Luk 4

Bhe Sátana aábhá Yésu

(Mat. 4.1-11; Mákɔ 1.12-13)

1 Átɛzaa i Yésu ɛɨ́nʉ́a ɨ ánOudhuudhu Sáátu ro nɛ́, bh'ɛngá ú átɛ́dháobho i nɛ́Yaradɛ́nɛ andrɛ ándroobhuru, bh'ɔá ú átóúmá. A nɛ́ égye ú átóúmá nɛ́, nÓudhuudhu Sáátu abwʉ anómba nɛ nɛ́, 2 ékíní ɛ́tɛɛvhɛ sɔ́sʉa, bhe Sátana aábhɔ́bwʉ nɛ égye. Átékíní hɛ́ kpɛ́, kabwʉ nɔ́nyɔ́ bhu dhu pɨɨ́dhɨngwɛ ápye. A drʉ ékíní hɛ́ káfa nɛ́, bhe némo agbá nɛ. 3 Hee bhe Sátana ɔdhyá nɔ́ɔ bhó « Múbhúa ká Angéle ándrɛNgwá nɛ́, kɛɨ́kpa ká nóópí i ndó nóópu ká nɛ́mápa ! » 4 Bhe Yésu akɛ́lyá nɔ́ɔ bhó « A ú ɔhá ndrɛ átébúku i Angéle bha nɛ́ bhó ‹ Nɔ́ra i nómbí bha nɛ́, ka bha sɨ́ átáányɔ́ ápye. › » 5 Átámɛ́zaa, bhe Sátana ɛɨ́ngá nɛ bhe kɔ́á bha nɛ bha ú bhó pima, bh'aádhá nɔ́ɔ átadhɨngangwɛ pɨɨ́dhɔ ɛ́ɨnyɨngwa ndúbhu si nápɛ i anɛ. 6 Ɔdhya nɔ́ɔ bhó « Mááa mɨ́o aáo nɛ́ɨnyɨngwa ndúbhu i nápɛ i andrɛ, ánamɛ́mándátí kɔ́rɔ, outo nɛ́, sɨ́ kábwʉ káángɛɨgbá ma ɔ́dhyɔ́ hɛ́ ndúbhu, bhe má ánaátáatɛ ndó mááo nómbí i mɔ́ɔ́mʉ́a ndó máo nɔ́ɔ nɛ́ ko. 7 Bhe ɨ́mɨ́, nyáágá bhó pá anúɛ́kaatí áteetu i bhándrá nɛ́ nɛ́, bh'ɔ́dhyɔ́ hɛ́ ndúbhu bhe kɔ́gá mɨ. » 8 Bhe Yésu akɛ́lyá nɔ́ɔ bhó « A ú ɔhá ndrɛ átébúku i Angéle bha nɛ́ bhó ‹ Kɛɛ́drwa nɛ́Ɨ́nyɨ́ Angéle i bhándrúé nɛ́, bhe nyásɛmya sɨ́ ɨ́nɛ ápye kana ! › » 9 Átámɛ́zaa, bhe Sátana ɔmbá nɛ ú áteYerusalɛ́mɛ, bh'eíká nɛ átáángélégyó kpɔkpɔ ándrɛmʉgɔ́gɔrɔ́, bh'ɔdhyá nɔ́ɔ bhó « Múbhúa ká Angéle ándrɛNgwá nɛ́, kɛbá ká ndru múdhe ká ú burú ! 10 sɨ́ a ú ɔhá ndrɛ átébúku i Angéle bha nɛ́ bhó ‹ Angéle ɛɨ́kpa ɛɨ́kpa áángelú si bhándrɛ nɛ́ bhó kárɨ́ mɨ ›, 11 bh'a ú ɔhá ndrɛ tɔkana bhó ‹ Kɔ́bwa mɨ mɔ́bwɔ tányɛtɛ́ bhó sɨ́ nyádia ɨ andrúɔ́ɔ́nzɔ́ átóópí nɛ́. › » 12 Bhe Yésu akɛ́lyá nɔ́ɔ bhó « A ú ɔhá ndrɛ átébúku i Angéle bha nɛ́ bhó ‹ mɨ́ɨ́ngousísí bhelé nɛ́Ɨ́nyɨ́ Angéle i bhándrúé nɛ́. › » 13 Ee a drʉ Sátana eíbia áábháábhɔ́ hɛ́ ndúbhu nɛ́, bh'abhá táo nɛ átapúmá bh'ɔá tó bha átadhɨngɔmɛ́ akʉ́nɛ́^a .

Bhe Yésu ɔtʉ́a némolo i bhándrɛ nɛ́ ú átɛ́bhágɔ́ i nɛ́Galiláya andrɛ

(Mat. 4.12-17; Mákɔ 1.14-15)

14 Bhe Yésu aátúa ndrɛ bha ú átɛGaliláya a n'ɛɨ́nʉ́a ɛɨ́nʉ ánɛkpakpárá i nÓudhuudhu Sáátu andrɛ nɛ́. Bh'ánɛrʉ kókúa átɛ́bhágɔ́ nɛ́ ndúbhu. 15 Bh'erímá a n' aádha ú átɔ́ʉ́sɛ́myágyo si éMoyúda anyɛ, bhe ómbi ndúbhu kérímá nɛ nábɨabɨ.

Bhe ómbi si nɛ́gbɔ́tɔ́ i nɛ́Náázarɛ́tɛ andrɛ kétía Yésu

(Mat. 13.53-58; Mákɔ 6.1-6)

16 Bhe Yésu ɔá ú átɛ́Náázarɛ́tɛ, ú kɛ́ɨ́nyɛ́bwʉ ɨ́ nɛ. Bh'ekía ndrɛ ú átɔ́ʉ́sɛ́myágyó i éMoyúda anyɛ átɛsabáto tɨánɛ sɨ́ɨ́sɨ́ ɛsɨ́sɨ́a. Ee bh'ɛngá bhó ndrɛhya nɛ́tʉ́ i Angéle bha nɛ́. 17 Bhe kɛ́ɨ́gbá nɛ nébúku i nénébi Isáya bha nɛ́. Bh'apúa, bh'ogwá nɔ́mɛ́ i ká ú kɔ́há to bhó 18 « NÓudhuudhu i nɛ́Ɨ́nyɨ́ Angéle bha nɛ́ ɨ́n'a máro, outo nɛ́, sɨ́ aábɔrwa ma sɨ́ze bhó ku mágyɔ́ nɛ́tʉ́ balí i Angéle bha nɛ́ ɛ́mʉ́dádákúái kála. Bh'ɔdhá ma bhó ku mágyɔ́ ɛ́kambaí kála bhó má ú mávha hɛ, bhó bh'ɛ́ŋɔʉtɛtɛí kógwá, bhe méísya émógyá. 19 Bhó bhe mágyá to nɛ́ɨzɛ i nɛ́Ɨ́nyɨ́ Angéle aángaádhɔ to nɔ́ɔmʉ i bhándrɛ nɛ́ gaaɨ́ drɨ́ nɛ́. » 20 Átadhɨnga i Yésu eíbía ɨ nɛ́hyɛ́hya nɛ́, bh'aagbʉ́a nébúku, bh'aátúa nɛ́mólómbíé i nɔ́ʉ́sɛ́myágyó andrɛ ko, bh'angódri bha sɔ́. Ómbi ndúbhu si kábwʉ ú átɔ́ʉ́sɛ́myágyó nɛ́, ányɛŋɔ ndúbhu bha nɔ́tɔ. 21 Bh'ɔtʉ́a táo a n'ɔdhya kála bhó « Nɛ́tʉ́ i Angéle bha nɛ́ i mɨɨ́ngɔga má nɛ́ mɛ́hyá nɛ́ nɛ́, aángɛsɨ́ ndrɛ átɛtɨánɛ i. » 22 Ómbi ndúbhu kábwʉ ká hɛ́ kógá nɛ mógo, ka hɛ́ kámbanga mámbanga átɛtʉ bali si abwʉ ú abɔdhyɔ nɛ́. Átámɛ́zaa, bhe kérímá ká hɛ́ kɔ́dhya bhó « Ka bha maa Yɔsɛ́fa ándrɛngwá nɛ́ ! » 23 Ee bhe Yésu ɔdhyá kála bhó « Nzúdhá, mʉgɔba mʉ́ mɔ́gɔ nɛ́tʉ́ i ‹ Andruɛmʉ́nganga, kɛɨ́ra ndru ɨ́mɨ́ tɔ́kpɛ. › Bhe mʉdhyɔba ká mʉ́ sɨ́ mɔ́dhyɔ tɔkana bhó ‹ Maábɔga ɔ́dhyɔ́ ndúbhu si nyɛ́sɨ́bwʉ ú átɛKapɛrnaúma nɛ́, (hee múbhúa Masíya nɛ́), kɛsɨ́ ká táo hɛ nɔgɔ átɛ́gbɔ́tɔ́ i kɔ́hɨ́a to mɨ i nɛ́. › » 24 Ɔdhyá kála bhó « Má nɛ́ mádhyá nyala nzúdhá-nzúdhá nɛ́, ka ɨ nébi kana i ká nɛ́ kápía nɛ mɔmbɛ́ átɛ́gbɔ́tɔ́ i bhándrɛ nɛ́ tɔ́kpɛ nɛ́. 25 Bh'éígwá ándrɔ́ kábwʉ ámóotu átéÍsraɛ́lɛ átɛɨzɛ i nénébi Elíya abwʉ to nɛ́. Ɛ́kárángá sɔ́ta, ánangwɛ tɛ́ngwɛkana, nɛ́kʉ́má abosu ka. Bhe némo mbámbó odía ómbi ndúbhu si néÍsraɛ́lɛ anɛ bíbírí. 26 Bhe Angéle kabwʉ nɔ́dha Elíya ú néigwa andrɔ kana bha átéígwá andrɔ́ ndúbhu hɛ́, bh'ɔdhábwʉ nɛ sɨ́ ú néigwa ándrɔ kana i kabwʉ ɨ nɛ Moyúda nɛ́, néi abwʉ ú átɛ́bhámoóyé i nɛ́Sɛrapáta andrɛ, áteSidɔ́na ándroobhuru nɛ́. 27 Bhe ɛ́magbulúi ootu kábwʉ ká bhu hɛ ú átéÍsraɛ́lɛ átɛɨzɛ i nénébi Elísa bha nɛ́, bh'Angéle kabwʉ nɛ́ɨ́ra ngwɛ́ to bhu kana ápye, bh'ɛɨ́rá sɨ́ Namána ápye, nómbí i néSiríya andrɛ. » 28 Bh'átadhɨnga i ómbi ndúbhu si kábwʉ égye átɔ́ʉ́sɛ́myágyó nɛ́ kɔ́gá ɨ ɛ́tʉ hɛ́ sɔ́ nɛ́, bh'ányeisu kágbá náago. 29 Bhe kɛ́ngá épirrr ! Bhe káhʉ́a nɛ, bhe kéídía nɛ kpakpara-kpákpárá ú átɛ́gbɔ́tɔ́ ándrabɛ́, bhe kɔ́a nɔ́rɔ átooholokpo i kɔ́bhʉ́a to nɛ́Náázarɛ́tɛ nɛ́ ándrendúndúli kana, bhó nyeídhe to nɛ. 30 Nɔ́dhyɔkana, a drʉ kóópua égye nɛ́, bh'ekíkía ndrɛ kɔ́tɔ ɔ́rɨandrɛ bh'ɔá.

Bhe Yésu ɛɨ́rá nómbí kana i abwʉ ánoudhuudhu biti ro nɛ́

(Mákɔ 1.21-28)

31 Ee bhe Yésu ɛngá bh'ɔɔ́dá bha ú átɛKaparanaúma, nɛ́gbɔ́tɔ́ kana i nɛ́Galiláya andrɛ. A drʉ oópúa ú átɔ́ʉ́sɛ́myágyó nɛ́, bh'erímá a n'aádha ómbi átɛ́sábátó tɨ́ánɛ́ nɛ́. 32 Bhe ómbi kábwʉ ká hɛ́ kámbanga mámbanga átáádhɔ́ i bhándrɛ nɛ́ nɛ́, sɨ́ abɔdhyɔ ánɛɨnyɛɨ́nyɨ́ tʉ́ ro. 33 Nómbí kana abwʉ égye, a nɛ́ ánoudhuudhu biti ro nɛ́. Bh'erímá a n'opa ánɛtʉ́ kpákpárá, 34 a n'ɔdhya bhó « Ka-ka-ka-ka ! Asɔdhyɔ gyó i aama mɨ́ro nɛ́ Yésu andruombí i nɛ́Náázarɛ́tɛ andrɛ ? Nyékúa bhó ku ndrɔpwʉ aama mɔ́pwʉ ? Má ú mɛ́ɨ́tɨ́a mɔmbɛ́ ndó ɨ́mɨ́ nyá adhi. Nyá nɛ́Sáátu i Angéle bha nɛ́. » 35 Bhe Yésu ɔʉngbá nóudhuudhu biti nɛ́ ko bhó « Keégye bhe nyédia nɔ́tɔ ! » Bhe nóudhuudhu biti nɛ́ apyá nómbí nɛ́ bha átapɛ átɔ́ɔ́rɨandrɛ i ómbi si kábwʉ drʉ nɛ́ anyɛ. Bh'edía nɔ́tɔ ka nɛ́ ka nɛ́sɨ́ nɛ ámébiti nɛ́. 36 Bhe ómbi ndúbhu si kábwʉ drʉ nɛ́ kámbángábwʉ mámbanga, bhe kérímá ká hɛ́ kááɨa nyɛ tányɛrɨ́ bhó « Asɛtʉ́ ɔmá gyó nɛ́ ? Outo nɛ́, sɨ́ ɨ́n'a ú aáa nɔ́ʉbwɔ ánɛɨnyɛɨ́nyɨ́ tʉ́ óúdhúúdhú biti kála bhó kédi bhe ká ú kédia nɛ́ ! » 37 Bhe Yésu ánɛrʉ kókúa átɛ́bhágɔ́ nɛ́ ndúbhu.

Bhe Yésu ɛɨ́rá ógói móotu

(Mat. 8.14-17; Mákɔ 1.29-34)

38 Bhe Yésu edía ú átɔ́ʉ́sɛ́myágyó, bh'ɔá ú náasí kana bha ánɛrʉ bhó Simɔ́na. Ɨ́drɨ́ nɛ́, Simɔ́na bheísanɛ́ abwʉ áneépí dede ro pima. Bhe ómbi si kábwʉ drʉ nɛ́ kóúgégélá nyɛ Yésu ko bhó nɛ́ɨ́ra ká ngwɛ nɛ́. 39 Bh'ɔʉ́sía ndrɛ bha ú a ɨ, bh'ɛɨ́lá ndrɛ bha ú a ɨ, bh'ɔkpá néépí dede nɛ́ bh'édi. Bhe néépí dede nɛ́ edía nɔ́tɔ, bh'ɔɔ́sá sɨ́ nɛ́ngɛ́nga, bh'erímá a n'ɛɛ́wa hɛ nɛ́. 40 Átaabhó, bhe ómbi ndúbhu si kábwʉ ánogói nɛ́, ká hɛ́ ánogó síze-sízé nɛ́, bhe kɛ́mbá hɛ bha ú Yésu a ɨ. Bhe ɨ́nɛ Yésu akpúa kɔ́tɔ ánɛtɛ́ kána-káná, bh'ɛɨ́rá hɛ. 41 Bh'óúdhúúdhú biti kédibwʉ átombi móotu, ká hɛ́ kópa mópo, ká hɛ́ kɔ́dhya bhó « Ɨ́mɨ́,nyá Angéle ándrɛNgwá ! » Nɔ́dhyɔkana, bhe Yésu ɔʉngbábwʉ kála bhe atʉ́a ányɔɨ bhó kɛ́ɨdʉ́ nɔ́dhyɔ. Outo nɛ́, sɨ́ kábwʉ ú kɛ́ɨ́tɨ́a ɛɨ́tɨ bhó ndra nɛ Masɨ́ya. 42 Átadhɨnga i nébhúlobhú ɛpɛ́lá ɨ nɛ́, bhe Yésu ɛngá ú átɛ́gbɔ́tɔ́, bh'ɔá ú átóúmá. Bh'ombirongwɛ erímá a n'ɔnda nɛ ɛ́fɛdhɛ-fɛdhɛ nɛ́ tó kángógwo nɛ. Átadhɨnga i kógwá ɨ nɛ nɛ́, bhe káátʉ́a ándrɔɨ bhó aángɔɔ́ bhelé. Kɔ́dhya nɔ́ɔ bhó « Nyábha ka bhó aama. » 43 Yésu ɔdhya kála bhó « Ɨ́n'aátá bhó móúti nɔgɔ pá nɛ́tʉ́ balí i nɛ́ɨnyɨngwa i Angéle bha nɛ́ andrɛ átɛgbɔtɔ akʉ́ɛ́, sɨ́ Angéle ɛdhá ma átámɔ́dhyɔ. » 44 Bh'erímá a n'agyá nɛ́tʉ́ i Angéle bha nɛ́ átɔ́ʉ́sɛ́myágyo si nápɛ́gɔ́ i ɛ́Moyúda anyɛ nɛ́.