Su Taw a Lusud kanu Kadenan enggu su Taw a dikena Lusud kanu Kadenan
4
Manga lusud ku sa tian a papedtayan, da kanu babaya maginugut kanu apia entain a edtalu sa lekanu sa lu sa lekanin su Suti a Ruh ugaid'a edsipati nu muna su pedtalun nin u ngintu, saben-sabenal a aden sa lekanin su Ruh nu Kadenan. Kagina saguna na madakel den i pembubuat a 'bpenabi-nabi sia sa dunia. 2 Nia ukit sa kataw tanu kanu taw a lu sa lekanin su Ruh nu Kadenan na amaika ibpangimbenal'in i su Isa al-Masih na mimbaluy a manusia na su entu ba a taw na lusud sekanin kanu Kadenan. 3 Ugaid'a apia entain menem i di nin ibpangimbenal i mimbaluy a manusia su Isa al-Masih na dikena lusud kanu Kadenan. Lu sekanin nalusud kanu pedsungkang kanu Masih. Nakineg'u den i pakauma su pedsungkanga a entu taman sa saguna a timpu na aden den 'bpamedsungkang kanu Isa al-Masih.4 Ugaid'a sekanu a manga dua na wata, na nalusud kanu den kanu Kadenan enggu tinabanan nu den su 'bpamedsungkang kagina su Kadenan a pedtapid sa lekanu na labi a mabagel kumin kanu Datu na Giadsal a sia sa dunia. 5 Silan na napaulipen kanu dunia tembu ba nia nilan ibpamamandu na pantag kanu manga kaduduniay taman sa 'bpamakikinegen mambu silan nu dunia. 6 Ugaid'a sekitanu na lusud tanu kanu Kadenan. Na apia entain i pegkilala kanu Kadenan na makikineg sa lekitanu. Ugaid'a apia entain menem i dikena lusud kanu Kadenan na di tanu nilan pakikinegen. Na kanu maya ba a ukit na katawan tanu u entain i taw a bantang i ibpamandu nin a ebpun kanu Ruh nu Kadenan enggu katawan tanu bun u entain i taw a dikena bantang i ibpamandu nin.
Su Kapegkalimu nu Kadenan enggu su Kapegkakalimua nu manga Taw a Lusud sa lekanin
7 Manga lusud ku sa tian a papedtayan, 'gkakalimua tanu kagina su limu na ebpun kanu Kadenan. Na apia entain i 'bpangalimuan na nabaluy den a wata nu Kadenan enggu 'gkakilala nin den su Kadenan. 8 Apia entain menem i di 'bpangalimuan na di nin 'gkakilala su Kadenan kagina su Kadenan na sekanin su limu. 9 Inipayag'in su limu nin sa lekitanu sia kanu kinasugu nin kanu Tunggal'in sia sa dunia ka enggu tanu kaadenan na uyag-uyag a da taman nin sia makanggulalan kanu Tunggal'in. 10 Nia man tidtu-tidtu a limu na dikena su kapegkalimu tanu kanu Kadenan ugaid'a su kapegkalimu nin sa lekitanu ka sinugu nin su Tunggal'in asal'a mabaluy a kurban a ukit a kaampun kanu kabaladusan tanu. 11 Manga lusud ku sa tian a papedtayan, na kagina ka maitu den i kinakalimu nu Kadenan sa lekitanu na dait a 'gkakalimua tanu bun. 12 Da man nakailay kanu Kadenan ugaid'a amaika 'gkakalimua tanu na katawan tanu i pedtapiden tanu nu Kadenan enggu 'gkatalutup tanu su limu tanu sa lekanin.
13 Na maya ba i ukit a katawan tanu i lusud tanu kanu Kadenan enggu pedtapiden tanu nin kagina pebpalalayunen nin sa lekitanu su Suti a Ruh. 14 Nailay nami enggu ibpangimbenal'ami i sinugu nu Ama su Tunggal'in asal'a makapalipuas'in su dunia. 15 Na apia entain i ibpangimbenal'in i su Isa al-Masih na su Tunggal'u Kadenan na lusud sekanin kanu Kadenan taman sa tapiden nin sekanin. 16 Na saben-sabenal a 'gkagedam tanu enggu pedsalig tanu kanu limu nu Kadenan sa lekitanu.
Su Kadenan na malimu, tembu apia entain i palalayunen nin su kapegkalimu nin na lusud sekanin kanu Kadenan taman sa tapiden nin sekanin. 17 Na kanu maitu ba a ukit, na natalutup su limu tanu kanu ped tanu tembu di tanu enggeda-geda sia kanu kagkukum kanu Gay nu Harikiamat kagina apia sia tanu pan sa dunia na mana makapagidsan tanu den kanu Isa al-Masih. 18 Dili man maaden i gilek kanu senep sa atay a talutup a kakalimu kagina su kagilek na aden lakit lambay nin sa kasiksan. Na apia entain i 'gkagilekan na dala sa lekanin su entu a talutup a limu.
19 Na 'gkakalimua tanu kagina su Kadenan i muna-muna a nalimu sa lekitanu. 20 Na pakandalebut su apia entain a edtalu sa “Ipegkalimu ku su Kadenan” ugaid'a 'gkabensian nin su suled'in. Ka apia su suled'in a 'gkailay nin demun, ka di nin makakalimu, na nia nin pan a entu makakalimu su Kadenan a di nin 'gkailay? 21 Nia ba man su kasuguan nu Kadenan sa lekitanu na apia entain i ikalimu nin su Kadenan na dait a ikalimu nin bun su suled'in.