o ɛ́masúmu si bhándrúé nɛ́. » 21 Bh'áadhaadhɔí bhu ɛ́Mɔfarúsi kɔ́tʉ́a ká hɛ́ kɔ́ɨa nyɛ tányeisu bhó « Nómbí i ɨ́n'a adhíngwɛ i oúnzía Angéle i nɛ́ ? Adhíngwɛ i ɨ́n'aánaátáatɛ bhó ndreégi ɛ́masúmu nɛ́ ? Kabha sɨ́ Angéle ápye kana ? » 22 A drʉ Yésu okía ányaámbáámbá sɔ́ nɛ́, ɔdhya kála bhó « Oudhu gyó i nya ú nyaambá to tákíeisu sɔ́ nɛ́ ? 23 Asɔdhyɔ kpákpáálá nyɔngwɛ gyó i átéi bhó nómbí nɔ́dhyɔ bhó ‹ Máángeégi mɨ́o ɛ́masúmu si bhándrúé nɛ́ nɛ́ ? ›, bhu átéi bhó nómbí nɔ́dhyɔ bhó ‹ Kɛnga bhe nyóólia nɛ́ ? › 24 Hee átɛmbanda i bhó anyɛ́ɨ́tɨ to bhó ‹ Ɨ́má nɛ́Ngwángwɛ i nÓmbí bha nɛ́ má ánaátáatɛ ɨ́ zá átapɛ i bhó méégi ɛ́masúmu si ómbi anyɛ nɛ́. › » Ɔdhya nómbí i áneépí amódo nɛ́ ko bhó « Mádhya mɨ́o ndó kɛnga ɛ́kyaaa, kɛɨ́nga nésongó i bhándrúé nɛ́, bhe mʉ́kʉ́a ú bhándrúé ! » 25 Ɛ́gala pɨ́tɛ́ nɛ́, bh'ɛngá áteetu i bhányɛ nɛ́, ándrɛkádhákpʉ́ átedhu i kéídhóbwʉ to nɛ nɛ́, bh'ɔkʉ́a ú bhándrɛ a n'ɔʉ́bwá Angéle nɛ́. 26 Bhe ómbi ndúbhu kámbángábwʉ mámbanga gbagba, bhe kérímá ká hɛ́ kɔ́ʉ́bwá Angéle, bhe nɛ́ɛrʉ agbábwʉ hɛ ámámbámbó, ká hɛ́ kɔ́dhya bhó « Maángogwo ɔ́dhyɔ́ améhwe átɛtɨánɛ i ! »

Bhe Yésu ongá Lévi

(Mat. 9.9-13; Mákɔ 2.13-17)

27 Hee bhe ú zaá nɛ́, bhe Yésu edía égye átɛ́gbɔ́tɔ́ nɛ́, bh'ogwá nɛ́ndɔ́mbɛ kana i ɛ́páko anyɛ ánɛrʉ bhó Lévi, a n'odría átebiró i ɛ́páko anyɛ nɛ́. Bhe Yésu ɔdhyá nɔ́ɔ bhó « Kadrwé ma. » 28 Bhe Lévi abhá némolo i abwʉ to nɛ́, bh'ɛngá bh'ɔtʉ́a a n'adrwá nɛ nɛ́. 29 Átámɛ́zaa, bhe Lévi eíká nɔ́ɔ náadhu kpɔkpɔ ú bhándrɛ, bhe kpukpurukpu i ɛ́ndɔ́mbɛ anyɛ ánombi akʉ́ɛ́, kábwʉ kɔ́rɔ ɔ́mápuekana ká hɛ́ káágá átamísá, ká hɛ́ káánya nɛ́. 30 Bhe ɛ́Mɔfarúsi ánaadhaadhɔí si bhányɛ nɛ́ si nɔ́ʉbwɔ anɛ si kábwʉ égye nɛ́, kérímá ká hɛ́ kɔ́ʉ́dhya nyɛ tányɛrɨ́ nɛ́, bhe kɔ́ɨ́a óudrwuaamɨ si Yésu bha nɛ́ bhó « Audhú gyó i nya ú nyaánya to bhe nya ú nyaambwá to ánɛndɔ́mbɛ bhu táo ómbi akʉ́ɛ́ si ánohíámɛ biti nɛ́ ? » 31 A drʉ Yésu ɔgá ká hɛ́ kɔ́ʉ́dhya nyɛ sɔ́ nɛ́, bh'akɛ́lyá kála bhó « Ómbi si áneépí kpákpárá nɛ́, ka ɨ kɔ́rɔ nɛ́mʉ́nganga ándremo. Ógói ká hɛ ánɛmʉ́nganga ándremo ro. 32 Ka méku bha ndó ku mángo ómbi si kónga nyɛ bhó nya ámɛ́mɛ́yɔ nɛ́, nɔ́dhyɔkana mékúa ndó ɛ́másúmúi kéevhíngílí ányeisu. »

Yésu a ú ɔdhya átemo ándrémbwúembwu ándrɔdhyɔ

(Mat. 9.14-17; Mákɔ 2.18-22)

33 Ɛ́Mɔfarúsi kɔ́dhya Yésu ko bhó « Óudrwaamɨ si Yɔáni bha nɛ́ kémbwua mémbwu pima némo, ká hɛ́ kásɛmya nɛ́, bɛsɨ́ngɨ obhúa ká ési bháɛ nɛ́. Obhúa ési bhándrúé nɛ́ nɛ́, kémbwu ka mo ! » 34 Ɔdhya kála bhó « Anyáambá ká átaadhu i náagɨ andrɛ^a  ! Nɛ́masí i a ú ɔgɨa nándrɔ nɛ́, bh'onga ándragɔ́nɛ́hɛ átaadhu. Nyaambá ki bhó aáta aátɛ bhó ándragɔ́nɛ́hɛ kémbwu némo, átadhɨnga i a ɨ kɔ́ro átɛ́mápue kana nɛ́ ? Nɛ́ɨtɔ, ka bha sɔ́ ! 35 Bh'oópuba ndrɛ átadhɨnga akʉ́nɛ́ i éetií kɔ́nvhɛba ɨ nyɔɨ nɛ́masí nɛ́^b , bhe kémbwuba táo némo átékíní hɛ́. »

Yésu ekúa nɛ ánɔdhyɔ́ adyá

36 Bh'ɔgá kála tɔkana nɛ́tʉ́ kana bhó « Ka ɨ ombí i aátwa nógi aapɛ́mbɛ́lɛ́ átogi adya bhó ndrari bha átogi tɔá nɛ́. Sɨ́ nómbí ɛsɨ́a sɔ́ nɛ́, b'aángaadá nógi adya, bhe nógi aapɛ́mbɛ́lɛ́ adya káágɨ ka nyɛ bhu nógi tɔá ! 37 Sɨ́ɨ́sɔ́ tɔkana, ka ɨ ombí i etua ɔ́gálá adyá átembwo tɔa nɛ́, sɨ́ nómbí ɛsɨ́a sɔ́ nɛ́ bh'ɔ́gálá kɔ́ʉ́ndra émbwo hɛ́, bhe kátakpa nyɛ bh'émbwo káádá. 38 Hiii ! Ɨ́n'aátá bhó kétu ɔ́gálá adyá sɨ́ átembwo adyá. 39 Bhe nómbí i ɔmbwá ɔ́gálá tɔa nɛ́, ka nɔ́ɔ́mʉ ámádyá, outo nɛ́, sɨ́ ɔdhya bhó ‹ Ámɛ́tɔka kɛ́pá hɛ átɔmbɛ. › »